Mʉkpanganɨa 14
14
Ɗite lɔdʉanɔ ati ɔ ɓangama
1Ya꞉ɓio jɛnɛ angbinga mʉngana, ɨya atɨ ngama Amʉlafɛlɨ ngɨyɔ Sɨnalɨ, nɔ ngama Alɨɔkɨ ngɨyɔ Ɛlasalɨ, nɔ ngama Kɛdɔlɨ Laɔmɛlɨ ngɨyɔ Ɛlamʉ, tɨa kʉ nɔ ngama Tɨdalɨ ngɨyɔ Gɔɨmʉ, ɓa꞉potio-ɔɔ ɗite. 2Ɨɓɔ ɓangama ɓɔgɨna ngʉɓɔnanɨ, ɓa꞉jombonio anɨsa anɨwa ɗite nɔ atɨ ngama Ɓɛla ngɨyɔ Sɔdɔmʉ, nɔ ngama Bɨlɨsa ngɨyɔ Gɔmɔla, nɔ ngama Sɨnabʉ ngɨyɔ Adɨma, nɔ ngama Sɛmɛbɛlɨ ngɨyɔ Sɛbɔɨmʉ, tɨa kʉ nɔ ngama ngɨyɔ Bɛla (ɨsɨ yɔngɔ ɓɔ Jɔalɨ). 3Ɨɓɔ, ɓangama ɓɔkʉ ngʉɓɔnanɨ ɓaɓomu, ɓa꞉jonokiso ɓasʉda ngʉɓeɓo ta ananɨ amugbundu wɔ Sɨdɨmʉ#14:3 Sɨdɨmʉ: pɔ ɓɔ ɨkyɛmʉ ndʉ musipe wangɔkwananamʉ-ɔɔ ɓio, ɨsɨ yɔngɔ ɓɔ lisini ngɨa ata mʉja ɔ mukwe. 4Amati ɔ mago tɛkɛɓɛ nɔ ɓepini, ɓangama ɓɔkʉ ngʉɓɔnanɨ, ɓa꞉ɓio ɛsɨ ɔ ʉpanʉ wɔ ngama Kɛdɔlɨ Laɔmɛlɨ. Yakamɛngana, tɨa akɔ igo ngɨyɔ tɛkɛɓɛ nɔ ɓeetu, ɨɓɔ ɓagama ngʉɓɔnanɨ, ɓɔ꞉sɨkanakɨa. 5Tɨa amati ɔ igo ngɨyɔ tɛkɛɓɛ nɔ ɓɔgɨna, ɨyɔ ngama, Kɛdɔlɨ-Laɔmɛlɨ ɨhɔ nɔ ɓangama ngʉɓa ɓa꞉ɓio naɓɔ, ɓa꞉sa akɔɓundo ɗite ngɨlɔ Ɓalɛfaɨmʉ anɔ Asɨtɛlɔtɨ-Kalanaɨmʉ, nɔ Ɓawajuji anɔ Hamʉ, nɔ Ɓaɛmɨ anɔ Sawɛ-Kɨlɨataɨmʉ, 6nɔ Ɓahɔlɨ akɔ ɨkʉmbʉ yɔ lɨkpangba ngɨyɔ Sɛɨlɨ, kʉ nɔ Ɛlɨ-Palanɨ aki anɔ ambamba ɔ mukengu. 7Ɨyɛ ndʉ ɓa꞉tɔwa inani, ɓɔ꞉tɔsa tɨa anɔ Ɛnɨ-Mɨsɨpatɨ, ɨsɨ yɔngɔ ɓɔ anɔ Kadɛsɨ. Kʉdɔ, ɓa꞉ɓundo ɗite ngɨlɔ Ɓaamalɛkɨ amati ɔ ɨkʉmbʉ ngɨyeɓo kʉ iɓomu. Ɓɔ꞉tɔɓundo kʉ nɔ ɗite ngɨlɔ Ɓaamɔlɨ ngʉɓa ɓa꞉ɓio ɓɔwoleni ɨkʉmbʉ anɔ Hajɛjɔnɨ-Tamalɨ.
8Kʉdɔ, atɨ ngama ngɨyɔ Sɔdɔmʉ, nɔ ngama ngɨyɔ Gɔmɔla, nɔ ngama ngɨyɔ Adɨma, nɔ ngama ngɨyɔ Jɛbɔɨmʉ, nɔ ngama ngɨyɔ Bɛla, ɨsɨ yɔngɔ ɓɔ Jɔalɨ, ɓa꞉jonokiso ɓasʉda ngʉɓeɓo amugbundu ngʉwɔ Sɨdɨmʉ. 9Inani, ɓa꞉sa anɨwa ɗite nɔ atɨ ngama Kɛdɔlɨ-Laɔmɛlɨ ngɨyɔ Ɛlamʉ, nɔ ngama Tɨdalɨ ngɨyɔ Gɔɨmʉ, nɔ ngama Amʉlafɛlɨ ngɨyɔ Sɨnalɨ, nɔ ngama Alɨɔkɨ ngɨyɔ Ɛlasalɨ. Yasugo ɓɔ ɓangama ɓɔgɨna ɓa꞉wa ɗite nɔ ɓangama ɓɔkʉ. 10Ɨyɛ ndʉ ɓangama ɓɔkʉ ɓɛ꞉na ɓɔ ɗite lɔɓʉkyakɔ, atɨ ngama ngɨyɔ Sɔdɔmʉ nɔ ngama ngɨyɔ Gɔmɔla, ɓɔ꞉nanjana nɔ bangʉ ga waa, nɔ, ɓɔ꞉tɔkwekweyo amati ɔ lɨmɔ ngɨlɛ la꞉ɓio amugbundu wɔ Sɨdɨmʉ. Ɓiga ngʉɓa ɓa꞉ɓwanaka, ɓɔ꞉nanjana ɨɓɔ tɨa kʉ bangʉ alɨkpangba. 11Atɨ ngama Kɛdɔlɨ-Laɔmɛlɨ ɨhɔ nɔ ɓawai ɓangɔ, ɨɓɔ akɛ, ɓa꞉ɓundo ɗite ngɨlɛnɛnɨ. Kʉdɔ, ɓɔ꞉sa atʉpa ikesi ngɨyɔ Sɔdɔmʉ nɔ Gɔmɔla ta iɓomu ɓɔ sɛ, ɨhɔ tɨa kʉ nɔ madyo, nɔ, ɓɔ꞉sa nalɔ ta nɨsa. 12Ɓɔ꞉fa Lɔtɨ, mwana ɔ manye ɔ Abalama ngɨa a꞉ɓio ɨkʉmbʉ kʉ ananɨ anɔ Sɔdɔmʉ. Ɓɔ꞉sɨka kʉ nɔ lɨkyɛmʉ ngɨlangɔ, kʉdɔ, ɓɔ꞉sa yeɓo.
Abalama ɔɓwanakiso Lɔtɨ
13Gue mʉngana ngɨa a꞉tʉgbʉa ɗite ngɨlɛnɛnɨ, ɛ꞉ka aɓɨa Abalama, Mʉebelenia, ɨsaʉ. Ɨyɔ, Abalama a꞉ɓio nɔ ɓagbama agbondo ngɨyɔ gue mʉngana ino ɓɔ Mamʉlɛ, Mʉamɔlɨ wɔngɔ, manye atɨ Ɛsɨkɔlɨ nɔ Anɛlɨ. Ɨɓɔ nɔ atɨ Abalama, ɓa꞉kiono jɛnɛ silika ɓɔ ɓasalanɨa angbinga ɔ ɗite salanɨanɨ. 14Ndʉ Abalama a꞉kɔ ɓɔ ɓa꞉fa pɛ mwana ɔ manye aɗite, ɔ꞉sɨka ɓafandɔngɔ mɨya ɓeetu nɔ tɛkɛɓɛ nɔ ɓɛgɨna, ʉɓa, ɓa꞉nɔtanɨa, nɔ nɨmbɨmbanaka ta amati ɔ ɨkáá ngɨangɔ. Kʉdɔ, ɓɔ꞉ɓʉkpata ɓakwa ngʉɓɔnanɨ akɔɓɔya ta anɔ Danɨ. 15Kʉdɔ, ɔ꞉nagbonyoko ambaja ɔ ɗite ngɨangɔ, dɔ ɨyɔ, nɔ ɓafandɔngɔ ɓɨsa naɓɔ akɔgoiso nɔ ɗite naɓutu. Ɓɔ꞉ɓundo ɗite, nɔ, ɓɔ꞉ɓukponyo akɔɓɔya ta anɔ Hɔba, ɨya, anɔ ʉgbaa ngʉwɔ ɨkʉʉ yɔ ɨkʉmbʉ yɔ Damasɨkɨ. 16Ɔ꞉tɔɓwanakiso ikesi ngɨyɛ ɓakwa ɓa꞉ɨhɨnɨa ta iɓomu ɓɔ sɛ. Ɔ꞉tɔɓwanakiso tɨa kʉ nɔ mwana ɔ manye Lɔtɨ, ɨhɔ nɔ lɨkyɛmʉ ngɨlangɔ, kʉ nɔ ɓoi, nɔ ɓombi ngaɓɔmɔ kʉtaa.
Ngama Melikisedeki ɔkiokio Abalama
17Abalama a꞉ɓundo ɗite ngɨlɔ atɨ ngama Kɛdɔlɨ-Laɔmɛlɨ, ɨhɔ nɔ ɓangama ngʉɓa ɓa꞉ɓio naɓɔ. Ɨyɛ ndʉ ɨyɔ Abalama a꞉tɔwa inani, ngama ɔ Sɔdɔmʉ ɛ꞉ka ajonokio nayɔ amugbundu ngʉwɔ Sawɛ, ɨsɨ yɔngɔ ɓɔ mugbundu wɔ ngama. 18Ngama Melikisedeki ngɨyɔ Ɓasalɛmɨ, a꞉ɓio kumukumu ɔ Asɔɓɨɨ ngɨa Akʉʉ Nɔgbɛ. Ɨyɔ, e꞉njo Abalama idyo nɔ ʉkyɛpʉ. 19Nɔ, ɔ꞉mukiokio akɔsugo ɓɔ:
«Asɔɓɨɨ ngɨa Akʉʉ Nɔgbɛ, nɔ ɨya a꞉kɨa dɔdɔ nɔ ɓisi
ɨnɔkiokio ʉwɛ Abalama kiokioni-e!
20Nɔ ɓata, Asɔɓɨɨ ngɨa akʉʉ nɔgbɛ ɨsɨka ʉbɨba-e.
Ɨyɔ akɛ, e꞉njo pɛ ɓanamasa ngʉɓɔsɔɔ, alɨkɔndɔ lɨsɔɔ-e.»
Ɔ꞉minjo mʉngana wɔ tɛkɛɓɛ, wɔ ɨkyɛmʉ iɓomu ngɨyɛ a꞉hɨnɨa akɔ ɗite.
21Ga ngama ɔ Sɔdɔmʉ nɔ Abalama aka ɓɔ: «Ɨndɔ aninjo ɨmɨ ɓombi, wɔsɨka ʉwɛ makwɔngɔ ta lɨkyɛmʉ.» 22Ga Abalama nɔ ngama ngɨananɨ ɓɔ: «Ɨmɨ nɔkio silika apɛɨ ɔ MAKWƆƁƗƗ, Asɔɓɨɨ ngɨa Akʉʉ Nɔgbɛ, makwɔ ɓisi nɔ dɔdɔ. 23Nɔ, nɔsugo ɓɔ nangɔsɨka pɔ uji, pɔ muki wɔ ɨkpakʉ, pɔ ɨkyɛmʉ yɛsɔɔ pɔ mɛngana. Iɗo ambɔ watisugomʉ ɓɔ: ‹Abalama ɛ꞉nɨanɨa nɔ lɨkyɛmʉ amʉkɔngʉ wɔsɛmɨ.› 24Ɨmɨ ingainga, nangɔmʉ asɨka ɨkyɛmʉ. Yakamɛngana, nɔkɔtatisiomʉ ɨkyɛmʉ nga ɓandambʉ ngʉɓa na꞉kyɛndaka pɛ naɓɔ, ɓa꞉dya pɛ, nɔ ɨlɛ atɨ ɓawai ngaɓɔsɛmɨ Anɛlɨ, Esɨkɔlɨ, nɔ Mamʉlɛ ɓa꞉sɨkana pɛ.»
Currently Selected:
Mʉkpanganɨa 14: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
