Marikì 2

Yesù mùrùkù kpiri sɔn cɛrɛmabeu min niì

(Matsiyù 9.1-8; Lukì 5.17-26)

1Àyìwà bwèy dànman tà shɔ̀ùn, Yesù yè e kpɛyn sèè Kapɛrinaxumùn wɔ̀ rɔ̀n. Mòdzian yè nà à myɛ̀n, ci à ni gbàà doùn. 2Tɔ̀un jàmaà yè bè e ladzyèè mɔn giri, fɔ è bè wɔ tsììma tsu na ni dɛ waa, arì dziɛ̀ rà da rɔ̀n. Àwà, Yesù yè è toro kɔ̀ɔ Ŋaablà re goomaa nà. 3À ni tɔ̀ ra, mòkun naàlen yè kpiri murùkuuma sɔn sen na à re. 4Jàmaà kamà, è fa ni dzi wɔ à ka Yesù tsɛ nìi fa waa, à ni gbà nìi doùn, yè tèyn tɔ̀ jìran nɔ̀n. Tɔ̀un yè kɔ̀ɔ̀ bo mɔn. Tɔ̀ faumaà shɔ̀ùn, kpir'la ɲɛɔ̀n ɲaange niì tsɛ, y'à jàà mɔn ko tɔ̀ ka. 5Àwà Yesù y'à jàu ci twɛy mòdzin neè ɲɛun wò ra min niì, è dzin mùrùkù kpir'là rà ci: «N dzin kpiri wo re gooɲaantsiɛ mɛɛy bou wo vu ra.» 6Tɔ̀ y'a tàrà, Sàrìyà Kaamoo reè swey na tsùuŋnà mɔn, twɛy yè bà dziàn e duùn ci: 7«Feera nèe yè bà goomaa nèe tsuru ? À Ŋaablà tsoo bar'la. Ŋaablà soo boshɔ̀ùn, tsì rii soo dzia gooɲaantsiɛ mɛɛy bo mòò vu ra ?» 8È nìi kɛ̀sɛɛ̀ e duùn, tɔ̀ nɔ̀nkɔɔrɔn, Yesù yè tɔ̀ tɔ̀ e yɛrɛma. Tɔ̀un, è dzin è ra ci: «Fee y'à to ye bà e kɛsɛɛ̀ nèe tsuru e duùn ? 9Min ye tey ɔ, e dzin mùrùkua rà ci: "wo re gooɲaantsiɛ mɛɛy bou wo vu ra", tà ko "a re ɲaangee sen e jìì", kɛ̀n ni de dzi twɛy fiɛ̀ ɲàn ? 10Àwà, ye nà à tɔ̀ she, ci à dzi ni Adamà dziàn nà, è gooɲaantsiɛ mɛɛy bo mòò vu ra dzɔ̀nxɔɔ̀ tsɛ.» Tɔ̀un, Yesù yè dzin mùrùkù kpir'là rà ci: 11«Mun ci e fù, a re ɲaangee sen, e b'à re tsii !» 12Tɔ̀ nɔ̀nkɔɔrɔn, kpir'la yè fù tsìì e san tsɛ, è re ɲaangee sen, è bo mòdzian sapɛ jaa ra. À goò yè ji mòdzian sapɛ dzii tsɛ, fɔ è bè wɔ yè tsoo dzi ɲɛɛn Ŋaablà tsɛ, yè dziàn ci: «Mùn na nèe tsuru jà jà ŋe fyeu.»

Yesù Lɛvì kiriu min niì à y'à bà e re kàràndzin

(Matsiyù 9.9-13; Lukì 5.27-32)

13Àyìwà twɛy goo rèè shɔ̀ùn, Yesù yè sèè bo kɔn, è bè Galile yu blàa dzii ra. Jàmaà yè bèe à kpɛyn mɔn giri, à yè è kàr'na. 14À dɔ̀n bokɔɔn tɔ̀un, è xɔnsɔɔntsibaa sɔn tsuuŋma jà xɔnsɔɔntsigbaà doùn, tɔ̀ tsoo Lɛvì, à fàà tsoo yè bà Àlifù. È dzin tɔ̀ ra ci: «A gban n kpɛyn.» Tɔ̀ sa yeè fù, è gban à kpɛyn. 15Tà shɔ̀ùn, Yesù yè nà bè ɲwɛyn ɲɔn Lɛvì rè tsii. Tɔ̀ ɲwɛyn ɲɔnma nɔ̀n, xɔnsɔɔntsibaa giri, ko mòdzin faadzii ɲaan neè giri na ni à ko e re kàràndzin neè ka. Àwà twɛy mòdzin neè giri na e gbaɔn à kpɛyn. 16Faridziɲɛn rèè raa Sàrìyà Kaamoo reè y'à jàu min niì ci à ko mòdzin faadzii ɲaan neè, ko xɔnsɔɔn tsi reè ɲwɛɛ̀n ɲɔɔ̀n esire, y'à re kàràndzin neè tey ci: «Feera è bà ɲwɛɛ̀n ɲɔɔ̀n xɔnsɔɔn tsi reè ko mòdzin faadzii ɲaan neè ka ?» 17Yesù tɔ̀ myɛ̀un, è dzin è ra ci: «Cɛrɛma reè màgoo na ni janfabaà rà waa, ɲìnìnkɔɔn reè rìì màgoo ni à ra. Nìì reè y'à jàa ye tereòn, mun nà kuàn na twɛy waa. Ŋà gooɲaantsiɛ ni nìì reè vu ra, mun naɔ̀ twɛy rìì kiri, yè tsi.»

