Yohan 11

Lazaru dvzu:nò we

1Betani rvwá taq Mari nv̀ng àngnvmmè Marta vle. Wervwá taq Lazaru tǿò we tiqpè zae. #Luk. 10:38-39 2Mari nø Kàngpè sv̀ng ngórdorcìí vdø:rò nø̀, Àng hí sv̀ng àng vgonií shøqvpmà mè íe. Za pè Lazaru nø àngnvmpè íe. #Yoh. 12:3 3Wervtnø̀ àngnvmmèníí Yesu yv́ng vsv̀ng dvzá:rò nø̀, “Kàngpèá, Nà èshóngshì pè Lazaru nø zae,” a:lòe.

4Yesuí tá bǿà kvt, “Záyv̀ng yalòng nø shìlv́m høq nø mø̀í. Gvray ngø̀rdvgùng nv̀ng Gvray Àngcèpè ngø̀rdvgùng nø yalòng taqkèní shvringlv́m dvpvt lè íe,” a:lòe. #Yoh. 9:3 5Yesu nø Marta nv̀ng àngnvmmè sv̀ng gø, Lazaru sv̀ng gø shóngshìe. 6Íwe Lazaru za we tá bǿà nìgø, Yesu nø Àng vl yv́ngø vní ni v́ldv̀ng wae. 7Wemèpvng À:ngí coqcv́nrì sv̀ng, “Yuda móng sv̀ng vrá tiqkvt dìì,” a:lòe.

8Coqcv́nrìí, “Rabiá, cáyaq ni Yuda vsv̀ngrìí Nà sv̀ng lú:ngì wvplv́m èwàa:pmì we, vrá tiqkvt weyv́ng sv̀ng dìlv́m èwa má?” a:lòe. #Yoh. 8:59; 10:31

9Yesuí, “Tiqni taq tiqcé vní nari vl we mø̀í má? Vsv̀ng nø vyá:ngí tvrà di nìnø, nv̀m gálù:ngí yv́ngshì rvt vtøplv́m màvl. #Yoh. 9:4-5; 1Yh. 2:10 10Ínìgø yaqdø̀:ngí tvrà di gǿ nø, àng taq gálòng màvl rvt vtøpmvme,” wa vtá:nòe.#Yoh. 12:36; 1Yh. 2:11

11Yadv́ng pv̀n shø̀:nò dá:ngí, vrá À:ngí, “Nøngmaq rv̀mnvngpè Lazaru nø yøpme. Ngà nø àng sv̀ng dvshatlv́m dønge,” a:lòe. #Mat. 9:24; Luk. 8:52

12Coqcv́nrìí, “Kàngpèá, àng nø yøp we í nìnø tv́n àngwa ban longe,” a:lòe. 13Yesuí nø Lazaru shì lòng sv̀ng shø̀:nòe. Íwe, àngmaqí nø àngwà dø yøp lòng sv̀ng wae, lá:nòe.

14Wervtnø̀ Yesuí àngmaq sv̀ng chaqdvp dvtáò nø̀, “Lazaru nø shìa:pmì. 15Weyv́ngø Ngà màvlvp rvt nàmaq dvpvt Ngà dvbònge. Pàwá wani nàmaq kv́mlv́m dvpvt íe. Có, àng yv́ngsv̀ng dìì,” a:lòe.

16Wekvt Didimu#11:16 “Didimu” nø Heleni kà, “Toma” nø Hebru kà í nø, “bvrá” wa kà íe. tǿò pè Tomaí rv̀mnvng coqcv́nrì sv̀ng, “Có, Svrapè nv̀ng tiqdø shí nv̀ngsv̀ng nøngmaq gø dìì,” a:lòe. #Mak. 10:32; 14:31

17Yesu tuq á:mì dvgvp, Lazaru sv̀ng lóngdùng dvgv̀mø kǿ:mò we nø vbì ni ía:pmì we À:ngí yv̀ng bǿà. 18Betani rvwá nø Yerusalem kèní vní ming dv́ngte wa vrúme. 19Yuda vsv̀ng mvme nø Marta nv̀ng Mari yv́ngsv̀ng àngnvmpè rvt nøt shvlø̀mlv́m dì dá:rì. 20Yesu dì ráì we Martaí tá bǿà kvt, àng búngá:mì nø̀ Yesu sv̀ng vtoá:mà. Mari nø chø̀m yv́ng vl ráì.

21Wekvt Martaí, “Kàngpèá, Nà yayv́ng èvlvp pà í nìnø, vnvmpè nø mvshì ni we íe. #Yoh. 3:32 22Íwe Gvray kaq Nàí kapà èrø:tnò ninø, Gvrayí Nà sv̀ng akvtni èzi daq we ngàí shángòe,” a:lòe.

23Yesuí, “Nvnvmpè nø vrá zun longe,” a:lòe.

24Martaí, “Lv̀ngdø̀m àngni zun long we taq àng vrá zun long we ngàí shángòe,” a:lòe. #Luk. 14:14; Yoh. 5:29; 6:40

25Yesuí, “Zunlòng nv̀ng gø̀nshaq nø Ngà ǿngàe. Ngà kaq kv́m gǿ nø, shì nìgø cúnshì longe. 26Vrá, Ngà kaq kv́m yv́ngkèní Ngà vdòng taq cúnshì we kagǿ gø, kadvgvp gø mvshì long. Yalòng sv̀ng èkv́me má?” a:lòe. #Yoh. 5:24; 8:51

27Martaí, “Íe, Kàngpèá, Nà nø rvgaq tø̀m sv̀ng èdi daqì pè, Gvray Àngcè Kristu èí we sv̀ng ngà kv́me,” a:lòe. #Yoh. 6:69

28Marta nø wedø shø̀n dá:ngí vtvngá:mì. Wekvt àngnvmmè Mari sv̀ng mvyø̀:ní goò nø̀, “Svrapè tuq ráì. Nà sv̀ng ègoe,” a:lòe. 29Marií yakà tá bǿà kvt tiqshaqí búng nø̀, Yesu yv́ngsv̀ng dìá:mì. 30Yesu nø mvrìng vdòng sv̀ng shini mvgòng dø, Martaí Àng sv̀ng vtoa:tnà yv́ngø v́ldv̀ng wae. #Yoh. 11:20 31Mari sv̀ng nøt shvlø̀mlv́m rvt chø̀m yv́ng vl we Yuda vsv̀ngrìí, Mari nø tiqdvshaqí búng nø̀ dìá:mì we sv̀ng yv̀ng bǿà kvt, àng nø dvgv̀m yv́ngø ngǿlv́m die lá:nò nø̀, àng mèpvng cà:nòe.

32Mari nø Yesu vl yv́ng tuq ráì nø̀, Àng sv̀ng yv̀ng bǿà kvt, Àng hí yv́ngø kǿng kupshì sórí, “Kàngpèá, Nà ya yv́ngø èvlvp pà í nìnø, vnvmpè nø mvshì ni we íe,” a:lòe. #Yoh. 11:21

33Mari gø, àng ó tiqdø dì ráì we Yuda vsv̀ngrì gø ngø we sv̀ng Yesuí yv̀ng bǿà kvt, Àng nøt vdòngø mvgø̀r nø̀ nøt dvshà sórí, #Yoh. 13:21 34“Nàmaqí àng sv̀ng kayv́ngø èkǿmvpshà má?” wa rø:tnòe.

Àngmaqí, “Kàngpèá, có, yv̀ngá:mì,” a:lòe.

35Wekvt Yesu ngøe. #Luk. 19:41

36Wervtnø̀ Yuda vsv̀ngrì nø, “Èyv̀ngnø̀ng, À:ngí Lazaru sv̀ng kadvngshìni shònga:tnà!” wae. 37Íwe tiqmaq nø, “Yapèí nø nemàn pè sv̀ng ne yvngshì dvzá:rò nìnø, Lazaru sv̀ng gø la mvshì dø wá ngu:tnò we mø̀í má?” wae.

38Yesu nø vrá tiqkvt nøt mvgø̀r sórí dvgv̀m sv̀ng tuq ráì. Dvgv̀m nø lóngdùng í nø̀, bv́ngkà chit sv̀ng lóngkø̀:mí bvt shøòe. #Mat. 27:60 39Yesuí, “Lóngkø̀m gø̀m tèrinø̀ng,” a:lòe.

Shìa:pmì pè àngnvmmè Martaí, “Kàngpèá, akvt nø da vngàvpni. Pàwá wani àng shìapmì we vbì ni í ráì,” a:lòe. #Yoh. 20:1

40Yesuí, “Nà èkv́m nìnø Gvray ngø̀rdvgùng èyv̀ng lú:ngòe, wvng vl dv́rà we mø̀í má?” a:lòe. #Yoh. 4:25-26

41Wekvt àngmaqí lóngkø̀m gø̀m tvri bǿà. Yesu nø muqlàng kaq dvjaq sórí, “Vpèá, Ngà røtkà ètángang bǿngà rvt Nà sv̀ng oqà. 42Kadvgvp gø Ngà røtkà sv̀ng Nàí ètángangà we shángòe. Íwe Nàí dèzv́r dakngà we sv̀ng gùrgùr rip we vsv̀ng loksokrì kv́mlv́m rvtnø̀ Ngà yadø shø̀n we íe,” wae. #Yoh. 12:30

43À:ngí kà yarì shø̀n bǿà dá:ngí, “Lazaruá, èléshì long!” wa nø̀ vkiqe. 44Wekvt shìapmì pè Lazaru nø, vnàngmøq laqtu:ní hí wur vdøpshaq, àng mv́rdaq gø sømba:ní vzvpshaq léshì lú:ngì.

