Mateghusi 19
19
Yikuyonga yokutjora ghurugho
(Mark 10:1–12)
1Apa gha manine kughamba Jesusi, gha tundire muGalileya no gha yendire muthiko thaJudeya, thambodiya dhaJordani. 2Mbunga dhodhingi dha mu kuthire no gha werukithire.
3Pa karire Hafarasayi awa ha shanine kumuyereka, nawo heyire kukwendi no mepwero eshi: “Ku kona kuyakunuka murume kwamukamadi wendi pa kehe thinu ndi?”
4Aye gha wa huthire eshi: “Mbadi mwa toya eshi Muvareki ne kutunda pakutanga gha tendire murume namukamadi ndi? 5No gha ningire karo eshi, murume gha thighe hawihe nanyina no gha ka pare namukamadi wendi ndi? No mughuwadi wawo hana kukara yofotji. 6Yodigho kadi shime hawadi ene yofotji. Ethi gha nunga Nyambi, mbadi gha kona kuthishutura munu.”
7Awo ha mwipura eshi: “Nye gha yi rikanyitherire keho Mosesi eshi munu gha tape mbapira dhokutjora mayekero no kuthigha mukamadi?”
8Aye ha wa hutha eshi: “Pamurandu ghoghukukutu ghomitjima dhenu, po gha mu thighererire Mosesi eshi mu kuyakunuke nawakamadi wenu. Ene mbadi ya karire kemo pamatangero. 9Ame na kumutongwera eshi: Kehe yu ghokumwagha mukamadi wendi shimengwa parungu no ka yeka wayenaye, ghana tjoro mayekero.”
10Hakathishongero wendi ha mu tongwerire eshi: “Ngeshi ngo dyo ya kara yinu yomayekero, ghuhunga ne kadi wa kuyeka ndani.”
11Ene ye ha wa tongwera eshi: “Eyi muna kughamba mwe n̂anyi‐n̂anyi, mbadi ya redhupa kwawahe, shimengwa wa ha yi pa. 12Yoyishi padi hanu ho kudhira kukona kuyeka, yoyi wo kutunda kumushamurukero kemo dyo ha kara. Hamweya ne hanu ha yi wa tenda, no hamweya hathinda ha yi kutorwera pamurandu ghoghufumu ghodiwiru.
“Oyu ghana haka kuyitenda, gha yi tende ngenyu.”
Jesusi ghana kukandadheka hanuke
(Mark 10:13–16; Luk 18:15–17)
13Hanu ha mu reterire hanuke eshi gha wa kambeke nyara, no gha wa raperere. Hakathishongero wendi ha patire nawo. 14Jesusi ne gha ningire eshi: “Mu thighe hanuke no mwa wa shinga eshi heya kukwange, yoyishi ghufumu ghodiwiru wa hungamena kwawanu yira wo.”
15Apa gha manine kuwakambeka nyara, ko kutunda po gha ka yende.
Mungaghu ghomutungi
(Mark 10:17–31; Luk 18:18–30)
16Munyima gheyire munu kukwendi gha mwipure eshi: “Muhongi, thitenda munye thothiwa ethi sho ni tende kukuwana moyo ghororuheya?”
17Aye gha mu tongwerire eshi: “Nye ghuna kunipwera kuyinu yoyihunga? Yofotji keho ghomuhunga. Ene ngeshi ghuna haka kwingena mumoyo ghororuheya, kwate miragho.”
18Munu yu ha mwipura eshi: “Miragho munye ghuna kuninga We?”
Jesusi gha ningire eshi: “Edhi, wa pagha, wa tjora mayekero, wedha, wa ghamba mbango. 19Fumaneke hawiho nanyoko no ghu hake muyendhoye kenge di wa kuhaka ghothinda.”
20“Yoyiheya yi ne na yi tenda,” dyo gha huthire mungaghu. “Yinye karo yi ya ni pupera po?”
21Jesusi gha mu huthire eshi: “Ngeshi ghuna himi kukara munu ghokuyara, yende ghu ka ghurithe yinu yoye yoyiheya no ka tapere manyinga hahepwe no mbo ghuna ka wana ghushwi mudiwiru. Ho ka huke no ni kuthe.”
22Apa gha yi yuvire mungaghu, gha yendire noghutokota, yoyishi gha karire noghugavo ghowingi.
23Munyima gha ningire Jesusi kwawakathishongero wendi eshi: “Shemwa na kumutongwera, munu ghomutungi ne ghukukutu kukwingena mughufumu ghodiwiru. 24Shime ha ni dhi tanaritha eshi: Kwangameno ne ghuredhu kwingena mudiho dyothonga, kadi yira mutungi kukwingena mughufumu waNyambi.”
25Pakuyiyuva hakathishongero wendi, ha tutukwa kwawo thikuma ghuninga eshi: “Yidye ghokukona kughamwena ne?”
26Ko kuwanungurukera Jesusi ghuninga eshi: “Kwawanu ne ghukukutu yi, kwaNyambi ne yiredhu.”
27Ha ningi Petrusi kukwendi eshi: “Ngo mone, atwe ne twa thigha yoyihe, ho tuna kukukutha. Nye yi mbo tu wana po?”
28Ko kuwahutha Jesusi eshi: “Shemwa na kumutongwera: Apa mbo yipwa kutenda yoyiheya ghupya, ngeshi mbo gha hungumane Mwanamunu pdipuna dyendi dyoghufumu, namwe muna kunikutha, mbo muna hungumana pamapuna dikumi nomawadi, no mbo muna pangura mako dikumi nomawadi ghaIsragheli. 29No kehe yu mbo gha thigha muDina dyange ndhugho, ngambi haminendi, ngambi han̂amba dhendi, ngambi wihe, ngambi nyina, ngambi hana, ngambi dipya, mbo ghana ka tambwera po yoyingi, yokurikanya kudithere no ka yora moyo ghororuheya.
30“Ene hengi hakakutanga, wa mba kara hakanyima, no hakanyima wo mbo ha kara hakakutanga.
Currently Selected:
Mateghusi 19: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
