Lukasi 14
14
Jesusi ghana kwirukitha mukayishongo
1Mudiyuwa dimweya dyoSabata, apa gheyire Jesusi mundhugho dhanduna waWafarasayi na gha dye, ha mu konekire hanu thiwana. 2Kughutho wendi gha karire murume ghokukorwa yishongo. 3Jesusi gha ghambire nawakamuragho naWafarasayi no kuwepura eshi: “Ya pwa kufundhwera eshi kwirukitha munu muSabata ndi?” 4Awo ne pore vene. Ko kwitha Jesusi mukatjitju popepi gha mwirukithe no kumuthigha gha ka yende. 5Munyima gha wa tongwerire eshi: “Mu ninge vene eshi, ngeshi mungaghu ngambi ngombe wa wenu ghopapenu ghana wera mudikwina, kadi wa kumushwaghitha mo wangu, ngambi mudiyuwa dyoSabata ndi?” 6Awo ne ha pirire nomahuthero kumepwero gha.
Maghanekero gha wa hana pu kuragha nawakakukununeka
7Apa gha monine Jesusi edi hana kukutorwera mango ghokughutho kuthidyero, ko kughanekera kwendi maghanekero ghamweya kwa wa ha pwire kuragha eshi: 8“Ngeshi ha kuragha ghumweya kumukandi, wa kuyenditha eshi ghu ka hungumane mudyango dyokughutho. Yoyishi, oyu mukakuyarera hagenda, ngwa ghana kwitha mukakupiterera we. 9Noyu ghana mu ragha, ghana kwiya kukoye no kukutongwera eshi: ‘Tape dyango kwamurume yu,’ edhi ne honyi dhoye ngambi ho ka hungumana mudyango dyomunyima. 10Ene ngeshi ghuna pu kuragha, yende no ghu tumbure dyango dyomunyima. Pakwiya keho mukakuyarera hagenda po sho gha kutongwere eshi: ‘Mundenge, wiye no hungumane kuno kughutho.’ Munyima ghuna kuwana fuma kwawaheya awa ghu di nawo. 11Yoyishi kehe yu ghokukukutekera thinda, mbo ghana shwahuka, noyu ghokukushwahura thinda mbo ghana pu kukutekera.”
12Ko kuninga kwendi koyu gha mu raghire eshi: “Ngeshi ho yareka mughondhera ngambi murarero, wetha ko hashere ghoye ngambi haminoye ngambi hoye ngambi hatungi homaparaghumbo noye eshi, mbo ha kwithe nawo no kuyikuhuthera thika di ghuna tendi. 13Kadi kemo, ngeshi mukandi ghuna tendi, raghe hahepwe, nawakakuteghena, nawayihwere, nawakunga. 14Ghuna kuvighara, yoyishi awo ne mbadiko thokukuruwera. Nyambi thinda yo mbo gha kuruwera pamuvumbukero wawahunga.”
Maghanekero ghodiyumbu dyodikuru
(Mat 22:1–10)
15Eyi gha yi yuvire ghumweya yu gha karire pofotji nendi kuthidyero, ko kuninga kwendi kwaJesusi eshi: “Mukaruvigha mukakuyerana kudiyumbu dyoghutungi waNyambi.” 16Ha ningi Jesusi kukwendi eshi: “Pa karire murume ghumweya oyu gha tendire diyumbu dishokuru no gha raghire hanu hohengi. 17Apa dya tangire diyumbu, ko kutuma kwendi mupikendi gha kethe awa hana pu kuragha no kuwatongwera eshi: ‘Mwiye, yina rogho yoyiheya.’ 18Ene waheya ha tangire kukutjakumuna yofotji kwayofotji. Mukakutanga gha ningire eshi: ‘Nga ni ghuru thiko, na himi shemwa eshi ni yende ni ka thi mone. Na kanderera ghu ni thigherere.’ 19Ghumweya naye eshi: ‘Ame ne nga ni ghuru mapuru ghoyipani kwoko, kuyenda na kuyenda ni ka gha yereke. Na kanderera ghu ni thigherere.’ 20Ghumweya naye karo eshi: ‘Ame ne muwenga ni di, mbadi na kona kwiya.’
21“Mupika yu ne ko ka huka na gha tongore yoyiheya kwahekudyendi. Hekudyendi gha patire no gha ningire kwamupikendi eshi: ‘Tambuke wangu mumikara nomumambirikatji ghombara, kethe kuno hahepwe nawakakuteghena nawakunga nawayinhwere.’ 22Munyima gha keyire mupika no gha ningire eshi: ‘Hekudyange, eyi ghuna raghura ne yina pu kutenda, ene shime dya karera ko dyango.’ 23Munyima gha ningire hekudyamupika eshi: ‘Shwaghe ghu yende mumayira nomumahangayira, ghu ka wa thineneke kate na dhi yare ndhugho dhange. 24Ene na kumutongwera shemwa eshi, noyofotji temba ghopawa na ragha pakutanga oyu sho gha yereke diyumbo dino.’ ”
Yiragha yoghukathishongero
(Mat 10:37–38; Mark 10:29–30)
25Mbunga dhodhikuru dha yendire pofotji naJesusi. Aye gha pirukire no gha wa tongwerire eshi: 26“Ngeshi gheye ghumweya kukwange, oku mbadi ghana dhimbi wihe nanyina namukamadi wendi nohanendi nawaminendi nawan̂amba dhendi ngambi moyo wendi thinda, mbadi gha kona kukara mukathishongero wange. 27Noyu ghokudhira kushimba thikurushe thendi gha ni kuthe, mbadi gha kona kukara mukathishongero wange.
28“Yoyishi, yidye ghopapenu ghokuhima thishokeka, oyu ghokudhira tango kuyenda gha ka hungumane gha ka rikanyithe tango eyi mbo yi pita po, no kumona eshi manyinga ne gha rikanya mukuyaritha yirughana? 29Ene ngeshi mbadi ghana rikanyitha yoyiheya pakutanga vene kutateka kashemandhugho, yina kumufupipera yoyihe, nowaheya wa mbo ha yi mona, mbana tanga kumusherera. 30Awo mbana ningi eshi: ‘Murume yu, gha tangire kushokeka, ene kadi wa kukona kumanitha.’
31“Endi fumu munye ghokushana yita namuyendheni, oyu ghokudhira kuhungumana gha kwipudhure eshi, dha rikanya ngcamu dhawarume wendi mayovi dikumi, kukurwa nawapika muyendhendi homayovi makumi mawadi ndi? 32Ene negshi ha yi mono eshi ngepi, pamweya ghana kutuma mukamiti, oku muyendhendi shime gha karera kayenda gha ka kumbere thiraro. 33Kemo mbadi gha kona ghumweya ghopapenu, oyu ghokudhira kuthigha ghutungi wendi eshi gha kare mukathishongero wange.
Mungwa ghokututukwa
(Mat 5:13; Mark 9:50)
34“Mungwa ne ghuwa. Ene ngeshi ghuna tutukwa mungwa ne no nye sha ghu tovithe karo eshi ghu kare mungwa mwene. 35Mbadi hana kughunyanda shime kudipya ngambi kudirambo dyorutoko. Ene hana kughumwaghera panunda. Oyu gha kara nomatwi no kukona kuyuva, gha tegherere.”
Currently Selected:
Lukasi 14: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
