Yɔanɨ 15

Yeso a mujabibo wɔ ingono

1Ɨmɨ akɛ, na mujabibo ngʉwɔ ingono, nɔ Aba ngɨasɛmɨ akɛ, a makwɔ ɔ kʉbaa ngɨananɨ. 2Ɨyɔ Aba, akioko mɨtapʉ yɔngɔ iɓomu ngɨyɛ, yɛkpakpanɨɛ nayɔ, nɔ ɨyɛ, yangɔmʉ anumo lipumo. Yakamɛngana, mɨtapʉ nganangana, ngɨyɛ yaɓio anumo lipumo, aɨtinyoko, nɔ, ɔɨtambanaka, iɗo ambɔ yɨsɨnganaka anumo lipumo tɨa lɨja nɔgbɛ. 3Inu, ná tɨa ɓagyaɓanakɨɛ, akʉʉ ɔ mapanʉ ngʉka, ɨmɨ, na꞉ninjo pɔngɔ. 4Ɓieni amati asɛmɨ ingono, ngbanga kʉndʉ ɨmɨ na amati eno. Mʉtapʉ wangɔkwananamʉ anumo lipumo, wɔɓienimʉ ʉɗetenie akɔ mujabibo. Kʉndʉ inu, nángɔkwanana numo lipumo, nɔ́ɓienimʉ amati asɛmɨ. 5Ɨmɨ, na mujabibo, nɔ inu, tɨa mɨtapʉ yɔngɔ. Mombi muɓomu ngɨa aɓio amati asɛmɨ, nɔ ɨmɨ, kʉ amati angɔ, achweiso masɔɔ maja. Dɔ, nángɔkwanana kɨa ɨkyɛmʉ pɔ mɛngana, nɔ́kɔɓienimʉ ta ɨhɔ nɛmɨ. 6Mombi muɓomu ngɨa angɔmʉ amati asɛmɨ, ɓamugiso aɓei, ngbanga ndʉ ɨyɛ ɓagikiso-ɔɔ mɨtapʉ. Kʉdɔ yɔmaka, nɔ, ɓɔɨtɔpaka, nɔ, ɓɔɨgikiso amati ɔ dyaa, nɔ, yɔsioko ta sioko. 7Ndʉ náɓio amati ɔ asɛmɨ, nɔ mapanʉ ngʉkɔsɛmɨ kɔɓio amati eno, ɨteni ɨkyɛmʉ iɓomu ngɨyɛ nakʉnda, kʉdɔ, na꞊ninjo ɨyɔ injoni. 8Ndʉ náchweiso masɔɔ maja, Aba asɨka ʉbɨba. Kʉdɔ, nápananiso aɓʉmba ɓɔ ná ɓakpata ɓɔsɛmɨ ingono. 9Ngbanga ndʉ Aba anakʉnda ɨmɨ, nanɨkʉnda inu kʉɓanɨ. Inu, ɓieni amati ɔ ɓʉkʉnda ngʉɓɔsɛmɨ. 10Ndʉ nákyananakɨa mapanʉ ngʉkɔsɛmɨ, ná꞊ɓio ɓombi ɓɔsɛmɨ ɓɔ ɓʉkʉnda. Kʉndʉ ɨmɨ, nakɔkyananakɨa mapanʉ ngʉkɔ Aba, nɔ, na tɨa kʉ mombi ngɨangɔ ɔ ɓʉkʉnda.

11Ɨmɨ, nɔ꞉nɨngakɨɔ yaka ngɨyɛnɛnɨ, dɔ, ɨgyagya ngɨyɛsɛmɨ yiɓio amati ɔ mɨtɨma ngɨyeno, nɔ, ɨgyagya yɔngɔ yɨhuo ta nuhuo ɓɔ kyɛɛ. 12Ʉpanʉ ngʉwɔsɛmɨ wa ɓɔ: «Inu, kʉndaneni ati eno, ngbanga kʉndʉ ɨmɨ nanɨkʉnda. 13Ɓʉkʉnda ngaɓɔmɔ ɓɔta ɓʉja ɓangɔmʉ akɔnagaaka, mombi ngɨa ɔbayɔ awekio ɓangɛ. 14Inu, nɔ́kɨeni yaka ngɨyɛnɛnɨ nanenu atitio, ná꞊ɓio ɓawai ɓɔsɛmɨ kʉ ingono. 15Nanenu anisoko ɓɔ ɓawai, dɔ, ɨmɨ na꞉nɨmbiiso pɔngɔ yaka iɓomu ngɨyɛ, Aba ngɨasɛmɨ a꞉nɔngakɨa jɛnɛ. Kʉɓanɨ, nangɔnisoko tii ɓata ɓɔ ɓabaya, dɔ, baya angɔkwananamʉ anɨmbɨa yaka ngɨyɛ makwɔngɔ akɔkɨa. 16Sɔkɔmʉ inu akɛ ná꞉nachwa ɨmɨ, yakamɛngana, ɨmɨ akɛ, na꞉nɨchwa inu. Ɨmɨ, na꞉nɨtʉma inu akɔnumo lipumo, nɔ lipumo lɔngɔ, lɨgbalɨa gbalɨanɨ. Kʉɓanɨ, ɨkyɛmʉ iɓomu ngɨyɛ nɛ́꞊ta Aba, akɔ ino yɛsɛmɨ, a꞊ninjo ɨyɔ injoni. 17Ʉpanʉ ngʉwa nɔnititio ɓɔ kyananakieni wa ɓɔ: ‹Kʉndaneni ati eno.›

Ɓombi ɓɔ dɔdɔ ɓɔyaɔ atɨ Yeso nɔ ɓakpata ngʉɓangɔ

18Yɔɓieni ɓɔ dɔdɔ ɔnɨyaɔ inu, ɨmbɨeni iɗo ɓɔ a꞉nayaa jɛnɛ-sɨ ɨmɨ ta pɛɨ. 19Nɔ́꞉ɓieni jɛnɛ ɓombi ɓɔ dɔdɔ, ambɔ dɔdɔ anɨkʉnda kʉ kʉndanɨ ndʉ ɓombi ɓangɔ. Yakamɛngana, ɨmɨ akɛ na꞉nɨchwa inu, nɔ, nenu achweiso amati ɔ dɔdɔ. Kʉɓanɨ inu, nangɔmʉ ɓata ɓombi ɓɔ dɔdɔ. Yaka ngɨyɛ dɔdɔ a꞉nɨyaa-ɔɔ, ɨyɔ ɨyɛnɛnɨ. 20Tungueni ta yaka ngɨyɛ na꞉nɨngakɨa pɔngɔ ɓɔ: ‹Baya angɔnagaakamʉ makwangɔ.› Yɔɓieni ɓɔ, ɨɓɔ ɓa꞉nakyananaka pɔngɔ ɨmɨ, ɓa꞊nɨkyananaka inu kʉɓanɨ. Yɔɓieni ɓɔ, ɨɓɔ ɓa꞉kyananakɨa pɔngɔ ʉpanʉ ngʉwɔsɛmɨ, ɓa꞊kyananakɨa ʉweno kʉɓanɨ. 21Yakamɛngana, ɓa꞊nɨkɨa yaka ngɨyɛnɛnɨ iɓomu, dɔ, ná ɓakpata ɓɔsɛmɨ, nɔ ɨɓɔ ɓangɔmʉ anɨmbɨa mombi ngɨa a꞉natʉma ɨmɨ. 22Ɨmɨ, nɛ꞉kenimʉ jɛnɛ naɓɔ angakɨa yaka ngɨyɛnɛnɨ, ambɔ ɓangɔɓiomʉ amati ɔ ɓʉɓɨɓɨ pɔ bele. Yakamɛngana, ɨtakɨtakɨ ngɨyɛ, ɓangɔtatɨa ɓata ɓʉɓɨɓɨ ngʉɓeɓo. 23Mombi ngɨa anɔ ɓʉyaa akʉʉ asɛmɨ, ayaa Aba kʉɓanɨ. 24Apɛɨ eɓo ɨmɨ, na꞉kɨa jɛnɛ yaka ngɨyɛ mombi ngakɔmɔ a꞉ngɔkɨamʉ sina. Nɔ꞉kɔkɨenimʉ jɛnɛ yaka ngɨyɛnɛnɨ, ambɔ ɨɓɔ ɓangɔmʉ nɔ ɓʉɓɨɓɨ pɔ bele. Yakamɛngana, ɨɓɔ, ɓɛ꞉na yaka ngɨyɛnɛnɨ na꞉kɨa, nɔ ɓɛsɨnganaka nesu ta ayaa, isu nɔ Aba. 25Yaka ngɨyɛnɛnɨ, yakyananakɨa akpatanakɨa nɔ ɨyɛ, ɓa꞉tɛndakɨa amati ɔ Mabii ngʉkeɓo ɓɔ: ‹Ɓa꞉nayaa jɛnɛ ta ɓʉtʉʉ.›#popoko Mmb 35:19; 69:5

26Anɨngwa aki atɨ Aba, ɨmɨ, na꞊nɨtʉmɨa suo mombi ngɨa anɨsalɨa. Ya Mʉtɨma wɔta Tu, ngʉwa wanɨngwa, atɨ Aba, ɨya, a꞊nɨpanɨa yaka iɓomu ngɨyɛ ingono, nɔ nenu akɔngakɨa yaka akʉʉ asɛmɨ. 27Gʉtʉ ta inu, nɔ́꞊ngakɨa sungo kʉɔ ɓombi yaka yɔ ingono akʉʉ ɔ asɛmɨ, dɔ inu ná ɨhɔ nɛmɨ, anɨngwa ta amʉkpanganɨa.

Currently Selected:

Yɔanɨ 15: buuN

Highlight

Copy