Mak 2
2
Ia Jisas e maurisia chikai na tinoni te labe
(Matiu 9:1-8; Luk 5:17-26)
1Mi bukena kesana dani laka ia, me visu mai soha ia Jisas i Kapaneam. Mara valingea ira na tinoni na saurongona te laba noha ia Jisas tana vale te hanaa ia na toha tatana. 2Mi ira dangana na tinoni ara mai sai tana vale nia, me seisuge levu kuli tana matana sangania nia, e teha laka siki mangamanga. Mi tahuna te kori lengaa ia Jisas na nina valagu ia God vanira na tinoni nira, 3mara mai laba e vati na tinoni tara vou maia loera chikai na tinoni te labe. 4Ma ia matengana te danga solehana na tinoni, mara utu loera na taha diaa na tinoni nia vania ia Jisas. Mara vou datoa na tinoni nia tana vovotuna vale nia, mara heli putaa na vovotuna tana hana tuhu vahai te tuu ia Jisas. Mi tahuna tara kode loera, mara lelu sivoa loera na tinoni nia kolu na mihena, me sivo lalo vale. 5Ma ia Jisas e hae vagoa lodira dodonu loera, me kori vahai vania na tinoni te labe nia de, “Dalegu, u kori kenihua nau tana hamu seko nira hoe.”
6Mara toha lakamu kesana na tinoni sau manasa tana nina keja ia Mosis tana vera nia. Mi ira ara papada vahai de tana manasadira tovosi, 7“!Aemu! ?E vahai vei na tinoni de e vu valagu vahai sahata nia? !Ia e valagu seko vania ia God rongona ia God bamu te hanaa na kori kenihua tana hadira seko na tinoni!”
8Mi tana tahu vahai kalavata nia, ia Jisas e hana nohaa nidira papada ira na tinoni, me gesuara me kori vahai vanira de, “?E vahai vei hamu amu vu tamania na papada vahai nia tana tobamiu? 9E teha utu na kori vahai vania na tinoni te labe de, ‘Inau u kori kenihua tana hamu seko nira hoe.’ Me utu solehana na kori vahai vania de, ‘Ko tatuhuru, mo ko tahaa na mihemu mo ko dia.’ 10Mi tana tahu de ba ku tihisi lenga vanihamu inau na Dalena Tinoni, minau u tamania na susuliha tana pari de ku kori kenihua tana hana seko na tinoni.” Mi tana tahu vahai nia, me tu ia Jisas me kori vahai vania na tinoni oche nia de, 11“Ko tuchau, mo ko tahaa na mihemu mo ko visu i veramu.”
12Mi tahuna tara momoro ira, me tatuhuru na tinoni nia me tahaa na mihena me dia. Mi ira na tinoni tara toha tana tahu nia ara makai solehana tahuna tara haea na omea vahai nia. Mara livu kaea ia God, mara kori vahai de, “!Aemu, i sau a teha hita na haeana siki omea te ke vahai de!”
Ia Jisas e soloa ia Livae me hahani kolura ira na tinoni sekoseko
(Matiu 9:9-13; Luk 5:27-32)
13Me visu soha ia Jisas tana lihilihi ni namo leho i Galili. Ma na toha na tinoni ara mai tatana ia Jisas, me tuturiha ia Jisas na sau manasa vanira. 14Mi tana tahu te diadia ia Jisas, me haea chikai na tinoni, asana ia Livae, na dalena mane ia Alpeas. Ia Livae e tohotuu tana vale tara pelu takisi tatana. Me tu ia Jisas me kori vahai vania de, “Ko mai mo ko bukeu nau.” Me tatuhuru ia Livae me bukea ia Jisas.
15Mi bukena, me dia ia Jisas me hahani tana valena ia Livae. Me danga na tinoni taha takisi mi kesana na tinoni sekoseko, ara bukea ia Jisas, mi tana tahu nia, mara hahani kolua ia Jisas ma na hana duli nira. 16Mi kesana na tinoni sau manasa tana nina keja ia Mosis mi ira na Parasii lakamu, ara haea ia Jisas te hahani kolura na tinoni sekoseko nira. Mara kori vahai vanira hana duli nira ia Jisas de, “?Ae, e vahai vei na tinoni nia e vu hahani kolura na tinoni taha takisi mi ira kesana tinoni sekoseko vahai nira nia?”
