Lukasi 17
17
Yighamba yaJesusi
(Mat 18:6–7, 21–22; Mark 9:42)
1Ko kutongwera Jesusi hakathishongero wendi eshi: “Kadi wa kuwana mashingero ghoyinu yokuwithera munu mumaharwero. Ene mawe kwawanu wa hana kureta yi. 2Ghuhunga munu ghokenge yo ne kumughanga dimuwe pathingo dhendi, no kumuvukumena mudikuruviya, ngeshi ha yongaritha yofotji ghopawanuke wa. 3Yodigho mu kukoneke mwathinda. Ngeshi ha tendi ghuyi muyendhoye kukoye, yi mu shwenene, ene ngeshi ghana kwera, mu thigherere. 4Karo ngeshi ghana harura kukoye parukwoko noruwadi mudiyuwa, ho gheye kukoye parukwoko noruwadi mudiyuwa gha ninge eshi: ‘Na humbu,’ wa kona kumupa mathigherero.”
5Hapostoli ko kwipura kwaFumu eshi: “Tu wedherere ko matawero ghetu!”
6Fumu gha wa huthire eshi: “Ngeshi ngo mwa kara nomatawero ghokukara yira dinona dyoghutata, ngo kukona kuninga kuthitondo thoghutunda eshi: ‘Dhuruke po pano nomidhi dhoye dhodhiheya, ghu ka kutapeke mudikuruviya. Natho ngo tha mu yuva.’
7“Yidye ghopapenu oyu gha kara nomupika, oyu ghana ka tunda kukudima ngambi kukuditha ngombe no kumutongwera popo pakukuma eshi: ‘Tambuke kuno kuthidyero no dye’? 8No kamanana temba, ene ghana kumutongwera eshi: ‘Ni roghithere tango murarero wange. No ghu tende yoyiheya thiwana-thiwana, kate ni mane kudya no kunwa me, ndani po sho ghu dye nowe.’ 9Mupika yu ne ghana kutumera eshi yoyi ghana rughana eyi hana mu rawera ndi? Ava we, kadi yodigho. 10Kemo ya kara kukwenu namwe, ngeshi muna mana kurughana yoyiheya yi hana mu rawera, muna kuninga eshi: ‘Twayipika vene ho kupira ndjambi. Tuna tendi vene eyi ha tu himena eshi tu yi tende!’ ”
Jesusi ghana kwirukitha hakayin̂ondwe
11Muruyendo rwendi rokuJerusalema, gha tjinaghanine Jesusi pepi nomuyindha ghoditunga dyaSamaria naGalileya. 12Apa gha kumine pepi nodighumbo dimweya, ko kumutjingawera hakayin̂ondwe dikumi. Awo hemanine kokayenda, 13no ha kughererire eshi: “Jesusi, Muruti, ghu tu fere n̂eke!”
14Apa gha wa monine, gha ningire eshi: “Mu yende mu ka kuneghe kwawapristeri.” Pakuthighuka ha tambe oku gha wa tongwerire, ko kwiruka kwawo. 15Yofotji ghopapawo apa gha monine eshi, gha neruka, gha ka hukire ghukugha Nyambi thikuma. 16Ko kukuvama kwendi kumapadhi ghaJesusi gha mu tumere. Murume yu ne Musamaritana. 17Jesusi gha ningire eshi: “Mbadi ha neruka dikumi ndi? Kupi hashakwoko nohane? 18Mbadiko yu gho ka thighuka eshi na gha fumaneke Nyambi, shimengwa yoyu munumaghana keho?” 19Kukwendi gha ningire eshi: “Wimane ghu huke kukwenu. Matawero ghoye ne ghana kughamwena.”
Mwiyero ghoghutungi waNyambi
(Mat 24:23–28, 37–41)
20Apa ha mwipurire Hafarasayi Jesusi eshi, diyuwa munye mbo wiya ghutungi waNyambi, gha wa huthire eshi: “Ghutungi waNyambi, mbadi mbo wiya nothidimukitho thokukonekera. 21Awo mbadi mba kona kuninga eshi: ‘Mu mone, oghu no!’ Ngambi eshi: ‘Oghu ya paya.’ Yoyishi ghutungi waNyambi ne mumwenu ghu di.”
22Munyima gha tongwerire hakathishongero eshi: “Mbo gha neya mayuwa agha mbo mu rura eshi mudiyuwa munye mbo mu mona Mwanamunu, ene mbadi mbo mu yi mona. 23Awo mbo hana mu tongwera eshi: ‘Mu mone ono kuno,’ ngambi: ‘Mu kenge kuya!’ Mwa mba yenda ko, no mwa mba wa kutha munyima dhawo. 24Yoyishi thika mushoro ghokwethera mutara ghumweya oku dya ka shisha diwiru, no kusheghenyena kumutara ghumweya, kemo dyo mbo gheya Mwanamunu, apa mbo diya diyuwa dyendi. 25Ene pakutanga mbo ghana nyanda thikuma no mbo ghana pu kumwagha kwawanu homumayuwa ghano. 26Thika di ya karire mumayuwa ghaNoghe, kemo dyo mbo yi kara mumayuwa ghaMwanamunu. 27Awa ha dyangire no ha nwangire ha yekangire thika roruheya, kate mudiyuwa edi ghengenine Noghe muwato ghushokuru. Ko kwiya divavure no dya wa dhongononine waheya. 28Karo thika kenge di ya karire mumayuwa ghaLoti, ha dyangire, ha nwangire, ha ghurire, no ha ghurithire, ha tapekire no ha shokekire thika roruheya. 29Ene mudiyuwa di gha shwaghire Loti muSodoma, wa rokwire mudiro mudiwiru yira marothi no wa myarurire yoyiheya. 30Kemo dyo mbo yi kara karo mudiyuwa dyomuhokokero waMwanamunu.
31“Mudiyuwa dyo, gha mba shuruka oyu mbo gha kara pamutuya ghondhugho dhendi eshi, gha ka shimbe ghugavo ghomundhugho dhendi. Kwamukakukara mumapya naye kemo, gha mba ka thighuka eshi gha huke kudighumbo. 32Mu vuruke muna Loti! 33Kehe yu mbo gha yereka kukunga moyo wendi, mbo ghuna mu yongara, oyu mbo gha ghu yongaritha, mbo ghuna mu karera. 34Kutongwera na kumutongwera eshi: Mughuthiku ghu, mbana rara hawadi mughudidi ghofotji. Yofotji mbana mu shimbi, ghumweya ne mbana mu thighi mo. 35Hakamadi hawadi mbana tu mahungu pofotji, 36yofotji mbana mu shimbi, ghumweya ne mbana mu thighi.”
37Ko kumwipura kwawo eshi: “Kupi ne Fumu?” Aye gha wa huthire eshi: “Oku gha di nyama ne, ko gha konganena makwi.”
Currently Selected:
Lukasi 17: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
