Marikì 1

Mòdzìn Jààràfoobaa Yùxanà rè waajibia gooma reè

(Matsiyù 3.1-12; Lukì 3.1-18; Yùxanà 1.19-28)

1Yesù, Ŋaablà Jaara Moò, [Ŋaablà Dzin Kpir'la], tɔ̀ re Kùnàgoo Dziɔ̀ dziikuan nì siin. 2#Mak 3.1.Àyìwà à sɛbɛɔ̀n kɛɛra Esayì rè kìtaabuà doùn ci: «Mun Ŋaablà, mun nà n ne kɛɛradzian ka bè wo jɔun, è bè wo dɔ̀n shià lamɔnɔ̀n tsùù wo jɔun. 3#Ekk 40.3.Mòdzin sɔn sɛɛ̀y vu boò jènjàà kor'nà doùn ci: "Ye mùn Tsìfaà rè shia lamɔnɔ̀n tsùù ! Ye shi ì sɔ̀nbyɛ̀n tsùù à re, yè bà tereòn cɛyn !"»

4Àwà twɛy gooma reè dèu mòò riì tsɛ, tɔ̀ yeè bà mòdzìn Jààràfoobaa Yùxanà, tɔ̀ yeè e kungɔ bo jènjàà kor'nà doùn. È waajibia faa, ci mòdzian yè e re jaamabee fau'n kur'la lakere, y'à to è jaara yeè fòò Ŋaablà re shia goo rèè rà, è re gooɲaantsiɛ yè bà ni mɛɛy bo è vu ra. 5Tà doùn, Yude mar'la mòdzian sapɛ, ko Yerusalɛmùn wɔ̀ùndzin neè sapɛ na bèe Yùxanà rè. È na e tsiɛ e re gooɲaan fauma rèè rà y'à dè. Y'à to Yùxanà yè è jaara foò Ŋaablà re shia goo rèè rà Yuridɛn ba rɔn. 6#Mak2 1.8.Vya rìi na ni Yùxanà vu ra, tɔ̀ na faɔ̀ ɲɔ̀ɔ̀nmɛ̀n suɔ̀ rìì ka, à re ɲànshìàgee yè bà na tsùn. Kɛ̀ynjàko reè, ko jòon nɔ̀n gaà rìì na à re ɲwɛyn ɲɔnàma. 7À na waajibia faa, è dziàn ci: «Mòo nàa mun shɔ̀ùn, fàan ni nìi ɲàn, è geren mun tsɛ. Arì à re seereyn fɛɛ rèè, min bà ni n mɛɲɛn min twɛy foro bo à sàn nà, mun na wù tɔ̀ tsu ka waa. 8Mun kpɛ̀yn ye jaara foo Ŋaablà re shia goo rèè rà ko yu rìì ka. Ŋà, tɔ nà ye jaara foò ko Ŋaablà re Dzi Fɛnɛɛ rìì ka.»

Yesù jaara fòoŋ min niì

(Matsiyù 3.13-17; Lukì 3.21-22)

9Àyìwà, tɔ̀ waatsi rɔn, Yesù sa yeè bo Nazarɛtsì, Galile mar'la wɔ̀ɔ̀ sɔn, è nà, Yùxanà y'à jaara foò Ŋaablà re shia goo rèè rà Yuridɛn ba rɔn. 10Yesù bokɔɔn yu rɔ̀n tɔ̀un, tɔ̀ nɔ̀nkɔɔrɔn, à y'à jà jìrànxɔɔ̀ dzii saun, Ŋaablà re Dzia yè jàà na à tsɛ a ci màsàkere. 11#Gok 22.2; Zab 2.7; Ekk 42.1; Mat 3.17; 12.18; Mar 9.7; Luk 3.22.Tɔ fau min niì, vu sɔn yeè bo ŋaablaxɔɔ̀ doùn, tɔ̀ yeè dzin ci: «Min Dzin Kpir'liì kɛ̀niɔ̀n, à wo rìì, wo goò dzi mun na fɔ è bè geren.»

Sùtana Yesù dzuun bo siin min niì

(Matsiyù 4.1-11; Lukì 4.1-13)

12Tɔ̀ nɔ̀nkɔɔrɔn, Ŋaablà re Dzia yè Yesù jaa ji be jènjàà kor'nà doùn. 13È to mɔn, è bè tàrà fɔ bwèy dzyèè. Tɔ̀ sapɛ ɲan, Sùtana y'à dzuun bo siɛ̀n. À na ni jòònshu reè fi mɔn, mɛ̀rɛ̀kɛ rèè yè bà na à màgoo wubee.

Yesù yè e re faagoò dzii kuun min niì

(Matsiyù 4.12-17; Lukì 4.14-15)

14Àyìwà Yùxanà kun jiumaà shɔ̀ùn kàsoò doùn, Yesù yè dɔ̀n be Galile mar'lɔùn, è Ŋaablà re Kùnàgoo Dziɔ̀ waajibia faa. 15#Mat 3.2.À na dziàn ci: «Ŋaabla waatsi riì kpàdèu, tɔ̀ dzii tsyɛun, à re Màsàbee waatsi to tsyɛnbeò. Ye e tsiì e re gooɲaan nà, ye e re jaamabee fau'n kur'la lakere, ye ɲɛn Kùnàgoo Dziɔ̀ rà.»

Yesù yè e re kàràndzìn jɔna reè kiriu min niì

(Matsiyù 4.18-22; 5.1-11)

16Àwà sii sɔn see, Yesù jìì bekɔɔn Galile yu blàa dziire, è jikunbaa fii jà, twɛy ni yɔ̀ maa rà yu rɔ̀n. À na keresima fii rìì, soo tsoo Shimɔ̀n, soo tsoo yè bà Andère. 17Yesù yè dzin è ra ci: «Ye e gban mun kpɛyn. Mun nà ye bà mòdzìn gaabaa ì, a ci ye na ji rèè kuàn nìi tsuru.» 18Tɔ̀ nɔ̀nkɔɔrɔn twɛy yè e raa yɔ̀ rèè bàto mɔn, yè gban à kpɛyn. 19Yesù yè e kpɛrɛ̀ bèu jɔun dɛyn kɔn, è keresima fii jà, twɛy ni e raa konkor'na doùn, yè bà e re yɔ̀ rèè lamɔn'na. Soo tsoo Yàkubà, soo tsoo Yùxanà, è fàà tsoo yè bà Zhebedè. 20Tɔ̀ nɔ̀nkɔɔrɔn, è twɛy sa kiri. Tɔ̀un, twɛy yè e faà ko faagoofadzin neè bàto konkor'na doùn, yè e gban Yesù kpɛyn, yè dɔ̀n be.

Yesù kpiri kweykɔɔn sɔn ne kwey kaa bou à kpɛyn min niì

(Lukì 4.31-37)

21Àwà, tà shɔ̀ùn, Yesù ko e re kàràndzin neè yè dɔ̀n be Kapɛrinaxumùn wɔ̀ rɔ̀n. Ɲànwɔsiɛ̀ nàu wɔ, è bè dɔ̀n ŋaablabegbaà doùn, è mòdzian kàr'na. 22#Mat 7.28,29.À re kàr'nà na jiɔ̀ mòdzian dzii tsɛ fɔ è bè geren. À ko Sàrìyà Kaamoo reè raa mòdzìn kàràùn'n kur'la naà soo waa. Baraka na ni à raà ɲàn fɔ è bè geren. 23Tɔ̀ y'a tàrà, kpiri sɔn na ni ŋaablabegbaà doùn, tɔ kweykɔɔn. Tɔ̀ yeè nà sɛ̀ɛ̀y jaa soo fààn na. 24È dzin ci: «Nazarɛtsika kpiri Yesù, fee rìì ni mùn fi ? Wo naɔ̀ ɲe bar'li gbɛ ? Wo mòò riì kuru, mun y'à tɔ̀. Wo Ŋaablà re Mòdzìn fɛnɛ ka naumaà nì.» 25Yesù yè e cerè kweè tsɛ ci: «A dziɛ̀ tsyee e bo kpir'la kpɛyn !» 26Kweè yè kpir'la yuuyuu tɔ̀un fààn na, è gɛyn vu blà bo, è bo à kpɛyn. 27À goò yè ji è sapɛ dzii tsɛ, fɔ è bè wɔ yè e si teè ci: «Nèe fee ? Nèe kàràn ye, ŋɔn ni nìi ɲàn dɛ ! Arì kwey rèè, à nìi jia twɛy jɔun, twɛy sa tɔ̀ shi jiɛ.» 28Àwà, Yesù tsoò yè bo tɔ̀ nɔ̀nkɔɔrɔn Galile mar'la min niì sapɛ.

