Yohan 13

Yesuí Àng coqcv́nrì hí zá:lò we

1Yesu nø rvgaq yalòng kèní búng nø Àngpè yv́ng lolv́m rvtø̀ tuq ráì we sv̀ng Shvlé Bóy mvpà:ngò vzv̀ng kaq sháshìe. Rvgaq tø̀mø vl we Àng coqcv́nrì kaq À:ngí shù:ngò nø̀ lv̀ngdø̀m høq àngmaq sv̀ng shù:ngòe. #Yoh. 7:30; 8:20; 15:13; Gal. 2:20 2Wedvgvp àngmaq nø dørø̀m v́mpà v́mlv́m runge. Sataní Simon Iskariot àngcè Yuda vdòng taq Yesu sv̀ng nvmv́mlv́m nøt vzv́ngashaq íe. #Luk. 22:3 3Yesu nø Vpèí í dv́ngte shvngbe Àng wur taq vzíshaq í we nv̀ng Àng nø Gvray yv́ngkèní dì daqì nø Gvray yv́ng sv̀ng vtv́nglvm í we sháshìe. #Yoh. 3:35; 16:28; 17:2 4Wervt Àng nø dørø̀m v́mpà vm yv́ngkèní búng nø, mvdv̀m bèlaq chutshì dá:ngí paqzit tiqdù:ngí juq dvchvtshìe. #Mat. 11:29; 20:28; Luk. 12:37 5À:ngí kung tiqgø̀m taq tì zá:ngò dá:ngí Àng coqcv́nrì hí zv́laò nø̀ Àng dvchvtshì we paqzit dù:ngí shøqaòe. 6Simon Piter yv́ng høqa:tnà kvt à:ngí, “Kàngpèá, Nàí ngà hí sv̀ng zv́llv́m èwa má?” a:lòe. #1Pt. 5:3 7Yesuí, “Ngàí kapà wv̀ngò we akvt nàí mèsíngò. Íwe tv́n mèpvng èsíng lú:ngòe,” wa vtá:nòe. 8Piterí Àng sv̀ng, “Kadø ínìgø ngà hí nø Nàí zv́l màdvzv́rshø̀ng,” a:lòe. Yesuí, “Ngàí nà hí mvzv́lnø̀ngnø, nà nø Ngà nv̀ng vzø̀mlv́m#13:8 “Ngà coqcv́n mèí,” gø rø daqe. màvl,” wa vtá:nòe. 9Simon Piterí, “Kàngpèá, íni ngà hí wa mø̀í, ngà wur gø, vgo gø èzv́là,” a:lòe. 10Yesuí àng sv̀ng, “Tì vzv́lshìshaq tiqgǿ nø góngkøp shèrvm rvt, hí wa zv́lshì rae. Nàmaq dvhø̀ kèní tiqgǿ wa mø̀íni, shvngbe nø èshèrnø̀nge,” a:lòe. #Yoh. 15:3 11Kadø íe wani Àng kaq nvmv́mlv́m pè sv̀ng À:ngí sháòe. Wervt À:ngí, “Nàmaq dvhø̀ kèní tiqgǿ wa mø̀íni shvngbe nø èshèrnø̀nge,” a:lò we íe. #Yoh. 6:64,70,71

12Yesuí àngmaq hí zv́la bǿà dá:ngí mvdv̀m belaq gwashì nø̀ vrá námrung sórí, “Ngàí nàmaq sv̀ng wáa bǿshà lòng èsíngnø̀ng má? 13Nàmaqí Ngà sv̀ng, ‘Svrapè’ gø ‘Kàngpè’ gø èvlshàe. Nàmaqí wedø èvlshà lòng nø vdue. Kadø íe wani Ngà nø wedøni ǿngàe. #Mat. 23:8,10 14Nàmaq Nvkàngpè nv̀ng Svrapè ǿngà we Ngàí dv́ng nàmaq hí zv́laì nìnø, nàmaq gø tasv̀ng hí vzv́lké ràe. #Luk. 22:27; 1Tm. 5:10 15Ngàí nàmaq sv̀ng wáa bǿshà dø nàmaqí gø wàlv́m shvbóngshìrà Ngàí wv̀ng bǿngà we íe. #Pil. 2:5; Kol. 3:13; 1Pt. 2:21 16Ngàí kàdøng vla:tnìni, vshuq nø àngkàng mvdv̀m ring we mø̀í. Dvzv́rshú gø àng kaq dvzá:rò pè mvdv̀m ring we mø̀í. #Mat. 10:24 17Yadv́ng pv̀n sv̀ng nàmaqí èshánø̀ng nø èwànø̀ng nìnø, ìshøt ìgv̀n èlún lóngnø̀nge. #Mat. 7:24; Yak. 1:25 18Nàmaq shvngbe sv̀ng shø̀n we mø̀í. Ngà rvcvngshìshaq rì sv̀ng Ngàí shángòe. Íwe Shànshér Kàru taq, ‘Ngà v́mpà vmpè àng híí Ngà sv̀ng pèlonge,’ wa ciq dvhømlv́m rvt íe. #Shz. 41:9 19Wedø í long dvgvp, Ngà nø ‘NGÀ ǾNGÀE’ wa pè ǿngà we sv̀ng nàmaq kv́mlv́m dvpvt, shini mvbø̀n ra ke nàmaq sv̀ng Ngàí akvt dvtáì we íe. #Yoh. 14:29 20Ngàí kàdøng vla:tnìni, Ngàí dvzv́rò gǿ sv̀ng vtoò gǿí nø Ngà kaq nàtong we íe. Ngà kaq nàtong gǿí nø Ngà sv̀ng dèzv́r dakngà pè kaq gø vtoò we íe,” a:lòe. #Mat. 10:40

