Luk 13
13
Kamu tuu pililiu tahania hamiu seko
1Mi tana tahu nia, kesana tinoni ara kori vania ia Jisas na kokorina kesana tinoni ni Galili te tuu ia Paelat me labu matera tahuna tara kere vania ira ia God i Jerusalem. 2Ma ia Jisas e kori vahai vanira de, “?Ihamu amu pada vahania na tinoni ni Galili nira nia, ara mate vahai ia rongona na hadira seko e leho liungisia hadira seko ira kode hana ni Galili? 3!E teha vahai ia! Me tina kamu teha hamu na tuu pililiu tahania nimiu seko ihamu ba kamu mate lakamu. 4?Me vahai vei loera e sangavulu alu na tinoni ni Saeloam te tajora na vale dato nia me sivo me kobiloera mara mate nia? ?Ia loera nia lodira seko te leho liungisia hadira seko ira tinoni tovosi tara toha i Jerusalem? 5!E teha vahai ia! Mu kori vanihamu laka nau, tina kamu teha hamu na tuu pililiu tahania nimiu seko, ihamu ba kamu mate lakamu.”
Na kori titihila tatana chikai na hai te teha tamania siki vuana
6Me bukena mai ia Jisas e kori vanira chikai na kori titihila, me kori vahai de, “E chikai na tinoni e tamania chikai na hai ni fig tana nina uta. Mi bukena te chau tahu ni vua hai nia me dia ia chihoa, me teha haea siki vuana. 7Me kori vahai vania ia na tinoni te morosi taonia na uta nia, ‘Tana lalona e tolu na uvi inau u maimai na daia siki vuana na hai de, me teha na vua. !Ko kali chonia! E teha talana ke tuu, kevu vosahi voloa na pari talana nia.’
8“Ma na nina tinoni ago ia e kori vahai vania de, ‘Taovia, ko livu luhia ke tuu ke chikai laka na uvi, minau ba ku heli parina mu ku choni jingona borona. 9Me tina ke tamani vuana ia tana uvi bukena nia me talana solehana. Me tina ke ba teha tamani vuana, ma ka ko kali chonia.’ ”
Ia Jisas e vani maurisia chikai na daki te lohu tana Sabat
10Tana danina chikai na Sabat, ia Jisas e sasani tana vale lotu ira na Jiu. 11Me toha chikai na daki te tohavia na tarunga seko te vahania me lohu na bukena, me utu na tuu hotohoto e sangavulu me alu na uvi. 12Me morosia ia Jisas na daki nia, me soloa me mai tatana me kori vahai vania de, “Dakiniho, ihoe o laka tana nimu oche nia.” 13Me chibelia ia Jisas na daki ocheoche nia, me hoto na bukena me tatuhuru me livu kaea ia God.
14Ma na tinoni te hae taonia na vale lotu nia e kore rongona ia Jisas e maurisia na daki nia tana danina na Sabat. Me kori vahai vanira na tinoni tana tahu nia de, “E ono na dani te talasangaa nida keja hita ka ago tatana, ma na dani loera nia te tuhua kamu mai hamu kara ni maurisihamu, me teha tana danina Sabat.”
15Ma na Taovia e kori vahai vania na tinoni nia, “!Lohamu na vanga tuliuliu! ?Me vahai vei? ?Ba ke teha chikai vidalomiu lohamu na chuaa na halona nina buluka se nina dongki tana valena, me ke udungia ke dia inu kolo tana danina Sabat? Ia kamu agosi vahania lohamu. 16Ma na daki de na kukuana ia Ebraham, te tuu ia Setan me soria e sangavulu me alu na uvi, ma ia e tihilana nomu nau ku maurisia tana danina Sabat.”
17Tahuna te kori vahai ia Jisas ia, me vahani vahamara ia hana hala loera. Ma na tinoni nira ara mamahela solehana na morosiana visa na omea taengana te agosia ia Jisas.
Na kori titihila tatana chikai na piu ni hai mastad
(Matiu 13:31-32; Mak 4:30-32)
18Ma ia Jisas e gesuara vahai de, “?Nina baravata ia God e moro vahai nomu vei? ?Na hua tu ku hanaa nau na titihila kolu tatana? 19Ia e vahai chikai na piu ni hai mastad te pechi solehana, te tahaa chikai na tinoni me chukaa tana nina uta. Mi tahuna te dato me lia na hai leho, mi ira na manu ara mai mara agosia na nikudira tana arangana nira.”
