KEJADIAN 27
27
Ishak Kiberkat Yakub
1Mong nanek arik mase Ishak ya kiengrak ru ya kaha-buta, kek kicereg Esau ikenon sulog lalu kiurok nu kek, “Bei!”
“Ma, apak?” Esau kiberlag.
2Ishak kiurok, “Eng ya engrak ru pek liu nij doh ngdat. 3Jadi, kotloh panah ru mat panah hek. Etloh intei binatag ku padag. 4Masakloh caknak de sedap de nggemar ya eng ru enloh nu eng. Eng doh ngcak supaye eng buleh ngberkat hek sebelom ngdat.”
5Ku mase ajeh, bengwal Ishak ru Esau ikenon ajeh bicerngai ya Ribka. Bile Esau kiet nu neintei, 6Ribka kiurok nu Yakub ikenon ajeh, “Eng pai ngcerngai apak hek kiurok nu Esau tenek hek begei adeh: 7‘Enloh eng nuikor binatag neintei ru masakloh caknak de sedap ha eng. Telas ngcak, eng doh ngberkat hek ku ngar Yahweh sebelom ngdat.’ ” 8Lalu Ribka kiurok nij, “Bei, hunen, cerngailoh engrok eng ru behloh ma de ngurok adeh. 9Etloh nu tempat kenumpol binatag daknek hik ru pilehloh nar ikor kenon kambeg de bakcok. Eng doh ngmasak caknak de ihad bigemar ya apak hek. 10Lalu enloh caknak ajeh nu kek supaye buleh kicak. Telas ajeh kek doh kiberkat hek sebelom kek kidat.”
11Tapi Yakub kiurok nu iamek, “Jenpanei berog Esau besentol, tapi berog eng pek besentol. 12Entah-entah apak doh kipep berog eng ru kipanei eng nglenglod ha kek. Kek doh pek kiberkat ha eng tapi kipecelaka ha lieng.”
13Tapi iamek kiberlag, “Agok risau, bei. Biar eng ngtanggong dikdij celaka ajeh. Beh taleh ma de ngurok. Etloh kot kambeg-kambeg ajeh.” 14Lalu Yakub pen kiet kikot nar ikor kambeg ajeh. Kek kien kambeg-kambeg ajeh nu iamek lalu Ribka kimasak caknak de bigemar ya Ishak. 15Mong penakei Esau de bor ku kateh deg Ribka, jadi kek kikot penakei ajeh lalu kiperlog nu Yakub. 16Kek kitutop kengrit ru tangen Yakub de pek besentol ajeh ya getek kambeg. 17Lalu kek kiog caknak de sedap ru ruti de kibeh nu Yakub ikenon ajeh.
18Telas ajeh Yakub kiet nu iapak ru kiurok, “Apak!”
Iapak kiberlag, “Ma bei? Hek bok? Hek Esauka Yakub?”
19Yakub kiberlag, “Eng Esau kenon sulog jen. Eng ya ngbeh ernor jen. Geiloh ru cakloh sej binatag neintei de ngen adeh supaye buleh jenberkat eng.”
20Ishak kitanya, “Begeiharok haberkep binatag neintei ihad deras, bei?”
Yakub kiberlag, “Yahweh Jenang de jensembah ajeh ya Kitulog eng.”
21Telas ajeh Ishak kiurok nu Yakub, “Beiloh arek gek supaye buleh ngpep hek. Betolka hek adeh Esau kenon eng ataopen tok?” 22Jadi, Yakub pen kiperek nu Ishak iapak. Ishak pen kipep kek ru kiurok, “Suara hek begei suara Yakub tapi kengrit hek begei kengrit Esau.” 23Ishak pek kicam ha Yakub kerana ikengrit besentol begei kengrit Esau. Jadi, Ishak kaha-berkat Yakub. 24Tapi kek kitanya nij, “Betolka hek adeh Esau?”
“Hooh,” Yakub kiberlag.
25Lalu Ishak kiurok, “Ogloh nu eng sej ajeh. Telas ngcak, eng doh ngberkat hek.” Yakub kien caknak ajeh nu iapak ru teu wain juga ha ingeknut. 26Telas ajeh Ishak iapak kiurok nu kek, “Bei, beiloh arek gek nu eng ru nyuiloh eng.”