Àng kaq nvmv́mlv́m pè sv̀ng tvnuò we

Mat. 26:21-25; Mak. 14:18-21; Luk. 22:21-23

21Yadv́ng pv̀n shø̀n bǿà dá:ngí, Yesu nø vtvngshaq nøt dvshà lú:ngì nø, “Ngàí kàdøng vla:tnìni, nàmaq taqkèní tiqgǿí Ngà sv̀ng ènvmvm bønge,” wa dèdè vchàngòe. #Yoh. 12:27 22Kagǿ sv̀ng Àng wa we coqcv́nrìí mvsháò rvtnø̀ dvtiqshì sórí dàjaq kee. 23Yesu shóngshì we coqcv́npè nø, Àng shvnvngø námrunge. #Yoh. 19:26; 20:2; 21:7,20 24Wervt Simon Piter nø àng sv̀ng ne vlapshì sórí Yesuí shø̀:nò pè nø kagǿ í we sv̀ng røt dvzá:ròe.#13:24 Angké kà tiqmaq taq, “À:ngí shø̀:nò gǿ kagǿ í we dètáshà,” wa vrue. 25Coqcv́n wepè nø Yesu yv́ng tvp vnvpshì nø̀, “Kàngpèá, kagǿ íe?” wa rø:tnòe. 26Yesuí, “Ngàí zidòng yamǿr kung taq zønò nø̀ zǿngò gǿ íe,” wa vtá:nòe. Wekvt À:ngí zidòng tiqmǿr zøn dv̀ng Simon Iskariot àngcè Yuda sv̀ng zíòe. 27Zidòng wemǿr Yudaí v́m bǿà chàng, Satan nø àng vdòng gòngá:mì. Wervtnø̀ Yesuí àng sv̀ng, “Nàí wàlv́m èdá:nò lòng bò èwàò,” a:lòe.#Yoh. 13:2 28Yesuí pàwá àng kaq yadø a:lò we sv̀ng v́m shvbóy taq námrung rì tiqgǿí gø mvsháò. 29Yuda nø gv̀msùng shøpshú í rvtnø̀, Yesuí àng sv̀ng bóy dvpvt rà pv̀nrì wvnlv́m, mø̀íni dvshàrì kaq tiqpv̀npv̀n zílv́m, a:lò pà íe, wa tiqmaqí lá:nòe. #Yoh. 12:6 30Yuda nø zidòng wemǿr v́m dá:ngí chàng búngá:mì. Wervtø̀ nø yaqdø̀ng íá:mì.

Dvkv́mkà angshv́r zíò we

31Yuda búngá:mì kvt Yesuí, “Vsv̀ng Àngcèpè ngø̀rdvgùng nø akvt kèní dvtan daqòe. Gvray ngø̀rdvgùng gø Àng taqkèní dvtan daqòe. 32Gvray ngø̀rdvgùng nø Vsv̀ng Àngcèpè taqkèní dvtan daqò we í kvt kèní nø, Gvrayí ni Vsv̀ng Àngcèpè ngø̀rdvgùng gø dvtan daqò nø, akvtni dvtanlv́m dá:nòe. #Yoh. 12:23; 17:1-5 33Ngàcèrìé, Ngà nø nàmaq nv̀ng tiqlvngcè wa vle. Nàmaqí Ngà sv̀ng èlá lóngshàe. ‘Ngà døngvm yv́ngsv̀ng nàmaqí di mèlúnnø̀ng,’ wvng Ngàí Yuda vsv̀ngrì kaq àvlshaq dø tiqdvchá, nàmaq sv̀ng gø akvt wedøni a:lìe. #Yoh. 7:33; 8:21; 12:33 34Tiqgǿ nø tiqgǿ nàshòngkénø̀ng, wvng dvkv́mkà àngshv́r tiqlòng Ngàí nàmaq sv̀ng zí ráìe. Ngàí nàmaq sv̀ng shù:ngì dø, nàmaq gø tiqgǿ nø tiqgǿ nàshòngkénø̀ng. #Yoh. 15:12,13,17; 1Yh. 2:7-10 35Nàmaq tiqgǿ nø tiqgǿ nàshòngkénø̀ng nìnø, nàmaq nø Ngà coqcv́n èínø̀ng we vsv̀ng shvngbeí shá bǿòe,” a:lòe.

Piterí ma lú:ngò we

Mat. 26:33-35; Mak. 14:29-31; Luk. 22:31-34

36Simon Piterí Àng sv̀ng, “Kàngpèá, Nà nø kayv́ng sv̀ng dìlv́m èwa má?” a:lòe. Yesuí, “Ngà døngvm yv́ngsv̀ng akvt nàí cv́n mèlú:nò. Íwe mèpvng nø nàí cv́n rà longe,” wa vtá:noe. #Yoh. 7:34; 21:18-19 37Piterí, “Kàngpèá, kadø í nø akvt Nà mèpvng ngàí cv́n mvlúnò má? Nà dvpvt gø̀nshaq dvbǿmshìlv́m høq gø ngà kvmshø̀nge,” a:lòe. 38Yesuí, “Ngà dvpvt nà gø̀nshaq dvbǿm kvmshø̀nge nàyà lá? Ngàí nà sv̀ng kàdøng vlvtnø̀ng, dv̀nggú shini mvgì dvgvp, nàí Ngà sv̀ng vshø̀m kvt èmang lóngàe,” wa vtá:nòe.

Currently Selected:

Yohan 13: GSM

Highlight

Copy