Mʉkpanganɨa 20
20
Abalaama nɔ ngama Abɨmɛlɛkɨ
1Ɓisi mʉngana, Abalaama a꞉hoko ananɨ anɔ Mamʉlɛ, ɔ꞉tɔsa awolo ɨkʉmbʉ tɨa anɔ Negebu, amusungati wɔ Kadɛsɨ nɔ Sulia. Kʉdɔ, mbise ɔngɔ, ɔ꞉tɔsa tɨa awolo anɔ Gɛlalɨ ndʉ mɛɛka. 2Ɨyɔ Abalaama, a꞉tɨsugoko ɓɔ moi angɔ Sala, a mʉsaɨ wangɔ. Tɨa kʉ ananɨ Abɨmɛlɛkɨ, ngama ɔ ɨkʉmbʉ yɔ Gɛlalɨ, a꞉tʉma-ɔɔ ɓombi akɔsɨka Sala.
3Yakamɛngana, naɓutu Asɔɓɨɨ ɔ꞉chwɛanɨa Abɨmɛlɛkɨ akɔ lɨwɔtɔ, nɔ, ɔ꞉mʉngɨa ɓɔ: «Ʉwɛ, wɔmanɔ aniwo akɔ yaka yɔ moi ngɨa wa꞉mʉsɨka pɛ, dɔ, a moi ɔ mombi.» 4Ɨnadɔ, Abɨmɛlɛkɨ a꞉ɓio-sɨ ta ɓɔ angɔjonokienimʉ nɔ Sala. Ga ɨyɔ Abɨmɛlɛkɨ aka ɓɔ: «Makwɔɓɨɨ, wa꞊wa ndɨ ɓombi wanɨ, gʉtʉ ɓɔɓieni ta ngbingbii? 5Sɔkɔmʉ-sɨ ta ɨyɔ ingainga, a꞉naɓia pɔngɔ ɓɔ: ‹Mʉsaɨ asɛmɨ ɨya.› Nɔ gʉtʉ ta ɨyɔ moi, ɔ꞉bandanɨa kʉɓanɨ ɓɔ: ‹Aya asɛmɨ.› Kwananɨ ɨmɨ, na꞉kɨa pɛ yaka ngɨyɛnɛnɨ mʉtɨma ta ɓɔ dɨɨ, dɔ ɨmɨ ingainga, nɔ꞉kɔkɨɔmʉ ɓʉɓɨɓɨ pɔ mʉngana.»
6Kʉdɔ, Asɔɓɨɨ ɔ꞉mutosio akɔ lɨwɔtɔ ɓɔ: «Ii, ɨmɨ nanɨmbɨa kʉ iɗo ɓɔ, wa꞉kɨa pɛ yaka ngɨyɛnɛnɨ mʉtɨma ta ɓɔ dɨɨ, nɔ janga nɨmbɨa. Tɨa kwananɨ, na꞉nasɨamʉ pɛ-ɔɔ nayɔ aɓoto, dɔ, watɨnakɨamʉ ɓʉɓɨɓɨ. 7Ɨtakɨtakɨ ngɨyɛ, mutosio swaɨ ɔ moi, moi angɔ, dɔ ɨyɔ swaɨ, a ɨgbɛ yɔ Asɔɓɨɨ. Ɨyɔ, a꞊nɛtɨa Asɔɓɨɨ ambɔ watɨwomʉ. Yakamɛngana, ndʉ wangɔmutosio ɨyɔ, ɨmbɨa mbɨanɨ ɓɔ wa꞊wo, nɔ ɓandɔɔ ta ɓaɓomu ɓɔ sɛ.»