Yesù ɲìnìnkɔɔn giri cɛrɛmabeu min niì

(Matsiyù 8.14-17; Lukì 4.38-41)

29Àyìwà, Yesù bou tɔ̀un ŋaablabegbaà doùn, à ko kàràndzin neè yè dɔ̀n be Shimɔ̀n ko Andère re tsii, Yàkubà ko Yùxanà sa yeè bà ni è ka. 30Tɔ̀ y'a tàrà, màta brìsi na Shimɔ̀n blantaàn ɲɛɔ̀n. È bèu wɔ mɔn, tɔ̀ nɔ̀nkɔɔrɔn y'à gooma de Yesù rà. 31Yesù yè e kpɛrɛ̀ à ra tɔ̀un, à y'à kun e si ra, à y'à fù. Tɔ̀ yeè bà màtaà dòuma. Taàn yè fù è ɲwɛyn goo jaa bo è re.

32Àyìwà, ɲɛ̀rɛɛ̀rà nàu wɔ, bwèè tɔrɔunma shɔ̀ùn, ɲìnìnkɔɔn ge o ge ni, ko kweykɔɔn ge o ge ni, yè bè twɛy sapɛ ka Yesù rè. 33Wɔ̀ùndzian sapɛ na e ladzyèeŋnà tsiɛ̀ dɔ̀nmàdziɛ rà. 34Tà doùn, Yesù yè ɲìnìnkɔɔn giri cɛrɛmabe, a ci à ɲìnìn kun ge o ge. È kwey giri kaa bo kweykɔɔn reè kpɛyn. À naà à toò kwey rèè yè gooma waa, kàtsu twɛy na à tɔ̀ à mòò riì.

Yesù bèu min niì Galile mar'la ɲàn, è bè mòdzian toro kɔ̀ Ŋaablà re goomaa nà

(Lukì 4.42-44)

35Àwà tɔ̀ raa gbey rɔn, dzɔ̀n vì bɛɛ rà, Yesù yè swɛ̀y bo è bè jènjàà kor'nà gàne sɔn ɲan, è bè Ŋaablà mafyɛ̀n. 36Tɔ̀un Shimɔ̀n ko e dzyeèsi rèè yè bo, ci ye bèe à gaa. 37Yè b'a jà. Y'à jàu, yè dzin à ra ci: «Mòdzian sapɛ wo gaa.» 38È dzin è ra ci: «Y'a wa mìn bo mìin, mìn bè dziire wɔ rèè sa ɲan, min bè mòdzian toro kɔ̀ Ŋaablà re goomaa nà mɔn sa, kàtsu mun naɔ̀ tɔ̀ rii là.» 39#Mat 4.23; 9.35.Yesù yè bèe tɔ̀un Galile mar'la min niì sapɛ, è Ŋaablà re goomaa gbango beè è re ŋaablabegba rèè doùn, è kwey rèè kaa boò kweykɔɔn reè kpɛyn.

Yesù byèèmà kpiri sɔn cɛrɛmabeu min niì

(Matsiyù 8.1-4; Lukì 5.12-16)

40Àyìwà byèèmà kpiri sɔn yeè bè Yesù kpɛyn tɔ̀un, è bè e kunun gban à bììn, è dzin à ra ci: «Wo y'a tsiì, wo dzia mun cɛrɛmabe, min bà mòdzìn fɛnɛ.» 41À màtsuru yeè Yesù kun fɔ è bè geren. Tɔ̀un è sià foro, è dzyɛn à ra, è dzin à ra ci: «Min tsiiŋ w'e cɛrɛmabe, w'e bà mòdzìn fɛnɛ.» 42Tɔ̀ nɔ̀nkɔɔrɔn, kpir'la rè byèèmà ɲin'nà yè dò, è cɛrɛmabe. 43Tà shɔ̀ùn, Yesù yè e sɔbɛn dè à ra, è dzin à ra ci à y'à waa. À y'à dè màxɔbe à ra ci: 44#Sak 14.1-32.«Maà gèsɔn dè mòò pɛn na. B'à yɛrɛ kpadè saakagoojaabobaà rìì là. Musà rè sàrìyaa ci nìi yè fa è kpàdè ci wo cɛrɛmabeu, e tɔ̀ shi jiì a fɛnɛbeumaà kamà. Tɔ nà bà wo cɛrɛmabeumaà shɛɛrɛbe è re.» 45Àwà, kpir'la boumaà shɔ̀ùn, nìi fau à re, è maa è tɔ̀ gbango beè min niì sapɛ. À goò yè bè wɔ fɔ Yesù na dzia dɔ̀n wɔ̀ pɛn doùn mòò jaa ra dɛ. À na too jènjàà kor'nà nì doùn sa, mòdzian yè boò min niì sapɛ, yè bèe à kpɛyn mɔn.

Currently Selected:

Marikì 1: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode