Yohannis 6

Yeesus koona shiix bettiisha

(Maatiyos 14:13-21; Markos 6:30-44; Luukas 9:10-17)

1Amaymik sarrah, Yeesus Tiberiyasti igil akko yarhxin, Galiilaati igilhi waacina fanah yedee. 2Laxuute maralle abe ishaarar yubliinimhi sabbatah mango xiyaw lakadde akko aduuk yinin. 3Yeesus koomalle yewceh amalle ishi katattaynitlih defeye. 4Yahuud cid kin Faasigi lel yakko kuuk yine. 5Amaymik sarrah, ishi intit xaf-isheyaako mango xiyaw kaa gabolle amiituk yubleh, Filibboosuk: “Ta xiyaw beetan folo awlaako dhamno kino?” akko yerhxe. 6Usuk abo lem isheh aarhiguk yine hanuk, kaa yaqhaaso ciloh akko yerhxem kinni. 7Filibboos: “Lamma bool diinar hi folo walaa cindhadhdhaahikkeh ten migufta” akko yerhxe. 8Amaa katattaynitko Indiryaas, Simcoon Bithroos sacal kinya tahe akko yerhxe: 9“Talle cadeelaw koona kinnas kee lamma caasatto le cindhooki yane, laakin tayidhdha mango marah ayim akah takko?” 10Yeesus: “Ta xiyaw defeysha” yerhxe. Kado, amaa caralle mango cashsho tine. Amayimko, labha bisa koona shiix takkemik defeyen. 11Yeesus, amaa kinnos beyeyaako dhaaco alle abek sarrah, amaa defeyteh tine xiyawah kele. Caasa lel amayim balih, sinneh akah farheeniikah. 12Inkoh xayteenik sarrah ishi katattaynitik: “Teggereerecem racteya inkoh eskettaantaaki, walaa inkim akko alaye wayto” akko yerhxe. 13Amaymih usun amaa cadeelaw koona kinnasko amaa mari beeteenimko ractem teggereereceya yeskettiinih lamman kee taman jambiiliya akko yemegin. 14Amaa xiyaw lel usuk abe ishaarar yublin gedda: “Tati rummah tamaa caalamalle yamaato le Nabii kinni” yerhxin.

15Sarrah yemeetinyaako xaylah nugus akko aboona loonim yeerhegeh, malammih Yeesus ishi ulah koomalle gaxe.

Yeesus layet bukalle gerha

(Maatiyos 14:22-23; Markos 6:45-52)

16Kasi yekke gedda, kaa katattaynit igil fanah oobeenih, 17jalbadde koreenih igilko Kafarnaxuumulle taben. Baarho dhumteh tine, Yeesus lel kaddih alle amiitekkah yine. 18Dhacuma haboobale tinemhi sabbatah, amaa igil angixiluk yine. 19Koonah lixa kiilometer yedeynimko sarrah, Yeesus igil bukalle yeeceteh amaa jalbah kab-yerhxeh yublin gedda, mashshiiten. 20Usuk laakin: “Yotta kinni, mimashshiitina” akko yerhxe. 21Usun lel amaa jalbadde kaa kabbaateenih, akkanih lel amaa jalba usun alle aduuk yinin baarho gufte.

Anu aniinat folo kiyo

22Malammit max amaa igil tabsolle racteh tine mango xiyaw, amalle inki jalba bisa tinem kee Yeesus amaa jalbadde ishi katattaynitlih moorobinnam, laakin kaa katattaynit sinni ulah yedeynih yiniinim yublin. 23Aki jalbab Tiberiyasko lel amaa Maddari dhaaco alle abeyaako folo alle beeteenih yinin carah agaagalle yemeete. 24Sarrah amaa mango xiyaw Yeesus yakko kaa katattaynit amalle miyiniinim yublin gedda, sinneh jalababadde koreenih Yeesus goronuh Kafarnaxuum fanah yedeyin.

25Igilko amaa carha kaa geyen gedda: “Mudarris, talle manda temeete?” akko yerhxin. 26Yeesus: “Yotta wagiyak taniinim folo betteenih xayitten gedda kibah, ishaarar tubliinih makinam rummah, rummah sinak arhxiyuk ane. 27Abba kin Yalli ishi maxtam kayyalle hayeh yanemhi sabbatah, Xiyawti Barhi sinah yaxaw le umman geedit aniinah takke foloh kibah bakitto le foloh mixawalina” akko yerhxe. 28Sarrah usun: “Yallih ciyyo abno, ayim abno nolle tane?” akko yerhxin. 29Yeesus: “Yallih ciyyo tayim kinni, tamaa usuk fareh yanetiyah taaminiinim” yerhxeh alle deheye. 30Amaa gedda usun: “Amaydo, nubleh ku naamano ciloh awlih ishaara abta? Ayimti ciyyo abta? 31‘Beetoona carsheeko folo akah yoxoye#Zaabur 78:24’ terhxeh akah tunkuttubeh taneekah, ni abbub zibolle ‘manna’#6:31 Manna Israa-eel xiyaw Masriiko hi muucak sarrah saxralle Yalli cibra kin araxah ten bettiishe folo kinni. akko yarhxin folo beeten” akko yerhxin. 32Sarrah Yeesus: “Carsheeko folo sinah toxoyem Moosa akkekkah rummaahit folo yi Abba carsheeko sinah yaxayem rummah rummah sinak arhxiyuk ane. 33Amayim lel Yallih folo, usuk carsheeko oobayaako aniina caalamah yaxayem kinni” akko yerhxe. 34Usun: “Maddara, amaa folo umman gedda noh uxuu” akko yerhxin.

