YOHANES 10
10
Perumpamaan tentang Gembale ru Idombe
1Lalu Yesus Kiurok nij nu mai Farisi ku pajeh, “Cerngailoh abor. Mai de naiha-muj nu kateh kandag dombe naimuj melalui ipintu. Tapi mai siksij naimuj nu kandag dombe naihuj idinig. 2Mai de kimuj melalui pintu kandag ajehloh gembale dombe. 3Mai bejaga kandag kibuka pintu ha gembale ru dombe-dombe ajeh naikenal suara gembale liknai de kicereg muh jap-jap liknai. Lalu gembale ajeh kibetek idombe-dombe nu luar. 4Telas kiperhol idombe-dombe ajeh nu luar, kek kicip ku ngar enai ru idombe-dombe ajeh naijoi kek kerana naikenal isuara. 5Dombe-dombe ajeh pek naijoi ha mai kilek. Enai doh naijar kerana pek naikenal suara mai kilek.”
6Yesus Kicerite perumpamaan ajeh nu mai Farisi tapi pek naipaham imaksod.
Yesus Gembale de Bor
7Kerana ajeh, Yesus Kiurok nij, “Cerngailoh abor. Engloh pintu miknuj ha dombe-dombe. 8Dikdij mai de naihol canuk sebelom Eng ru naiurok liknai ajeh gembale dombe, enai ajeh mai siksij. Tapi dombe-dombe de naikenal suara gembale liknai pek naijoi sengoi begei ajeh. 9Engloh pintu. Mai de naimuj melalui Eng doh bipeselamat. Enai ajeh begei ha dombe de naimuj nu kateh kandag ru naihol ku ipepegelap naiha-cak rumpot de bor. 10Mai siksij naihol had naiha-siksij, naiha-perdat, ru naiha-pebinasa. Tapi Eng Nghol nu dunia adeh Ngha-og sinui de lei ditehjeh de tebeg ya berkat.
11Engloh gembale dombe de bor. Gembale de bor kiog inyawe kaha-peselamat idombe-dombe. 12Sengoi de biupah nyiknyuk pek gembale dombe ru dombe-dombe ajeh pek hak kek. Kek kijar ru kidek dombe-dombe ajeh bile kibakek cok lig kihol. Lalu dombe-dombe ajeh bijerop ru bikap ya cok lig. 13Sengoi de biupah ajeh kijar kerana kikerakjak kaha-berkep upah taleh ru pek kiirau ha dombe-dombe ajeh. 14Engloh gembale dombe de bor. Eng Ngkenal dombe-dombe Eng ru enai pen naikenal Eng 15sama begei Menek Kikenal Eng ru Eng Ngkenal Menek. Eng Ngog nyawe Eng ha dombe-dombe Eng. 16Mong juga dombe-dombe kilek de pek temasok ku kateh kenawat dombe-dombe adeh. Eng juga hod Ngen enai nu kenawat dombe-dombe Eng ru enai juga doh naicerngai suara Eng. Dikdij liknai doh naijadi nukenawat dombe de mong nek numom gembale.
17Menek Kihok Eng kerana Eng sanggop Ngog nyawe Eng Ngha-peselamat enai. Tapi telas Ngdat, Eng doh Ngsui nij. 18Pek mong bok-bok pen de dapat kikot nyawe Eng ju LiEng sendiri. Ya heknod LiEng sendiri, Eng Ngog nyawe Eng. Eng bekuasa Ngog nyawe Eng ru Ngbekuasa juga Ngpersui diri LiEng sendiri nij. Ajehloh ernor de Ngterima ju Menek Eng.”
19Bengwal Yesus ajeh kibeh mai Yahudi naiceraklah kerana mong memaseg peniker. 20Jeoi ju engkap enai ajeh naiurok, “Kek bisangrog ya nyanik! Kek gila! Pek beguna engkecerngai bengwal Kek!”
21Tapi mong mai kilek de naiurok, “Sembelokloh sengoi de bisangrog ya nyanik buleh kibelwal begei ajeh! Nyanik pek dapat kiperbor mat mai buta!”
Mai Yahudi Nainyek ha Yesus
22Ku mase musem sengij, mai Yahudi naisamut Arik Raya Pentahbisan Deg Jenang#10:22 Arik Raya Pentahbisan Deg Jenang: 167 tahut sebelom Yesus Kiyos, kote Yerusalem bitawan ya aska Syria. Enai naijamu lek ha jenang liknai ku kateh Deg Jenang ru bahneh enai ajeh naihina ha Jenang mai Yahudi. Nik tahut ju kenjeh, mai Yahudi nairampas balek tempat ajeh ru naibeh upacare pentahbisan naiha-pesuci Deg Jenang. Mai Yahudi naisamut Arik Raya Pentahbisan Deg Jenang naiha-ingat ha kejadian ajeh. ku kote Yerusalem. 23Mase ajeh Yesus Kicekcip ku Beranda Salomo ku kateh laman Deg Jenang. 24Lalu mai Yahudi naihol naibekumpol ku kelileg Yesus. Naitanya, “Merip iluniuka Haha-biar jik tetanya-tanya tentang Hek? Beteros-terangloh, Hekka Peselamat de bijanji ya Jenang?”
25Lalu Yesus Kiberlag, “Eng ya Ngpasal nu engkek tapi pek engkepecaya. Kerjak de Ngbeh melalui kuasa Menek Eng kiperneng Eng adeh bok. 26Tapi pek engkepecaya kerana engkek nyiknyuk pek dombe-dombe Eng. 27Dombe-dombe Eng naikenal suara Eng. Eng Ngkenal enai ru enai naijoi Eng. 28Eng Ngog enai sinui de lei ditehjeh ru enai doh pek naibinasa. Pek mong numom pen de buleh kirampas enai ju teg Eng. 29Menek Eng de lebeh entoi daripade ma-ma pen de Kiog enai nu Eng. Pek mong numom pen de dapat kirampas enai ju teg Menek Eng. 30Menek ru Eng ajeh nanek.”
31Nukali nij mai Yahudi naikot batu naiha-pej nu Yesus. 32Tapi Yesus Kiurok nu enai, “Eng ya Ngbeh jeoi kerjak de bior ya Menek. Dikdij kerjak ajeh bor. Jadi, kerjak belokka de kibeh engkeha-pej batu nu Eng?”
33Lalu mai Yahudi naiberlag, “Jik jiha-pej batu nu Hek pek kerana kerjak bor de Habeh tapi kerana Hahina Jenang! Hek ajeh manusia biasa taleh tapi Haurok Hek ru Menek nanek. Imaksodjeh Haurok LiHek ajeh Jenang!”
34Yesus Kiurok nu enai, “Ku kateh Hukom Taurat engkek, Jenang pernah Kicereg pemimpen-pemimpen manah engkek ‘tuhan.’#Mzm 82:6 35Tentu ya hipanei hal adeh: Ma de bicot ku kateh Alkitab ajeh betol ru pek beubah lei ditehjeh. Jadi, amen Jenang Kicereg sengoi de naiterima Iengrok ajeh ‘tuhan’, 36yama engkeurok Eng Nghina Kek bile Ngurok LiEng adeh Kenon Jenang? Padehal, Eng bipesuci ru bingeng ya Menek nu dunia adeh. 37Amen engkeneng Eng pek Ngbeh heknod Menek, wesloh agok pecaya nu Eng. 38Tapi amen engkeneng Ngbeh heknod Menek, pecayaloh nu ma de Ngbeh ajeh hamapen pek engkepecaya nu Eng supaye engkepanei ru engkereti hal adeh: Menek Kibenanek ru Eng ru Eng Ngbenanek ru Menek.”
39Nukali nij mai Yahudi naikerekwat naiha-cap Yesus tapi Yesus Kitelas ju enai.
40Yesus Kilos nij nu tempat Yohanes Pembaptis kibaptis sengoi entem de ku englag Batag arik Jordan, lalu Yesus Kigei ku pajeh. 41Jeoi mai naihol nu Kek. Naiurok, “Yohanes Pembaptis pek kibeh tanda ajaib tapi dikdij ma de kiurok tentang Sengoi adeh betol.” 42Jeoi sengoi ku pajeh naipecaya nu Yesus.
Currently Selected:
YOHANES 10: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
