Yohan 4

Yesu nv̀ng Samarimè

1Yesuí nø Yohan mvdv̀m coqcv́n té lú:nò nø̀ tìløpmaòe, wa kà Parisirìí táa:pmà we sv̀ng À:ngí shá bǿà. #Yoh. 3:22,26 2(Àngjǿng nø Yesu Àng vdèí tìløp mvzíò. Àng coqcv́nrìí wa zíòe). #1Kr. 1:17 3Wervt Àng nø Yuda móng kèní búng nø̀ Galili móng sv̀ng vrá vtv́ngá:mì. 4Yesu nø Samari móng dangdang léshì vdu rvtnø̀, #Luk. 9:52 5Àng nø Yakuí àngcè Yosep sv̀ng zí yà:ngà rvgaq shvnvng, Samari móng Sikar tǿò mvrìng sv̀ng tuq lú:ngì. #Nnp. 33:19; Ysh. 24:32 6Weyv́ng nø Yaku tìtung vle. Yesu nø tvrà dí mvjòr lú:ngì rvt tìtung shvnvng runge. Welvng nø tvné vyáng rvwè#4:6 Heleni kàí “vchuq rvtø̀ dv́ngte” wae. íe.

7Samari tiqmè tì kvpshì ráì dvgvp Yesuí àng sv̀ng, “Ngà sv̀ng aq tì èzǿngà lè,” a:lòe. 8(Wervtø̀ nø Àng coqcv́nrì nø v́mlv́m wvn nv̀ng mvrìng sv̀ng dì dá:rì lvng íe).

9Samarimèí Yesu sv̀ng, “Nà nø Yuda vsv̀ng èí we, kadø í nø̀ Samarimè kèní tì èrøtne má?” a:lòe. (Kadø íe wani Yuda vsv̀ngrì nø Samari vsv̀ngrì nv̀ng vzø̀m we vtóng màvl). #Luk. 9:53

10Yesuí àng sv̀ng, “Gvray gønpaq lòng nv̀ng nà yv́ngkèní aq tì røtshì pè nø kagǿ í we sv̀ng la èsháò nìnø, nà mv̀ng Àng yv́ngkèní èrøtshì nø̀, À:ngí nà sv̀ng cúnshì we tì èzivtne,” wa vtá:nòe. #Yoh. 7:38,39

11Svmarémèí Àng sv̀ng, “Vshaqpèá, Nà nø tì kvplv́m pv̀n gø mènàdá, tìtung gø rvnaqe. Íni, cúnshì we tì nø kayv́ng kèní lèlú:nò ni? 12Vkop vkàng Yakuí nø nøngmaq sv̀ng tìtung yalòng èzí yv̀ngshà. Tìtung yalòng kèní àng nv̀ng àngcèrì gø, àng nìnàrì gø aq yà:ngì. Nà nø àng mvdv̀m èringe má?” wa rø:tnòe.#Yoh. 8:53

13Yesuí, “Tì yalòng aq we kagǿ ínìgø vrá bál longe. #Yoh. 6:58 14Íwe Ngàí zǿngò we tì aq gǿ nø kadvgvp gø mvbál long. Tì welòng nø dvciqlvpat gø̀nshaq zí lún høq àng vdòngø bor we tìbor í longe,” wa vtá:nòe. #Yoh. 6:27,35; Yoh. 7:37-39

15Svmarémèí Àng sv̀ng, “Vshaqpèá, ngà tì mvbállv́m dvpvt gø, tì kvp nv̀ng yayv́ng høq dí mvràlv́m dvpvt gø, tì welòng èzǿngà,” a:lòe.

16Yesuí, “Èdivm, nvchø̀mpè sv̀ng ègoá:mò nø̀ èshøla:tnò,” a:lòe.

17Svmarémèí, “Ngà nø chø̀mpè màdáng,” wa vtá:nòe.

Yesuí àng sv̀ng, “‘Ngà chø̀mpè màdáng,’ èwa kà nø vdue. 18Kadø íe wani nvchø̀mpè pungwà gǿ èv́la yà:ngì. Akvt ègvlshì pè gø nvchø̀mpè mø̀í. Nà èshø̀n kà dìnge,” a:lòe.

19Svmarémèí àng sv̀ng, “Vshaqpèá, Nà nø kàdvtutshú èí we ngàí dǿm bǿngà. #1Kr. 14:24,25; Yoh. 9:17 20Nøngmaq vkop vkàngmaqí nø ya shìgùng taq noq yà:ngà. Íwe nàmaq Yuda vsv̀ngrì nø, ‘Gvray kaq noqngø̀m rà nø Yerusalem taq wa íe,’ èwànø̀nge,” a:lòe. #Drd. 12:4-7; Shz. 122

21Yesuí, “Svmarémèá, Ngà sv̀ng èkv́m. Vpè sv̀ng nàmaqí noqlv́m nø ya shìgùng taq gø mø̀í, Yerusalem taq gø mø̀í we rvtø̀ tuq ràe. #Mak. 14:58 22Nàmaq Samarirìí nø mèshánø̀ng pv̀n sv̀ng ènoqnø̀nge. Íwe nøngmaqí nø nøngmaqí sháì we Gvray kaq noqìe. Kadø íe wani chutchv́ng we tvrà nø, Yuda dvcì taqkèní íe. #2Kk. 17:29-41; Esa. 2:3 23Vpè sv̀ng døngdøng wa noqò rìí nø pvlàcè nv̀ng dìnglòng taqkèní noqlv́m rvtø̀ tuq rae, akvt gø íe. Kadø íe wani Vpèí nø Àng sv̀ng wedø døngdøng wa noqò rì kaq láòe. 24Gvray nø Pvlàcè í rvtnø̀, Àng sv̀ng noqò rìí nø pvlàcè nv̀ng dìnglòng taqkèní noq ràe,” a:lòe. #Rom. 12:1; 2Kr. 3:17

25Svmarémèí Àng sv̀ng, “Kristu tǿò pè Meshia di daq we nø ngàí shángòe. Àng di daq kvt, À:ngí nøngmaq sv̀ng shvngbe dètá daqìe,” a:lòe. #Yoh. 1:41

26Yesuí, “Nà nv̀ng kà dvmv̀n pè Ngà nø wepè ni ǿngàe,” a:lòe.#Bng. 3:14; Yoh. 9:37

27Wela:ngí coqcv́nrì tuq ráì nø̀, Àng nø svmaré tiqmè nv̀ng kà dvmv̀n da rvt àngmaq dàá:mì. Íwe “Nàí pà èrø:tnòe?” mø̀íni “Wemè nv̀ng pàwálv́m kà dèmv̀ne?” wa nø̀ tiqgǿí gø mvrø:tnò. 28Svmarémèí àng tìchúng weyv́ng là:ngò dá:ngí, mvrìng kaq vtv́ngá:mì nø̀ vsv̀ngrì kaq, 29“Ngàí wv̀ng yv̀ngà rì shvngbe sv̀ng dètáng bǿngà we vsv̀ng tiqpè vle, èyv̀ngvtnø̀ng. Àng nø Kristu í we màsha!” a:lòe. 30Wekvt àngmaq nø mvrìng kèní búng ráì nø̀ Àng yv́ngsv̀ng di ráì.

31We dvhø̀ taq coqcv́nrìí Àng sv̀ng, “Rabiá, v́mpà èvm ra,” wa rø̀:nòe.

32Íwe À:ngí, “Ngà nø nàmaqí mèshánø̀ng we v́mlv́m vdánge,” a:lòe.

33Wervtnø̀, “Kagǿí Àng sv̀ng v́mlv́m lv́nga dá:rà má?” wa coqcv́nrì vrùnge.

34Yesuí àngmaq sv̀ng, “Ngà sv̀ng dèzv́r dakngà pè Àng nøt dø wàlv́m nv̀ng Àng bv̀nlì dvdv́nglv́m lòng nø Ngàò v́mpà èǿngange. 35‘Akvt vbì shvlá dv́ngte taq nø vm dvkøm rvtø̀ tuq rae,’ wa nø̀ shø̀nkà vl we mø̀í má? Ngàí vla:tnìni, rvmá hv́ngrì nø gongá:mì nø̀, dvkøm vrvmá:mì we sv̀ng pán vshat èyv̀ngnø̀ng. #Mat. 9:37; Luk. 10:2 36Dvkø:mò gǿí nø akvtni zìbè lú:nò nø̀, dvciqlvpat gø̀nshaq dvpvt àngshí dvkømv́m ma:nòe. Wekvt wø:nò gǿ nv̀ng dvkø:mò gǿ nø tiqdø dvbù longe. 37‘Wø:nò we nø tiqgǿ, dvkø:mò we nø dvgá tiqgǿ,’ wa we shø̀nkà nø dìnge. #Mik. 6:15 38Pàwá wani, nàmaqí màwáshaq yv́ng dvkømlv́m Ngàí nàmaq sv̀ng dvzv́r bǿshà. Dvgárìí vwáshaq yv́ng nàmaqí àngshí dvkømv́m èlún bǿshà,” a:lòe.

