Marikì 7

Yesù nìi dèu Faridziɲɛn rèè rà goo bɔrɔɔ shi rèè tsɛ

(Matsiyù 15.1-9)

1Àyìwà Faridziɲɛn rèè, ko Sàrìyà Kaamoo reè swey yè dan yè bo Yerusalɛmùn, yè nà e ladzyèè Yesù tɛyn. 2Yè Yesù rè kàràndzin neè swey jà, twɛy ɲwɛɛ̀n ɲɔɔ̀n e si rèè nooŋmaà ka, tɔ̀ dzuɔn ci è na e sira foo e foòŋ'n kur'la waa. 3Àwà, sani Faridziɲɛn rèè ko Dzyèèsìbee mòdzin neè yè ɲwɛɛ̀n ɲɔn, è na e si rèè fòòŋ'n kuru wuu faa, è ɲɛn à tsɛ, è na shiɔ̀ e fabɔɔ rèè rè shi bɔrɔɔ reè rà. 4È ye dan yè bo jàmà làdzyeema nɔ̀n, è ma e foò fyeu, è na ɲwɛyn ɲɔɔ̀n waa. È na goo giri kpɛ̀rɛ̀kuru ì sa shi jiɛ twɛy shi bɔrɔɔ reè kàjaa tsɛ, nìi yɛ, yukuun neè, ko tsyɛn reè, ko tàànge dànɲànma reè fòòŋ'n kur'la. 5Tà doùn, Faridziɲɛn rèè, ko Sàrìyà Kaamoo reè yè Yesù tey ci: «Fee y'à to wo re kàràndzin neè na fàbɔɔ rèè rè shi bɔrɔɔ reè shi jiɛ waa, è ɲwɛɛ̀n ɲɔɔ̀n e si rèè nooŋmaà ka ?» 6#Ekk 29.13.Tɔ̀ yeè dzin è ra ci: «Kɛɛra Esayì gooma niì dèu ye duungoofiitsi rèè tsɛ, tɔ wùbeu taki, a ci à sɛbɛɔ̀n nìi tsuru ci: "Nèe mòdzin nee reè mun blàbee e dzii rìì ka. È duùn nɔ̀n, è dan gbàn mun na. 7È mun blàbe niì faa, nàfa na ni tɔ̀ ɲan waa, kàtsu è kàràn nìì reè sìan, tɔ mòdzin ì nè sàrìya tsuuŋma ì."» 8Yesù yè dzin è ra ci: «Ye Ŋaablà dzugooma xɔù rèè bàtoo, ye yè e shi mòdzian raa shi bɔrɔɔ reè rà.» 9È dzin è ra kɔn ci: «Ye jaa tàrau ye e nɔn Ŋaablà dzugooma xɔù rèè rè, sànko ye mà e re shi bɔrɔɔ reè mɛɛy waa. 10#Jdk 20.12; Sdk 5.16; Jdk 21.17; Sak 20.9.Àwà, kɛɛra Musà dziun ci: "A faà ko a naà blàbe." È bà ci kɔn: "Mòò riì dzii ɲaan nà wɔ e faà, tàmafa e naà tsɛ, tɔ wù è vu."» 11Ŋà nìi ye, ye dziàn ci: «Mòo dzia dzin e faà, tàmafa e naà nà ci: "Mun na wù min nìi sìn wo ra m'a ka wo dzwɛ̀ma, tɔ 'kɔ̀rìban' nìi dzuɔn Ŋaablà kɔɔ gè." 12Tà tsuru, y'a toò, tɔ̀ tsìfa na dzia gèsɔn fa e faà, tàmafa e naà rè dɛ. 13Tà doùn, ye Ŋaablà re goomaa mɛɛ̀ twɛy goo bɔrɔɔ shi rèè ka, ye twɛy nìì reè dèe mòdzian nà. Ye to tɔ̀ tsuru goo giri kpɛ̀rɛ̀kuru ì sa faa.»

Yesù ci nìi mòò noo

(Matsiyù 15.10-20)

14Tà shɔ̀ùn, Yesù yè jàmaà kiri kpɛ̀rɛ̀ e ra kɔn, è dzin è ra ci: «E sapɛ yeè e toro wɔ n ne, ye nèe dzin sen: 15Gè o ge boò da rɔn è bè mòò duùn, tɔ̀ pɛn na mòò noo waa. Ŋà nìi daàn è bo duùn nɔ̀n, tɔ̀ rii mòò noo. [ 16Toro ì ye ba ni mòò riì rè è bà è ka myɛ̀yn faa, è toro wɔu'n kuru wube dɛ !]»

