Yɔanɨ 16
16
1Nɔ꞉nɨngakɨɔ yaka ngɨyɛnɛnɨ, dɔ, báya ngɨyeno yatɨkwamʉ. 2Ɓa꞊nikponyo sina alɨkáá lɔ nɨta ngɨlɔ Ɓayuda. Ya꞊ɓio sina nɔ angbinga ngɨa ɓombi ɓa꞊nɨmaa-ɔɔ, ɨɓɔ, atunguo ɓɔ ɓakyananakɨa Asɔɓɨɨ. 3Ɓombi ɓa꞊ɓio sina akɨa yaka ngɨyɛnɛnɨ, ta dɔ, ɓɛ꞉mbɨamʉ Aba, nɔ, ɓangɔmʉ nɛmɨ anɨmbɨa kʉɓanɨ. 4Yakamɛngana, ɨmɨ, na꞉nɨngakɨa yaka ngɨyɛnɛnɨ, ambɔ ngbinga ngɨa ya꞊kyananakɨa sina-ɔɔ, tungueni ɓɔ, na꞉nisigio jɛnɛ ta sigioni.
Tɛa ngɨyɔ Mʉtɨma wɔta Tu
Ɨmɨ, na꞉nisigiomʉ jɛnɛ yaka ngɨyɛnɛnɨ amʉkpanganɨa, dɔ ɨmɨ, na꞉ɓio pɔngɔ-sɨ ta ɨhɔ nenu. 5Ɨtakɨtakɨ ngɨyɛ, nɔmanɔ atɔa atɨ mombi ngɨa a꞉natʉma ɨmɨ, nɔ, mombi pɔ mʉngana ati eno ɔnaɓokuomʉ ɓɔ: ‹Wanɨsa gbanɨ?› 6Yakamɛngana, inu nánɨdya ikoko amati ɔ mɨtɨma ngɨyeno nɔgbɛ, dɔ ɨmɨ, nɔ́꞉nɨsigio yaka ngɨyɛnɛnɨ. 7Kʉdɔ ɨmɨ, nánenu asigio ingono ɓɔ: ‹Yanɔ ɨjangɨa yɛta ɨja ɓɔ ɨmɨ, nɨsa apɛɨ,› dɔ, nɔsenimʉ apɛɨ, nángɛnɨanɨamʉ nɔ Mombi ngɨa anɨkɨa isingo pɔ bele. Yakamɛngana, ɨmɨ nɔseni apɛɨ, na꞊nɨtʉmɨa ɨyɔ tʉmɨanɨ. 8Angbinga ngɨa ɛ꞊ka-ɔɔ, ɛ꞊mbiiso sina ɓombi ɓɔ dɔdɔ ta aɓʉmba, akʉʉ ɔ ɓʉɓɨɓɨ, nɔ akʉʉ ɔ ɓungbingbii ngʉɓa Asɔɓɨɨ, nɔ akʉʉ ɔ mʉkɔmbʉ. 9A꞊ɓʉpana sina ɓɔ ɓa amati ɔ ɓʉɓɨɓɨ, dɔ, ɓayaa nɛmɨ abaya. 10Nɔ, ɔ꞉ɓʉpana kʉ ɓɔ Asɔɓɨɨ a ngbingbii, dɔ ɨmɨ, nanɨsa atɨ Aba, nɔ, ɓangɔnɛna sina ɓata. 11Nɔ, ɔ꞉ɓʉpana ɓata kʉ ɓɔ Asɔɓɨɨ akio mʉkɔmbʉ tanɨ, dɔ, ngama ɔ dɔdɔ ngɨakɛ, ɓa꞉kio jɛnɛ mʉkɔmbʉ ngʉwangɔ tɨa kioni.
12Na ɓata-sɨ kʉ nɔ yaka ɨja ngɨyɛ, nakʉnda nenu angakɨa, yakamɛngana, ɨtakɨtakɨ ngɨyɛ, yangɔmʉ-sɨ adaa ngɨa inu, náɨpɛmiso-ɔɔ. 13Yakamɛngana, angbinga ngɨa Mʉtɨma wɔ ingono ɛ꞊ka sina-ɔɔ, a꞊kwanana nenu akyɛndakiso amati yaka yɔ ingono iɓomu. Nɔ, a꞊ngɔsugo sina yaka, nɔ mʉtʉ wangɔ nangana. Yakamɛngana, a꞊sugo sina ta yaka ngɨyɛ aɓio anʉka, nɔ, ɔ꞊nɨɓɨa sina yaka iɓomu ngɨyɛ yaɓio anɨka. 14Ɨyɔ, a꞊nabibiso ta ɨmɨ, dɔ, a꞊ɓio asɨka yaka anɨngwa andamɨ, nɔ, ɔ꞊sa tɨa nenu aɓɨakɨa. 15Ɨkyɛmʉ iɓomu ngɨyɛ Aba anayɔ, ya ɨsɛmɨ. Yaka ngɨyɛ nɔ꞉sugo-ɔɔ ɓɔ Mʉtɨma wɔta Tu, a꞊ɓio asɨka yaka anɨngwa andamɨ, nɔ, ɔ꞊sa nenu aɓɨakɨa, yɔ꞉kwɔ mʉtʉ ɓanɨ.
Ikoko yanatana aɓio ɨgyagya
16Yɔtukoo angbinga bele, nángɔnɛna ɓata suo. Yakamɛngana, ɓata kʉ ambise ɔngɔ bele, nɔ́tɔnɛna ɓata-sɨ kʉ ɨnanɨ.» 17Nganangana ɔ ɓakpata ngʉɓangɔ, ɓɔ꞉pʉnga yakanaka ati eɓo akɔsugo ɓɔ: «Ɨyɔ ɔtisigio ɓɔ: ‹Yɔtukoo angbinga bele, nángɔnɛna ɓata suo. Yakamɛngana, ɓata kʉ ambise ɔngɔ bele, nɔ́tɔnɛna ɓata-sɨ kʉ ɨnanɨ.› Nɔ, ɔ꞉matɨa kʉ ɓɔ: ‹Ya ɓanɨ dɔ na꞊nɨsa atɨ Aba.› Ɨsɨ yɔ yaka ngɨyɛnɛnɨ iɓomu, ya-sɨ tanɨ?»
18Kʉdɔ, ɓɛ꞉sɨnganaka tɨta ɓokwonoko ɓɔ: «Yaka ngɨyɛ asugo ɓɔ mwana ɔ angbinga bele, ya-sɨ akʉnda asugo tanɨ?» 19Ɨyɔ Yeso ɛ꞉mbɨa ta ɨmbɨanɨ ɓɔ, ɓakʉnda nayɔ aɓokuo yaka. Kʉdɔ, ga ɨyɔ naɓɔ ɓɔ: «Ná ndɨ akɔɓokwonoko ta akʉʉ ɔ yaka ngɨyɛ nɔ꞉nisigio pɛngɛ ɓɔ: ‹Yɔtukoo angbinga bele, nángɔnɛna ɓata suo. Yakamɛngana, ɓata kʉ ambise ɔngɔ bele, nɔ́tɔnɛna ɓata-sɨ kʉ ɨnanɨ?› 20Ta ingono, nanenu asigio ɓɔ: ‹Inu, ná꞊ndɨndɨanaka nɔ nɨdya ikoko.› Yakamɛngana, ɓombi ɓɔ dɔdɔ ɓa꞊kwa ɨgyagya. Ná꞊dya ikoko ta ɓanɨ, yakamɛngana, ikoko ngɨyeno, ya꞊natana tɨa ɨgyagya. 21Angbinga ngɨa ʉnɔtʉ wadʉa-ɔɔ moi, adya ikoko dyanɨ, dɔ, ngbinga ngɨangɔ ɔndanɔ tɨa ndananɨ. Yakamɛngana, ɨyɛ apipo nɔta ɓɔ gba, angɔtunguo tii ɓata ɓʉkaɨ ɓɔngɔ, dɔ, a꞊ɓio tɨa nɔ ɨgyagya anɨna ɓɔ mwana ɔnɔtanɨɔ akɔ uɓei nɔtanɨanɨ. 22Kʉndʉ ɨtakɨtakɨ ngɨyɛ, inu, ná-sɨ ta amati ɔ ikoko. Yakamɛngana, nɛ꞊ka sina ɓata-sɨ kʉɔ nenu akanga, kʉdɔ, ná꞊huo nɔ ɨgyagya amɨtɨma, adaa ngɨa ɓɔ, mombi pɔ mʉngana a꞊ngɔnɨhɨnɨa ɓata ɨgyagya ngɨyɛnɛnɨ.