È Yesù teroun min niì sun goo mà

(Matsiyù 9.14-17; Lukì 5.33-39)

18Àyìwà Yùxanà rè kàràndzin neè ko Faridziɲɛn rèè rè kàràndzin neè na suàn wɔɔ̀. Sii sɔn see, è to suàn nà, swey yè Yesù tey ci: «Feera Yùxanà rè kàràndzin neè, ko Faridziɲɛn rèè rè kàràndzin neè suàn wɔɔ̀, wo raa rèè to na wɔɔ̀ waa ?» 19Yesù ci è ra ci: «Kɔnɲɔn kpir'là ko e dzyeèsi rèè ni dzi ba ni esire, ci à dzyèèsi rèè yè sun wɔ ɔ ? Kɔnɲɔn kpir'là nà waatsi niì sapɛ fa è ka, è fa dzi sun wɔ dɛ. 20Ŋà jisee nàa, nìi doùn kɔnɲɔn kpir'là nà sen bo è ɲan. Tɔ̀ sii sèè, è nà sun wɔ.» 21Yesù yè dzin kɔn ci: «Mòò pɛn na vya ye ka vya bɔrɔɔ tsyɛɛ̀rɛɛ waa. Tɔ̀ ye fa, vya yee vya bɔrɔɔ sɔ̀ɔ̀n vyɛ̀ɛ kpɛrɛ, à vyɛ̀maà si yè tsi. 22Mòò pɛn to na dɔ̀ɔ̀ yɛy jia yu vɔrɔ bɔrɔɔ ì doùn waa. Tɔ̀ ye fa, dɔ̀ɔ̀ yɛɛ̀ nà nà yu vɔrɔ bɔr'leè jee, è kon, vɔ̀r'leè sa yeè bara. Tà doùn, dɔ̀ɔ̀ yɛɛ̀ wù, è ji vɔ̀rɔ̀ ye ì rìì doùn.»

Yesù ci wò rii ɲànwɔsiɛ̀ tsìfa

(Matsiyù 12.1-8; Lukì 6.1-5)

23 # Sdk 23.26. Àyìwà, ɲànwɔsii sɔn ma, Yesù ko e re kàràndzin neè na dɔ̀n boò shìmàn dzu swey ɲàn. Tɔ̀un, kàràndzin neè yè e maa yè shìmàntan neè swey fùùrua. 24Faridziɲɛn rèè yè dzin à ra ci: «Nìì na dàaŋnà è fa ɲànwɔsiɛ̀ mà, feera wo re kàràndzin neè tɔ̀ faa ?» 25À ci è ra ci: «Dzuà màsà kpiri Dawudà ko e dzyeèsi rèè kuun sii rìi sèè o, ɲwɛyn to naà ni è re waa, Dawudà nìi fau ye na tɔ̀ kàràn jà ŋe dɛ ? 26#Sak 24.9.#Sak1 21.2-7.Saaka Jɔundzin niì tsoo na Abiyatarì, tɔ̀ raa waatsi rɔn, à na dɔn Ŋaablà re gbà blàa doùn, buru niì reè sìan Ŋaablà ra kwɛ̀yge, è twɛy sen ɲɔn, è dzyeèsi rèè sa kɔ ɔ̀ ? Tɔ̀ to y'à tàrà, saaka goojaabo reè boshɔ̀ùn, à na dàaŋnà mòò pɛn yè twɛy bur'leè ɲɔn waa.» 27Tà shɔ̀ùn, è dzin è ra ci: «Ɲànwɔsiɛ̀ ni mòdzian nàfaà rìì kamà, mòdzian na ɲɛɔ̀n ɲànwɔsiɛ̀ rè jòn dɛ ! 28Tɔ̀ kamà, Adamà dziàn sa ɲànwɔsiɛ̀ Tsìfa.»

Currently Selected:

Marikì 2: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode