Marikì 8

Yesù buru kunun ɲɛɛ̀nun ko ji myɛyn danman ka jàmaà dziira gaaŋ min niì

(Matsiyù 15.32-39)

1Àyìwà, twɛy jisee reè sii sèè, jàma brìsi na e ladzyèeŋnà Yesù ka kɔn yeu. Tɔ̀ y'a tàrà, ɲɔɔ̀n gè naà ni è re waa. Àwà, Yesù yè e re kàràndzin neè kiri kpɛ̀rɛ̀ e ra tɔ̀un, è dzin è ra ci: 2«Jàmaà màtsuru mun kuɔn fɔ è bè geren, kàtsu à bwèy zhììgi rii yɛ nèe è ni mun ka, ɲwɛyn to na ni y'à ɲɔn. 3Mun ye è dzukɔɔn baji be e re tsii, è nà gba shia rè, kàtsu swey boo jeenà yè nà.» 4Kàràndzin neè yè dzin à ra ci: «Mòo dzia nèe rèè cɛɛ̀n ɲwɛyn jà mìin jènjàà kor'nèe doùn ɔ̀n ?» 5À yè è tey kɔn ci: «Buru kunun fɛrɛn ni ni ye re ?» È ci «ɲɛ̀ɛ̀nun.» 6Tɔ̀un, à y'à gaa jàmaà rè, ci yè e tsuù dzɔn nɔ̀n. Tà shɔ̀ùn è buru kunun ɲɛɛ̀nun nèe tsi, è baraka sìn Ŋaablà ra, à yè è tara tara, è wɔ kàràndzin neè suun, ci y'à tanan. Àwà twɛy sa y'a tanan jàmaà nà. 7Ji myɛyn danman sa na ni è re. Yesù yè twɛy sa tsi è Ŋaa tswà, è twɛy sa sin, ci kàràndzin neè y'à tanan jàmaà nà. 8Mòdzian yè ɲwɛɛ̀n ɲɔn yè cɛn kpan. Y'à dzyee kùnkwììn touma rèè ka sèè ɲɛ̀ɛ̀nun tsyɛn. 9Nìì reè tɔ̀ ɲwɛɛ̀n ɲɔun, è na mòkun gbaa nààlen tsuru boò. Tà shɔ̀ùn, Yesù yè shi sin è ra. 10Tɔ̀ faumaà shɔ̀ùn, à ko e re kàràndzin neè yè dɔ̀n konkoron sɔn doùn suu, yè dɔ̀n be màrà sɔn ɲan, nìi kir'là Dalimanutà.

Yesù ci wò re kàràndzin neè yè e kaàwɔ nìi rà

(Matsiyù 16.1-4)

11 # Mat 12.38; Luk 11.16. Àyìwà, è bèu dzi mɔn, Faridziɲɛn rèè yè bo na, yè nà e maa yè sɔ̀swɛy faa Yesù ka. È ni à re y'à dzuun bo nìi fa, y'à gaa à re, ci è tàànmàshɛn kabagoomaa sɔn fa ye jaa ra, è bo jìrànxɔ rɔ̀n. 12#Mat 12.39; Luk 11.29.Tɔ̀ goò rè Yesù byɛunmaà e akir'là ɲàn, è ŋɔ̀n tɔ̀un fààn, è dzin ci: «Feera nèe waatsi ree mòdzian yè bà tàànmàshɛn kabagooma gaa ? Sààben na, mun nì ci e ra, tàànmàshɛn kabagooma pɛn fa fa è jaa ra waa.» 13Tà goomaa shɔ̀ùn, Yesù yè bo è tɛyn è bè dɔ̀n konkor'na doùn, è dɔ̀n be yu blàa kɛ̀yn.

14Àwà kàràndzin neè taa na to yè buru sen waa. Buru kunun soo pe rii na ni è kùùn konkor'na doùn. 15#Luk 12.1.Yesù to y'à dè màxɔbe è ra ci: «Y'a jàa dɛ, ye e yɛrɛ kaàwɔ Faridziɲɛn rèè rè buru fu geè, ko Erodzì rè buru fu geè rà.» 16Kàràndzin neè yè e kɛsɛ, yè dzin e si ra ci: «Buru na ni ɲe re nìi fa dɛ, tɔ̀ rii kamà à nèe dèe.» 17Yesù yè è duùn naà tɔ̀u nìi fa, è dzin è ra ci: «Feera ye yè bà à kɛ̀sɛɛ̀ ci buru na ni ye re nìi fa ci à tɔ̀ rii ? Arì she ye akir'là na jɛ̀y fa ŋe o ? Ye akir'là ŋununbeò gbɛ ? 18#Ykk 5.21; Ezk 12.2; Mar 4.12.Jaadzin ì na ni ye re ye yè bà jɛ̀y faa gbɛ ? Toro ì na ni ye re ye yè bà myɛ̀yn fara ɔ ? Ye taa na ni gbɛ ? 19Mun buru kunun nuàn ka mòkun gbaa nùn nìi dziira gaaŋ, y'a dzyeè ka sèè fɛ̀rɛ̀n ni tsyɛun ?» È ci «teeŋ fii.» 20È tey kɔn ci: «Mun ɲɛ̀ɛ̀nuàn ka mòkun gbaa nààlen nìi dziira gaaŋ y'a dzyee toumaà ka sèè fɛ̀rɛ̀n ni tsyɛun ?» È ci «ɲɛ̀ɛ̀nun» 21È dzin è ra ci: «Arì she ye akir'là to na jɛ̀y fa ŋe o ?»

