Marikì 10

Yesù nìi dèu furu saan tsɛ

(Matsiyù 19.1-12; Lukì 16.18)

1Àyìwà Yesù yè bo mɔn tà shɔ̀ùn, è dɔ̀n bè Yude mar'la ɲàn, Yuridɛn baa kɛ̀yn nɔn. Jàma brìsi yè bè e ladzyèè à tɛyn mɔn kɔn yeu. Tɔ̀un à yè è kàr'na, a ci à dɛ̀rɔɔ̀n à y'à faa nìi tsuru bɔrɔɔ. 2Faridziɲɛn rèè swey yè nà e kpɛrɛ̀, y'à tey, è ba dàaŋnà kpir'la yè e re tààn furu san. È na à dzuun bomà nì gaa tɔ̀ goomaa ka. 3Yesù ci e ye è latsi, è tey ci: «Kɛɛra Musà fee rìì dèu ye ra, ci y'a fa ?» 4#Sdk 24.1-4; Mat 5.31.È ci: «Musà y'à shi siun, ci e ba taàn bàjia, e furu san sɛbɛ̀n fa, a bàji tɔ̀ ka.» 5Ŋà Yesù yè dzin è ra ci: «A y'a jà Musà yè tɔ̀ dzugooma xɔɔ̀ sɛbɛn tsuù, à tɔ̀ fau ye re tantaamaxɔbeè rìì kamà. 6#Gok 1.27; 5.2.Tà boshɔ̀ùn, fɔ dziɲaan jɔ̀n bwey, Ŋaablà yeè ɲɛun kpiri ko tàan. 7#Gok 2.24.Tɔ̀ kamà, è dè ci: "Kpir'la nà e naà ko e faà bàto, [è shi e re tààn nà.] 8Tɔ̀ tsuru è fiɛ̀ nà bà gɔn kungɔ soo." È na fii dɛ waa, ŋà è bàu soo. 9Tà doùn, Ŋaabla nìi bàu soo, mòo mà tɔ̀ bo e si ra waa.» 10Àwà, Yesù ko e re kàràndzin neè nàu e kpɛyn sèè tsii rɔ̀n waatsi riì bwèy, kàràndzin neè y'à tey tɔ̀ goò mà kɔn. 11#Mat 5.32; Kor1 7.10,11.È dzin è ra ci: «Mòò riì yè e re tààn bàjia è kpɛrɛ furu, jɔ̀naà kamà, tɔ ɲànmɔ̀ɔ̀be rii faa. 12Taàn to ye bo kpir'la rè è bè furu kpɛr'le, à sa ɲànmɔ̀ɔ̀be rii faa.»

Yesù dzwɛ jiu dziin nèè rà min niì

(Matsiyù 19.13-15; Lukì 18.15-17)

13Àyìwà, tà shɔ̀ùn, swey yè nà dziin nèè swey ka Yesù rè, è bà ni e si dzyɛn è ra, è dzwɛ ji è ra. Kàràndzin neè yè fù fù twɛy mòdzin neè kpɛyn. 14Yesù tɔ̀ goò jàu min niì, è dɔ̀n à kpɛyn. È dzin kàràndzin neè rà ci: «Y'a to dziin nèè yè nà n na, e maà è jɔun shu nàà tsɛ waa. Nìì reè ni è tsuru, Ŋaablà re Màsàbee twɛy rìì laa. 15#Mat 18.3.Sààben na, mun nì ci e ra, mòò o moò ma e tsiì Ŋaablà re màsàbee rà a ci dziinkòòmɛ̀yn, tɔ̀ tsìfa fa dɔ̀n à doùn byɛ.» 16Yesù yè dziin nèè sen kuàn e suun tɔ̀un, è sià tsùɔ è tsɛ, è dzwɛ jia è ra.

Yesù ci gètsià dɔn ɲan Ŋaablà re màsàbee doùn

(Matsiyù 19.16-30; Lukì 18.18-30)

17Àyìwà, twɛy goo rèè sapɛ shɔùn, Yesù ko e re kàràndzin neè yè shia kun kɔn. À yè è to shia tsɛ, kpiri sɔn yeè vwɛ̀yn na, è nà e kunun gban Yesù bììn, à y'à tey ci: «Kàrànfa wùù, mun wù min fee rìì fa, min dzi jaamabe dziù dòbɛɛ tàrà shɛn ?» 18Yesù ci à ra ci: «Feera wo yè bà mun kir'là kàrànfa wùù ? Ŋaablà soo boshɔ̀ùn, mòò pɛn na wù waa. 19#Jdk 20.13; Sdk 5.17; Jdk 20.14; Sdk 5.18; Jdk 20.15; Sdk 5.19; Jdk 20.16; Sdk 5.20; Jdk 20.12; Sdk 5.16.Wo Ŋaablà dzugooma xɔù rèè tɔ̀: "Maà mòò vu, maà ɲànmɔ̀ɔ̀be fa, maà shɔnbe fa, maà doò wɔ mòò rà, maà mɛɛy mòò pɛn tsɛ, a naà ko a faà blàbe."» 20È dzin Yesù rà ci: «Kàrànfaà, fɔ mun dziinkoomɛynkɔɔn nà, mun nèe sapɛ shi jiɛ.» 21Yesù y'à siin to kɛ̀nbààbe ka tɔ̀un, è dzin à ra ci: «Goo soo wo fɔɔn ŋe. B'à suun ge reè sapɛ gɔɔ, a ɲɛɛn sìn gbakɔɔn reè rà. Tɔ̀ tsuru, nàforo bla nà bà ni wo re jìrànxɔɔ̀ doùn. Tà shɔ̀ùn, e nà a gban mun kpɛyn.» 22Kpir'la tɔ̀ goomaa myɛ̀un min niì, tɔ̀ y'a jaakɔrɔun kùùn. À taama ŋununbeuma yè geren, kàtsu à na gètsi blà.

23Àwà Yesù yè siin fa e lagur'la ɲàn tɔ̀un, è dzin e re kàràndzin neè rà ci: «Gè ni nìì reè suun, twɛy dɔn ɲan Ŋaablà re màsàbee doùn dɛ !» 24Yesù twɛy gooma niì reè dèu, tɔ̀ yeè kàràndzin neè shi. Yesù yè sèè kɔn, è dzin è ra ci: «N dzin ì, Ŋaablà re Màsàbee doùn dɔ̀ɔ̀n ɲan dɛ ! 25Ɲɔ̀ɔ̀nmɛɛ̀n yè dɔ̀n mɔnsɛyn kɔɔ rè, tɔ̀ fa dzi gètsià dɔ̀ɔ̀n mà Ŋaablà re Màsàbee doùn.» 26Tɔ̀ goò yè ji kàràndzin neè dzii tsɛ fɔ è bè geren. Yè dziàn e si ra ci: «Tsì rii soo to dzia tsi sa ?» 27Yesù yè è siin to, è dzin ci: «Mòdzian rè à fa dzi fa waa, ŋà Ŋaablà re, à dzia fa, kàtsu, goo sɔn pɛn na Ŋaablà jaan waa.» 28Tɔ̀un, Piyɛrì yè dzin à ra ci: «Ɲe do ? Ɲe kaariu gèè sapɛ shɔùn, ɲe yè e gban wo kpɛyn.» 29Yesù yè dzin ci: «Sààben na, mun nì ci e ra, mòò riì nà kaari e re gbàà shɔ̀ùn, tàmafa e tseyn nèè, tàmafa e tsinà rèè, tàmafa e naà, tàmafa e faà, tàmafa e dzin nèè, tàmafa e re dzù rèè, mun ko Kùnàgoo Dziɔ̀ kamà, 30tɔ̀ tsìfa nà twɛy gè rèè tsuru càànmoò mòò tàrà mìin dziɲan ree doùn. À nà gba ì tàrà, è tseyn ko tsina ì tàrà, è na ì tàrà, è dzin ì tàrà, è dzu ì tàrà, è byɛnbe ì sa tarà. Waatsi nakɔɔn doùn, è jaamabe dziù dòbɛɛ tàrà. 31#Mat 20.16; Luk 13.30.Àwà jɔundzin giri nà bà bònèdzin, bònèdzin giri yè bà jɔundzin.»

Yesù yè e saàn ko e seè kpunaàn gooma deu min niì kɔn

(Matsiyù 20.17-19; Lukì 18.31-34)

32Àyìwà, è Yesù ko e re kàràndzin neè to shia tsɛ, yè bà tèyn beè Yerusalɛmùn, Yesù na e jiɔ̀ è jɔun. Kàràndzin neè duungoo na dòonà, è kpɛyn jììbaa rèè sa yeè bà shiɔ̀. Yesù yè kàràndzin teeŋ fiɛ̀ kiri bo e si kɔn yeu, goo nìì reè nà à tàrà, è bè e maa, è twɛy jaa dèe è ra. 33À ci è ra ci: «Mùn tèyn bekɔɔn yɛ Yerusalɛmùn nèe. Mìn na bè wɔ mɔn, mòo nà Adamà dziàn wɔ Saaka Jɔundzin neè ko Sàrìyà Kaamoo reè suun, yè kitsia mɛɛy à tsɛ, ci è vu. È to nà à wɔ kun kpɛrɛ mòdzin neè suun. 34È nà à ɲanŋmɛn, yè dzweeyuà fyɛ à tsɛ, y'à dɔrɔ sɛɛn ka, y'à vu. Bwèy zhììgi à saunmaà shɔ̀ùn, à nà sèè kpunan bo saàn ɲàn.»

