УблапӀэ 30
30
ЯщэкӀэнэрэ шъхьэр
1Якъубэ сабыйхэр зэрэдимыгъотыхэрэр елъэгъути, Рахъэл ышыпхъу ехъуапсэщтыгъэ. «Сабыйхэр къысэтых, – риӀуагъ ащ Якъубэ, – армырмэ сылӀэщт». 2Ау Якъубэ, Рахъэл фэгубжи, риӀуагъ:
«Сэра Тхьэу о сабый пхэмыкӀынэу зышӀыгъэр?» 3«Мары сиунэӀут бзылъфыгъэу Билхэ, – ыӀуагъ Рахъэл, – ащ ыдэжь ихь: слъэгуанджэхэм сабый атесынэу къысферэлъф#30:3 Мыщ къикӀырэр – мылъфыкъор шъаокӀэ зэраштэщтыгъэ хабзэр ары, ащ ыуж шъаор Рахъэл ыкъо мэхъу..
Ащ ихьатырыщтми, сабыйхэр сэри сиӀэных».
4Рахъэл иунэӀут бзылъфыгъэу Билхэ ащ ыгъэшъузынэу ритыгъ; Якъубэ ащ ыдэжь ихьагъ. 5Билхэ ышъо сабый хафи, Якъубэ шъао къыфилъфыгъ. 6«Тхьэм сиӀоф къызэхифыгъ, – къыӀуагъ Рахъэл, – силъэӀу къызэхихи, шъао къыситыгъ». Джащ пае Дан#30:6 Дан – ижъырэ джуртыбзэкӀэ къикӀырэр: къыгъэшъыпкъэжьыгъ. фиусыгъ.
7Рахъэл иунэӀут бзылъфыгъэу Билхэ джыри лъэрымыхь хъуи, ятӀонэрэ шъаор Якъубэ къыфилъфыгъ. 8«Бэнэныгъэ лъэшкӀэ сэ сшыпхъу себэни, сытекӀуагъ», – ыӀуагъ Рахъэл. Джащ пае ишъао Нафталый#30:8 Нафталый – ижъырэ джуртыбзэкӀэ къикӀырэр: убэнэныр. фиусыгъ.
9Леа ежь зэрэмылъфэжьыщтым егупшыси, иунэӀут бзылъфыгъэу Зилпа Якъубэ шъуз гуадзэу ритыгъ. 10Леа иунэӀут бзылъфыгъэу Зилпа Якъубэ шъао къыфилъфыгъ. 11Леа къыӀуагъ: «Синасып къыхьыгъ». Джащ пае шъэожъыем Гъад#30:11 Гъад – ижъырэ джуртыбзэкӀэ къикӀырэр: насып. фиусыгъ.
12Зилпа джыри шъао Якъубэ къыфилъфыгъ. 13Арыти Леа къыӀуагъ: «Гъогу мафэ сытеуцуагъ! Бзылъфыгъэмэ насыпышӀу къысаӀощт!» Джащ пае Ащэр#30:13 Ащэр – ижъырэ джуртыбзэкӀэ къикӀырэр: нахь насыпышӀу. фиусыгъ.
14Коц хыныгъом Рубэн шъофым мандрагорхэр#30:14 Мандрагор – уц лъапс, ушхъухьанымкӀэ, бзылъфыгъэм сабый хэкӀынымкӀэ агъэфедэщтыгъэ. къыщигъотхи, янэу Леа къыфихьыгъэх. Рахъэл Леа елъэӀугъ: «Пкъо къыхьыгъэ мандрагорхэр къысэтба». 15Ау Леа ащ къыриӀуагъ: «СилӀ зэрэстепхыгъэр имыкъоу, джы скъо имандрагорхэр зыӀэкӀэбгъахьэхэ пшӀоигъу, ара?» Рахъэл къыӀуагъ: «Пкъо имандрагорхэм апае ащыгъум силӀ нычэпэ къыбгорэлъ».
16Пчыхьэм Якъубэ губгъом къызекӀыжьым, Леа ащ пэгъокӀи, риӀуагъ: «Садэжь къихь. Скъо имандрагорхэмкӀэ сэ сшыпхъу ущысщэфыгъ». Арыти а чэщым Якъубэ Леа голъыгъ. 17Леа илъэӀу Тхьэм къызэхихыгъ, ащ ышъо сабый хафи, ятфэнэрэ шъаор Якъубэ къыфилъфыгъ. 18Джащыгъум Леа къыӀуагъ: «СиунэӀут бзылъфыгъэ силӀ зэрэдэзгощыгъэм пае Тхьэм сиӀахьэ къыслъигъэӀэсыжьыгъ». Джащ пае Леа ыкъо Исасхъар#30:18 Исасхъар – ижъырэ джуртыбзэкӀэ къикӀырэр: гушӀуапкӀэ. фиусыгъ.
19Джыри Леа сабый ышъо хафи, яхэнэрэ шъаор Якъубэ къыфилъфыгъ. 20Леа къыӀуагъ: «Тхьэм тын шӀагъо къысфишӀыгъ! Джы силӀ лъытэныгъэ къысфишӀын шъыпкъ, сэ ащ шъэуих къыфэслъфыгъэба!» Леа ыкъо Зэбулун#30:20 Зэбулун – ижъырэ джуртыбзэкӀэ къикӀырэр: напэ е тын. фиусыгъ. 21ЕтӀанэ пшъашъэ къылъфи, ащ Динэ фиусыгъ.
22Тхьэр Рахъэли егупшысагъ, ащ илъэӀу къызэхихи, ышъо сабый хигъэфагъ. 23Рахъэл лъэрмыхьэ хъуи, шъао къыфэхъуи, къыӀуагъ: «Тхьэм емыкӀу къысигъэхьыгъэп». 24Ыкъо Юсыф#30:24 Юсыф – ижъырэ джуртыбзэкӀэ къикӀырэр: нэмыкӀ Ащ къерэт, Ащ ыштагъ. фиуси, лъэӀуагъэ: «Зиусхьаным джыри сэ зы шъао къысерэт!»
Якъубэ Лабан фэлажьэзэ бай зэрэхъугъэр
25Юсыф къызэхъум ыуж, Якъубэ Лабан риӀуагъ: «Тадэжь, сихэгъэгу сыкӀожьынэу сытӀупщ, 26сызкӀыпфэлэжьэгъэ сишъузхэмрэ сисабыйхэмрэ къысэтхи. Ори ошӀэ Ӏофэу пфэсылэжьыгъэр зыфэдэр». 27Ау Лабан ащ къыриӀуагъ: «НэшӀукӀэ сэ о укъысэплъыгъэмэ, сыолъэӀу, къэуцу, джэнчымкӀэ сэ къэсшӀагъ оркӀэ Зиусхьаным ынэшӀу сэри скӀыгъу зэрэхъугъэр». 28ЕтӀани къыпигъэхъуагъ: «ЛэжьапкӀэу къыптефэрэр ор орэу къаӀуи, сэ къыостыщт».
29Якъубэ ащ къыриӀуагъ: «Сэ о сызэрэпфэлэжьэгъэ шӀыкӀэр ори ошӀэ, сапэтыфэ уибылымхэр зэрэхъугъэхэри ошӀэ. 30Сэ сыкъэмыкӀозэ уиӀагъэр макӀэ, джы бэ хъугъэ! Сыдым сыфежьагъэми, Тхьэм ынэшӀу джарэу къыпщифэщтыгъэ! Ау сыдигъуа сэ сиунагъо сызыфэлэжьэщтыр?» 31Лабан къыӀуагъ: «КъаӀо, сыда къыостыщтыр?» Якъубэ къыӀуагъ: «Зи къысэмыт. Сэ къыуасӀорэр къысфапшӀэмэ, сэ джыри уимэлхэр пфэзгъэхъущтых ыкӀи къэсыухъумэщтых. 32Непэ зэкӀэ уимэл пчэн Ӏэхъогъухэр къэскӀухьащтых; къахэщых ахэмэ мэлхэу бжьыгъэ зыхэлъхэри, къолэнхэри, шӀуцӀэхэри, джащ фэдэу бжьыгъи хэлъэу, къолэнэуи пчэнхэм ахэтхэри. Ащ фэдэ былымхэр сэркӀэ лэжьапкӀэ хъущтых. 33ЕтӀанэ силэжьапкӀэ уеплъынэу укъызыкӀокӀэ, сэ сизэфагъэ уапашъхьэ къыщынэфэщт. Джы щегъэжьагъэу бжьыгъэ хэмылъэу е мыкъолэнэу пчэн е мэлхэм ащыщэу мышӀуцӀэ сэсыемэ къахэбгъуатэмэ, ар сэ стыгъугъэу мэхъу».
34«Дэгъу, – ыӀуагъ Лабан, – орэхъу о зэрэпӀуагъэу». 35Ау а мафэм Лабан къахищыгъэх ачъэ къолэнхэри, бжьыгъэ зыхэлъхэри, зэкӀэ пчэнэу бжьыгъэ зыхэлъхэри, къолэнхэри, фыжь тӀэкӀу нэмыӀэми зыхэлъыгъэхэри, зэкӀэ мэл шӀуцӀэхэри, ахэр агъэхъунхэу ыкъомэ аритыгъэх. 36Якъубэ мэфищ гъогукӀэ пэчыжьэхэу ахэр ӀукӀыгъэх. Лабан ибылымэу къэнагъэр Якъубэ ыгъэхъущтыгъэ. 37Къумбыл чъыгым, миндалым, платаным ячы цӀынэхэр ащ ыштэхи, пхъашъомэ шъолъырхэр афишӀыгъэх, пхъэ фыжьыр къычӀигъэщызэ. 38Шъолъырхэр зыхэщыгъэ чы упсыгъэхэр ащ пчэнхэр псы зыщешъощтыгъэ хьакъуашъомэ арилъхьагъэх, ахэр псы ешъонхэу къызыкӀохэкӀэ, а уахътэм зэгуахьэщтыгъэхэти, чыхэр алъэгъунхэу. 39Чы къолэнмэ апашъхьэ пчэнхэр щызэгуахьэщтыгъэхэти, чэцӀхэр къолэнхэуи, бжьыгъэ ахэлъэуи къалъфыщтыгъэ. 40Якъубэ мэлхэр къахищыхэти, ахэр Лабан имэл къолэнхэмрэ шӀуцӀэхэмрэ афэгъэзагъэхэу зэкӀолӀэнхэм пае ыгъэуцущтыгъэх. Джы Якъубэ ежь иӀэхъогъу шъхьафэу ыӀыгъыгъ, Лабан иехэм ахэр ахигъэуцощтыгъэхэп. 41Былым лъэшхэр зэгуахьэхэ зыщыхъурэм, Якъубэ чыхэр былымхэм алъэгъунэу хьэкъуашъомэ арилъхьэщтыгъэ, чымэ апашъхьэ щызэгохьанхэу. 42Ау былым хъыбыйхэр зыщызэгуахьэхэрэм, чыхэр арилъхьэщтыгъэхэп. Джаущтэу Лабан былым хъыбыир ие хъущтыгъэ, былым пытэр Якъубэ ӀэкӀахьэщтыгъэ. 43Якъубэ бай дэдэ хъугъэ; ащ мэл пчэн Ӏэхъогъухэри, унэӀут бзылъфыгъэхэри, хъулъфыгъэхэри, махъши, щыди бэ иӀэ хъугъэр.
Currently Selected:
УблапӀэ 30: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
