Mʉkpanganɨa 19
19
Ɓʉɓɨɓɨ ngʉɓɔ ɓombi ɓɔ Sɔdɔmʉ
1Ta nɔ ɨpasɨ ngɨyɛnɛnɨ, ɓamalaika ɓapɨnɨ ngʉɓɔnanɨ ɓɔ꞉ɓɔya anɔ Sɔdɔmʉ#19:1 Sɔdɔmʉ: pɔ ɓɔ gʉlʉ a꞉ɓio mukungue nɔ aga. Ɨnadɔ Lɔtɨ a꞉ɓio ɓawele ananɨ anɔ umongu wɔ gʉlʉ ɔ Sɔdɔmʉ. Ɨyɛ ndʉ Lɔtɨ a꞉ɓɨna, ɔ꞉ngwa anɨsa naɓɔ akɔtɛtɨa, nɔ, ɔ꞉gbʉkʉmɨa nɔ mau aɓɔya ta akɔ ɛsɨ. 2Kʉdɔ, ɔ꞉ɓusigio ɓɔ: «Kikiliki inu ɓamakwɔɓɔsɛmɨ, ɓundoneni ɓaka-sɨ atɨ baya eno aka. Nɔ́gyaɓana-sɨ mɨtɨndɨ, nɔ, nɔ́kwaa. Suo nɛkʉɓa, nɔ꞊chwɛa tɨta apɛlʉ ɓɔ cha, nɔ꞊sa yeno.» Ɓɔ꞉tosio ɓɔ: «Haa, yangɔmʉ ɓanɨ, isu ta꞊kwaa ta aibamu aka.» 3Yakamɛngana, ɔ꞉ɓʉkpakpa ta ɓɔ ndi, akɔɓɔya ta aka ɓa꞉baya-ɔɔ ɓundono andɔngɔ, nɔ, kumonio ambɛnɨ. Ɔ꞉pʉnga naɓɔ anɨsɨa idyo yɛta iɗo, nɔ naɓɔ, anʉyɨa mɨkatɨ, kʉdɔ, ɓɔ꞉dyakaka.
4Ɨɓɔ-sɨ ta ɓɔ ɓa꞉ngɔkwaenimʉ, ɓague ngʉɓɔ Sɔdɔmʉ ɓɛ꞉ka, ɓɔ maka maka, akɔkunguo ɨkáá. Tɨa akɔ ɓakʉʉ, tɨa akɔ ɓandambʉ, mombi ɔ꞉kɔtukuomʉ! 5Ɓɛ꞉soko Lɔtɨ, ga ɨɓɔ nayɔ ɓɔ: «Isue, ɓague ngʉɓa ɓɛ꞉kɔ andɔɔ nɛpasɨ aka, ɓa gbanɨ? Ɓuchweiso iyani aɓei, takʉnda naɓɔ akɨa yaka ngɨyɛ ya amʉtɨma ngʉweso.»
6Kʉdɔ, Lɔtɨ a꞉chwɛa inani ɓa꞉ɓio-ɛɛ aɓei, ɔ꞉kuto umongu ambise angɔ ga gbu. 7Ga ɨyɔ naɓɔ ɓɔ: «Kikiliki, inu ɓaya, nátɨkɨamʉ ɓaka ɓʉɓɨɓɨ ɓanɨ. 8Ɨmɨ, nanɔ ɓiga ɓeɓoi ɓapɨnɨ, ʉɓa, ɓangɛmbɨamʉ yaka yɔ ɓague. Na꞊ninjo eɓo, nɔ꞊ɓʉkɨa ndʉ aka nakʉnda-ɔɔ naɓɔ akɨa. Yakamɛngana, nátiɓotomʉ ɓague ngʉɓa, dɔ ɨɓɔ, ɓa ɓabika ɓɔsɛmɨ, ʉɓa nɔkwananɔ naɓɔ apɛmakɨa.» 9Kʉdɔ ɨɓɔ, ɓɔ꞉tosio ɓɔ: «Ʉwɛ, ʉngwa ana-a!» Ga ɨɓɔ ɓata kʉ ɓɔ: «Himbo, ineni-sɨ ɨkyɛmʉ yɔ mɛɛka ngʉwa, akʉnda-sɨ panɨa ɓaneni? Kanganɨa iɗo! Ɨyɛ yɔbio anɨtanɨa naɓɔ akɔkɨa, ɨtakɨtakɨ ngɨyɛ, ta꞊nakɨa tɨta ʉwɛ nɔgbɛ akɔchana.» Kʉdɔ, ɓɔ꞉mutito Lɔtɨ ga tigbo, ɨɓɔ akɔhata ɓɔ ɓiɓundo gɔ umongu ta ɓundo. 10Yakamɛngana, ɓabika ngʉɓɔnanɨ, ɓɔ꞉chwɛiso lɨkɔndɔ aɓei, nɔ, ɓɔ꞉muɗuɗuo Lɔtɨ inani ambɛnɨ. Ɓɔ꞉kuto umongu ga gbu. 11Ɓombi ɓaɓomu ngʉɓa ɓa꞉ɓio ananɨ anɔ umongu, ɨɓɔ ɓague ɓapɨnɨ ngʉɓɔnanɨ ɓɔ꞉ɓukutoko mesu nɔ mamɔmɔ, ga wali wali. Ɓɔ꞉pʉnga ɓotio ʉmʉwa ga kpa kpa kpa, tɨta ɓʉtʉʉ, pɔ tii pɔ anɨna umongu.