23Nɔ ɓisi ngʉɓɔnanɨ, ná꞊ngɔnaɓokuo sina ɓata yaka pɔ mɛngana. Nanenu asigio ta ingono ɓɔ: ‹Ɨkyɛmʉ iɓomu ngɨyɛ, nɛ́꞊ta Aba akɔ ino yɛsɛmɨ, a꞊ninjo ɨyɔ injoni.› 24Akɔɓɔya kʉndʉ ɨtakɨtakɨ ngɨyɛ, inu, nángɛtamʉ ɨkyɛmʉ akɔ ino yɛsɛmɨ. Ɨteni, nɔ nɛ́꞊nɨanɨa nɔ ɨkyɛmʉ, iɗo ambɔ, uhueni nɔ ɨgyagya ɓɔ kyɛɛ.
Yeso ɔnagaakɔ ɓʉkaɓʉkaɨ ngʉɓɔ dɔdɔ
25Na꞉nʉngakɨa pɔngɔ yaka ngɨyɛnɛnɨ iɓomu ta ɨngbaa akɔ lisisenio. Angbinga a suo anɨka, ɨya, na꞊ngɔnʉngakɨa ɓata yaka ɨngbaa akɔ lisisenio. Yakamɛngana, na꞊pʉnga nenu anʉngakɨa yaka ngɨyɛ Aba tɨta aɓʉmba ɓɔ gbau gbau. 26Tɨa nɔ ɓisi ngʉɓɔnanɨ sina, nɛ́꞊ta sina Asɔɓɨɨ akɔ ino yɛsɛmɨ. Nangɔmʉ nenu asigio ɓɔ ɨmɨ, akɛ nanɨtɨa ɨkyɛmʉ atɨ Aba, 27dɔ, Aba anɨkʉnda inu kʉndanɨ. Anɨkʉnda ɓanɨ dɔ, ná꞉nakʉnda ɨmɨ kʉ kʉndanɨ, nɔ, nɔ́꞉baya kʉ ɓɔ ɨmɨ, na꞉ngwa atɨ Asɔɓɨɨ. 28Ɨmɨ, na꞉ngwa atɨ Aba, nɛ꞉ka iyani adɔdɔ. Ɨtakɨtakɨ ngɨyɛ, ɨmɨ, na tɨa anɨngwa, nɔ tɔwa tɨa kʉ atɨ Aba.»
29Kʉdɔ, ga ɓakpata nayɔ ɓɔ: «Ha mombi angaka-sɨ yaka kʉ aɓʉmba ɓɔ gbau gbau ɓanɨ, sɔkɔmʉ ta ɨngbaa akɔ lisisenio! 30Ɨtakɨtakɨ ngɨyɛ, tɔpemiso tɨa iɗo ɓɔ, ʉwɛ, wanɨmbɨa yaka iɓomu, nɔ, yɔkwananamʉ pɔ ɓɔ mombi ɨnaɓokuo yaka kʉɓanɨ. Yaka ngɨyɛ isu tɔbaya-ɔɔ ɓɔ wa꞉ngwa atɨ Asɔɓɨɨ, ya mʉtʉ ɓanɨ.»
31Kʉdɔ, Yeso ɔ꞉tɔɓutosio tɨa ɓɔ: «Ɨtakɨtakɨ ngɨyɛ, nɔ́bayɔ ndɨ tɨa bayanɨ? 32Angbinga a suo anɨka, nɔ a tɨa kʉ mʉndanɛ, ɨyakɛ, ná꞊nanjana suo-ɔɔ ɓɔ ngbii, mombi nɔ mombi nɔ ɨngbaa nga yangɔ, nɔ, nɔ́꞊nasɨa nangana ga vu. Ɨnadɔ, nangɔmʉ pɛpɛ dɔ nangana, dɔ, Aba a ta ɨhɔ nɛmɨ. 33Nɔ꞉nisigio yaka ngɨyɛnɛnɨ iɗo ambɔ hueni nɔ majɨɔ amati asɛmɨ. Amati ɔ dɔdɔ ngɨa, ná꞊dya ɓʉkaɓʉkaɨ dyanɨ, yakamɛngana, sɨkeni iguegue! Ɨmɨ, na꞉nagaaka dɔdɔ nagaakanɨ.»
Currently Selected:
Yɔanɨ 16: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
