Johannesi 1
1
N̂ando dha karire munu
1Pakutanga dha karire N̂ando, N̂ando dha karire naNyambi, noNando dhi ne Nyambi thinda. 2Gha karire pamutango naNyambi. 3Papendi ya pwire kuvareka yoyihe no mbadiko thi tha pwire kutenda kupira ye. 4Mumwendi wa karire moyo, nomoyo wa karire munyenge wawanu. 5Munyenge ghuna kumuneka makokore, makokore mbadi gha konine kudhimitha munyenge.
6Pa karire murume oyu gha pwire kutuma kwaNyambi. Dina dyendi ne Johannesi. 7Gheyire kukunongonona munyenge eshi, wahe ngo ha ghu dimuke no kughutawa. 8Aye thinda mbadi gha karire munyenge, ene gha kone kunongonona yamunyenge. 9Munyenge ghoshemwa ghokukona kumunekera kehe munu wa karire mukwiya pakaye.
10Gha karire mukaye no kaye ka pwire kutenda papendi, ene kaye, mbadi ka mu dimukire. 11Gheyire kuyimuna yendi, hakadiko dyendi ne mbadi ha mu tamburire. 12Ene wahe wa ha mu tamburire no ha tawire kuDina dyendi, gha wa pire ngcamu dhokukara hana Nyambi. 13Ne mbadi ha karire hana Nyambi pamushamurukero ghokughuwiha vene. Nyambi thinda yo gha karire Wihawo.
14N̂ando dha karire munu no dha tungire pakatji ketu. Atwe twa monine ghufumu wendi, ghufumu wendi yira waMwana ghopithendi oyu gha tunda mwaWihe, gha yara n̂eke noghushemwa.
15Johannesi ghana kumunongonona Ye, no ghana kukugherera ghuninga eshi: “Yodiye yu na mu tongwerire eshi, Oyu ghana kwiya munyima dhange, gha ni pitetera me yoyishi yomutangotango, ndani me.”
16Mughuhunga wendi twa tambura kemo twahe marudhi ghon̂eke. 17Nyambi gha tapire muragho kwaMosesi, n̂eke noghushemwa yeyire mwaJesus Kristusi. 18Noyofotji temba yu gha monine Nyambi panganyi. Mwanendi ghopithendi ghoNyambi thinda oyu gha karire nendi mumwendi, yo gha mu nongonona.
Ghunongononi waJohannesi ghoMukadiyoghero
(Mat 3:1–12; Mark 1:2–8; Luk 3:15–17)
19Hajuda ha tumine hapristeri naWalevita homuJerusalema kwaJohannesi ha ka mwipure eshi: “Yowe dye?”
Aye ha kunongonona, 20mbadi gha kananine, gha kunongononine eshi: “Kadi yame Kristusi.”
21Ha Mwipura kwawo eshi: “Yowe dye ne? Yowe Eliya ndi?”
Aye gha huthire eshi: “Kadi yame”
“Ghomuporofeta ndi?”
Dyo gha huthire eshi: “Kadi kemo.”
22Munyima ha mu thundire shime eshi: “Yowe dye ne? Ghokudhira kuhutha mepwero ghetu, tu ka wa dimbwerere awa hana tu tumu. Ngepi wa kutoyanga ghothinda?”
23Ha hutha eshi:
“Ame ne nodiywi dyokukugherera mumamboreya eshi:
‘Mu ghororokithe ndhira dhaFumu,’ ”
thika di gha ningire muporofeta Jesaya.
24Mwa wa ha pwire kutuma ha karire mo naWafarasayi. 25Ko kumwipura kwawo eshi: “Nye ghuna yogheranga, ngeshi kadi yowe Kristusi ngambi Eliya ngambi muporofeta?”
26Johannesi gha wa huthire ngeno: “Ame ne kuyogha nomeyu keho, ene mukatji kenu mu nemana Ghumweya yu mwa dhira kudimuka. 27Oyu ne yo ghana kwiya munyima dhange, oyu na dhira kufumana me kushutura tukanda tomakuha ghendi.”
28Yoyiheya yi ya karire muBetaniya thambodiya dhaJordani omu gha yoghangire Johannesi.