Lɔtɨ ɔchwɛɔ amati ɔ ɨkʉmbʉ yɔ Sɔdɔmʉ
12Ga ɓombi ɓapɨnɨ ngʉɓɔnanɨ nɔ Lɔtɨ ɓɔ: «Wɔɓieni ɓata kʉ nɔ mombi ngakɔmɔ agʉlʉ ngɨa, ndʉ ɓana ɓɔsɔɔ ngʉɓɔ ɓegue, ga pɔ ʉɓɔ ɓeɓoi, pɔ ɓaswaɨ ɓɔ ɓana ɓɔsɔɔ, nɔ ɓafandɔɔ ɓaɓomu ɓɔ sɛ, ɓʉchwɛiso, nɔ, nɔ́hoko agʉlʉ ngɨa ta nuhoko. 13Dɔ, MAKWƆƁƗƗ ɔ꞉ka pɛ, ɓɔ ndɨana ngɨyɔ ɓombi akʉʉ eɓo, yɔbeluo tɨa beluoni. Kʉdɔ, ɔ꞉tɨtʉmɔ ɓɔ tɨdʉka gʉlʉ ngɨa ta dʉka.»
14Kʉɓanɨ, Lɔtɨ ɔ꞉sa aɓɨakɨa ɓandambʉ gʉɓa ɓa꞉ɓio akʉnda asɨkana nɔ ɓana ɓangɔ. Ga ɨyɔ naɓɔ ɓɔ: «Chweyeni akɔ gʉlʉ ngɨa ta ɨtakɨtakɨ ngɨyɛ, dɔ, MAKWƆƁƗƗ akʉnda dʉka gʉlʉ ngɨa.» Yakamɛngana, ɨɓɔ ɓandambʉ, ɓɔ꞉sɨka yaka ngɨyɛnɛnɨ a꞉ɓio naɓɔ asigio ta ndɨ mʉjɛɛ.
15Tɨa nekuɓa apɛlʉ, ɓamalaika ngʉɓɔnanɨ ɓɔ꞉pʉnga titio Lɔtɨ ɓɔ: «Ha gue, ʉngwa ɨkʉʉ, sɨka moi asɔɔ, nɔ ɓana ɓɔsɔɔ ɓapɨnɨ ngʉɓa ɓeɓoi ɓa aka, iɗo ambɔ nátɨdʉkenimʉ inu, akɔ ɓʉɓɨɓɨ ɓɔ gʉlʉ ngɨa.» 16Ndʉ Lɔtɨ a꞉ɓio anatana kyɛnda ɓɔ pɛɨ pɛɨ, kʉdɔ, ɓombi ngʉɓɔnanɨ ɓɔ꞉mʉfa ɨkɔndɔ, ɨhɔ nɔ moi angɔ, nɔ ɓana ɓangɔ ngʉɓa ɓeɓoi ɓapɨnɨ. Ɨnadɔ MAKWƆƁƗƗ a꞉ɓio akʉnda nayɔ aɓwanakiso. Kʉdɔ, ɓa꞉muchwɛiso, nɔ, ɓɔ꞉sa nayɔ asɨa tɨta aɓei ɔ gʉlʉ. 17Tɨa aka ɓa꞉ɓio-ɔɔ nayɔ achwɛiso aɓei ɔ gʉlʉ, mʉngana ati eɓo ɔ꞉musigio ɓɔ: «Tʉgbʉeni, dɔ nátɨdʉkenimʉ. Kpɔ kpɔ kpɔ, nátɨtɨnamʉ ɓajwa nɔ mbise, pɔ anɨmaa anɔ ɨngbaa, ananɨ amati ɔ ihoi ngɨyɛ. Seni bangʉ, inani amati ɔ lɨkpangba, dɔ, nátɨdʉkamʉ.»
18Ga Lɔtɨ naɓɔ ɓɔ: «Hii! Kikiliki Makwɔɓɨɨ, watɨkɨamʉ ɓaka ɓanɨ. 19Kikiliki, ya ta ingono ɓɔ ɨmɨ baya asɔɔ nɛ꞉nɨanɨɔ nɔ ɨjɨɔ apɛɨ asɔɔ, nɔ, wɔ꞉pananiso iɗo iɗo, nɛmɨ akɔheiso akɔ ingwo. Yakamɛngana, nangɔmʉ anɨsa nɔ bangʉ akʉʉ ɔ lɨkpangba, ɓʉkaɓʉkaɨ ɓa꞊nagbʉka ta anɔ ɨngbaa, nɔ na꞊wo ta woni. 20Kikiliki, kanga-sɨ mwana ɔ ɨkʉmbʉ ngɨyɛ, yanɨnɨa ɓɔ belee aki. Ya ta tinene, nɨsa gɔ pɛngɛ anʉɓa inani, iɗo ambɔ nátiwomʉ.» 21Kʉdɔ, malaika ɔ꞉mutosio ɓɔ: «Iii, nɔnabaɨyɔ ɓata ta baɨyanɨ. Nangɔdʉkamʉ ɓata mwana ɔ ɨkʉmbʉ ngɨananɨ. 22Chwa bangʉ, nɔ, wɔsa anʉɓa inani, nangɔkɨamʉ-sɨ ɨkyɛmʉ, pɛɨ ngɨa waɓɔya-ɔɔ inani.» Yaka ngɨyɛ ɓa꞉sʉa-ɔɔ gʉlʉ ngɨananɨ ino ɓɔ Sɔalɨ#19:22 Sɔalɨ: pɔ ɓɔ ɨsɨ yɔngɔ ɓɔ «bele» nɔ Ebelenia, ya꞉kwa ɓanɨ. 23Lɔtɨ a꞉ɓɔya inani anɔ Sɔalɨ, ɨpá yɔɓieni tɨa achwɛa.
Asɔɓɨɨ ɔdʉkɔ Sɔdɔmʉ nɔ Gɔmɔla
24Kʉdɔ, MAKWƆƁƗƗ ɔ꞉to dyaa, ɨhɔ nɔ baluti ndʉ ʉgbaá anɨngwa akʉʉ ɔ ɓisi, akʉʉ ɔ Sɔdɔmʉ nɔ Gɔmɔla. 25Ɔ꞉dʉka ɓombi ɓɔ ɨkʉmbʉ, nɔ ɓagʉlʉ ngʉɓɔnanɨ, nɔ iju, nɔ ihoi kʉ iɓomu, ga gbatata. 26Yakamɛngana, moi ɔ Lɔtɨ, ɔ꞉tɨna ɨyɔ ajwa nɔ mbise, ɔ꞉natakanaka ititi yɔ mukwe, gbɛgbɛ ta ananɨ.
27Nekuɓa yɔngɔ, ta nɔ igbandindi ɓɔ cha, Abalaama ɔ꞉sa akɔ ʉmʉa ngʉwa ɛ꞉maa jɛnɛ-ɔɔ, apɛɨ ɔ MAKWƆƁƗƗ. 28Ɔ꞉tɨna ajwa nɔ ʉgbaa mesu anɔ Sɔdɔmʉ, nɔ Gɔmɔla, nɔ akɔ ihoi ngɨyɛnɛnɨ iɓomu, nɔ ɛ꞉na umwei wɔta ʉja, akɔɗeto nɔ ɨkʉʉ, ngbanga ndʉ ɓʉya mboɓi. 29Ɨyɛ ndʉ Asɔɓɨɨ a꞉ɓio adʉka ɓagʉlʉ amati ɔ ihoi ngɨyɛnɛnɨ, Lɔtɨ a꞉ɓio jɛnɛ ɓɔ ɔwoleni-ɛɛ ɨkʉmbʉ, ɔ꞉tunguo Abalaama. Ta akʉʉ ɔ itungwio ngɨyɛnɛnɨ, ɨyɛ Lɔtɨ ɔ꞉tɔɓwanaka-ɔɔ.