Yesuí, “Àng sv̀ng èpǿnanø̀ng nø shèlàngnø̀ng,” wa àngmaq sv̀ng a:lòe.

Yesu sv̀ng shvtlv́m Parisirì vrashì we

45Wekvt, Mari yv́ngsv̀ng dì ráì we Yuda vsv̀ngrì mvme nø Yesuí wà bǿà rì yà:ngò nø̀ Yesu sv̀ng kv́m bǿì. #Luk. 16:31; Yoh. 10:42; 12:42 46Ínìgø àngmaq taqkèní tiqmaq nø Parisirì yv́ng dìá:mì nø̀, Yesuí wà bǿà rì dvtáòe. 47Wekvt shvrúngshú vjìrì nv̀ng Parisirìí Shaqré Lìpòngmè taq shaqré shaqtvngrì dvkø̀:mò nø̀, “Vsv̀ng yapèí nø shálv́m mvshv́lpvrá mvme wàòe. Kadø wàì ni? 48Àng sv̀ng yadø shvlángdv̀ng wàì kvt nø, vsv̀ng shvngbe Àng sv̀ng kv́mvme. Wekvt Roma cìlcèrì di daq nø̀, nøngmaq Shànshér Tø̀ngnø nv̀ng nøngmaq dvcì sv̀ng ècatnv́m bǿìe,” wae.

49Àngmaq taqkèní wenǿng taq shvrúngshú vgo wáshì pè Kayapaí, “Nàmaqí pàgø mèshánø̀ng. 50Nøngmaq dvcì køp vmv́nglv́m lòng mvdv̀m nø, bashàrì tvle vsv̀ng tiqgǿ shìlòng nø nàmaq dvpvt té shvla we sv̀ng mèdaknø̀ng má?” a:lòe. #Yoh. 18:14 51Àng yadø shø̀n lòng nø, àng nø:tní shø̀:nò we mø̀í. Àng nø wenǿng taq shvrúngshú vgo wáshì rvtnø̀, Yuda dvcì køp dvpvt gø, #Nnp. 50:20; Bng. 28:30 52Yuda dvcì dvpvt wa mvtaq, kayv́ng màyv́ng vshin we Gvray àngcèrì sv̀ng tiqpóng dvkø̀mlv́m dvpvt gø Yesu shìlv́m dàng kàdvtu:tnò we íe. #Yoh. 10:16; 1Yh. 2:2 53Weni kèní Àng sv̀ng shvtlv́m àngmaqí gvcvt vjø:nòe.

54Wervt Yesu nø Yuda vsv̀ngrì dvhø̀ø neyv́ng negv̀m mvdìá:mì. Weyv́ng kèní Àng búng nø̀ rvgaq mvgung shvnvng Epraim tǿò mvrìng yv́ngø Àng coqcv́nrì nv̀ng v̀lá:mì.

55Yuda vsv̀ngrìò Shvlé Bóy yùl ráì rvtnø̀, vtv́r rvgaq kèní vsv̀ng mvme nø vdèdè dvshérshì we vtóng cv̀nlv́m dvpvt, Shvlé Bóy mvwàò vzv̀ng Yerusalem sv̀ng ngangá:mì. #2Dg. 30:17; Mak. 10:32; Dzr. 21:24,26 56Àngmaqí Yesu sv̀ng láò nø̀ Noqngø̀m Tø̀ngnø yv́ng rip sórí, “Kadø dèdvmnø̀ng má? Àng nø yabóy sv̀ng bvttut mvdìlv́m dø í má?” wa tasv̀ng vrùnge. 57Shvrúngshú vjìrì nv̀ng Parisirìí nø, Yesu sv̀ng tvp lúnlv́m rvt, Àng kayv́ng vl we sháò gǿí nø, dvtá ràe, wa nø̀ vmíng vzíshaq íe.

Currently Selected:

Yohan 11: GSM

Highlight

Copy