Mak 1

Ia Jon Na Tinoni Lesovitabu e naho me valakaa na sala

(Matiu 3:1-12; Luk 3:1-18; Jon 1:19-28)

1Ide na tuturihana na Saurongo Talana tana rongona ia Jisas Kraes#1:1 Na papadana na asa Kraes ma na asa Mesaea na nina vivili ia God., na Dalena ia God.#1:1 Kesana na kopi tuali nira ara teha tamania na mamare “na Dalena ia God.” 2Ia God e kori vania ia propet Aesaea tana rongona na dalena ia, me mare vahania de,

“Ba ku sau nahoa nau nigu tinoni saurongo

me ke valakaa na sala vaniho.”#1:2 Morosia tana Malakae 3:1

3Ma ia ba ke huhuu tana talu mangu, me ke kori vahai de,

“Kamu onioni vania nina sala na Taovia,

ma kamu hotosia na meana ia te ke liu.”#1:3 Morosia tana Aesaea 40:3

4Ba, me laba mai ia Jon na Tinoni Lesovitabu tana talu mangu nia, me kori lengaa na valaguna ia God me lesovi tabura na tinoni nira. Me kori lenga vanira vahai de, “Kamu tuu pililiu basiaa hamiu seko, ma kamu lesotabu, ma ia God ke kori kenihua tana hamiu seko.” 5Me danga na tinoni i Jiudia ma na vera leho i Jerusalem, ara dia na valingeana nina sasani ia Jon. Ara kori lengaa ira hadira seko, ma ia Jon e lesovitabura tana kolo i Jodan.

6Me sahelia ia Jon na kaleko daho tara agosia tana vulu ni kamel, me sori talihua tana bubusana na halo tara agosia ira tana kevu ni buluka. Ma na hana hahani ia na kalai ma na bulumijua.#1:6 Na kaleko ma na hahani vahai de te tihilana toha kolu tana talu mangu. Mi tana Oltestamen, ia propet Elaeja te saheli lakamua na kaleko vahai de. Morosia tana 2 Kings 1:8. Mi bukena, ma ia Jisas e kori tutuhua ia Jon na propet vahai ia Elaeja tara pipitua ira na Jiu ba ke visu mai. Morosia tana Matiu 11:14, Mak 9:12-13. 7Me kori lengaa ia nina valagu ia God vanira na tinoni nira, me kori vahai de, “Mi ngeni ba ke mai chikai na tinoni te ke leho liungisiu nau, minau u teha kalavata na tihilagu seisuge na choru sivo ma na chuaa na halona nina sadolo ia. 8Inau u lesovitabuhamu hamu tana kolo bamu, ma ia ba ke lesovitabuhamu hamu tana Tarunga Tabu.”

Ia Jisas na borongana dalena ia God

(Matiu 3:13-17; Luk 3:21-22)

9Me teha na oka bukena, ma ia Jisas e basiaa i Nasaret tana provins i Galili, me dia tatana ia Jon me ke ni lesovitabua ia tana kolo i Jodan. 10Mi tahuna te chuu ia Jisas me laba kae mai, me morosia na heven te haruharu, ma na Tarunga Tabu e sivo mai tatana ia vahai chikai na manu vahai na kavuku.#1:10 Morosia tana Aesaea 64:1 11Tana tahu nia, me vota mai chikai na valagu i heven me kori vahai de, “Ihoe na borongana dalegu kalavata nau tu sahaviho, minau u mamahela tatamu hoe.”

Ia Setan e tovoa ia Jisas

(Matiu 4:1-11; Luk 4:1-13)

12Me teha na oka bukena, ma na Tarunga Tabu nia e udungia ia Jisas me dia tana talu mangu. 13Me danga na omea levo achiachi ara totoha tana hana tuhu nia. Me toha ia Jisas tana talu mangu nia lalona e vati sangavulu na dani, me visa tahu nia ia Setan e tovoa ia. Mara mai na enjol nira mara sangaa ia Jisas.#1:13 Morosia tana Deut 8:2-3

Ia Jisas e sololoera e vati na tinoni ni vuho cheche

(Matiu 4:12-22; Luk 4:14-15; 5:1-11)

14Mi bukena tara livua ia Jon tana peresini, ma ia Jisas e dia i Galili me ke ni kori lengaa ia nina saurongo talana ia God. 15Me kori vahai vanira de, “Nina tahu ia God e mai noha, ma na nina baravata#1:15 Tana nida valagu hita, na asa baravata nia e tuhutuhu vahai na asa Kingdom tana Iglis. ia God e maravia na mai! Mihamu kamu tuu pililiu basiaa hamiu seko, ma kamu donua hamu nina saurongo talana ia God.”

16Mi tahuna te diadia ia Jisas taonia lihilihina na namo leho i Galili, me morosia ia e ruka na tamatasi, ia Saemon ma ia Andru, na tinoni ni vuho cheche. Koera ara ko chochoni vuho tana namo leho nia. 17Me kori vahai vanikoera ia Jisas de, “Kamu ko bukeu nau mu ku ni tihisi vanikohamu na vuho tinoni.” 18Mara ko tangochaku koera mara ko basiaa kodira vuho, mara ko dia kolua ia.

19Ma ia Jisas e dia kalikali laka, me morosikoera ia Jemes ma ia Jon, koera nia na dalena mane ia Sebedi. Mara ko toha lalona kodira vaka pepechi mara ko valakaa kodira vuho. 20Mi tana tahu nia, me solokoera ia Jisas mara ko buke lakamua ia. Mara ko basiaa koera na tohakodira ia Sebedi lalona na vaka nia kolu na tinoni ago nira, mara ko dia kolua koera ia Jisas.

Ia Jisas e huru chonia chikai na tarunga seko

(Luk 4:31-37)

21Ma ia Jisas ma na hana duli nira ara mai tana vera leho i Kapaneam. Mi tana dani na Sabat, ia Jisas e dia tana vale lotu ira na Jiu, me tuturiha ia na sasanira na tinonina na vera nia. 22Mi ira na tinoni nira tara valingea nina valagu ia Jisas, ara makai tana nina sasani ia, matengana ia te tihisi lengaa ia e tamania na susuliha. Ma na nina sasani ia e teha vahai nidira sasani ira na tinoni sau manasa tana nina keja ia Mosis.

23Mi tana tahu lakamu nia, e chikai na tinoni te tohavia na tarunga seko te toha lalona na vale lotu nia, me huhuu vahai de, 24“?Ia Jisas ni Nasaret, na hua to ngangavina hoe tatamami hami? Saga hoe o mai na luvusihami hami! Minau u hana talanaa isei hoe. !Ihoe nina Tinoni Tabu ia God!”

25Me valagu susuliha ia Jisas me kejalia na tarunga seko nia, me kori vahai de, “!Ko toha mui, mo ko dia choni hoe tatana tinoni nia!”

26Ma na tarunga seko nia e vahania na tinoni nia me hahariri solehana, me huu me ai leho lakamu, me chulu na tarunga nia tatana na tinoni nia. 27Mara makai solehana e visa na tinoni, mara tuturiha na vaigesuahi mara kori vahai de, “?Na hua vahai nimu nia? E chikai na sasani vaolu laka de nia. !Ia e valagu vahai na tinoni te tamania na susuliha! Seisuge na tarunga seko nira nia, tahuna te kejalira, mara valinge lakamua ia.”

28Ma na kokorina ia Jisas e talihu laba tangochaku lalona na provins i Galili.

Ia Jisas e maurisira danga na tinoni tara oche

(Matiu 8:14-17; Luk 4:38-41)

29Ma ia Jisas kolu ia Jemes ma ia Jon ma ira hana duli nira ia, ara basiaa na vale lotu nia, mara dia hotohoto ira tana valena ia Saemon ma ia Andru. 30Tahuna te dia ia Jisas me chau tana vale nia, mara kori vania ia na gosi vungona ia Saemon na tinana hana toha kolu ia te jaro i mihe, matengana ia e bilabila solehana. 31Me dia ia Jisas me tahi tatuhurusia. Mi tana tahu vahai nia, me dia choni na oche nia tatana ia. Mi bukena ia, me valakaa ia hadira hahani ira.

32Mi tana ngulavina nia bukena te joku na aso, ma ira na tinoni ara taha maira na tinoni tara tamania na oche vania ia Jisas, mi ira lakamu te tohavira na tarunga seko nira. 33Me visa na tinoni kode tana vera leho nia ara mai mara sai tana matana vale nia. 34Ma ia Jisas e maurisira danga na tinoni tara tamania e danga na vatana na oche. Me huru choni lakamua ia dangana na tarunga seko mara dia choni tatadira na tinoni. Ma ia e teha talasangara na tarunga seko nira kara valagu, matengana ira ara hana kode nohaa isei ia.

Ia Jisas e kori lengaa na saurongo talana tana vale lotu ira na Jiu

(Luk 4:42-44)

35Mi tana mohomoho putiputi, tahuna te teha vata dato na aso, me rerei ia Jisas me dia tana malengana te mangu me nonginongi. 36Mi bukena ia, ma ia Saemon mi ira nina papi ara daia ia Jisas. 37Mi tahuna tara haea ira ia Jisas, mara kori vahai vania de, “So, visa na tinoni de ara daiho hoe.”

38Ma ia Jisas e kori vahai vanira de, “Hita ka dia laka tana vera varangi nira kesana, mu ku ni kori lenga vanira nina valagu ia God. Ia vahai u vu ni mai nau.”

39Me liuvia ia Jisas na vera nira lalona na provins i Galili, me kori lengaa ia nina valagu ia God lalona na vale lotu nira, me huru chonia ia na tarunga seko nira tatadira ira na tinoni.

Ia Jisas e maurisia chikai na tinoni te hadovia na mudo#1:40 Na mudo nia e chikai nida oche ni sau, me tovosi kalikali vania na oche Leprosi tana tahu ira na Israel. Tina vahai na Leprosi te ke hadovia ke chikai, mara morosi vahania ia e teha na male tana nidira naunau ira, ma kara livu salihia tana vera.

(Matiu 8:1-4; Luk 5:12-16)

40Me mai chikai na tinoni te hadovia na mudo, me sivo tuturu tana matana ia Jisas, me navusia me kori vahai de, “Inau u hanaa hoe o tamania na susuliha. Tina vahai ko tala kiki hoe, mo ko vani malesiu nau mu ku ni talana visu soha.”

41Ma ia Jisas e sahavi solehanaa ia, ba me chibeli dia ia na tinoni nia, me kori vahai vania de, “Inau u tala. !Ko male visu soha hoe!” 42Me laba taora ba me sagava na mudo nia, me male visu soha na tinoni nia. 43-44Ma ia Jisas e varakoena vania na tinoni nia me kori vahai vania de, “Ko mui hoe na kori lenga vania siki tinoni. Ba, mo ko dia hotohoto tatana na tinoni ni kere, me ke ni vilekea na kokoramu, ma kara ni hanaa ira kode na tinoni te mavo noha na kokoramu hoe. Mo ko agosia na kere vahai tana nina keja ia Mosis mo ko ni male.” Ma ia Jisas e sau diaa ia.

45Ba, me dia soha laka na tinoni nia, me tuturiha na kori valegoa na hua te tu ia Jisas me agosi vania. Me matengana te vahai nia, me teha ia Jisas na hanaa na lela lalona siki vera tana matadira na tinoni. Ba, me toha salihi ia tana malengana te teha siki tinoni na toha tatana. Mara maimai vata ira na tinonina visa na vera ma kara ni morosia ia.

Currently Selected:

Mak 1: mln

Highlight

Copy