Yohanni 20
20
O Yezous hi djido
1Sik taysarlake, pal o Debleskro dives, har gomme rati his, vas i Maria Magdalena pash ko moulengro kheer, oun dikas, kay ko bar bouder gar glan o voudar hi. 2Koy nashas yoy pash o Simon Petreste oun pash ko vavareste kol deesh-te-douyendar, koles, kay kamas o Yezous o djiyestar, oun penas ap lende: “Yon lan o rayes dran ko moulengro kheer vin. Oun mer djinah gar, kay yon les čivan.”
3Koy djas o Petro oun ko vavar pash ko moulengro kheer. 4Kol douy nashan khetne. Ko vavar nashas sikeder har o Petro. Yaake vas yob glan leste pash o moulengro kheer, 5dikas koy dren, oun dikas kol layntikre kotya kote čiddo. Yob djas gar dren. 6Pal leste vas o Simon Petro oun djas an ko moulengro kheer dren, oun dikas kol layntikre kotya kote čiddo. 7Ko diklo, kay troul o Yezouseskro shero pandlo his, his gar pash kol vavar layntikre kotya čiddo. Kova his khetne pandlo, oun his kokres čiddo.
8Kanna djas ninna ko vavar o Yezouseskre malendar dren, kay glan leste pash ko moulengro kheer vas. Oun yob dikas oun patsas.
9Yon hayvan gar, hoy an o Debleskro lab tardo hi, kay yob hounte stella i moulendar pre. 10Pal kova djan kol douy pale khere.
O Yezous moukell pes glan i Magdalena te dikell
11I Maria his vin glan o moulengro kheer tardo oun rovas. Har yoy yaake rovas, dikas li an o moulengro kheer dren. 12Kote, kay o Yezous čiddo his, dikas yoy douy bolepangren an parne ripya beshdo. Ko yek his kote, kay leskro shero čiddo his, oun ko vavar, kay leskre herya his.
13“Hoske roveh tou, romniya?” poučan kol bolepangre i Mariatar.
“Yon lan miro rayes krik,” penas li, “oun me djinau gar, kay yon les čivan.”
14Oun har yoy kova penas, rissras pes li trouyel, oun dikas o Yezouses. Yob his glan late tardo, oun yoy prindjras les gar.
15Koy penas o Yezous ap late: “Romniya, hoske roveh tou? Kones rodeh tou?”
I Maria patsas: Yob hi kova, kay boudrell an i baar. Doleske penas li: “Romeha, te anal tou les krik, pen mange, kay tou les čival, te djap koy, oun lap les pale!”
16“Maria!” penas o Yezous.
Koy rissras pes li trouyel, oun penas ap hebretikes: “Rabouni!”
Kova kharella Sikepaskro.
17Penas o Yezous ap late: “Ma tape ap mande! Me djom gomme gar pash o dadeste pale. Dja pash mire phralende oun pen lenge: Me djau pash miro dadeste oun pash t'maro dadeste oun pash miro Debleste oun pash t'maro Debleste.”
18Koy djas i Maria Magdalena pash o Yezouseskre malende, oun penas lenge: “Me dikom maro rayes!”
Oun yoy penas lenge, hoy yob lake penas.
O Yezous moukell pes glan peskre malende te dikell
19Har rati his ap kava dives, – kova his i kourko#20:19 kourko dimanche – his o Yezouseskre mala khetne. I daryatar kol biboldendar his lengro voudar klidedo. Ap yek kopo vas o Yezous dren, oun djas mashkral lende, oun penas ap lende: “O Debleskri barht t'mentsa!”
20Har yob kova penas, sikras yob lende peskre vasta, oun peskri rig. Koy van o Yezouseskre mala barhtelo, kay dikan le pengro rayes.
21Pale penas o Yezous ap lende: “O Debleskri barht t'mentsa! Har miro dad man bičras, yaake bičrau me t'men.”
22Oun har yob kova penas, phourdas yob ap lende, oun penas: “Lenn o Debleskro Dourho! 23Ap koneste t'mer penenna: Tiri doosh hi krik lino, koleske vell li krik lino. Oun ap koneste t'mer penenna: Tiri doosh ačell ap toute, ap koleste ačell li.”
O Yezous moukell pes glan o Thomaseste te dikell
24O Thomas, yek kol deesh-te-douyendar, koles dan le ninna Didimo#20:24 Didimo, kova kharella jumeau gole, his gar koy pashel, har o Yezous pash lende vas.
25Ap leste penan i vavar kol deesh-te-douyendar: “Mer dikam maro rayes!”
Yob penas ap lende: “Te dikau me gar leskre vasta, kay saster dren dino vas, oun te čivau me gar miro goushto koy dren oun miro vast an leskri rig, patsau me kova gar.”
26Oun pal orhta divessa his o Yezouseskre mala pale khetne an ko kheer. Oun o voudar his klidedo. Kava kopo his o Thomas pash lende. Ap yek kopo his o Yezous mashkral lende tardo, oun penas: “O Debleskri barht t'mentsa!”
27Pal kova penas yob ap o Thomas: “Čip tiro goushto ap mire vasta, oun čip tiro vast an miri rig. Ač gar har yek, kay patsell gar. Pats kanna!”
28Koy penas o Thomas ap leste: “Miro ray oun miro Devel!”
29“Kanna, kay dikal man, patseh tou,” penas o Yezous. “Barhtele hi kolla, kay patsenna, ninna te dikenn le man gar.”
O Yezous hi o Debleskro čavo
30Boud vavar baro koova kras o Yezous an o Debleskri zoor glan peskre malende, kay gar an kava liil činlo hi. 31Kava vas činlo, te patsenn t'mer, kay o Yezous ko baro ray hi, kolestar o Devel penas, te vell yob. Yob hi o Debleskro čavo. Oun te patsenn ap leste, lenn t'mer o čačo djipen lestar.
Currently Selected:
Yohanni 20: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
