Mʉkpanganɨa 15
15
Asɔɓɨɨ ɔkio agɔmɛ nɔ Abalama
1Ambise ɔ yaka ngɨyɛnɛnɨ ya꞉ɓio ɓɔ yɔkyananakɨeni, MAKWƆƁƗƗ ɔ꞉yakanaka nɔ Abalama amati ɨkyɛmʉ mɛngana ndʉ lɨwɔtɔ, ga ɨyɔ nayɔ ɓɔ: «Abalama, watɨkumomʉ! Ɨmɨ akɛ, na kɔpɨ ngɨasɔɔ, nɔ, na꞊nenjo apɛpɛ ata mʉja nɔgbɛ.» 2Ga Abalama nayɔ ɓɔ: «Asɔɓɨɨ MAKWƆƁƗƗ, ɨkyɛmʉ nga wa꞊nenjo ɨmɨ ya꞊nakɨa dɔ ɨmɨ ɨmanɨ? Dɔ ɨmɨ ɨya, nangɔmʉ-sɨ pɔ nɔ mwana kʉɓanɨ! Ɛɛ, tɨa kʉ mombi ɔ tɛa ngɨasɛmɨ a ino ɓɔ Ɛlɨajalɛ, ngɨyɔ Damasɛkɛ akɛ, a꞊dya mʉgyɛndɔ wɔ maɓɨɨ ngʉwɔsɛmɨ.» 3Ga ɨyɔ ɓata kʉ ɓɔ: «Ʉwɛ, wa꞉nenjomʉ jɛnɛ ɨmɨ, mwana. Tɨa kʉ mʉngana wɔ ɓombi ɓɔ tɛa ngʉɓɔsɛmɨ, ɨyakɛ, a꞉nɔtanɨa aɨkáá ngɨyɛsɛmɨ, a꞊dya mʉgyɛndɔ wɔ maɓɨɨ ngʉwɔsɛmɨ.»
4Kʉdɔ, iso yɔ MAKWƆƁƗƗ ya꞉ɓio nayɔ aka ɓɔ: «Pɔ bele, sɔkɔmʉ ɨyɔ akɛ a꞉dya suo maɓɨɨ ngʉwɔsɔɔ. Yakamɛngana, mombi ngɨa a꞊dya suo maɓɨɨ ngʉwɔsɔɔ, a꞊chwɛa ta aʉsʉkʉa ngʉwɔsɔɔ ɓɔ kpɛ.» 5Kʉdɔ, ɔ꞉muchwɛiso aɓei, ga ɨyɔ ɓɔ: «Kanga akʉʉ ɔ ɓisi, nɔ, poo ndata, ndʉ waɓio adaa ngɨa waipoo-ɔɔ.» Ga ɨyɔ ɓata kʉ ɓɔ: «Ɓanɔnɔ ɓɔsɔɔ ɓa꞊ɓio ɓaja kʉɓanɨ.»
6Kʉɓanɨ, Abalama ɔ꞉mʉɓɨnyɨa MAKWƆƁƗƗ, nɔ ɨyɔ Asɔɓɨɨ, ɔ꞉mʉsɨka ndʉ a mombi ɔ ingono.
7Ga MAKWƆƁƗƗ ɓata nayɔ ɓɔ: «Ɨmɨ akɛ na MAKWƆƁƗƗ ngɨa a꞉nachwɛiso ʉwɛ anɨngwa anɔ Ʉlɨ, akɔ ɨkʉmbʉ yɔ Kaladɛa, nɔwɛ aninjo ɨkʉmbʉ ngɨyɛ.» 8Abalama ɔ꞉mutosio ɓɔ: «Asɔɓɨɨ MAKWƆƁƗƗ, nɛ꞊mbɨa tɨa tanɨ ɓɔ ɨkʉmbʉ ya꞊ɓio suo yɛsɛmɨ ingono?» 9Ga Asɔɓɨɨ nayɔ ɓɔ: «Anasɨkɨa mʉsamʉkyɛ wɔ ngɔmbɛ, nɔ ʉwɔ mɛmɛ ɓaɓomu ta nɔ mago kaatʉ kaatʉ, tɨa kʉ nɔ gue ɔ kɔndɔlɔ, nɔ ndɛgʉ nɔ anjua.» 10Kʉdɔ, Abalama a꞉sɨka ɓanama ngʉɓɔnanɨ ta ɓanɨ, ɔ꞉ɓukioko ati ga gbo gbo, ɔ꞉sɨa ta ɓanoi. Ɔ꞉napioko ligbiti lɔ ɓanana ngɨlɛnɛnɨ akangana ta mesu akɔ mesu.
11Ɓanoi ngʉɓa ɓadya anjɨɓɔ, ɓɛ꞉ka aniteyo akʉʉ ɔ anjɨɓɔ ɔ ɓanama ngʉɓɔnanɨ. Abalama ɔ꞉ɓukponyo. 12Nɛpasɨ ngɨyɛnɛnɨ, tɨa aka ɨpá yakyɔ-ɔɔ anɨkwa aka, tɔɔ kɔ꞉mʉfa Abalama ga gbɛ. Umomo wɔ꞉kuto ga ɗɨɛ, kʉdɔ, ʉɓá wɔ꞉muhuo ga fɔ. 13Ga MAKWƆƁƗƗ nɔ Abalama ɓɔ: «Ɨmbɨa iɗo ɓɔ ɓanɔnɔ ɓɔsɔɔ ɓa꞊ɓio sungo ɓɛɛka amati ɔ ɨkʉmbʉ yɔ ɓangɛ. Nɔ ɓa꞊ɓio sungo inani ta ɓabaya, nɔ, ɓa꞊ɓʉkyananaka sina amati ɔ mago lɨmɨa ɓɔgɨna. 14Yakamɛngana, na꞊kio sina mʉkɔmbʉ wɔ ɨkʉmbʉ ngɨyɛ ya꞉ɓʉkyananaka kioni, nɔ, ɓa꞉chwɛa sina nɔ lɨkyɛmʉ lɨja. 15Pɛpɛ dɔ akɔ ʉwɛ, wa꞉gbalɨa sina akɔ uɓei ɓɔ ndɨɨ, aɓɔya ta aka wɛ꞊ka-ɔɔ ikweikwei, nɔ, wa꞊wo sina ingwo yɛta iɗo, nɔ, ɓɔ꞉nahʉna kʉ nɔ ʉbɨba. 16Ngbinga ngɨa ɓʉɓɨɓɨ ngʉɓɔ Ɓaamɔlɨ, ngʉɓa ɨkʉmbʉ aka, ɓa꞊beluo sina-ɔɔ, ambise ɔ limbika lɔ ɓanɔnɔ ɓɔgɨna, nɔ, nɔ꞊kio sina mʉkɔmbʉ ngʉweɓo, kʉdɔ, nɔ꞊toiso dɔ tɨa ɓanɔnɔ ɓɔsɔɔ aka.»
17Ndʉ ɨpá ya꞉kwa, nɔ, umomo wɔ꞉kuto ga ɗɨɛ, ta ndʉ aka nasugo-ɔɔ aka, ɨkyɛmʉ mɛngana ndʉ ɨkɔsɔkɔsɔ aɗunguo umwei, nɔ, chwɛiso magou kɔ dyaa, yɛ꞉ka akɔchanaka ati ɔ ligbiti lɔ ɓanama ngɨlɛnɛnɨ. 18Ta nɔ ɓisi ngʉɓɔnanɨ, MAKWƆƁƗƗ ɔ꞉kio jɛnɛ agɔmɛ nɔ Abalama, akɔsugo ɓɔ: «Nenjo ɨkʉmbʉ ngɨyɛ akɔ ɓanɔnɔ ɓɔsɔɔ, anɨngwa alisini ngɨa anɔ Misili, aɓɔya alisini ngɨa ata mʉja ino ɓɔ Ɛfʉlatɨ. 19Ihoi ngɨyɛnɛnɨ, ya lɨkʉmbʉ lɔ Ɓakɛnɨ, nɔ Ɓakɛnɨsɨ, nɔ Ɓakadɨmɔnɨ, 20nɔ Ɓahɨtɨ, nɔ Ɓapɛlɛsɨ, nɔ Ɓalɛfaɨmʉ, 21nɔ Ɓaamɔlɨ, nɔ Ɓakanana, nɔ Ɓagɨlɨgasɨ kʉ nɔ Ɓayɛbʉsɨ.»
Currently Selected:
Mʉkpanganɨa 15: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