39Svmarémèí, “Ngàí wv̀ng yv̀ngà rì shvngbe À:ngí ngà sv̀ng dètáng bǿngà,” wa shvkse kà rvt, we mvrìng kèní Samari vsv̀ng mvme nø Àng sv̀ng kv́m bǿì. 40Samari vsv̀ngrì Àng yv́ng tuq ráì kvt, àngmaq nv̀ng tiqdø v̀llv́m Àng kaq rø̀:nò rvtnø̀, weyv́ngø Yesu nø vní ni vle. 41Vrá, Yesu kà rvt dvgá gø mvme gǿ kv́m ráì. 42Àngmaqí svmarémè sv̀ng, “Akvt nøngmaq kv́m bǿshà we nø nà kà rvt mø̀í, nøngmaq vdèí Àng kà tashì lún bǿshà rvtnø̀ íe. Yapè nø rvgaq tø̀m sv̀ng Chv́ngshúpè jø̀ngjǿng í we shá bǿshà,” wae. #1Yh. 4:14

Yesu Galili móng sv̀ng gòng we

43Vní ni mèpvng Yesu nø weyv́ng kèní búng nø̀ Galili móng sv̀ng gòngá:mì. #Mat. 4:12 44Kàdvtutshú sv̀ng nø vdè rvgaqrìí màpǿò, wa nø̀ Yesu Àng vdèí ni vshǿnshaq íe. #Mat. 13:57; Mak. 6:4; Luk. 4:24 45Íwe Galili móng sv̀ng Yesu tuqá:mì dvgvp àngmaqí Àng sv̀ng vtoòe. Pàwá wani Galilirì nø Yerusalem Shvlé Bóy sv̀ng dìa:pmì nø̀, weyv́ng Yesuí wàò rì shvngbe yv̀ng a:pmà rvt íe.#Yoh. 2:23

Kapernum dupè àngcè dvba:nò we

46Yesu nø À:ngí tì kèní bìmtì shvlèa:pmà we Galili móng Kana rvwá sv̀ng vrá tiqkvt tuq ráì. Wekvt Kapernum wamàø du tiqpè vl we, àngcèpè zae. #Yoh. 2:1-9 47Yesu nø Yuda móng kèní Galili móng sv̀ng tuq ráì wa kà dupèí tá bǿà kvt, Yesu yv́ng dìá:mì nø̀, Àng di daq weí shìlv́m dv́nshì we àngcèpè sv̀ng dvbanalv́m dvpvt nímshìe. #Luk. 7:2

48Yesuí àng sv̀ng, “Nàmaqí nø shálv́m mvshv́lpvrá nv̀ng vtiqrà ni mèyv̀ngnø̀ng kèní nø, kadø ínìgø mèkv́mnø̀ng,” a:lòe. #Yoh. 2:18; 1Kr. 1:22

49Dupèí, “Kàngpèá, ngàcèpè shini mvshì dvgvp èdía daqshà,” a:lòe.

50Yesuí, “Nàtv́ngvm, nvcèpè nø cúnshìe,” a:lòe.

Àng nø Yesuí a:lò kà sv̀ng kv́m nø̀ vtv́ngá:mì. 51Wekvt àng yøt mvnshì daqì dvgvp, àng vshuqrìí àng sv̀ng vhøma:tnà nø̀, àngcèpè baná:mì we dvtáòe. #Mat. 8:6 52Karvtø̀ taq àngcèpè ban bǿì we àngmaq sv̀ng rø:tnòe. Àngmaqí, “Cáni vyáng mèpvng tiqnari#4:52 Heleni kàí nø̀, shvngøt rvtø̀ wae. taq góng vkatshì lòng shø̀má:mì,” a:lòe. 53Wekvt Yesuí, “Nvcèpè nø cúnshìe,” wa vlapmà rvtø̀ ni í we sv̀ng àngpèí shá bǿà nø̀, àng nv̀ng àngmaq rvpkøp Yesu sv̀ng kv́m bǿì.#Dzr. 16:31 54Yalòng nø Yuda móng kèní Galili móng sv̀ng vtv́ng ráì mèpvng Yesuí wàò we shálv́m mvshv́lpvrá vnílòng walòng íe. #Yoh. 2:11,23

Currently Selected:

Yohan 4: GSM

Highlight

Copy