Zhebedè dzin kpiri fiɛ̀ nìi gaaŋ Yesù rè

(Matsiyù 20.20-28; Lukì 22.25-27)

35Tà shɔ̀ùn, Yàkubà ko Yùxanà, Zhebedè dzin kpiri fiɛ̀, twɛy yè nà e kpɛrɛ̀ Yesù rà, yè dzin à ra ci: «Kàrànfaà ɲe nà nìi gaa wo re, ɲe sào ni w'e tɔ̀ fa ɲe re.» 36Tɔ̀ yeè è tey ci: «Ye sào ni min fee rìì fa ye re ?» 37È ci: «Kàrànfaà, e na bà ni a nɔɔrɔɔ̀ doùn waatsi riì bwèy màsàbee tsɛ, à to ɲe mòò sɔn yè e tsuù a sirama si jaa rè, soo yè e tsuù a ɲɔnmà sì jaa rè.» 38#Luk 12.50.Yesù yè dzin è ra ci: «Ye nìi gaa, ye na tɔ̀ tɔ̀ dɛ ! Byɛnbe niì nà mun tàrà, tɔ̀ ni dzi ku ye ɲan ɔn ? Mun jaara to nà fòò fòòŋ'n kur'liì rà, ye raà ni dzi foò tɔ̀ tsuru ɔ ?» 39È ci à ra ci: «Ɲe nà dzi.» Ŋà, Yesù yè dzin è ra ci: «Byɛnbe niì nà mun tàrà, ye kpɛ̀yn nà dzi tɔ̀ ku e ɲan, ye jaara yeè dzi foò mun naà fòòŋ'n kur'la rà. 40Ŋà mòò yè bà ni e tsuù mun sirama si jaa, tàmafa mun ɲɔ̀nmà sì jaa rè, tɔ̀ sìàn na ni mun suun waa. À mabyɛ̀n tsùuŋnà nìì reè rè, twɛy rìì nà e tsuù mɔn.»

41Kàràndzin neè dzyee tsyeòn tɔ̀ goomaa myɛ̀un min niì, tɔ̀ yeè è vunun ta Yàkubà ko Yùxanà kpɛyn. 42#Luk 22.25,26.Yesù yè è dzyèèmaa kiri kpɛ̀rɛ̀ e ra tɔ̀un, è dzin è ra ci: «Y'a tɔ̀, ci nìì reè tsùuŋnà jàmàan rèè kùùn, twɛy yè è màraɔ̀ kùntsììbe ka, jàmaàn mòdzin bla reè yè bà e faan ɲinaɔn jàmààndzin neè tsɛ. 43#Mat 23.11; Mar 9.35; Luk 22.26.Ŋà ye fi, à na wù è bà tɔ̀ tsuru waa. Ye ɲan, mòò riì sào ni wò yeè bà blà dzyee rèè mà, fɔ tɔ̀ yeè e ba è re faagoofadzin. 44Mòò riì sàò to ni wò yeè bà dzyee rèè jɔundzin ye ɲan, fɔ tɔ̀ yeè e ba è sapɛ re jòn. 45Àwà, Adamà dziàn na naɔ̀ ci mòò yè faagoo fa à re dɛ, ŋà à naɔ̀ nì, ci è faagoo fa mòdzian rè. È xɔɔn sìn, à y'à ka mòò giri kùngɔ màbo.»

Yesù jaana kpiri Baritsimè cɛrɛmabeu min niì

(Matsiyù 20.29-34; Lukì 18.35-43)

46Àyìwà, Yesù ko e re kàràndzin neè yè bè dzi Yerikò wɔ̀ rɔ̀n tɔ̀un. È bokɔɔn wɔ̀ɔ̀ doùn, jàma brìsi na gbaɔn è kpɛyn. Tɔ̀ y'a tàrà jaana kpiri sɔn sa na tsùuŋnà mɔn shi dziɛ rè, tɔ̀ yeè bà fyɛ̀yn faa. Tɔ̀ tsoo Baritsimè, à fàà tsoo yè bà Tsimè. 47Àwà, tɔ̀ jaana kpir'là toro jiu à ɲan min niì ci à Nazarɛtsika kpiri Yesù rìì dɔ̀nkɔɔn, è maa, è dziàn fààn na ci: «Màsà kpiri Dawudà tsua dzin Yesù, a yɛrɛ to e màtsuru n na.» 48Ŋà mòò giri yè fù à kpɛyn, sànko è bà ni e mɛnshɛ̀n. À sa yeè sɔn ba e vuà tɛ̀y arì she ci: «Màsà kpiri Dawudà tsua dzin Yesù, a yɛrɛ to e màtsuru n na.» 49Yesù yè e tsiì tɔ̀un è dzin ci: «Y'a kiri na.» Y'à kiri, yè dzin à ra ci: «A akiri tsùù, e fù, à wo kir'là.» 50Jaana kpir'là yè e re mɛ̀yɛ blaa bo maa tɔ̀un, è tsyɛn fù, è bè Yesù rà. 51Yesù y'à tey ci: «Wo sào ni min fee rìì fa wo re ?» À ci: «Kàrànfaà, min jɛ̀y fa !» 52Yesù yè dzin à ra ci: «Bè, wo ɲɛunmaà mun na, tɔ wo cɛrɛmabeu.» Kpir'la yè jɛ̀y fa tɔ̀ nɔ̀nkɔɔrɔn, è shia kun Yesù ka.

Currently Selected:

Marikì 10: BDZU

Highlight

Copy