Ndjwighana waNyambi
29Mudiyuwa dyokuranda ko, gha monine Johannesi Jesusi ghana kwiya kukwendi no gha ningire eshi: “Oya ne yoNdjwighana waNyambi ghokutumbura maharwero ghawanu. 30Oyu ne yo na tongorire eshi: ‘Munyima dhange mbo gha neya murume yu gha ni pitetera, yoyishi yomutango ndani me.’ 31Ene mbadi na mudimukire name temba eshi yidye Yu. Ame ne neyire kukuyogha nomeyu, ni mu dimukithe Ye kwawaIsragheli.”
32Johannesi gha rundururire shime manogweneno eshi: “Na monine Mupepo yira dikutji ghuna kushuruka mudiwiru, ho wa temberire papendi. 33Name mbadi na mu dimukire pakutanga eshi yidye Yu. Ene Nyambi yu gha ni tumine kukuyogha nomeyu, yo gha ni tongwerire eshi: ‘Oyu mbo ghu mona ghuna tembera Mupepo papendi, yoghokuyoghitha noMupepo ghoKupongoka.’ 34Na yi monine nothinda yo na kunongonona eshi: Aye ne Mwana Nyambi.”
Hakathishongero hokutanga waJesusi
35Eyi dya vire ko, ha yendi ko karo Johannesi nawakathishongero wendi hawadi. 36Apa gha monine Jesusi ghana kupita, ha ningi Johannesi eshi: “Oya ne yoNdjwighana waNyambi!”
37Hakathishongero hawadi ha yi yuvire oku ghana kuyighamba, no ha kuthire Jesusi. 38Pakuthetuka Jesusi no gha monine oku hana kumukutha, gha wepurire eshi: “Yinye muna kushana?”
Awo ha huthire eshi: “Rabbi,” (kuninga eshi Muhongi) “kupi ku wa tunga?”
39Ha wa tongwera eshi: “Na mu tu yende, ndani po mu ka mona.” Nawo ha yendire no ha ka monine ku gha karire. Nako dhi ne dha karire yira muviri dhodikumi pamathiku‐thiku, no ha ghondhire kukwendi diyuwa dyodiheya.
40Andreyasi ghomina Simon Petrusi, yoghopawashawadi awa ha yi yuvire kwaJohannesi no ha kuthire Jesusi. 41Ko kushana pakutanga mukurwendi Simoni no gha mu tongwerire eshi: “Tuna mu wana twe Mesiya” — eshi Kristusi. 42Ha mu twara kwendi kwaJesusi.
Ngenyu gha mu demine Jesusi gha mu kenge, ha ningi kwendi eshi: “Yowe Simoni ghomwana Johannesi. Mbana kutoyo eshi Kefasi.” (Kefasi kuninga eshi, Petrusi dimuwe.)
HaFilipusi naNatanagheli
43Mudiyuwa dyokuranda ko, gha rongerire Jesusi ruyendo rokuGalileya. Ha wana kwendi Filipusi no gha mu ningire eshi: “Ni kuthe!” 44Filipusi muBetsayida gha tungire, mudighumbo dyofotji naAndreyasi naPetrusi.
45Munyima Filipusi gha ka wanine Natanagheli no ghu mu tongwerire eshi: “Atwe tuna mu wana oyu gha tjangire Mosesi mumuragho, noyoyu ha tjangire karo haporofeta. YoJesusi ghomukaNasareti mwana, Josefu.”
46Ene Natanagheli gha mwipurire eshi: “MuNasareti ne kukona kutunda mo yinu yoyiwa ndi?”
Filipusi gha mu huthire eshi: “Wiye no mone!”
47Apa gha monine Jesusi Natanagheli ghana kwiya kukwendi, ha ningi eshi: “Oyu ne Muisraghelite shemwa, murume ghokupira difurumeko.”
48Natanagheli ghepurire Jesusi eshi: “Kupi ku wa ni dimukera?”
Jesusi gha mu dimbururire eshi: “Kughutho ghokukwitha Filipusi apa ghuna kara mwimi dhoghukuyu, ame ku na kumono kare.”
49Ha kugherera Natanagheli eshi: “Muhongi, Yowe Mwana Nyambi, no Yowe Fumu waIsragheli!”
50Jesusi gha mu tongwerire eshi: “Eyi ghuna kutawera ne yoyi na kutongwera eshi na kumono mwimi dhoghukuyu ndi? Mbo ghuna mono shime yinu yoyikuru kupiterera yino.” 51Jesusi ha mu tongwera shime eshi: “Ghushemwa na kumutongwera, mbo muna mono diwiru dina yandhuruka, nawaengeli waNyambi oku hana kuninga, ha dhina ha shurukera Mwanamunu.”
Currently Selected:
Johannesi 1: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