Na kori titihila tana isti
(Matiu 13:33)
20Me gesuara laka ia Jisas me kori vahai de, “?Na hua tu ku hanaa nau na titihila kolu tana nina baravata ia God? 21Nina baravata ia God e vahai na isti. E chikai na daki e tahaa na isti me valo kolua chikai danga ni kei ni pulaoa. Ma na isti nia e agosia nina ago tana lalona pulaoa nia me vahania me pose dato matadu na pulaoa nia.”
Na sangania te havi
(Matiu 7:13-14; Matiu 7:21-23)
22Ma ia Jisas e liu dia tana salana i Jerusalem me sasanira ira na tinoni tana vera leho nira ma na vera pepechi nira. 23Me laba chikai na tinoni me gesuaa, “?Taovia, ba ke kesana bamu tinoni te ke sau vanira ia God na mamauri sali?”
Me tuhua ia Jisas me kori vanira visa kode na tinoni tana tahu nia, me kori vahai de, 24“Nina baravata ia God e havi na sanganiana, ma kamu ago matena hamu ma kamu sahe tatana, rongona ba ke danga na tinoni kara tovoa na sahe me utu. 25Mi tahuna te ke vongotia na tamanina na vale nia na sangania, mihamu ba kamu tuu kuli ma kamu kidikidi ma kamu kori vahai de, ‘Taovia, ko haru vanihami kiki na sangania.’
“Ma na tamanina vale nia ke tuhua me ke kori vahai de, ‘Inau u teha hanamiu hamu, mu voo ivei tamu vota mai.’
26“Mihamu ba kamu kori vahai de, ‘Ihami tami inuinu mami hahani koluho hoe, Mihoe to sasani tana sala ni veramami.’
27“Ma ia ba ke tuhu visu vanihamu me ke kori vahai de, ‘Inau u teha hanamiu hamu, mivei tamu vota mai. Ihamu kode na tinoni sekoseko. !Kamu dia choni!’
28“Mihamu ngeni ba kamu sasahavi solehana ma kamu giria livomiu tahuna ta kamu morosia ia Ebraham ma ia Aesak ma ia Jekob ma ira kode na propet tara toha lalona nina baravata ia God, mihamu ba kara huru hamu ma kamu toha kuli. 29Ira na tinoni ba kara vota mai i longa, mi tasi, mi huri, mi vava, ma kara tohotuu ma kara sanga na kabu tana nina baravata ia God. 30Mi tana tahu nia ira tara buke ba kara dia naho, ma ira tara naho ba kara dia buke.”
Ia Jisas e sahavia na vera i Jerusalem
(Matiu 23:37-39)
31Mi tana tahuna nia kesana na Parasii ara mai tatana Jisas mara kori vahai vania de, “Ko dia choni hoe tana vera de, mo ko ba toha siki vera siki meana, rongona ia Herod Antipas e ngangavina na labu mateho.”
32Ma ia Jisas e kori dia vanira, “Dia ma kamu kori vania ia Herod, e utu ia ke utusiu nau. Inau ba ku huru choni tarunga mu ku vani maurisi tinoni i ngeni de me ke moho, mi tana toluna dani ba ku kodesia nau nigu ago. 33Me seisuge te vahai ia, inau ba ku diadia bamu i Jerusalem i ngeni de mi moho mi tana dani chikai, matengana e teha tihilana kara labua na propet tatana siki vera tovosi, ma ia i Jerusalem bamu.”
34Ma ia Jisas e kori vahai laka de, “Ihoe Jerusalem, Jerusalem, ira na tinoni tatamu hoe ara labu matesira nina propet nira ia God, mara tai makarara na tinoni nira te sau atua ia God. Me danga kiki noha tahu tu ngangavina nau na taha saira nimu tinoni nira vahai na kudo te charo saira na dalena pepechi nira tana vavana rapona. Mo teha hoe na tala vaniu. 35Matengana to vahai hoe ia, ia God ba ke hoso tahaniho hoe, ma na nimu vale lotu ba ke tuu mangu volo. Minau ku kori talana vaniho laka, ihoe ba ko teha morosi matagu nau po ke chau tana dani ira na tinoni ta kara kori vahai de, ‘Ia God ke mamahela vania na tinoni te laba mai tana asana na Taovia.’ ”
Currently Selected:
Luk 13: mln
Highlight
Share
Copy
Want to have your highlights saved across all your devices? Sign up or sign in
© 2024 (active), Wycliffe Bible Translators, Inc. All rights reserved