17Àwà Yesù nàu bo jàmaà tɛyn waatsi riì bwèy è bè tsii rɔ̀n, kàràndzin neè y'à tey tɔ̀ gooma bɔɔ̀ dzuun ma. 18È dzin è ra ci: «Arì she ye tsu akir'là na jɛ̀y fa ŋe o ? Ye na à tɔ̀ ci gè o ge boò da rɔ̀n è bè mòò duùn tɔ̀ na à noora ɔ ? 19À na à noo waa, kàtsu à na beè dùsùkuan doùn waa, fɔ duùn nɔ̀n. Tà shɔ̀ùn, à dàmààn yè bè ji.» Yesù y'à kpàdè tɔ̀ goomaa ka, ci ɲwɛyn ge pɛn na nooŋnà waa. 20È dzin kɔn ci: «Nìi daàn è bo mòò duùn, tɔ̀ rii y'à noo. 21Àwà duungoo ɲaan neè boò mòdzian duùn nɔ̀n nì. Tɔ̀ rii daàn nèe goo rèe rèè ka: kɛ̀kɛ̀ɛ̀ybeè, shɔnbeè, mòdzìn vua, 22ɲànmɔ̀ɔ̀beè, jaacɛnbɛybeè, ɲanbee, mòdzìn sànfir'la, kɛ̀kɛ̀ɛ̀y goo reè, jaaɲininbeè, mòdzìn tsòò bar'la, yɛ̀rɛ̀blàbeè, ko akiribɛybeè. 23Twɛy goo ɲaan neè sapɛ boò mòdzian duùn nɔ̀n nì, y'à noo.»

Yesù kwey kaa bou tàan sɔn dzin taan kpɛyn min niì

(Matsiyù 15.21-28)

24Àyìwà, tà shɔ̀ùn, Yesù yè fù è bo mɔn, è bè Tsiirì wɔ̀ɔ̀ wòòɲaan ɲàn. À wɔu mɔn, è bè dɔ̀n gbà sɔn doùn. À sàò naà ni à re mòò y'à tɔ̀ ci wo ni mɔn waa. Ŋà, à na dzi e mɛnɛn waa. 25À wɔumaà mɔn, tɔ̀ nɔ̀nkɔɔrɔn, tàan sɔn y'a goomaa myɛ̀n. Kwey na ni tɔ̀ taàn raa dzin taan kpɛyn. Tɔ̀un, è bè Yesù kpɛyn. À bèu wɔ, è kunun gban à bììn. 26Tàan rèe na kun kpɛrɛ mòdzin, è bà kereu jàmaan sɔn ɲan, nìi kir'là Sirofenisi. È Yesù màfyɛ̀n, ci è kweè kaa bo wò dzin taan kpɛyn. 27Yesù to yè dzin à ra ci: «À to dziin nèè yè cɛn ŋe. À na wù dziin nèè rè ɲwɛɛ̀n yè sen maa vììrìì reè rè waa.» 28Taàn ci à ra ci: «Tsìfaà, arì ɲwɛyn bubui niì reè tɔr'nà dziin nèè rè ɲwɛyn ɲɔnma nɔ̀n, vììrìì reè tɔ̀ ɲɔɔ̀n do.» 29Yesù yè dzin à ra ci: «Tɔ̀ goomaa kamà, à wa a re tsii, kweè bou wo dzin taan kpɛyn.» 30Tɔ̀un, taàn yè dɔ̀n be tsii. À bèu wɔ è dziɛ̀n ɲɛn tsuuŋma jà ɲaangee tsɛ, kweè bou à kpɛyn.

Yesù kpiri toròtòròkɔɔn torokperen sɔn cɛrɛmabeu min niì

31Tà shɔ̀ùn, Yesù yè bo kɔn Tsiirì wòòɲaan màr'lɔ̀ùn. È nà dɔ̀n bo Sidɔ̀n wɔ̀ rɔ̀n, wɔ̀ tsyeùn nìì reè kir'là Dekapɔlì, è twɛy fi shɛn dɔ̀n, è nà Galile yu blàa kpàkèrè. 32Tɔ̀un, yè nà kpiri toròtòròkɔɔn torokperen sɔn ka à re, y'à màfyɛ̀n, è bà ni e si rèè tsùù à tsɛ, è cɛrɛmabe. 33Àwà Yesù yè bo kpir'la ka jàmaà tɛyn tɔ̀un, è b'a ka e soone. Tà doùn, è siniin neè mùù à torokɔɔ re, è dzweeyuà sen è tɔ̀ dzyɛn à nɛɛ̀n nà. 34Tà shɔ̀ùn, è jaà ɲansen jìran kèrè, è ŋɔ̀n fààn, è dzin à ra è re kungoòmà ɲàn ci: «'Efatà', nìi dzuɔn ci: Dzii san.» 35Tɔ̀ nɔ̀nkɔɔrɔn, kpir'la tor'lèè dzii yè san, à nɛɛ̀n yè foro, è dzi gooma e saoma. 36Tà shɔ̀ùn, à y'à dè màxɔbe è ra, ci è mà à gooma de mòò pɛn na. Ŋà à tɔ̀ dèe è ra vu rìi mà, è sa y'a gbango beè tɔ̀ vuà mà. 37À na jiɔ̀ è dzii tsɛ fɔ è bè geren, yè dziàn ci: «À goo o goo faa, à sapɛ wù. À y'à faa torokper'neè yè myɛ̀yn fa, bobo reè yè bà dzia gooma.»

Currently Selected:

Marikì 7: BDZU

Highlight

Copy