8Ta nɔ imbo yɔ ikuɓa ngɨyɛnɛnɨ, Abɨmɛlɛkɨ a꞉jʉkana-ɔɔ, ɔ꞉mɔma ɓandɔngɔ ɓaɓomu, nɔ tɔdʉ wɔ yaka ngɨyɛnɛnɨ. Kʉdɔ, ɓɔ꞉huo nɔ ʉɓá ga fɔ. 9Abɨmɛlɛkɨ ɔ꞉misoko ɨyɔ Abalaama, nɔ, ɔ꞉muɓokuo ɓɔ: «Ha gue, wa꞉tɨkɨa pɛ ɓanɨ dɔtanɨ? Yaka yɛta ɓɨɓɨ nga yino tanɨ na꞉nakɨa pɛ? Ɨna-sɨ tɨa ndʉ aka wɔtɨkumoniso-ɔɔ, amati ɔ ɓʉɓɨɓɨ ɓɔta kisoɓa ɓɔ, ɨmɨ, nɔ ɓandamɨ kʉtaa. Yaka ngɨyɛ wɔnakɨɔ ɨmɨ ayɛ, yɔsisekiomʉ kyananakɨa pɔ bele. 10Itungwio nga yeno tanɨ wa꞉ɓio pɛ nayɔ, nɛmɨ akɔkɨa ɓanɨ?» 11Abalaama ɔ꞉mutosio ɓɔ: «Nɛ꞉na pɛ ɓɔ mombi ngɨa akumo Asɔɓɨɨ angɔmʉ pɔ mʉngana aɨkʉmbʉ ngɨyɛ. Yɛmɔ, ɓabinawa ɨmɨ kʉ yayɛ, akɔ yaka yɔ moi asɛmɨ. 12Nɔ ya ingainga ɓanɨ, tɔ꞉chwɛɔ nayɔ atɨ abaa, yakamɛngana, ɓɛnaa di di di. Isu, tɔ꞉sɨkana tɨa kʉ sɨkana. 13Ɨyɛ ndʉ Asɔɓɨɨ a꞉nanguso atɨ aba, nɔ, ɔ꞉natʉma alɨkʉmbʉ lɔ ɓangɛ, kʉdɔ ɨmɨ, na꞉panɨa Sala ɓɔ: ‹Anapananiso ɓaka iɗo iɗo ngɨyɛsɔɔ, akɔ lɨda liɓomu ngɨlɛ taɓijoo suo-ɛɛ, ʉnga ta ɓɔ na mwana ɔ anʉ.›»
14Kʉdɔ, ɨyɔ Abɨmɛlɛkɨ a꞉sɨka kʉ nɔ ɓakɔndɔlɔ, kʉ nɔ ɓamɛmɛ, kʉ nɔ ɓangɔmbɛ, kʉ nɔ ɓombi ɓɔ tɛa ɓague nɔ ɓoi, ɔ꞉ɓinjo Abalaama, nɔ, ɔ꞉mutosio moi angɔ Sala ga gbʉ. 15Ɔ꞉tɔmatɨa ɓata ɓɔ: «Ɨkʉmbʉ ngɨyɛsɛmɨ ɨyɛ, wɔkʉndeni, uwolo ɨkʉmbʉ ta aka wa꞊baya-ɔɔ.»
16Ɨyɔ Abɨmɛlɛkɨ, ɔ꞉natana mesu aki Sala a꞉ɓio-ɛɛ, nɔ, ɔ꞉sugo ɓɔ: «Nɔminjo mwana ɔ anʉ ɓagyɛgyɛ ɛlɔfʉ mʉngana, dɔ, ɓangɛ ɓɨmbɨa ɓɔ wa꞉kɨɔmʉ pɛ ʉwɛ, ɓʉɓɨɓɨ. Tɨa kʉɓanɨ, mombi muɓomu ɛ꞊na ɓɔ wa ta moi wɔ ɨmbʉka.»
17-18MAKWƆƁƗƗ a꞉dɨkpa ɓoi ɓɔ Abɨmɛlɛkɨ ɓaɓomu ʉnɔtʉ, akɔ yaka yɔ Sala, moi ɔ Abalaama. Kʉdɔ, Abalaama ɛ꞉ta Asɔɓɨɨ, nɔ ɨyɔ Asɔɓɨɨ, ɔ꞉heiso Abɨmɛlɛkɨ nɔ moi angɔ, nɔ ɓoi ɓɔ tɛa ngʉɓangɔ, adaa ngɨa ɓanɔta ɓata-ɔɔ kʉ nɔtanɨ.
Currently Selected:
Mʉkpanganɨa 20: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
