Yɔanɨ 14
14
Yeso a ɨngbaa anɨsa atɨ Aba
1Ga Yeso nɔ ɓakpata ngʉɓangɔ ɓɔ: «Nátɨɓiomʉ amati ɔ mbambanio, bayeni Asɔɓɨɨ, nɔ, nɔ́nabaya ɨmɨ kʉ bayanɨ. 2Amati ɔ ɨkáá ngɨa Aba, lɨda la lɨja, ɨmɨ, nanɨsa nenu atambanakɨa lɨda. Yɔɓienimʉ pɛngɛ ɓanɨ, ambɔ nɔkɔnisigiomʉ yaka ngɨyɛnɛnɨ. 3Ndʉ nabi nenu atambanakɨa ɨda, kʉdɔ, nɛ꞊ka sina ɓata nenu akpata, iɗo ambɔ aki ɨmɨ naɓio-ɛɛ, inu ɓieni tɨa kʉ ananɨ. 4Ʉmʉa ngʉwa aki ɨmɨ na-ɛɛ anɨsa, inu nánɨmbɨa ɨngbaa kʉtaa.»
5Ga Tɔma nayɔ ɓɔ: «Makwɔɓɨɨ, tangɔmʉ isu anɨmbɨa aki wa-ɛɛ anɨsa, takwanana anɨmbɨa ɨgbaa tɨa tanɨ?» 6Yeso ɔ꞉mutosio ɓɔ: «Ɨmɨ, na ɨngbaa, ingono nɔ ɓʉhɛa. Mombi angɔkwananamʉ aɓɔya atɨ Aba, ɔkɔchanenimʉ ta ɨngbaa akɔ ɨmɨ. 7Nɔ́nɛmbɨeni pɛngɛ ɨmɨ, ambɔ námɨmbɨa Aba tɨa kʉ ɨmbɨanɨ. Nɔ, anɨngwa ɨtakɨtakɨ ngɨyɛ, nánayɔ tɨta anɨmbɨa, nɔ nánayɔ tɨa kʉ anɨna.»
8Ga Filipo nayɔ ɓɔ: «Makwɔɓɨɨ, atɨpana pɨ Aba, kʉdɔ, mʉsasa ngʉwa tanawɔ wɔsio.»
9Yeso ɔ꞉mutosio ɓɔ: «Ha Filipo, takɨa ɨhɔ nenu amati ɔ makwaa maja. Yakamɛngana, ʉwɛ, wangɔnɛmbɨamʉ ndɨ sina? Yasugo ɓɔ mombi ɔnɛneni ɨmɨ, ambɔ ɔmɨnɔ Aba tɨa kʉ ɨnanɨ. Wɔ꞉nasigio dɔ-sɨ ɓɔ atɨpana Aba tɨa dɔtanɨ? 10Wangɔmʉ ndɨ abaya ɓɔ isu nɔ Aba, ta ta ɨkyɛmʉ mɛngana? Ɨyɔ, amati asɛmɨ, kʉndʉ ɨmɨ na amati angɔ. Yaka iɓomu ngɨyɛ ɨmɨ nanenu angakɨa, yangɔmʉ anɨngwana nɛmɨ. Yakamɛngana, Aba ngɨa a amati asɛmɨ akɛ, akɔkɨa tɛa ngɨangɔ. 11Anabayeni ɨmɨ, ngbinga ngɨa na-ɔɔ nenu asigio ɓɔ: ‹ɨmɨ, na amati ɔ Aba, nɔ ɨyɔ kʉ amati ɔ asɛmɨ.› Nɔ́bayenimʉ ananɨ, bayeni gʉtʉ tɨta ɨngbaa akɔ yaka iɓomu ngɨyɛ ɨmɨ nakɔkɨa. 12Ta ingono nanenu asigio ɓɔ: ‹Mombi ngɨa anabaya ɨmɨ, akwanana kʉ akɨa yaka ngɨyɛ ɨmɨ, nakɔkɨa.› Nɔ, akwanana kɨa yaka yɛta ɨgbɔgbɔ akɔnagaaka ɨyɛ ɨmɨ, nakɔkɨa, dɔ, ɨmɨ, natɔa atɨ Aba. 13Nɔ, yaka iɓomu ngɨyɛ nɛ́꞊ta akɔ ino yɛsɛmɨ, ɨmɨ, na꞊ɨkɨa kɨanɨ, iɗo ambɔ, Aba ɨsɨka ʉbɨba ɨngbaa akɔ Mwana. 14Nɔ́neteni ɨkyɛmʉ akɔ ino ngɨyɛsɛmɨ, ɨmɨ, na꞊ɨkɨa kɨanɨ.
Yeso ɔsigio ɓakpata ɓɔ ɓaɓʉtʉmɨa suo Mʉtɨma wɔta Tu
15‹Nɔ́nakʉndeni nɔ ingono, nápɛmakɨa mapanʉ ngʉkɔsɛmɨ pɛmakɨanɨ.› 16Ɨmɨ ingainga, nɛ꞊ta Aba ɓɔ ɨnɨtʉmɨa mombi ɔ isingo ngakɔmɔ, akɔɓio ɨhɔ nenu amati ɔ mago nɔ mago. 17Nɔ, ya Mʉtɨma ngʉwɔ ingono. Dɔdɔ angɔmʉbayamʉ, dɔ, dɔdɔ angɔmɨnamʉ, nɔ, angɔmɨmbɨamʉ kʉɓanɨ. Yakamɛngana, inu, námɨmbɨa ɨmbɨanɨ, dɔ, ɨyɔ a ta ɨhɔ nenu, nɔ, a꞊ɓio kʉ amati eno.
18‹Nangɔnɨsɨamʉ ndʉ ɓawee, na꞊tɔa sina ɓata nenu agbʉka ta tɔanɨ.› 19Angbinga, ɔtukoo bele, dɔdɔ angɔnɛnamʉ suo ɓata. Yakamɛngana, inu, ná꞊nɛna ɓata-sɨ ta ɨnanɨ, dɔ ɨmɨ, nanɔ uɓei, nɔ, inu, ná꞊ɓio kʉ nɔ uɓei. 20Nɔ, tɨa akɔ angbinga ngɨananɨ, nɛ́꞊mbɨa tɨa ɓɔ, ɨmɨ na amati ɔ Aba, kʉndʉ inu ná amati asɛmɨ, nɔ ɨmɨ tɨa kʉ amati eno. 21Mombi ngɨa aɓoto mapanʉ ngʉkɔsɛmɨ, nɔ, ɔkʉkyananakɨa, ɨyɔ akɛ, anakʉnda ɨmɨ. Aba akʉnda mombi muɓomu ngɨa anakʉnda ɨmɨ. Nɔ ɨmɨ, na꞊mʉkʉnda mombi ngɨananɨ tɨa kʉ kʉndanɨ, nɔ na꞊mʉpananiso pananisoni ɓɔ ɨmɨ nsa anɨ.»
22Yuda (sɔkɔmʉ Yuda Ɨsɨkalɨɔta) ɔ꞉muɓokuo ɓata ɓɔ: «Makwɔɓɨɨ, dɔtanɨ, wakwanana anɨmbɨaniso ta akɔ isu, sɔkɔmʉ akɔ ɓombi ɓɔ dɔdɔ?» 23Yeso ɔ꞉mutosio ɓɔ: «Mombi ɔnakʉndeni ɨmɨ, akyananakɨa yaka ngɨyɛsɛmɨ kyananakɨanɨ. Aba a꞊mʉkʉnda mombi ngɨananɨ tɨa kʉ kʉndanɨ. Kʉɓanɨ, isu nɔ Aba tɛ꞊ka awolo ɨkʉmbʉ tɨta amati angɔ. 24Mombi ngɨa angɔmʉ nɔ ɓʉkʉnda nɛmɨ, angɔkyananakɨamʉ ɨyɔ yaka ngɨyɛsɛmɨ. Yaka ngɨyɛ nánʉka, yɔchwɛanɨɔmʉ nɛmɨ. Yakamɛngana, ya yaka yɔ Aba ngɨa a꞉natʉma ɨmɨ. 25‹Ɨmɨ, nanenu angakɨa yaka ngɨyɛ, ta dɔ na-sɨ kʉ ɨhɔ nenu.›
26Yakamɛngana, Aba anɨtʉmɨa suo akɔ ino yɛsɛmɨ, Mʉtɨma wɔta Tu ngɨa aɓio isingo yeno. Ɨyɔ, a꞊nɨpanɨa suo yaka iɓomu, nɔ, ɔ꞊nɨtungwiso suo yaka kʉ iɓomu ngɨyɛ na꞉ɓio nenu asigio. 27Ɨmɨ, nɔnɨsɨɔ nɔ majɨɔ, nɔ majɨɔ ngʉkɔsɛmɨ, nɔninjo ɨkɔ tɨa inu. Nɔninjo ɨkɔ sɔkɔmʉ ndʉ ɨyɛ dɔdɔ akinjo-ɔɔ. Nátɨmbambanienimʉ, nɔ, nátɨkumenimʉ kʉɓanɨ. 28Nɔ́꞉ka pɛ kʉtaa ngbanga ndʉ na꞉ɓio pɛ-ɔɔ nenu asigio ɓɔ, ɨmɨ nanɨsa, yakamɛngana, na꞊tɔa suo nenu kʉ agbʉka. Nɔ́nakʉndeni pɛngɛ nɔ ingono, ambɔ nɔ́kwɔ ɨgyagya akɔpemiso ɓɔ nanɨsa atɨ Aba, dɔ, Aba a mʉja nɔgbɛ nɛmɨ anagaaka. 29Nanenu angakɨa yaka ngɨyɛnɛnɨ pɛɨ ngɨa yangɔkyananakɨamʉ-ɔɔ, iɗo ambɔ ngbinga ngɨa ya꞊kyananakɨa-ɔɔ, ɓieni tɨta nɔ báya. 30Nangɔmʉ ɓata akʉnda nenu anʉngakɨa yaka ɨja, dɔ, ngama ɔ dɔdɔ ngɨa a tɨa anɨka. Ɨyɔ, angɔmʉ nɔ angu akʉʉ asɛmɨ pɔ bele.
31Yakamɛngana, iɓomu ngɨyɛnɛnɨ yakɔkyananakɨa, dɔ, ɓombi ɓɔ dɔdɔ ɓɨmbɨa ɓɔ, nakyɔkʉnda Aba kʉndanɨ. Nɔ ɨmɨ, nakɔkɨa ta yaka ngɨyɛ, ɨyɔ, anatitio akɨa. Ʉngweni ɨkʉʉ, tɨseni!»
Currently Selected:
Yɔanɨ 14: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
