Marikì 5

Yesù kpiri kweykɔɔn sɔn cɛrɛmabeu min niì Gerasa mar'la ɲan

(Matsiyù 8.28-34; Lukì 8.26-39)

1Àyìwà, twɛy goo rèè shɔ̀ùn, Yesù ko e re kàràndzin neè yè yu blàa fuu, yè b'a kɛ̀yn, Gerasaka reè rè jàmaàn ɲàn. 2È wɔu mɔn, Yesù yè bo konkor'na doùn. À bou min niì, kpiri kweykɔɔn sɔn yeè bo kabur'lèè rà, à y'à kùùntsi. 3Kabur'lèè na baɔ̀ tɔ̀ tsùùma, kàtsu à naà kuà mòò ɲàn è dzi jɔ̀rɔ̀kɔ tsu wɔ à ra dɛ. 4Waatsi giri è na jòòroon wɔɔ̀ à ra, yè jɔ̀rɔ̀kɔ ì ka à shì, ŋà, à na twɛy sapɛ shɛn shɛɛ̀n. È bà ni maɲinan, tɔ̀ fààn naà ni mòò pɛn ɲan waa. 5Fen ko bwèy sa, kudɛyn à na e ɲantsyeere beè kabur'là rà, ko jèn nèè tsɛ, è sɛ̀ɛ, è yɛrɛ vyɛ vyɛ̀ɛ ko kpàà reè ka. 6À tou è Yesù jà jeenà, è vwɛ̀yn na, è nà e maa ji à sàn dzuun. 7È sɛ̀ɛ̀y fààn na ci: «Yesù, Jìran nɔ̀n Ŋaablàa Dzin Kpir'la, fee rìì ni mùn fi ? A yɛrɛ sa rii to, a fa Ŋaablà kamà, a maà gooɲaan fa n na waa.» 8À tɔ̀ goomaa dèu, kàtsu, Yesù na dziàn ci kweè yè bo à kpɛyn. 9Tɔ̀un, Yesù y'à tey ci: «Wo tsoo fèe ?» À ci: «Mun tsoò rìì jàma blà, kàtsu ɲe giri.» 10È Yesù màfyɛ̀ɛn cɛyn, ci à mà nà to è kaa bo bè tɔ̀ gàneè màr'là kɛ̀yn waa.

11Àyìwà, tɔ̀ y'a tàrà, bɛ̀y kuru brìsi sɔn na ni ɲwɛɛ̀n nà jèèn tààkuùn mɔn kèrè. 12Kwey rèè yè Yesù màfyɛ̀n tɔ̀un. È ci à ra ci: «Mùn bàji be, mìn bè dɔ̀n bɛy rèè ɲàn.» 13Yesù yè tɔ̀ shi sin è ra. Tɔ̀un, kwey rèè yè bo kpir'la kpɛyn, yè bè dɔ̀n bɛy rèè ɲàn. Tɔ fau min niì, bɛy rèè yè soso jaà bo jèèn tsɛ mɔn, yè nà e kpinìn yu rɔ̀n, è sapɛ yeè san. È na bɛy gbaa fii tsuru boò. 14Bɛ̀y kplàtsuu reè yè vwɛ̀yn, ye b'a goò lakɛɛ̀y wɔ̀ɔ̀ doùn, ko ten dzii reè rà. Mòdzian yè bo tɔ̀un, nìi faɔ̀ yè bè tɔ̀ lafyɛ. 15Àwà, è bèu wɔ Yesù tsɛ, kwey giri na ni kpir'liì kpɛyn, yè tɔ̀ tsùuŋma jà, vya ì ni à mà, à jaamà yè bà tsìiŋnà. Yè shi. 16Goo nìi fau tɔ̀ kpiri kweykɔɔn ko bɛy rèè rà, nìì reè tɔ̀ jàu, twɛy y'à lakɛɛ mòdzian nà. 17È tɔ̀ myɛ̀un min niì, yè maa yè Yesù màfyɛ̀ɛn ci è bè, è bo ye re màr'lɔ̀ùn. 18Àwà Yesù dɔ̀nkɔɔn konkor'na doùn tɔ̀un, à kweykɔɔn niì cɛrɛmabeu, tɔ̀ y'a màfyɛ̀ɛn ci à y'à to w'e b'a ka. 19Yesù na e tsiì tɔ̀ ra à re waa, ŋà è dzin à ra ci: «B'à re tsii, a re mòdzìnbee doùn, Tsìfaà màtsuruu wo ra, è goo o goo fa wo re, e tɔ̀ sapɛ lakɛ̀ɛ̀y è ra.» 20Tɔ̀un, kpir'la yè dɔ̀n be. Yesù goo o goo fau à re, è bè e maa è tɔ̀ lakɛɛ̀y beè wɔ̀ tsyeùn nèè màr'là doùn, tɔ̀ niì kir'là Dekapɔlì. Gè o ge y'a myɛ̀n, è ji è sapɛ dzii tsɛ.

Yesù tàan tsììnàbànkɔɔn sɔn cɛrɛmabeu min niì, è tàànmɛ̀yn sɔn fun kpunan

(Matsiyù 9.18-26; Lukì 8.40-56)

21Àwà, Yesù yè yu blàa sèè fuu konkor'na ka kɔn, è nà à kɛ̀yn nɔn. À wɔumaà mɔn, jàma brìsi yè nà e ladzyèè à tɛyn, è bà ni yu bla dziɛ rè. 22Tà doùn, tɔ̀ gàneè ŋaablabegbaà kùntsiɛ̀ soo yeè nà, tɔ̀ tsoo Yayirusì. À Yesù jàu min niì, è kunun gban à bììn. 23À y'à màfyɛ̀n cɛyn. À ci: «Mun dzin taan gaa san, a yɛrɛ to e nà a si rèè tsùù à tsɛ, è bà ni cɛrɛmabe, è jaamabe fa kɔn.» 24Àwà, Yesù yè dɔ̀n be à ka. Tɔ̀ y'a tàrà, jàma brìsi na gbaɔn à kpɛyn, twɛy y'à ŋòò tsùù min niì sapɛ. 25Tɔ̀ y'a tàrà tàan sɔn na ni jàmaà ɲàn, tsììnàban ni tɔ̀ ra, tɔ̀ y'a jii teeŋ fii. 26À na byɛɔ̀n jangoofabaa gir'le fɔ è bè geren. È bè wɔ à suun gee sapɛ yeè bè dò, à pɛn na dzi goo wùbe, fɔ à ɲanbe beè nìi tsuru, à ɲanbe beè tɔ̀ rii tsuru. 27À na Yesù gooma myɛɔ̀n nìi fa, tɔ̀ rii ɲàn, è bè jàmaà ɲàn Yesù bònè, è bè e dzyɛn à re vyaà rà. 28À na dziàn e duùn ci: «Min dzyɛunma tàrà à re vya rèè bàsɔùn nà, mun nà cɛrɛmabe.» 29À to yè e dzyɛun vya rèè rà min niì, tɔ̀ nɔ̀nkɔɔrɔn, tsììnàbaan yè dò, à y'à tɔ̀ e gɔn nɔ̀n, ci wo cɛrɛmabeu. 30Àwà Yesù sa y'a tɔ̀ e yɛr'la tɔ̀ nɔ̀nkɔɔrɔn, ci fàan sɔn bou wò ɲan. Tɔ̀un è jaa kere jàmaà ɲàn, è tey fa ci: «Tsì rii yè e dzyɛun mun ne vya rèè rà ?» 31À re kàràndzin neè yè dzin à ra ci: «Wo tey faa ci tsì rii yè e dzyɛun wo ra, wo na à jàa jàmaà wo ŋòoŋnà nìi tsuru ɔ ?» 32Yesù to yè e lagur'la siin bè, gè riì n'a to mòò riì y'à goò fau, wò yeè tɔ̀ jà. 33Àwà, nìi fau taàn nà à tɔ̀ tɔ̀ nìi fa, à shiumaà tɔ̀un, à mà sɔ̀ɔ̀nkɔɔn yeè nà e kunun gban Yesù bììn, è sààbeen sapɛ de à ra. 34Yesù yè dzin à ra ci: «N dzin taan, wo ɲɛunmaà mun na, tɔ wo cɛrɛmabeu. Bè, Ŋaa yè b'à ko xɛɛrɛ tsi, à y'à cɛrɛma to.»

35Àyìwà, è Yesù to tɔ̀ goomaa nà, mòdzin ì yè dan ŋaablabegbaà kùntsiɛ̀ rè tsii rɔ̀n, twɛy yè nà dzin ci: «Wo dzin taan saun nòn, kàrànfaà byɛn kun fèe kɔn ?» 36Àwà, Yesù na e toro wɔ twɛy gooma reè rè è dzu waa, è dzin ŋaablabegbaà kùntsiɛ̀ rà rìì ci: «Maà shi waa, ɲɛn mun na bàsɔùn.» 37Tɔ̀un Yesù bèkɔɔn ŋaablabegbaà kùntsiɛ̀ rè tsii rɔ̀n, Piyɛrì, ko Yàkubà, ko Yàkubà raa keresi Yùxanà boshɔ̀ùn, à na à to mòò pɛn yè b'a ka waa. 38Àwà, è bèu wɔ Yayirusì rè tsii rɔ̀n, Yesù y'à jà màànkaan na màànkàn san. Swey gɛɛ, swey yè bà e matsùrùkɔ̀ɔ̀n fa beè. 39À dɔ̀un tɔ̀un gbàà doùn, è dzin è ra ci: «Feera ye nèe màànkan nee sapɛ faa, ye yè bà gɛɛ ? Dziɛ̀n na dòonà waa, à ciɛ̀ rìì.» 40À tɔ̀ goomaa dèu, yè jiran à mà. Tɔ̀un è mòdzian sapɛ bo da rɔ̀n, è to dziɛ̀n fàà ko à naà, ko kàràndzin zhiigia à ka. Tà shɔ̀ùn dziɛ̀n ni min niì è dɔ̀n mɔn. 41Tɔ̀un, è dziɛ̀n kun e si ra, è dzin à ra ci: «Tàlità kumùn !» Nìi dzuɔn ci: «Tàànmɛ̀yniin, mun ci e fù !» 42Tɔ̀ nɔ̀nkɔɔrɔn, tàànmɛ̀yniɛn yè fù tsìì, è maa è jìɛ. Àwà, à sìà na jii teeŋ fii rìì. È ji è dzii tsɛ tɔ̀ nɔ̀nkɔɔrɔn fɔ è bè geren. 43À y'à dè màxɔbe è ra tɔ̀un, ci è màà à to mòò pɛn y'à tɔ̀ waa. Tà shɔ̀ùn, è dzin è ra, ci yè ɲwɛyn sìn à ra, à y'à ɲɔn.

Currently Selected:

Marikì 5: BDZU

Highlight

Copy