35Yeesus: “Anu aniinat folo kiyo; yottalle amiitinnanti safriito maki, yottah aamininnanti lel bakhaarito maki. 36Laakin yi tubliinih yi mitaaminiini sinak erhxe. 37Inkoh Abba yoh yaxayem yottalle tamiite, yottalle amiitinnan tiya lel kaa ayyaaco makiyo. 38Amayim lel carsheeko oobeh aniyom inni farhi abo makiiki, yi fareh yane tiyahi farhi abo kinni. 39Yi fareh yane tiyahi farhi lel tayim kinni, inkoh usuk yoh yoxoyeh yanemko walaa inkim akko aylayekkah, abayshimat lellec rabaako ugusam. 40Amayim lel yi Abbah farhi tayim kinni, Barha yableh kayyah aamininnanti umman geedit aniina yaallo kee anu abayshimat lellec kaa rabaako ugusam” akko yerhxe.

41Usuk: “Anu carsheeko obte folo kiyo” yerhxemhi sabbatah, Yahuud yongoroozomin. 42Usun: “Tati tamaa ina kee abba akko naarhige Yeesus, Yoosuf barha makiho? Aymih kinni kado: ‘Anu carsheeko oobe’ yarhxem?” yerhxin. 43Yeesus: “Sinne-sinneh mangaraazamina. 44Tamaa yi fareh yane yi Abba hiriige tiyaako bextih walaa inketti yottalle yamaato mirhiica. Abayshimat lellec lel rabaako kaa uguso kiyo. 45‘Inkoh Yalli ten yaydaraso kinni’ yarhxiinim Nobowadde tunkuttubeh tane. Yi Abbaako yoobbeh yudruseti yottalle yamiite. 46Yallaako kin tiyaako bextih Abba tublem mitane; tati Abba yubleh yane. 47Aamininnanti umman geedit aniina lem rummah rummah sinak arhxiyuk ane. 48Anu aniinat folo kiyo. 49Sin abbub zibolle manna beeteenih raben. 50Ta folo carsheeko obta tiya kinni, akko beetinnanti lel miraba. 51Anu aniina-le folo carsheeko obteya kiyo. Ta folooko beetinnanti, umman geddah maro kinni. Ta caalamti aniinah axawo liyo folo lel yi xazo kinni” yerhxeh alle yedebbe.

52Yahuud lel: “Tati ishi xazo benno aaginah noh yaxaye?” yerhxiinih sinne-sinneh yenkeexedin. 53Amaymih Yeesus: “Xiyawti Barhih xazo betteenih, kaa biilo aacube wayteenimko, sinneh aniina malitiinim, rummah, rummah sinak arhxiyuk ane. 54Yi xazo beetinnanti, yi biilo lel aacubinnanti umman geedit aniina leya, anu lel abayshimat lellec rabaako kaa uguso kiyo. 55Amayim lel yi xazo rummaahit folo, yi biili lel rummaahit macaba kinamhi sabbatah kinni. 56Yi xazo beetinnanti, yi biilo lel aacubinnanti, yi addadde siga, anu lel kaa addadde. 57Yane Abba akah yi fareekah, anu lel Abbat sabbatah akah aneekah, tamaa yotta beetati yakkeedo yi sabbatah maro kinni. 58Tatiyä carsheeko obte folotta kinni, sin abbub beeteenih rabenya balih maki. Ta folo beetinnanti umman geddah maro kinni” akko yerhxe. 59Yeesus tayim yerhxem Kafarnaxuumulle Sunagoogedde aydurusuk kinni.

Umman geedit aniinah waani

60Kaa katattaynitko mango mari yoobbiinih: “Tayim dhacuma marhxo kinni, miyatti yaabbo dhiica?” yerhxin. 61Yeesus laakin kaa katattaynit tayimhi sabbatah angoroozomuk yaniinim ishi afcaadodde yeerhegemhi sabbatah: “Tayim sin kurrayishshaho? 62Xiyawti Barhi tamaa awwalah alle yinelle korak tablindo ayim abe dhadhdheeni? 63Aniina taxayem Ufaye kinni, xazo nafaaca male. Anu sinlih waanisheh anem Ufaye kee aniina kinon. 64Laakin sinko gari aamininnixeya yanin” akko yerhxe. (Amayim lel Yeesus, aamininnixe mari miya kinoonim kee kaa yasxaw leti miyatto kinam erherhaako yeerhegeh yinemhi sabbatah kinni). 65Usuk lel: “Tayim kinni anu sinak erhxem, Abba dhicshiishe tiyaako bextih, walaa inketti yolle yamaato mirhiica” akko yerhxe.

66Taymik sarrah kaa katattaynitko mango mari caazalle gaxen, kaalih lel maadayinnooni. 67Amaymih Yeesus amaa lamman kee taman fartoytiyak: “Atin gantah tadawna fadhdhaana?” akko yerhxe. 68Simcoon Bithroos taginah alle yedebbe: “Maddara, miya fanah nadiye? Atu umman geedit aniinah waani lito, 69nanu lel neemeneh nane, atu Yallih Quddus kin tiya kitom lel neerhegeh nane.” 70Yeesus: “Anu sin midooriyoho lamman kee tamanak? Yakko kibah sinko inketti ibliis kinni” yerhxeh alle yedebbe. 71Amaa lamman kee tamanko kinni hanuk kaa yasxaw le tiya kinamhi sabbatah tahe akko yerhxem Yahuuda, Simcoon Iskariyoot barha kinni.

Currently Selected:

Yohannis 6: SCC

Highlight

Copy