Johannesi 3
3
Jesusi naNikodemusi
1Pa karire murume ghodina dyoNikodemusi pakatji kaWafarasayi. Aye thimbi nomuhati ghomuragho waWajuda. 2Mughuthiku ghumweya, gheyire kwaJesusi no gha mu tongwerire eshi: “Muhongi, twa dimuka eshi owe ne ghomuhongi yu gha tunda mwaNyambi. Yoyishi noyofotji temba ghokukona kutenda yitetukitho yi ghuna kutenda we, ngeshi mbadi gha kara naNyambi.”
3Jesusi gha mu huthire eshi: “Shemwa na kukutongwera, ngeshi munu mbadi sho gha pwe kushamuruka karo paruwadi, mbadi gha kona kughumona ghufumu waNyambi.”
4Nikodemusi gha mwipurire eshi: “Ngepi di ghokukona kumushamuruka munu karo ngeshi gha kurupara? Mbadi gha kona kwingena mudira dyanyina paruwadi ho gha pwe kushamuruka?”
5Jesusi gha huthire eshi: “Shemwa na kukutongwera, ngeshi mbadi sho gha pwe kushamuruka munu mumeyu nomwaMupepo, mbadi gha kona kwingena mughufumu waNyambi. 6Oyu ghokupwa kushamuruka mwamunu ne, munu; noyu ghokupwa kushamuruka mwaMupepo ne, mupepo. 7Wa yi yovora yi na kutongwera eshi, mu pwe kushamurukurura karo. 8Mupepo ghuna kupungera oku ghuna himi. Owe ghuna kuyuva mun̂upe wagho, ene mbadi ghuna kudimuka eshi kupi ghuna kutunda no kupi ghuna kuyenda. Kemo dyo ya kara kwayomuhe, ghokupwa kushamuruka mwaMupepo.”
9Ha mwipura Nikodemusi eshi: “Ngepi di ghokukona kuhokoka yinu yokenge yo?”
10Ko kumuhutha Jesusi eshi: “Owe ne ghomudimuki ghomuhongi waIsragheli, ene kadi yakutjwathana yi? 11Ghushemwa na kukutongwera: Twa ghambanga eyi twa dimuka, no twa nongonona eyi twa mona, ene mbadi muna kutawa kuyinongonona yetu. 12Ngeshi ha ni mu thimwetwedhera me yinu yopamuve, kadi ya kutawa mwe. Ho mbo mu tawe ngepi, ngeshi ha ni mu thimwetwedhera yodiwiru? 13Noyofotji temba ghopamuve yu gha karire mudiwiru, shimengwa yu gha tundire mudiwiru, eshi Mwanamunu. 14No thika di gha kurekire Mosesi thiyoka mumamboreya, kemo sha kone kukureka naye karo Mwanamunu, 15eshi yomuhe ghokutawa mumwendi, gha wane moyo ghororuheya kukwendi.
16“Yoyishi Nyambi, gha hakire thikuma kaye pakutapa Mwanendi ghopithendi. No kehe yu ghokutawa mumwendi, mbadi mbo gha yongara, ene mbo gha wane moyo ghororuheya. 17Nyambi mbadi gha tumine Mwanendi kukupangura kaye, ene kaye ka wane maghamweno mumwendi. 18Oyu ghokutawa mumwendi, mbadi mba mu tetera ndhango; ngeshi ghokudhira kutawa, kare gha pwa kutetera ndhango, yoyi mbadi gha tawa mwaMwana Nyambi ghopithendi. 19Eyi ya reta ndhango neyino: Thishe theyire pakaye, hanu ne ha hakire thikuma makokore kupiterera thishe, yoyi yitenda yawo ya karire yimango. 20Noyomuhe ghokutenda ghuyi, gha dhimba thishe no mbadi ghana kwiya kuthishe eshi, maghana sho yi hokoke yitenda yendi. 21Ene yu ghana kurughana mughushemwa, ghana kwiya kuthishe eshi yitenda yendi yi hokoke thiwana, no gha yi rughanena mughutumanethi ghokwaNyambi.”
Johannesi ghoMukadiyoghero ghana kunongonona yaJesusi
22Munyima dhokenge yo, ko kuyenda Jesusi nawakathishongero wendi mumukunda waJudeya. Ha ka karire ko kamanana no ha ka yoghire hanu. 23Johannesi naye gha karire mukuyogha muEnoni pepi naSalimu, yoyi ko gha karire meyu ghomengi. Hanu heyire kukwendi no ha pwire kuyogha. 24Oku Johannesi shime mbadi hana mwingeneka mudorongo.
25Kutunda popo, ko kwiman̂anya n̂anani hakathishongero waJohannesi noMujuda ghumweya, yokughukushuki. 26Heyire kwaJohannesi no ha mu tongwerire eshi: “Muhongi, oyu wa tjinaghanine nendi thambodiya dhaJordani, noyu wa nongononine, ghuna yi dimuka eshi ngepi, kuyogha ghana kuyogha naye. No wahe kuyenda hana kuyenda kukwendi.”
27Johannesi gha wa huthire eshi: “Munu ne kadi wa kukutungumena thinu, oku mbadi hana thi mupa mudiwiru. 28Namwe yamwe mwathinda mwatunonga twange, apa na ningire eshi: ‘Kadi yame Kristusi. Ame ne nomukamushongwe wendi vene.’ 29Mwandekeri ne, wambandeke dhendi; ene mushera mwandekeri, oyu ghana kwimana gha mu tegherere eshi, ngwa kwiya ghana kwiya no ghana kushamberera thikuma, pakuyuva diywi dyamwandekeri. Name pano ni di na yara noyishamberera yoyikuru. 30Aye ne yo sho gha piterere ko, ame ne ni mbirupe.
31“Oyu gha tunda kuwiru, gha piterera yoyiheya; oyu mukapamuve, mukapamuve vene no ghana kughamba ndimi dhopamuve. Oyu gha tunda mudiwiru, gha piterera yoyiheya. 32Eyi gha mona no yi gha yuva, yo gha nongononitha, ene mbadiko yu ghana kutawa ghushupi wendi. 33Oyu ghokutawa ghushupi wendi, ghana kutanaritha eshi matawero ghokwaNyambi ne ghaghushemwa. 34Nyambi gha mu tuma no ghana kughamba man̂ando ghaNyambi. Yoyishi Nyambi ghana kumupererera Mupepo wendi. 35Wihe gha haka Mwana, no gha tapa yoyihe munyara dhendi. 36Oyu ghana kutawa mwaMwana ghana kuwana moyo ghororuheya; ene yu ghokudhira kuyuva Mwana, mbadi mbo gha wana moyo, oyu ne mbo ghana mu tetera ndhango Nyambi.”
Currently Selected:
Johannesi 3: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