27Yakub pen kiterbuk kaha-nyui iapak. Bile Ishak kikerngoi ngoi ipenakei, kiserngik kenon ajeh mimang Esau. Jadi, kek pen kiberkat ikenon. Kiurok,
“Ngoi kenon eng sedap begei ngoi padag de biberkat ya Yahweh.
28Jenang doh Kiog hek embon ju langit
supaye selai-selai hek kijadi subor
ru selai-selai ajeh doh kihasel gandom ru wain de jeoi.
29Semoge dikdij sengoi ju bangse-bangse kilek naitundok ru naisujod nu hek.
Semoge hek hajadi tuan nu sesedara hek,
ru kenon-cenok amek hek doh naisujod nu hek.
Bok de kipecelaka hek, celakaloh ilei,
ru bok de kiberkat hek, semoge biberkatloh ilei.”
Esau Kisemanj Berkat ju Ishak
30Telas Ishak kiberkat Yakub ru Yakub pen pai kiet ju kenjeh, jogloh itenek Esau ju ineintei. 31Kek juga kimasak caknak de sedap ru kien caknak ajeh nu iapak. Kek kiurok, “Apak, kosloh ru cakloh sej de ya ngen ha enjen supaye buleh jenberkat eng.”
32Tapi Ishak kitanya “Hek bok?”
Esau kiberlag, “Eng Esau kenon sulog jen.”
33Berog Ishak pen kijadi kerog lalu kek kitanya, “Amen begei ajeh, bokka ilei de ya kiintei binatag ru kien nu eng nek? Eng ya ngcak sebelom hek hahol. Telas ajeh ya ngog berkat eng nu kek ru hunen berkat ajeh kijadi hak kek lei ditehjeh.”
34Bile Esau kicerngai begei ajeh, kek kijap ihad kuat. Lalu kiurok, “Berkatloh eng juga, apak!”
35Tapi Ishak kiberlag, “Menang hek ya kihol nu madeh ru kitipu eng. Kek ya kikot berkat de ngha-og nu hek!”
36Esau kiurok, “Adeh ya ku inar kali kek kitipu eng. Patotloh imuh Yakub.#27:36 Yakub: Ku kateh engrok Ibrani, sengyog perkataan ‘Yakub’ ru ‘tipu’ lebeh kurang sama. Kek ya kikot hak eng sebegei kenon sulog, ru hunen nij ya kikot berkat de patot biog nu eng. Apak, mongka berkat kilek nij ha eng?”
37Lalu Ishak kiberlag nu Esau, “Eng ya ngpejadi kek tuan hek, ru dikdij sedara-mara kek ya ngpejadi ihambe. Eng ya ngberkat kek supaye Jenang Kiog gandom ru wain nu kek. Hunen pek mong ma-ma nij de buleh ngha-og nu hek, bei!”
38Esau pek behenti kisemanj nu iapak, “Apak, had nek nanek berkat talehka de mong ku enjen? Berkatloh eng juga, apak!” Lalu kek pen kijap ru ihad kuat nij.
39Jadi, Ishak kiurok nu kek,
“Tempat ginei hek doh nyak
ju tempat de mong embon ju langit,
ru ju tempat de mong selai de subor.
40Hek doh hasui ya pedang lihek,
ru hajadi hambe menang hek.
Tapi bile hek memberontak,
hek doh hatelas ju kuasa ajeh.”
41Mula ju kenjeh, Esau kigetek ha Yakub kerana iapak ya kiberkat Yakub. Esau kiserngik, “Telas apak eng kidat ru bile dij arik pekabongan danan apak eng, eng doh ngha-perdat Yakub!”
Yakub Bior Et nu Laban
42Bile Ribka biog panei ha nerancang Esau ajeh, kek kicereg Yakub ru kiurok, “Cerngailoh, tenek hek Esau kirancang kaha-balas dendam ru kaha-perdat hek. 43Bei, hunen behloh ma de ngurok. Etloh deras nu tenek eng Laban de ku pekan Haran. 44Geiloh besama ru kek memerip iluniu lei dij ibengal Esau 45ru kisip ma de ya habeh nu kek. Telas ajeh eng doh ngngeng sengoi ha en hek jog. Eng ngnyek nar mom kenon eng nyep ku arik de sama.”
46Telas ajeh Ribka kiurok nu Ishak, “Eng ngjemu ngsui besama ru kekenah Esau mai Het ajeh. Amen Yakub pen kikot numom kenah ju engkap mai Het begei Esau, maloh iguna ngsui nij?”
Currently Selected:
KEJADIAN 27: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
