УблапӀэ 29
29
ЯтӀокӀэнэрэ бгъурэ шъхьэр
Якъуб Рахъэл зэрэӀукӀагъэр
1Якъубэ игъогу лъигъэкӀуати, тыгъэ къокӀыпӀэм щыпсэурэ цӀыфхэм ячӀыгу нэсыгъ. 2Шъофым псынэ итэу, ащ мэл Ӏэхъогъуищ Ӏулъэу ылъэгъугъ. А псынэм псы къырахызэ, былымхэр рагъашъощтыгъэх. Псынашъхьэм мыжъошхо телъыгъ. 3ЗэкӀэ Ӏэхъогъухэр ащ зыщызэрэугъойхэкӀэ, Ӏахъомэ мыжъор псынашъхьэм къытырагъэукӀорэикӀыти, мэлхэр псы рагъашъощтыгъэх; етӀанэ икӀэрыкӀэу мыжъор псынашъхьэм тыралъхьажьыщтыгъэ.
4Якъубэ Ӏахъомэ яупчӀыгъ: «Скъошхэр! Тыдэ шъукъикӀыра?» Адрэмэ къаӀуагъ: «Тэ Хъаран тыщыщ». 5Якъубэ яупчӀыгъ: «ШъошӀа шъо Лабан, Нахъор ыкъо?» Ахэмэ къыраӀожьыгъ: «ТэшӀэ». 6Ар джыри яупчӀыгъ: «Сыд, ищыӀакӀэ дэгъуа?» Ахэмэ джэуап къатыжьыгъ: «Дэгъу, марыба Рахъэл, ащ ыпхъу, мэлымэ акӀыгъоу къэкӀо». 7«Тыгъэр джыри лъагэ, – ариӀуагъ Якъубэ чэмахъомэ, – былымхэр шъуугъоижьынхэу игъоп, мэлхэр псы ежъугъашъохи, хъупӀэм шъуфыжьхэба». 8Ау ахэмэ къыраӀуагъ: «ЗэкӀэ Ӏэхъогъухэр къэзэрэугъоижьыфэхэ ар тшӀэн тлъэкӀыщтэп. Мыжъор джащыгъум къытрагъэукӀорэикӀынышъ, мэлхэр псы едгъэшъощтых».
9Ахэр зэрэгъэгущыӀэхэфэ, ятэ имэлхэр къыфхэзэ, Рахъэл къыӀухьагъ – ар мэлэхъуагъ. 10Якъубэ янэшэу Лабан ыпхъу Рахъэл мэлхэм ягъусэу зелъэгъум, мыжъор псынашъхьэм къытригъэукӀорэикӀи, мэлхэр псы ригъэшъуагъэх. 11Якъубэ Рахъэл ебэуи, ымакъэ Ӏэтыгъэу къэгъыгъ. 12Рахъэл ятэ зэриӀэхьылыр, ежь Рыбкъэ зэрикъор Якъубэ ащ риӀуагъ. Пшъашъэр чъэжьи, ятэ риӀотэжьыгъ.
13Ышыпхъу ыкъо Якъубэ икъэбар зызэхехым, Лабан ащ къыпэгъочъыгъ, ӀаплӀ къырищэкӀи, къебэуи, иунэ рищагъ; Якъубэ ежь икъэбар зэкӀэ Лабан къыфиӀотагъэти, 14Лабан ащ къыриӀуагъ: «Шъыпкъэ дэдэмкӀэ, о скъупшъхьи ущыщ, сыли ущыщ». Якъубэ ащ ыдэжь мазэрэ щыӀагъ.
Якъубэ Леарэ Рахъэлрэ къызэрищагъэхэр
15Уахътэр зытекӀым, Лабан Якъубэ къыриӀуагъ: «УзэрэсиӀэхьылым пае пкӀэнчъэу сэщ пае улэжьэна? КъысаӀу, сыда лэжьапкӀэу остыщтыр?»
16Лабан пхъуитӀу иӀагъ: нахьыжъым ыцӀагъэр Леа; нахьыкӀэм – Рахъэл. 17Леа ынэхэр дэхагъэх#29:17 Ижъырэ джуртыбзэкӀэ тхыгъэм ятӀонэрэ мэхьани иӀ: ынэхэм къакӀичыгъагъ., ау Рахъэл ыпкъыкӀи ынапэкӀи дэхагъэ. 18Якъубэ Рахъэл шӀу ылъэгъугъэти, Лабан риӀуагъ: «Упхъу нахьыкӀэу Рахъэл пае илъэсиблырэ сыпфэлэжьэщт». 19Лабан къыӀуагъ: «НэмыкӀ горэм естын нахьи, ар о къыостымэ нахьышӀу, садэжь щыпсэу».
20Якъубэ илъэсиблырэ Рахъэл пае лэжьагъэ, ау пшъашъэр шӀу дэдэ ылъэгъущтыгъэти, ахэр ежь мэфэ заулэм фэдэу къыщыхъугъэх. 21Якъубэ риӀуагъ Лабан: «Сишъуз къысэт, сыда пӀомэ ыдэжь сызщихьащт уахътэр къэсыгъ».
22Лабан зэкӀэ игъунэгъухэр къыригъэблагъэхи, ешхэ ешъо ышӀыгъ. 23Пчыхьэ зэхъум, ыпхъу Леа Якъубэ дэжь къыщагъ; Якъубэ ащ гохьагъ. 24Лабан иунэӀут бзылъфыгъэу Зилпа, ыпхъу Леа иунэӀутынэу ритыгъ.
25Пчэдыжьым Якъубэ ылъэгъугъэр – мары Леа! Арыти Якъубэ риӀуагъ Лабан: «Сыда о къысэпшӀагъэр? Рахъэл паеба сэ Ӏоф о зыкӀыпфэсшӀагъэр? Сыда сызкӀэбгъэпцӀагъэр?» 26Лабан къыӀуагъ: «Тэ талъэныкъо нахьыжъым ыпэу нахьыкӀэр дагъакӀорэп. 27Мы нысэщэ мэфиблым ащ кӀыгъури, етӀанэ нахьыкӀэри къыоттыщт, о джащ пае илъэсиблырэ джыри сэщ пае улэжьэщт».
28Якъубэ ащ еуцолӀагъ. Тхьэмафэр зытешӀэм, Лабан ыпхъу Рахъэл шъузкӀэ къыритыгъ. 29Лабан иунэӀут бзылъфыгъэу Билхэ ыпхъу Рахъэл иунэӀутынэу ритыгъ. 30Якъубэ Рахъэл гохьагъ, Леа нахьи Рахъэл бэкӀэ нахь лъэшэу шӀу ылъэгъущтыгъэ, джыри илъэсиблэ ащ пае Лабан фэлэжьагъ.
Якъубэ ыкъохэр
31Зиусхьаным Якъубэ Леа шӀу зэримылъэгъурэр къызелъэгъум, ащ сабый къыфэхъунэу ышӀыгъ, ау Рахъэл сабый хэкӀыщтыгъэп. 32Леа лъэрымыхь хъугъэ, шъао къыфэхъугъ, ащ Рубэн#29:32 Рубэн – ижъырэ джуртыбзэкӀэ къикӀырэр: еплъ – шъао. фиусыгъ; сыда пӀомэ ащ къыӀуагъ: «Зиусхьаным ситхьамыкӀагъэ къылъэгъугъ, джы силӀ шъыпкъэмкӀэ шӀу силъэгъущт».
33Джыри ащ ышъо сабый хафи, шъао къызыфэхъум, къыӀуагъ: «Зиусхьаным зэхихыгъэ сэ шӀу сызэрамылъэгъурэр, джащ пае джыри зы шъао къыситыгъ». Ащ ЩымӀон#29:33 ЩымӀон – ижъырэ джуртыбзэкӀэ къикӀырэр: зэхэпхын. фиусыгъ.
34Джыри ащ ышъо сабый хафи, шъао къыфэхъугъ. «Джы силӀ сэ къысэпкӀылӀэщт, – ыӀуагъ ащ, – сэ ащ шъэуищ къыфэслъфыгъ». Джащ пае Лэуй#29:34 Лэуй – ижъырэ джуртыбзэкӀэ къикӀырэр: ыгукӀэ къысэпкӀылӀэн. фиусыгъ.
35Джыри зэ ащ ышъо сабый хэфагъ, джыри шъао къыфэхъугъ. «Джы сэ Зиусхьаным щытхъу фэсшӀыщт», – ыӀуи, джащ пае ыкъо Ехъуд#29:35 Ехъуд – ижъырэ джуртыбзэкӀэ къикӀырэр: ущытхъуныр. фиусыгъ. Ащ ыуж мылъфэжьэу хъугъэ.
Currently Selected:
УблапӀэ 29: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