Uduɓa ngʉwɔ Lɔtɨ nɔ ɓana ngʉɓangɔ ɓeɓoi
30Kʉdɔ, Lɔtɨ ɔ꞉hoko anɔ Sɔalɨ tɨta nʉhoko dɔ, a꞉ɓio tɨa nɔ ʉɓá akɔɓio ɓata ɨkʉmbʉ ananɨ. Ɓɔ꞉tɔsa awolo ɨkʉmbʉ tɨa akʉʉ ɔ ɨkpangba, ɨɓɔ nɔ ɓiga ɓeɓoi ɓapɨnɨ ngʉɓangɔ, amati ɔ ʉgbʉ wɔ ikopi. 31Tɨa ɓisi mʉngana, ga gwa ata moi ngɨa mʉkʉʉ nɔ gwa ata mwana ɓɔ: «Wanɨna iɗo ɓɔ aba ngɨyeso, a tɨa mʉkʉʉ, nɔ ɓague ɓangɔmʉ tinetine aka amati ɔ ɨkʉmbʉ ngɨyɛ, ʉɓa takyɛnda naɓɔ, kʉndʉ ɓalɨkʉmbʉ ɓakyɔkɨa. 32Ndʉ ya ɓanɨ, tɨmʉmwakiso gɔ aba ʉkyɛpʉ. Iɗo ambɔ, mbise ɔngɔ tɨ꞊kwaa naɓɔ, nɔ tɔmʉnɔtɨa kʉɔ aba ngɨyeso ɓanɔnɔ.» 33Ta nɛpasɨ yɔngɔ, ɓɔ꞉mumwokiso ɨsɛ eɓo ʉkyɛpʉ, nɔ, gwa ngɨa mʉkʉʉ ɔ꞉sa akwaa nayɔ. Ɨyɔ ɨsɛ, sɔkɔmʉ ɨmbɨa yaka ngɨyɛ ya꞉kyananakɨa, pɔ bele, pɔ aka mwana a꞉kwala-ɔɔ anambamba angɔ, pɔ aka a꞉ngwa-ɔɔ.
34Nekuɓa yɔngɔ, ɨyɔ mʉkʉʉ, ɔ꞉musigio mwana ɓɔ: «Pɛkɔpɛ naɓutu, ɨmɨ, nɔ꞉kwaɔ pɛngɛ nɔ aba kwaanɨ. Naɓutu ngɨa ɔ ɓʉɓʉnʉ, tɨmʉmwakiso ɓata ʉkyɛpʉ nga wɔmɔ, dɔ ʉwɛ, kwaa nayɔ kʉ kwaanɨ, iɗo ambɔ, tɨmʉnɔtɨa kʉɔ aba ngɨyeso ɓanɔnɔ, nɔ isu, tɨnɔta ɓana tɨa ɨngbaa akɔ ɨyɔ.» 35Kʉdɔ, nɛpasɨ yɔngɔ, ɓɔ꞉mʉmwakiso ɓata ɨsɛ eɓo kʉ ʉkyɛpʉ. Kʉɓanɨ, gwa ngɨa mwana ɔ꞉sa ɨyɔ kʉ akwaa nɔ ɨsɛ eɓo. Ɨyɔ ɨsɛ eɓo, sɔkɔmʉ ɨmbɨa yaka pɔ mɛngana ngɨyɛ ya꞉kyananakɨa, pɔ aka mwana a꞉kwala-ɔɔ anambamba angɔ, pɔ aka a꞉ngwa-ɔɔ. 36Nɔ ɨgbaa ngɨyɛnɛnɨ, ɓiga ɓeɓoi ngʉɓɔ Lɔtɨ ɓapɨnɨ ɓaɓomu, ɓɔ꞉sio maa, ɨngbaa akɔ ɨsɛ eɓo. 37Gwa ta mʉkʉʉ, a꞉nɔta ɨyɔ mwana ata gue, ɔ꞉mʉsʉa ino ɓɔ Mʉabʉ#19:37 Mʉabʉ: pɔ ɓɔ ɨsɨ yɔngɔ ɓɔ «a꞉chwɛa atɨ aba» nɔ Ebelenia. Ɨyɔ, Mʉabʉ akɛ a ɨsɛngʉʉ wɔ Ɓamʉabʉ, ngʉɓɔ ɓʉɓʉnʉ. 38Gwa ngɨa ata mwana, ɔ꞉nɔta ɨyɔ kʉ mwana ata gue, ɔ꞉mʉsʉa ino ɓɔ Bɛnɨ-Amɨ#19:38 Bɛnɨ-Amɨ: pɔ ɓɔ ɨsɨ yɔngɔ ɓɔ «mwana ɔ ɓandɛsɔ» nɔ Ebelenia. Ɨyɔ, Bɛnɨ-Amɨ akɛ a ɨsɛngʉʉ wɔ Ɓaamɔnɨ ngʉɓɔ ɓʉɓʉnʉ.
Currently Selected:
Mʉkpanganɨa 19: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