17Mi tahuna te valingea ia Jisas na kori vahai nia, me tu ia me kori vahai vanira de, “Kamu hanaa hamu, na tinoni tara teha na tamani oche, ara teha ngavina haea na dokta. Mi ira bamu na tinoni tara tamani oche tara ngangavina na haea na dokta. Minau u teha na mai na solora ira na tinoni te hoto na mamauridira. Inau u mai matedira ira tara toha tana mamauri sekoseko.”
Ara gesuaa ia Jisas tana toha ni nonginongi ma na teha hahani
(Matiu 9:14-17; Luk 5:33-39)
18Chikai na dani, mi ira hana duli ia Jon na Tinoni Lesovitabu, ma nidira duli ira na Parasii ara toha ni nonginongi ma na teha hahani. Me kesana na tinoni ara mai mara gesuaa ia Jisas mara kori vahai vania de, “Ira hana duli ia Jon na Tinoni Lesovitabu, ma na nidira duli ira na Parasii ara toha ni nonginongi ma na teha hahani. ?Me vahai vei hamu duli nira hoe mara teha kolu na toha ni nonginongi ma na teha hahani?”
19Ma ia Jisas e tuhu visua nidira gesugesu ira, me kori vahai de, “?E vahai vei, e talana vanira bamu ira tara toha tana kabu ni livusai ta kara toha ni nonginongi ma na teha hahani? !Teha vahai ia! Tahuna te ke toha na tinoni te livusai kolura nina papi nira, ira ba kara teha toha ni nonginongi ma na teha hahani. 20Ngeni ba ke chau mai na tahu, ma kara taha salihia ira na tinoni livusai vaolu nia. Mi tana tahu nia, ba kara toha ni nonginongi ma na teha hahani. Me vahai soha lakamu tana nigu duli nira nau. Ira ara utu na toha ni nonginongi ma na teha hahani tahuna tu toha kolura nau.”
Ia Jisas e koria e ruka na kori titihila tatana nina sasani vaolu
21Me kori vahai laka ia Jisas de, “E teha ke chikai ke tahaa na busu ni kaleko vaolu me ke somap kolua na kaleko tuali te nguta noha. Tina vahai ke agosi vahania ia, tahuna te ke vulia, ma na kaleko vaolu nia ngeni ba ke rochia na kaleko ngutanguta nia. Ma na kaleko tuali nia ngeni ba ke tarochi leho liungisia uluhina nia. 22Me teha ke chikai na tinoni te ke duara sivoa na vuaeni vaolu lalona na lasa tuali tara agosia tana kevu ni nanigot. Rongona na vuaeni vaolu nia, ba ke vahania na lasa tuali nia me ke tarochi, ma na vuaeni ma na lasa nia ba kara ko seko volo. Na vuaeni vaolu kara duara sivoa tana lasa vaolu.”
Ia Jisas na Taoviana na Sabat
(Matiu 12:1-8; Luk 6:1-5)
23E chikai na danina na Sabat, ia Jisas e liu dia lalona kesana na uta ni wit kolura hana duli nira. Ma ira hana duli ia ara tuturiha na pichuana na vungu ni wit nira. 24Mi tahuna tara morosi vahania ira na Parasii ia, mara gesuaa ira ia Jisas, mara kori vahai de, “?Ara vahai vei ira ara vu pichua na vungu ni wit nia? Nida keja hita e luti vanihita na ago tana danina na Sabat.”
25Ma ia Jisas e tuhu visu vanira me kori vahai de, “?E vahai vei? ?Amu teha vata hamu na padaa na omea nira te agosia ia Deved ma na nina tinoni nira i sau tana tahu vahai tara ngalo hahani ira? 26Tana tahu vahai nia, ia Abaeata te nidira lehona ira na tinoni ni kere. Me sahe ia Deved tana Valena Tabu ia God me tahaa na bred tabutabu. Na bred tabutabu nia na hadira bamu ira na tinoni ni kere. Me hania ia Deved me sau vanira nina tinoni nira.”#2:26 Morosia tana 1 Samuel 21:1-6; Levitikas 24:9
27Ma ia Jisas e kori vahai vanira laka de, “Ia God e agosia na Sabat vati ni sanga tinoni, me teha na agosiana na Sabat ke taovia vanira tinoni. 28Minau na Dalena Tinoni, na Taoviana na Sabat.”
Currently Selected:
Mak 2: mln
Highlight
Share
Copy
Want to have your highlights saved across all your devices? Sign up or sign in
© 2024 (active), Wycliffe Bible Translators, Inc. All rights reserved