Yesù jaana kpiri sɔn jaa dzii saun min niì

22Àyìwà, tà shɔ̀ùn, Yesù ko e re kàràndzin neè yè dɔ̀n be Bɛtsisayidà wɔ̀ rɔ̀n. È bèu dzi mɔn, yè nà jaana kpiri sɔn ka Yesù rè. Y'à màfyɛ̀n, è bà ni e dzyɛn à ra, è cɛrɛmabe. 23Àwà, Yesù yè jaana kpir'là kun e si ra tɔ̀un, è bo à ka wɔ̀ɔ̀ bònè. À bèu wɔ, è dzweeyuà ji à jaa ra, è si rèè tsùù à tsɛ, à y'à tey ci: «Wo gè jàra ɔ ?» 24Kpir'la yè e jaà ɲansen, è dzin ci: «Mun mòdzian jàa a ci gɔ̀ɔ̀ku ì. Ŋà è jìì beè.» 25Tà shɔ̀ùn Yesù yè e sià tsùù à jaa rèè tsɛ kɔn. Tɔ̀un, è jɛ̀y fa fasɛyn. Kpir'la yè cɛrɛmabe, è dzia gè rèè sapɛ jaà, è lafyɛ bo e si ɲan. 26Tà shɔ̀ùn Yesù y'à bàji be e re tsii, è dzin à ra ci: «Maà dɔ̀n wɔ̀ɔ̀ tsu rii doùn waa.»

Piyɛrì ci Yesù Ŋaablà Jaara Modzìàn

(Matsiyù 16.13-23; Lukì 9.18-22)

27Yesù ko e re kàràndzin neè yè bo mɔn tà shɔ̀ùn. Wɔ̀ nìì reè ni Sezare Fìlipù wɔ̀ɔ̀ tɛyn, yè bè mɔn kèrè. À yè è to shia tsɛ, Yesù yè kàràndzin neè tey ci: «Mòdzian dziàn ci mun tsì rii ?» 28#Mar 6.14,15; Luk 9.7,8.Twɛy ci à ra ci: «Swey ci wo Mòdzìn Jààràfoobaa Yùxanà, swey ci kɛɛra Àliì, swey yɛ̀rɛ̀ ci wo kɛɛra reè sɔn.» 29#Yux 6.68,69.Yesù yè è tey ci: «Ye do ? Ye ci mun tsì rii ?» Piyɛrì yè dzin à ra ci: «Wo Ŋaablà Jaara Modzìàn nì.» 30Tɔ̀un, Yesù y'à dè màxɔbe è ra, ci è mà wò gooma de mòò pɛn na.

31Àyìwà, tà shɔ̀ùn, à yè e maa è kàr'na. À ci è ra ci: «Fɔ Adamà dziàn yè byɛn cɛyn. Bɔɔ rèè, ko Saaka Jɔundzin neè ko Sàrìyà Kaamoo reè yè e nɔn à re, è vu. Bwèy zhììgi à saunmaà shɔ̀ùn, è sèè kpunan bo saàn ɲàn.» 32Yesù yè tɔ̀ goomaa dè fyɛ è ra tɔ̀ tsuru. Piyɛrì tɔ̀ myɛ̀un min niì, è Yesù kiri bo tɔnmà, è bè e maa è vu xɔù dèe à ra tɔ̀ kamà. 33Yesù yè e jaa kere tɔ̀un è re kàràndzin neè siin, è fù Piyɛrì kpɛyn. À ci à ra ci: «Bo n tɛyn, e bè jɔun, Sùtànà modzìn ! Wo nìi kɛ̀sɛɛ̀, tɔ̀ ko Ŋaablà raà na soo waa, à mòdzin ì kɛ̀sɛu'n kur'li.»

Mòò yè e gbaàn Yesù kpɛyn nìi tsuru

(Matsiyù 16.24-28; Lukì 9.23-27)

34 # Mat 10.38; Luk 14.27. Twɛy goo rèè shɔ̀ùn, Yesù yè jàmaà ko e re kàràndzin neè sa dzyeèmaa kiri kpɛ̀rɛ̀ e ra, è dzin è ra ci: «Mòò riì ye ba ni à re è gban mun kpɛyn, fɔ è ɲɛyn bo e yɛrɛ tsɛ, è gbaàn gɔɔ̀ sen, è kòmànà e gban mun kpɛyn.

35 # Mat 10.39; Luk 17.33; Yux 12.25. Àwà mòò riì y'à gaa ci wò yeè e xɔɔn tsi, tɔ nà fɔn à ɲan. Ŋà mòò o moò nà fɔn e xɔn nɔn mun ko Kùnàgoo Dziɔ̀ kamà, wo nà à tsi. 36À to fee wùbee mòò mà è dziɲaan sapɛ tarà bà e raa, è fɔn e xɔn nɔn ? 37Àwà mòo dzia fee soo rii sìn, à y'à ka e xɔɔn màbo ? 38Nèe she raa mòdzin niì reè yè e nɔɔ̀n Ŋaablà re, yè bà gooɲaan faa, àwà mòò riì ci wo seè twɛy jɔun mun ko n ne gooma reè kamà, Adamà dziàn sa ye na nà sii rìi sèè e Fa Ŋaablà nɔɔrɔɔ̀ doùn, ko e re mɛ̀rɛ̀kɛ̀ fɛnɛ reè ka à sa nà seey, ci wò na tɔ̀ tsìfa tɔ̀ waa.»

Currently Selected:

Marikì 8: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode