Mʉkpanganɨa 18
18
Asɔɓɨɨ ɔsugo ɓɔ Sala a꞉nɔta suo mwana
1Ɓisi mʉngana, Abalaama a꞉ɓio ɓawele akɔ umongu wɔ ɨhɛma ngɨangɔ, nɔ musoti ngʉwɔ ta nja ɓɔ gbe, amati ɔ gbondo ngɨyɔ Mamʉlɛ. Kʉdɔ, MAKWƆƁƗƗ ɔ꞉mʉchwɛanɨa. 2Ɨyɛ a꞉tɨna ɓajwa ɓɔ, ɛ꞉na ɓombi ɓaatʉ ɓɛ꞉maeni ɓɔ kɛlɛ, apɛɨ angɔ ɓɔ. Ɨyɛ ndʉ Abalaama a꞉ɓɨna ɓanɨ, ɔ꞉ɓʉtɛtɨa ta bangʉ anɨngwa ananɨ akɔ umongu wɔ ɨhɛma. Tɨa inani apɛɨ eɓo, Abalaama ɔ꞉gbʉkʉmɨa akɔɓɔya mesu ta ɛsɨ. 3Ga ɨyɔ ɓɔ: «Aba, kikiliki, nɛnɨanɨeni ɓaka kʉɔ nɔ ɨjɨɔ amesu kɔsɔɔ, watɨnachanɔmʉ ɓanɨ. Yakamɛngana, ɓundono-sɨ ɓaka andamɨ, ɨmɨ baya asɔɔ. 4Kikiliki, ɓɨteni-sɨ, ɓininjo mwana ɔ mipo, iɗo ambɔ gyaɓaneni mɨtɨndɨ, nɔ, nɔhomwono-sɨ asɨ ɔ ɓʉtɨ aka. 5Ngbinga ngɨa náɓio-ɔɔ anuhomwono, na꞊nɨkɨa-sɨ mwana ɨkyɛmʉ ata mʉdyɛ bele, ɨya, nádudiso nayɔ mʉtɨma, pɛɨ ngɨa náchana-ɔɔ. Dɔ inu ʉɓa, nɔ́꞉ɓɔyɔ tɨa andamɨ aka.» Ga ɨɓɔ nayɔ ɓɔ: «Yaɓanɨ, kɨa ndʉ aka wɔ꞉sugo-ɔɔ.»
6Kʉdɔ, Abalaama a꞉tɔwa bangʉ, amati ɔ ɨhɛma, ga ɨyɔ nɔ moi angɔ Sala ɓɔ: «Sɨka ɓakakpa ɓɔ ɓʉnga ngɨa ata muɗo ɓaatʉ, ta gagaa, nɔ, wɔmutambanaka, nɔ, wɛsɨa litambua.» 7Ambise ɔngɔ, ɔ꞉sa bangʉ akɔ mutunduga wɔ ɓanama, nɔ, ɔ꞉sɨka ingbou yɔ ngɔmbɛ ngɨa ata muɗo, nɔ kʉ, ɓɔ ngbʉlʉ ngbʉlʉ. Ɔ꞉minjo mombi ɔ tɛa ngɨangɔ, nɔ ɨyɔ, ɔ꞉mɨsɨa kʉ gagaa. 8Kʉdɔ, Abalaama ɔ꞉sɨka, ɔɓʉnapiokio anjɨɓɔ ngɨa ɓa꞉mɨsɨa, ɨhɔ nɔ majiɓa ngʉwɔ ta ngaa ngaa, tɨa kʉ nɔ majiɓa ngʉwa wɔta ɓuto ɓuto. Ɨyɛ ndʉ ɓa꞉ɓio tɨa adyakaka ananɨ ɛsɨ ɓʉtɨ, Abalaama ɛ꞉maa tɨa kʉ ananɨ anambamba eɓo ɓɔ kɛlɛ.
9Ɨɓɔ ɓabika ngʉɓɔnanɨ ɓɔ꞉mʉɓokuo ɓɔ: «Moi asɔɔ Sala a gbanɨ?» Ga ɨyɔ ɓɔ: «A ta inani amati ɔ ɨhɛma.» 10Mubika mʉngana ɔ꞉musigio ɓɔ: «Amati ɔ igo ngɨa nɨ꞊ka, nɔ꞊gbʉkɔ suo ɓata andɔɔ aka ta gbʉkanɨ akɔ angbinga kʉndʉ ɨya, nɔ moi asɔɔ Sala a꞊ɓio suo tɨa nɔ mwana ata gue.» Ambɔgɔ ɓɔ pe, ɨyɔ Sala, anʉka yaka ngɨyɛnɛnɨ ta iɓomu, ananɨ anɔ umongu wɔ ɨhɛma, ngɨyɛ ya꞉ɓio ambise ɔ Abalaama. 11Ɨnadɔ atɨ Abalaama, nɔ Sala ɓa꞉ɓio tɨa ɓɛtɨɛ, nɔ mago tɨa mɛsɨnganɛ. Nɔ ɨyɔ ɨna Sala, a꞉ɓio tii ɓata adaa ngɨa anɔta-ɔɔ mwana. 12Kʉdɔ, Sala a꞉pʉnga nɔwa amati ɔ mʉtɨma akɔsugo ɓɔ: «Nagbʉka dɔ pɛpɛ ɨmɨ taá yɔ uɓei tɨa gbanɨ? Ɨtakɨtakɨ ngɨyɛ, na-sɨ ɨmɨ tɨa kʉ ɨkyɛmʉ yɔ mʉkʉʉ wɔngɔ, nɔ mamʉkwasɛmɨ a ɨyɔ tɨa kʉ mɨtɨɛ.»
13Ga MAKWƆƁƗƗ nɔ Abalaama ɓɔ: «Akɔ yaka yɔ ɨmanɨ Sala ɔ꞉nɔwɔ-ɔɔ akɔsugo ɓɔ: ‹Eeɓe! Mʉkʉʉ ta ndʉ ɨmɨ aka, nɛnɨanɨa ndɨ ɓata nɔ mwana ta ɨnɨanɨanɨ ndɨ?› 14Ɨkyɛmʉ nga yeno tanɨ ɨyɛ yakyaka MAKWƆƁƗƗ? Amati ɔ igo ngɨyɛ ya꞊nɨka, nɔ꞊gbʉkɔ suo ɓata andɔɔ aka ta gbʉkanɨ akɔ angbinga kʉndʉ ɨya, nɔ Sala a꞊ɓio suo tɨa nɔ mwana.» 15Dɔ, ndɨ a꞉ɓio nɔ ʉɓá, Sala ɔ꞉mʉpɛta ta ɓɔ: «Nɔ꞉nɔwɔmʉ ɨmɨ.» Ɨnadɔ ga MAKWƆƁƗƗ nayɔ ɓɔ: «Iii, wɔ꞉nɔwɔ nɔwanɨ.»
Abalaama ɔkikelekio MAKWƆBƗƗ akʉʉ ɔ ɓombi ɓɔ Sɔdɔmʉ
16Kʉdɔ, ɓombi ngʉɓɔnanɨ, ɓa꞉ngwɨa kyɛnda anɨsa mesu anɔ Sɔdɔmʉ. Abalaama ɔ꞉sa naɓɔ anapɨa anɔ ɨngbaa. 17MAKWƆƁƗƗ ɔ꞉ɓokwono ɓɔ: «Nɨ꞊nayɨa ndɨ dɔ Abalaama yaka ngɨyɛ na꞊kʉnda kɨa, nayɨanɨ? 18Ɨnadɔ ɨyɔ akɛ, a꞊ɓio suo ɨsɛ ɔ ɨbaba yɛta ɨja yɔ ɓombi, nɔ kʉ ɨyɔ angu. Nɔ꞊kiokio sina mababa kɔ ɓombi maɓomu ngʉkɔ dɔdɔ kʉ ɨngbaa akɔ ɨyɔ. 19Dɔ ɨmɨ, na꞉mʉchwa jɛnɛ ɨyɔ, ɓɔ ɨpananakɨa ɓana ɓangɔ, nɔ ɓandɔngɔ ɓaɓomu ngʉɓa, ɓɛ꞊ka ambise angɔ, akɔpɛmakɨa mapanʉ ngʉkɔ MAKWƆƁƗƗ, nɔ, akɨa yaka ngbingbii, nɔ iɗo ngɨyɛ ɨmɨ nakɔbaya. Kʉdɔ, ne꞊njo Abalaama iɓomu ngɨyɛ na꞉mʉpanaka jɛnɛ.»
20Ga MAKWƆƁƗƗ nɔ Abalaama ɓɔ: «Ɨmɨ, nɔ꞉kɔ ɓɔ ɓombi ɓandɨana akʉʉ ɔ Sɔdɔmʉ nɔ Gɔmɔla tɨa nɔgbɛ, nɔ ɓʉɓɨɓɨ ngʉɓeɓo ɓɔbeluo tɨa beluoni. 21Kʉɓanɨ, ɨmɨ nɔ꞉kwaisio anɨsa anɨna ta nɔ mesu, ndɨana iɓomu ngɨyɛ nɔ꞉ka pɛ, ɓɔ ya ndɨ ta ingono. Yɔɓieni ingono, pɔ mʉjɛɛ nɛmbɨa.»
22Anɨngwa ananɨ, ɓombi ngʉɓɔnanɨ, ɓɔ꞉potio kyɛnda anɨsa mesu anɔ Sɔdɔmʉ. Yakamɛngana, Abalaama ɔ꞉tukuo-sɨ ɨyɔ ɓɛmaɛ ta ananɨ apɛɨ ɔ MAKWƆƁƗƗ. 23Kʉdɔ, Abalaama a꞉mɨsɨnganɨa MAKWƆƁƗƗ, nɔ, ɔ꞉muɓokuo ɓɔ: «Ha MAKWƆƁƗƗ-ee, wa꞊dʉka ndɨ ɓombi ɓɔta ngbingbii ɨhɔ nɔ ɓombi ɓɔta ɓɨɓɨ ta dʉkanɨ ndɨ? 24Adiga, ɓombi ɓɔta ngbingbii ɓa꞊ɓio inani amati ɔ gʉlʉ ɓatɛkɛɓɛ ɓɔkʉ. Wa꞊ɓʉdʉka ɨɓɔ ndɨ kʉ dʉkanɨ? Wa꞊ngɛpaakɨa ndɨ pɔ gʉlʉ akɔ yaka yɔ ɓombi ɓatɛkɛɓɛ ɓɔkʉ ngʉɓa, ɓa inani amati ɔngɔ? 25Pɔ ɓisi pɔ mʉngana, ʉwɛ wangɔkɨa sina ɨkananja yɔ yaka ngɨyɛnɛnɨ, akɔmaa ɓombi ɓɔta ngbingbii, nɔ ʉɓa ɓɔta ɓɨɓɨ. Pɛpɛ ta yaka ndʉ ɨyɛnɛnɨ, ʉwɛ, wa꞊ngɔkɨa sina pɔ. Ʉwɛ ndʉ juji ngɨyɔ dɔdɔ muɓomu, wakio ʉwɛ, mʉkɔmbʉ ta aɓungbingbii!» 26Ga MAKWƆƁƗƗ nayɔ ɓɔ: «Ndʉ na꞊gbʉka ɓombi ɓɔta ngbingbii ɓatɛkɛɓɛ ɓɔkʉ anɔ Sɔdɔmʉ, ɨmɨ, nɛpaakɨa gʉlʉ muɓomu akɔ yaka yeɓo.»
27Abalaama ɔ꞉toyo nɔ ɔ꞉sugo ɓɔ: «Ɨmɨ, na ta ɨkyɛmʉ yɛta ɓʉtʉʉ apɛɨ asɔɔ, ɨnadɔ, nakanio ta yakanaka nɔwɛ. 28Adiga ɓombi ɓɔta ngbingbii, ɓa꞊ngɔndana pɛpɛ ɓatɛkɛɓɛ ɓɔkʉ. Ɓeneni ɓatukoo ndʉ ɓɔkʉ anʉndana. Wa꞊dʉka ndɨ gʉlʉ muɓomu ta akɔ yaka yɔ ɓombi ɓɔkʉ ngʉɓɔnanɨ?» MAKWƆƁƗƗ ɔ꞉mutosio ɓɔ: «Ndʉ ɓombi ɓɔta ngbingbii ɓatɛkɛɓɛ ɓɔgɨna nɔ ɓɔkʉ ɓaɓio inani, na꞊ngɔdʉkamʉ gʉlʉ pɔ bele.» 29Abalaama ɛ꞉sɨnganaka ta yakanaka nayɔ, ga ɨyɔ ɓɔ: «Andɔ ɓombi ɓɔta ngbingbii ɓɔɓieni ta ɓatɛkɛɓɛ ɓɔgɨna ɓʉtʉʉ?» MAKWƆƁƗƗ ɔ꞉mutosio ɓɔ: «Akɔ yaka yɔ ɓombi ɓatɛkɛɓɛ ɓɔgɨna, na꞊ngɔkɨamʉ ɨkyɛmʉ.»
30Ga Abalaama ɓɔ: «Kikiliki Makwɔɓɨɨ, watɨkwamʉ ɓaka ʉnganga, nisugo-sɨ ta sugoni. Andɔ ɓombi ɓɔta ngbingbii ɓɛnɨanɨeni ta ɓatɛkɛɓɛ ɓaatʉ?» Kʉdɔ, Makwɔɓɨɨ ɔ꞉mutosio ɓɔ: «Nɔgbʉkeni ɓombi ɓatɛkɛɓɛ ɓaatʉ amati ɔ gʉlʉ, na꞊ngɔkɨamʉ ɨkyɛmʉ.»
31Ga Abalaama aka ɓɔ: «Kikiliki Makwɔɓɨɨ, ɨmɨ na ta ɨkyɛmʉ yɛta ɓʉtʉʉ apɛɨ asɔɔ, ɨnadɔ, natakanio yakanaka nɔwɛ. Andɔ ɓombi ɓɔta ngbingbii ɓɔɓieni ta ɓatɛkɛɓɛ ɓapɨnɨ ɓʉtʉʉ?» Makwɔɓɨɨ ɔ꞉mutosio ɓɔ: «Akɔ yaka yɔ ɓombi ɓatɛkɛɓɛ ɓapɨnɨ, nangɔdʉkamʉ gʉlʉ pɔ bele.»
32Kʉdɔ, ga Abalaama ɓata nayɔ ɓɔ: «Kikiliki Makwɔɓɨɨ, watɨnakwɨa ɓaka kɔmʉ ʉnganga, nisugo-sɨ sugoni. Andɔ ɓɔɓieni ta tɛkɛɓɛ ɓɔ kpekele.» MAKWƆƁƗƗ ɔ꞉mutosio ɓɔ: «Akɔ yaka yɔ ɓombi tɛkɛɓɛ, na꞊ngɔdʉkamʉ gʉlʉ pɔ bele.»
33Ɨyɛ ndʉ MAKWƆƁƗƗ a꞉pipo yakanaka nɔ Abalaama ɓɔ gba, ɨyɔ Makwɔɓɨɨ ɔ꞉sa yangɔ. Kʉdɔ, Abalaama ɔ꞉tɔwa ɨyɔ tɨa kʉ andɔngɔ.
Currently Selected:
Mʉkpanganɨa 18: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
Mʉkpanganɨa 18
18
Asɔɓɨɨ ɔsugo ɓɔ Sala a꞉nɔta suo mwana
1Ɓisi mʉngana, Abalaama a꞉ɓio ɓawele akɔ umongu wɔ ɨhɛma ngɨangɔ, nɔ musoti ngʉwɔ ta nja ɓɔ gbe, amati ɔ gbondo ngɨyɔ Mamʉlɛ. Kʉdɔ, MAKWƆƁƗƗ ɔ꞉mʉchwɛanɨa. 2Ɨyɛ a꞉tɨna ɓajwa ɓɔ, ɛ꞉na ɓombi ɓaatʉ ɓɛ꞉maeni ɓɔ kɛlɛ, apɛɨ angɔ ɓɔ. Ɨyɛ ndʉ Abalaama a꞉ɓɨna ɓanɨ, ɔ꞉ɓʉtɛtɨa ta bangʉ anɨngwa ananɨ akɔ umongu wɔ ɨhɛma. Tɨa inani apɛɨ eɓo, Abalaama ɔ꞉gbʉkʉmɨa akɔɓɔya mesu ta ɛsɨ. 3Ga ɨyɔ ɓɔ: «Aba, kikiliki, nɛnɨanɨeni ɓaka kʉɔ nɔ ɨjɨɔ amesu kɔsɔɔ, watɨnachanɔmʉ ɓanɨ. Yakamɛngana, ɓundono-sɨ ɓaka andamɨ, ɨmɨ baya asɔɔ. 4Kikiliki, ɓɨteni-sɨ, ɓininjo mwana ɔ mipo, iɗo ambɔ gyaɓaneni mɨtɨndɨ, nɔ, nɔhomwono-sɨ asɨ ɔ ɓʉtɨ aka. 5Ngbinga ngɨa náɓio-ɔɔ anuhomwono, na꞊nɨkɨa-sɨ mwana ɨkyɛmʉ ata mʉdyɛ bele, ɨya, nádudiso nayɔ mʉtɨma, pɛɨ ngɨa náchana-ɔɔ. Dɔ inu ʉɓa, nɔ́꞉ɓɔyɔ tɨa andamɨ aka.» Ga ɨɓɔ nayɔ ɓɔ: «Yaɓanɨ, kɨa ndʉ aka wɔ꞉sugo-ɔɔ.»
6Kʉdɔ, Abalaama a꞉tɔwa bangʉ, amati ɔ ɨhɛma, ga ɨyɔ nɔ moi angɔ Sala ɓɔ: «Sɨka ɓakakpa ɓɔ ɓʉnga ngɨa ata muɗo ɓaatʉ, ta gagaa, nɔ, wɔmutambanaka, nɔ, wɛsɨa litambua.» 7Ambise ɔngɔ, ɔ꞉sa bangʉ akɔ mutunduga wɔ ɓanama, nɔ, ɔ꞉sɨka ingbou yɔ ngɔmbɛ ngɨa ata muɗo, nɔ kʉ, ɓɔ ngbʉlʉ ngbʉlʉ. Ɔ꞉minjo mombi ɔ tɛa ngɨangɔ, nɔ ɨyɔ, ɔ꞉mɨsɨa kʉ gagaa. 8Kʉdɔ, Abalaama ɔ꞉sɨka, ɔɓʉnapiokio anjɨɓɔ ngɨa ɓa꞉mɨsɨa, ɨhɔ nɔ majiɓa ngʉwɔ ta ngaa ngaa, tɨa kʉ nɔ majiɓa ngʉwa wɔta ɓuto ɓuto. Ɨyɛ ndʉ ɓa꞉ɓio tɨa adyakaka ananɨ ɛsɨ ɓʉtɨ, Abalaama ɛ꞉maa tɨa kʉ ananɨ anambamba eɓo ɓɔ kɛlɛ.
9Ɨɓɔ ɓabika ngʉɓɔnanɨ ɓɔ꞉mʉɓokuo ɓɔ: «Moi asɔɔ Sala a gbanɨ?» Ga ɨyɔ ɓɔ: «A ta inani amati ɔ ɨhɛma.» 10Mubika mʉngana ɔ꞉musigio ɓɔ: «Amati ɔ igo ngɨa nɨ꞊ka, nɔ꞊gbʉkɔ suo ɓata andɔɔ aka ta gbʉkanɨ akɔ angbinga kʉndʉ ɨya, nɔ moi asɔɔ Sala a꞊ɓio suo tɨa nɔ mwana ata gue.» Ambɔgɔ ɓɔ pe, ɨyɔ Sala, anʉka yaka ngɨyɛnɛnɨ ta iɓomu, ananɨ anɔ umongu wɔ ɨhɛma, ngɨyɛ ya꞉ɓio ambise ɔ Abalaama. 11Ɨnadɔ atɨ Abalaama, nɔ Sala ɓa꞉ɓio tɨa ɓɛtɨɛ, nɔ mago tɨa mɛsɨnganɛ. Nɔ ɨyɔ ɨna Sala, a꞉ɓio tii ɓata adaa ngɨa anɔta-ɔɔ mwana. 12Kʉdɔ, Sala a꞉pʉnga nɔwa amati ɔ mʉtɨma akɔsugo ɓɔ: «Nagbʉka dɔ pɛpɛ ɨmɨ taá yɔ uɓei tɨa gbanɨ? Ɨtakɨtakɨ ngɨyɛ, na-sɨ ɨmɨ tɨa kʉ ɨkyɛmʉ yɔ mʉkʉʉ wɔngɔ, nɔ mamʉkwasɛmɨ a ɨyɔ tɨa kʉ mɨtɨɛ.»
13Ga MAKWƆƁƗƗ nɔ Abalaama ɓɔ: «Akɔ yaka yɔ ɨmanɨ Sala ɔ꞉nɔwɔ-ɔɔ akɔsugo ɓɔ: ‹Eeɓe! Mʉkʉʉ ta ndʉ ɨmɨ aka, nɛnɨanɨa ndɨ ɓata nɔ mwana ta ɨnɨanɨanɨ ndɨ?› 14Ɨkyɛmʉ nga yeno tanɨ ɨyɛ yakyaka MAKWƆƁƗƗ? Amati ɔ igo ngɨyɛ ya꞊nɨka, nɔ꞊gbʉkɔ suo ɓata andɔɔ aka ta gbʉkanɨ akɔ angbinga kʉndʉ ɨya, nɔ Sala a꞊ɓio suo tɨa nɔ mwana.» 15Dɔ, ndɨ a꞉ɓio nɔ ʉɓá, Sala ɔ꞉mʉpɛta ta ɓɔ: «Nɔ꞉nɔwɔmʉ ɨmɨ.» Ɨnadɔ ga MAKWƆƁƗƗ nayɔ ɓɔ: «Iii, wɔ꞉nɔwɔ nɔwanɨ.»
Abalaama ɔkikelekio MAKWƆBƗƗ akʉʉ ɔ ɓombi ɓɔ Sɔdɔmʉ
16Kʉdɔ, ɓombi ngʉɓɔnanɨ, ɓa꞉ngwɨa kyɛnda anɨsa mesu anɔ Sɔdɔmʉ. Abalaama ɔ꞉sa naɓɔ anapɨa anɔ ɨngbaa. 17MAKWƆƁƗƗ ɔ꞉ɓokwono ɓɔ: «Nɨ꞊nayɨa ndɨ dɔ Abalaama yaka ngɨyɛ na꞊kʉnda kɨa, nayɨanɨ? 18Ɨnadɔ ɨyɔ akɛ, a꞊ɓio suo ɨsɛ ɔ ɨbaba yɛta ɨja yɔ ɓombi, nɔ kʉ ɨyɔ angu. Nɔ꞊kiokio sina mababa kɔ ɓombi maɓomu ngʉkɔ dɔdɔ kʉ ɨngbaa akɔ ɨyɔ. 19Dɔ ɨmɨ, na꞉mʉchwa jɛnɛ ɨyɔ, ɓɔ ɨpananakɨa ɓana ɓangɔ, nɔ ɓandɔngɔ ɓaɓomu ngʉɓa, ɓɛ꞊ka ambise angɔ, akɔpɛmakɨa mapanʉ ngʉkɔ MAKWƆƁƗƗ, nɔ, akɨa yaka ngbingbii, nɔ iɗo ngɨyɛ ɨmɨ nakɔbaya. Kʉdɔ, ne꞊njo Abalaama iɓomu ngɨyɛ na꞉mʉpanaka jɛnɛ.»
20Ga MAKWƆƁƗƗ nɔ Abalaama ɓɔ: «Ɨmɨ, nɔ꞉kɔ ɓɔ ɓombi ɓandɨana akʉʉ ɔ Sɔdɔmʉ nɔ Gɔmɔla tɨa nɔgbɛ, nɔ ɓʉɓɨɓɨ ngʉɓeɓo ɓɔbeluo tɨa beluoni. 21Kʉɓanɨ, ɨmɨ nɔ꞉kwaisio anɨsa anɨna ta nɔ mesu, ndɨana iɓomu ngɨyɛ nɔ꞉ka pɛ, ɓɔ ya ndɨ ta ingono. Yɔɓieni ingono, pɔ mʉjɛɛ nɛmbɨa.»
22Anɨngwa ananɨ, ɓombi ngʉɓɔnanɨ, ɓɔ꞉potio kyɛnda anɨsa mesu anɔ Sɔdɔmʉ. Yakamɛngana, Abalaama ɔ꞉tukuo-sɨ ɨyɔ ɓɛmaɛ ta ananɨ apɛɨ ɔ MAKWƆƁƗƗ. 23Kʉdɔ, Abalaama a꞉mɨsɨnganɨa MAKWƆƁƗƗ, nɔ, ɔ꞉muɓokuo ɓɔ: «Ha MAKWƆƁƗƗ-ee, wa꞊dʉka ndɨ ɓombi ɓɔta ngbingbii ɨhɔ nɔ ɓombi ɓɔta ɓɨɓɨ ta dʉkanɨ ndɨ? 24Adiga, ɓombi ɓɔta ngbingbii ɓa꞊ɓio inani amati ɔ gʉlʉ ɓatɛkɛɓɛ ɓɔkʉ. Wa꞊ɓʉdʉka ɨɓɔ ndɨ kʉ dʉkanɨ? Wa꞊ngɛpaakɨa ndɨ pɔ gʉlʉ akɔ yaka yɔ ɓombi ɓatɛkɛɓɛ ɓɔkʉ ngʉɓa, ɓa inani amati ɔngɔ? 25Pɔ ɓisi pɔ mʉngana, ʉwɛ wangɔkɨa sina ɨkananja yɔ yaka ngɨyɛnɛnɨ, akɔmaa ɓombi ɓɔta ngbingbii, nɔ ʉɓa ɓɔta ɓɨɓɨ. Pɛpɛ ta yaka ndʉ ɨyɛnɛnɨ, ʉwɛ, wa꞊ngɔkɨa sina pɔ. Ʉwɛ ndʉ juji ngɨyɔ dɔdɔ muɓomu, wakio ʉwɛ, mʉkɔmbʉ ta aɓungbingbii!» 26Ga MAKWƆƁƗƗ nayɔ ɓɔ: «Ndʉ na꞊gbʉka ɓombi ɓɔta ngbingbii ɓatɛkɛɓɛ ɓɔkʉ anɔ Sɔdɔmʉ, ɨmɨ, nɛpaakɨa gʉlʉ muɓomu akɔ yaka yeɓo.»
27Abalaama ɔ꞉toyo nɔ ɔ꞉sugo ɓɔ: «Ɨmɨ, na ta ɨkyɛmʉ yɛta ɓʉtʉʉ apɛɨ asɔɔ, ɨnadɔ, nakanio ta yakanaka nɔwɛ. 28Adiga ɓombi ɓɔta ngbingbii, ɓa꞊ngɔndana pɛpɛ ɓatɛkɛɓɛ ɓɔkʉ. Ɓeneni ɓatukoo ndʉ ɓɔkʉ anʉndana. Wa꞊dʉka ndɨ gʉlʉ muɓomu ta akɔ yaka yɔ ɓombi ɓɔkʉ ngʉɓɔnanɨ?» MAKWƆƁƗƗ ɔ꞉mutosio ɓɔ: «Ndʉ ɓombi ɓɔta ngbingbii ɓatɛkɛɓɛ ɓɔgɨna nɔ ɓɔkʉ ɓaɓio inani, na꞊ngɔdʉkamʉ gʉlʉ pɔ bele.» 29Abalaama ɛ꞉sɨnganaka ta yakanaka nayɔ, ga ɨyɔ ɓɔ: «Andɔ ɓombi ɓɔta ngbingbii ɓɔɓieni ta ɓatɛkɛɓɛ ɓɔgɨna ɓʉtʉʉ?» MAKWƆƁƗƗ ɔ꞉mutosio ɓɔ: «Akɔ yaka yɔ ɓombi ɓatɛkɛɓɛ ɓɔgɨna, na꞊ngɔkɨamʉ ɨkyɛmʉ.»
30Ga Abalaama ɓɔ: «Kikiliki Makwɔɓɨɨ, watɨkwamʉ ɓaka ʉnganga, nisugo-sɨ ta sugoni. Andɔ ɓombi ɓɔta ngbingbii ɓɛnɨanɨeni ta ɓatɛkɛɓɛ ɓaatʉ?» Kʉdɔ, Makwɔɓɨɨ ɔ꞉mutosio ɓɔ: «Nɔgbʉkeni ɓombi ɓatɛkɛɓɛ ɓaatʉ amati ɔ gʉlʉ, na꞊ngɔkɨamʉ ɨkyɛmʉ.»
31Ga Abalaama aka ɓɔ: «Kikiliki Makwɔɓɨɨ, ɨmɨ na ta ɨkyɛmʉ yɛta ɓʉtʉʉ apɛɨ asɔɔ, ɨnadɔ, natakanio yakanaka nɔwɛ. Andɔ ɓombi ɓɔta ngbingbii ɓɔɓieni ta ɓatɛkɛɓɛ ɓapɨnɨ ɓʉtʉʉ?» Makwɔɓɨɨ ɔ꞉mutosio ɓɔ: «Akɔ yaka yɔ ɓombi ɓatɛkɛɓɛ ɓapɨnɨ, nangɔdʉkamʉ gʉlʉ pɔ bele.»
32Kʉdɔ, ga Abalaama ɓata nayɔ ɓɔ: «Kikiliki Makwɔɓɨɨ, watɨnakwɨa ɓaka kɔmʉ ʉnganga, nisugo-sɨ sugoni. Andɔ ɓɔɓieni ta tɛkɛɓɛ ɓɔ kpekele.» MAKWƆƁƗƗ ɔ꞉mutosio ɓɔ: «Akɔ yaka yɔ ɓombi tɛkɛɓɛ, na꞊ngɔdʉkamʉ gʉlʉ pɔ bele.»
33Ɨyɛ ndʉ MAKWƆƁƗƗ a꞉pipo yakanaka nɔ Abalaama ɓɔ gba, ɨyɔ Makwɔɓɨɨ ɔ꞉sa yangɔ. Kʉdɔ, Abalaama ɔ꞉tɔwa ɨyɔ tɨa kʉ andɔngɔ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.