Mʉkpanganɨa 30
30
1Ngbinga ngɨa Lakeli ɛ꞉na-ɔɔ ɓɔ, angɔmʉ anɔtɨa Yakɔɓɔ ɓana, ɔ꞉pʉnga napɨa manye ngɨa ata moi tɨa nɔ ɨwaɨ. Ga ɨyɔ nɔ Yakɔɓɔ ɓɔ: «Anenjo ɓana, dɔ sɔkɔmʉ ɓanɨ, nɔmanɔ aniwo.» 2Yakɔɓɔ ɔ꞉kwa ʉnganga nayɔ, nɔ, ɔ꞉musigio ɓɔ: «Wɔnɛnɔ ndɨ ɓɔ ɨmɨ, na tɨa Asɔɓɨɨ ngɨa anɔwɛ anengyo ɓɔ, watɨnɔtamʉ ɓana?» 3Lakeli ɔ꞉mutosio ɓɔ: «Bila, mombi ɔ tɛa ngɨasɛmɨ ata moi, ɨya. Mʉsɨka, ɨnanɔtɨa ɓaka ɓana, iɗo ambɔ ɨmɨ, nɨnɨanɨa gʉtʉ nɔ ɓana tɨa ambise angɔ.» 4Kʉdɔ, ɔ꞉minjo Yakɔɓɔ Bila ndʉ moi ga gbʉ, nɔ, ɓɔ꞉jonokio nayɔ. 5Bila ɔ꞉sio ɓʉa, nɔ, ɔ꞉mʉnɔtɨa Yakɔɓɔ mwana. 6Ga Lakeli ɓɔ: «Asɔɓɨɨ ɔ꞉kio mʉkɔmbʉ ngʉwɔsɛmɨ, nɔ, ɔ꞉kɔ ndɨana ngɨyɛsɛmɨ, nɔ, ɔ꞉nenjo mwana ata gue.» Ɔ꞉mʉsʉa mwana ngɨananɨ ino ɓɔ Danɨ#30:6 Danɨ: pɔ ɓɔ ɨsɨ yɔngɔ ɓɔ «juji» nɔ Ebelenia. 7Bila, mombi ɔ tɛa ngɨyɔ Lakeli, ɔ꞉siyo ɓata ɓʉa, nɔ ɔ꞉nɔtɨa Yakɔɓɔ mwana ata gue ngɨyɔ ɓepini. 8Ga Lakeli ɓɔ: «Nɔ꞉ɓɛndaniso ɓaka ɨmɨ agbanga ata ɓʉkaɓʉkaɨ, nɔ aya ngɨasɛmɨ ata moi, nɔ, nɔ꞉nagaakɔ dɔ ta nagaakanɨ.» Kʉdɔ, ɔ꞉mʉsʉa mwana ngɨananɨ ino ɓɔ Nafʉtalɨ#30:8 Nafʉtalɨ: pɔ ɓɔ ɨsɨ yɔngɔ ɓɔ «agbanga» nɔ Ebelenia.
9Nɔ, ta ngbinga ngɨa Lɛa ɛ꞉na-ɔɔ ɓɔ ʉnɔtʉ ngʉwangɔ, wɛ꞉pɔ tɨa ɨpanɨ, ɔ꞉mʉsɨkɨa Yakɔɓɔ Jɨlɨpa mombi ɔ tɛa ngɨangɔ, ata moi, ɔ꞉minjo ɨyɔ ga gbʉ. 10Kʉdɔ, Jɨlɨpa, mombi ɔ tɛa ngɨyɔ Lɛa, ɔ꞉mʉnɔtɨa Yakɔɓɔ mwana ata gue. 11Ga Lɛa ɓɔ: «Ɨna ambɔ ngasa yakisoɓa-ee!» Ɔ꞉mʉsʉa mwana ngɨananɨ ino ɓɔ Gadɨ#30:11 Gadɨ: pɔ ɓɔ ɨsɨ yɔngɔ ɓɔ «ngasa» nɔ Ebelenia. 12Jɨlɨpa, baya ngɨyɔ Lɛa ɔ꞉tɔnɔtɨa ɓata Yakɔɓɔ mwana ata gue ngɨyɔ ɓepini. 13Ga Lɛa ɓɔ: «Ɨna ambɔ ɨgyagya yakisoɓa nɛmɨ-ee! Ɓoi ɓa꞊ɓio suo asugo tɨa ga nɔhuo nɔ ɨgyagya.» Kʉdɔ, ɔ꞉mʉsʉa mwana ngɨananɨ ino ɓɔ Aseli#30:13 Aseli: pɔ ɓɔ ɨsɨ yɔngɔ ɓɔ «ɨjangɨa» nɔ Ebelenia.
14Ɓisi mʉngana, Lubeni a꞉sa aneju akɔ angbinga ngɨyɔ buoko masɔɔ kɔ nganɔ. Kʉdɔ inani, ɔ꞉tejeyo lipumo lɔ ɨsʉɓa#30:14 lipumo lɔ ɨsʉɓa: pɔ ɓɔ lipumo ngɨlɛ ɓa꞉tɨkɨa nɔ itungwio akʉʉ ɔngɔ ɓɔ lanjo ɓoi ʉnɔtʉ nɔ ɛ꞉kɨa nalɔ inye Lɛa. Kʉdɔ, Lakeli a꞉ɓio nɔ Lɛa ananɨ ɓɔ: «Kikiliki, anenjo ɓaka kʉɔ mikpekpe yɔ lipumo lɔ ɨsʉɓa, ngɨlɔ mwana asɔɔ.» 15Lɛa ɔ꞉mutosio ɓɔ: «Yaka ngɨyɛ wa꞉nahɨnɨa-ɔɔ gue ngɨasɛmɨ, ʉwɛ, wakyɛna ta ɓʉtʉʉ! Tɨa kʉ ananɨ wa-ɔɔ akʉnda asɨka tɨa kʉ nɔ lipumo lɔ ɨsʉɓa ngɨlɔ mwana asɛmɨ?» Lakeli ɔ꞉mutosio ɓɔ: «Ndʉ ya gɔ-sɨ ɓanɨ, ɓʉɓʉnʉ naɓutu, a꞊ɓio-sɨ ɓʉnʉ ɓʉkwaa tɨta inani andɔɔ, akʉʉ ɔ lipumo ngɨlɔ mwana asɔɔ.»
16Nɛpasɨ ngɨyɛnɛnɨ, ndʉ Yakɔɓɔ a꞉tɔwa aneju, Lɛa ɔ꞉mɨsɨnganɨa, ga ɨyɔ nayɔ ɓɔ: «Ɓʉɓʉnʉ, wa꞊ɓio ɓʉkwaa ta iyani andamɨ, dɔ, nɔ꞉nakayakɨɔ nɔ lipumo lɔ ɨsʉɓa ngɨlɔ mwana asɛmɨ, kayakɨanɨ.» Kʉdɔ, ɓa꞉kwaa nayɔ naɓutu ngɨananɨ ta ɓanɨ. 17Asɔɓɨɨ ɔ꞉ka nɨta ngɨyɔ Lɛa, kʉdɔ, ɔ꞉siyo ɓʉa, nɔ, ɔ꞉nɔtɨa Yakɔɓɔ mwana ata gue ngɨyɔ ɓɔkʉ. 18Ga Lɛa ananɨ ɓɔ: «Asɔɓɨɨ ɔ꞉nakwɔ, dɔ ne꞉njo pɔngɔ gue asɛmɨ, mombi ɔ tɛa ngɨasɛmɨ, ata moi.» Kʉdɔ, ɔ꞉mʉsʉa mwana ngɨananɨ ino ɓɔ Isakali#30:18 Isakali: pɔ ɓɔ yanʉkanɨa tinetine ndʉ «mʉkaya» nɔ Ebelenia. 19Lɛa ɔ꞉siyo ɓata ɓʉa, nɔ, ɔ꞉mʉnɔtɨa Yakɔɓɔ mwana ata gue ngɨyɔ mɛɗɨa. 20Ga ɨyɔ ɓɔ: «Asɔɓɨɨ ɔ꞉nenjo apɛpɛ ata muɗo. Gue asɛmɨ, a꞊nabibiso pɛpɛ ɓʉnʉ nɔ kyɛnda nga yɛɓɔ ta bibisoni, dɔ, nɔ꞉mʉnɔtɨɔ tɨa ɓana ɓegue mɛɗɨa.» Kʉdɔ, ɔ꞉mʉsʉa mwana ngɨananɨ ino ɓɔ Jɛbʉlʉnɨ#30:20 Jɛbʉlʉnɨ: pɔ ɓɔ yanʉkanɨa tinetine ndʉ «bibiso» nɔ Ebelenia. 21Ambise ɔngɔ, ɔ꞉tɔnɔta tɨa mwana ata moi, nɔ, ɔ꞉mʉsʉa ino ɓɔ, Dina.
22Kʉdɔ, Asɔɓɨɨ a꞉mutunguo Lakeli, nɔ, ɛ꞉mbɨa mʉsasa ngʉwangɔ, nɔ, ɔ꞉mʉsalɨa ɓɔ isiyo ɓaka kʉɔ ɓʉa. 23Ɔ꞉tɔsiyo ɓʉa ta ɓanɨ, nɔ, ɔ꞉nɔta mwana ta gue, ga ɨyɔ ɓɔ: «Asɔɓɨɨ ɔ꞉nangusio soni ngɨyɛsɛmɨ ngusioni.» 24Ɔ꞉mʉsʉa mwana ngɨananɨ ino ɓɔ «Yɛjɛfʉ», nɔ ɔ꞉sugo ɓɔ: «Hii, MAKWƆƁƗƗ ɨnamatɨa gɔ ɓata mwana ata gue ta matɨanɨ!»
Yakɔɓɔ ɛnɨanɨɔ nɔ lɨkyɛmʉ
25Ambise ɔ nɔtanɨa ngɨyɛ Yɛjɛfʉ, ga Yakɔɓɔ nɔ Labanɨ ɓɔ: «Anenjo-sɨ kyɛnda tɨa injoni, nɨtɔwa tɨa kʉ andɛsɔ. 26Wɔnasɨa anɨsa tɨa kʉ nɔ ɓoi, nɔ ɓana ngʉɓɔsɛmɨ, ʉɓa, na꞉nakyanakɨa pɔngɔ-ɔɔ, akɔ yaka yeɓo. Ʉwɛ, watanɨmbɨa tɛa yɛta ɨja ngɨyɛ, na꞉nakɨa pɔngɔ.» 27Yakamɛngana, Labanɨ ɔ꞉mutosio ɓɔ: «Kikiliki ha gue, anɔka ɓaka-sɨ bele. Ɓanɔkɔ ngʉɓɔsɛmɨ ɓɔ꞉naɓɨɔ pɛngɛ ɓɔ MAKWƆƁƗƗ ɔ꞉nakiokio ɨmɨ, ta amʉkɔngʉ wɔsɔɔ. 28Anachwɨa pɨ ɨkyɛmʉ ngɨyɛ wakʉnda, ndʉ mʉkaya. Kʉdɔ, na꞊nenjo ɨyɔ.» 29Ga Yakɔɓɔ nayɔ ɓɔ: «Sɨ watanɨmbɨa nɔ ɨngbaa nga yeno tanɨ na꞉nakyananakɨa pɔngɔ-ɔɔ, nɔ ɓanama ngʉɓɔsɔɔ ɓɔ꞉cho, alɨkɔndɔ lɨsɛmɨ. 30Mukpekpe yɔ ɓanama, ngʉɓa wa꞉ɓio naɓɔ pɛɨ asɛmɨ anɨka, ɓa꞉cho pɔngɔ tɨa ɓaja nɔgbɛ. MAKWƆƁƗƗ a꞉nokiokio ʉwɛ, anɨngwa ta aka, na꞉kumonio jɛnɛ-ɔɔ andɔɔ aka. Yɔkwananɔ ɓɔ nɨpʉnga-sɨ tɨa kʉɔ akɨa ɨkyɛmʉ, akɔ ɨfananja ngɨyɛsɛmɨ ɓɔ kpɛ.»
31Labanɨ ɔ꞉muɓokuo ɓɔ: «Yɔɓieni ɓɔ waɓata akʉnda aɓio kʉ ɨhɔ nemɨ, nɨnakwa dɔ tɨa nɔ ɨmanɨ?» Ga Yakɔɓɔ nayɔ ɓɔ: «Nangɔmʉ ɨmɨ, nɔ taa yɔ ɨkyɛmʉ. Yakamɛngana, ndʉ wakɨa ta yaka ngɨyɛ nanɔwɛ asigio ɨtakɨtakɨ ngɨyɛ, ɨmɨ, na꞊pʉnga ɓata ta ɓeyoko ɓanama ngʉɓɔsɔɔ, nɔ naɓɔ adyaakiso. 32Ɓʉɓʉnʉ, anasɨa aponyoko amati ɔ mutunduga wɔ ɓanama ngʉɓɔsɔɔ, ɓakɔndɔlɔ ɓaɓomu, ʉɓa, ɓa꞊ɓio ndʉtʉ ɨbanda ɓɔ nji nji nji, nɔ ɓamɛmɛ, nɔ ɓakɔndɔlɔ ɓaɓomu, ngʉɓa ɓa, ndʉtʉ nɔ lɨɗa ɓɔ kpɛɛ kpɛɛ. Ɨyɛnɛnɨ ya꞊ɓio mʉkaya ngʉwɔsɛmɨ, nanɔwɛ anɨta. 33Ngbinga ngɨa wɛ꞊ka suo-ɔɔ, mbise anɨna mʉkaya ngʉwɔsɛmɨ, ɓungbingbii ngʉɓɔsɛmɨ, ɓɛ꞊mbɨanɨa suo tɨa ananɨ. Ndʉ wagbʉka ati ɔ mutunduga ngʉwɔsɛmɨ, kɔndɔlɔ muɓomu, ngɨa angɔɓiomʉ ndʉtʉ ɨbanda ɓɔ nji, pɔ mɛmɛ ngɨa angɔɓiomʉ nɔ lɨɗa ɓɔ kpɛɛ kpɛɛ, ambɔ nɔmiɓo niɓo.» 34Labanɨ ɔ꞉mutosio ɓɔ: «Ɛɛɛ, yaɓanɨ, yɨkyananakɨa tɨta ndʉ ananɨ wɔ꞉sugo-ɔɔ.»
35Yakamɛngana, nɔ ɓisi ngʉɓɔ ta ɓʉnanɨ, ɨyɔ Labanɨ, a꞉ponyoko lagbonguo ngɨlɔ mudii nɔ ɨlɔ lɨɗa, nɔ ɓamɛmɛ ɓaɓomu, ngʉɓɔ lɨɗa lɨta tu tu tu, nɔ ʉɓa, ɓa ɓɔ kpɛɛ kpɛɛ. Ɔ꞉tɔponyoko tɨa kʉ nɔ ɓakɔndɔlɔ ɓaɓomu, ngʉɓa ɨbanda ɓɔ nji nji nji. Kʉdɔ, ɔ꞉ɓinjo ɓana ɓangɔ, ɓɔ ɓiɓio naɓɔ aɓeyoko. 36Kʉ ananɨ, Labanɨ, ɨhɔ nɔ ɓanama ngʉɓangɔ, ɓɔ꞉sa ɗu nɔ Yakɔɓɔ, adaa ɔ kyɛnda yɔ makwaa kaatʉ. Yakɔɓɔ ɔ꞉tukoo yangɔ ta apɛmakɨa ɓanama ngʉɓɔmɔ, ɓɔ Labanɨ.
37Tɨa ananɨ, Yakɔɓɔ ɔ꞉tɛndakɨa mɨkakaʉ yɛta ɨɓɨsɨnɨ ɓeetu, yɔ manɔ di di di, nɔ mudii ɓɔ gɨnɨ gɨnɨ. 38Ɔ꞉tɔɨnapiyoko mɨkakaʉ ngɨyɛnɛnɨ, amesu kɔ ɓanama, amati ɔ lɨkɔ, ngɨlɛ ɓanama ɓa꞉tɨlɨmwa. Dɔ ngbinga ngɨananɨ ingainga, ɨya ɓanama ɓa꞉tɨnapʉana-ɔɔ. 39Ɓanama ngʉɓɔnanɨ, ɓa꞉ɓio anapʉana tɨta anambamba ɔ mɨkakaʉ ngɨyɛnɛnɨ. Kʉdɔ, ɓɔ꞉ɓio anɔta ɓana tɨta, nɔ midii midii, ɓɔmɔ ɓɔ kpɛɛ kpɛɛ, nɔ ɓata ɓɔmɔ, ɓɔ mbaa mbaa. 40Yakɔɓɔ ɔ꞉tɔsɨka ɓana ɓɔ ɓakɔndɔlɔ, nɔ, ɔ꞉ɓʉnapɨa mwanɔngɔ kʉ di ɓɔ kɛlɛ, ɓɔɓieni akangana mesu nɔ mitunduga yɔ ɓanama ngʉɓɔ Labanɨ, ʉɓa ɓɔta kpɛɛ kpɛɛ, nɔ ʉɓɔ mudii mudii. Kʉɓanɨ, ɔ꞉napɨa mitunduga yɔ ɓanama ngʉɓangɔ tɨa kʉ di, sɔkɔmʉ ɓata aka ɓamatanakɨa-ɔɔ ɨhɔ, nɔ ʉɓɔ Labanɨ pɔ tii pɔ bele.
41Ngbinga muɓomu, ngɨa ɓanama ngʉɓa ɓɔta ɓakpɔkpɔ ɓa꞉tɨnapʉana-ɔɔ, Yakɔɓɔ ɔ꞉ɓio anapɨoko mɨkakaʉ apɛɨ ɔ ɓanama, inani amati ɔ lɨkɔ lɔ mipo, ngɨlɛ ɓanama ɓa꞉tɨlɨmwa. A꞉ɓio akɨa ɓanɨ, ambɔ ɓiɓio anapʉana tɨta ananɨ anambamba ɔ mɨkakaʉ ngɨyɛnɛnɨ. 42Yakamɛngana, yɔ꞉ɓieni jɛnɛ mɨgbɛngɛ yɔ ɓanama, sɔkɔmʉ ɓata ɨmaya mɨkakaʉ amati ɔ mipo. Kʉɓanɨ, mɨgbɛngɛ yɔ ɓanama yɔ꞉ɓio tɨta ʉɓɔ Labanɨ, nɔ ʉɓa ɓɔta ɓakpɔkpɔ, tɨa kʉ ʉɓɔ Yakɔɓɔ.
43Kʉdɔ, Yakɔɓɔ ɛ꞉nɨanɨa nɔ lɨkyɛmʉ tɨa lɨja ɓɔ kyɔ, kyɔ, kyɔ. Ɛ꞉nɨanɨa nɔ ɓombi ɓɔ tɛa ɓeɓoi, nɔ ʉɓa ɓegue, tɨa akɔ ɓakɔndɔlɔ, akɔ ɓamɛmɛ, akɔ ɓangamɨa nɔ ɓapunda.
Currently Selected:
Mʉkpanganɨa 30: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
