Mateghusi 22
22
Maghanekero ghowenga
(Luk 14:15–24)
1Jesusi gha ghambire karo nawanu mumaghanekero.
2Gha ningire eshi: “Ghufumu ghodiwiru, wa pitura yira fumu yu gha roghitherire mwanendi mukandi. 3Gha tumine hapikendi, ha kethe wa ha pwire kuragha kumukandi. Ene ha shwenine kwiya ko. 4Munyima kokutuma karo hapika hamweya nomarawero eshi: ‘Mu ka wa tongwere wa hana pu kuragha: Diyumbu ne dina rogho, mapuru ghange noditimbe, yina pu kupagha no yoyiheya yina kumenena mo. Mwiye kumukandi.’
5“Ene wa ha pwire kuragha mbadi ha yi thoterire. Ghumweya gha yendire kuthirwa thendi, no ghumweya kuyirughana yendi. 6Hamweya ha purundundire hapikendi no kuwashinya no kuwapagha. 7Fumu gha patire no gha tumine hamashurundate wendi, ha ka paghe wa hapaghi no ha ka tumekere mbara dhawo.
8“Ha ningi kwawapikendi eshi: ‘Yoyiheya yina pu kurongathana kumukandi. Ene wa hana pu kuragha, mbadi yina wa roghera. 9Mu yende keho mumahangayira, ho mu kethe hanu wahe wa sho mu ka hangane, kumukandi.’ 10Hapika nawo ha yendire mumakuhangano ha kokwedhire hanu wahe wa ha wanine, hamango nawahunga. Ko kuyara ditara‐tara dyomukandi kwawagenda.
11“Apa ghengenine fumu, ha mono kwendi murume yu gha dhirire kushupata yivata yomukandi, 12no gha ningire kukwendi eshi: ‘Mundenge, ngepi di ghunengena muno yokupira yivata yomukandi?’ Murume yu, mbadi wa kukona kuhutha. 13Ko kuninga fuma kwawakareri wendi eshi: ‘Mu mu ghange kumoko ghendi no kumapadhi, ho mu mu vukumene panunda mudikokore. Ko sho ha ka direre nomahumangayegho.’
14“Yoyishi, hengi hapwa kwitha, ene hapu hapwa kutorora.”
Mepwero ghokuketa diketo
(Mark 12:13–17; Luk 20:20–26)
15Ko kukunungathana Hafarasayi eshi, ha mu yereke Jesusi nodipwero. 16Ha tumu kwawo hayihongwana yawo naWaherodiyane hamweya, ha ka mu tongwere eshi: “Muhongi, twa dimuka eshi, owe ne ghomukaghushemwa. Wa tjimapa mughushemwa no wa neghedha hanu ndhira dhaNyambi, no mbadi ghuna kuthotera yawanu, yoyishi mbadi wa tokomena kughunu wamuguva. 17Tu tongwere di ghuna kughayara we: Ghuhunga kuketa diketo kwafumu shokuru ndi, endi kadi kemo?”
18Ene Jesusi gha monine ghumbango wawo no gha wa tongwerire eshi: “Mwakadifurumeko! Yinye muna kuniteghera dikon̂oto? 19Mu ni neghedhe dinyinga di hana ketithanga diketo.”
Ko kumuretera kwawo dinyinga, 20ha wepura kwendi eshi: “Wadye ghu mutwi nodina yi yidi po?”
21Awo ha mu huthire eshi: “Yafumu shokuru.”
Jesusi ha wa tongwera eshi: “Mu tape ne heho kwafumu yi ya kara yafumu, no kwaNyambi, eyi ya kara yaNyambi.”
22Apa ha yi yuvire, ko kutetuka kwawo no ha mu thighire thiwana ha huke.
Mepwero ghokumuvumbukero ghomwawafu
(Mark 12:18–27; Luk 20:27–40)
23Mudiyuwa dyodyo, ko kwiya Hasadusayi kwaJesusi. Awo ne wo ha kananine eshi, mbadiko muvumbukero. Ko kumwipura kwawo eshi: 24“Muhongi, Mosesi ghaningire eshi: ‘Ngeshi kufa munu kupira nohana, minendi ghana kukuyeka namudidhi yu no kumuretera po hanahoka.’ 25Ene papetu pa karire kwoko nohawadi hakadira dyofotji. Mbedi gha yekire ho gha fire. Yoyi pa pirire hana, thirandambedi gha kuyekire namudidhi. 26Kemo ya karire kwathirandambedi no kwamitakatji, kate kwawahe kwoko nohawadi. 27Paghuhura ne ko kufa naye mukamadi. 28Munyima pamuvumbukero ne muna dye mbo gha kara? Wahe kwoko nohawadi ne ha mu yekire.”
29Ene Jesusi gha wa huthire eshi: “Mwa yongara, yoyishi mbadi mwa dimuka Yitjanga nongcamu dhaNyambi temba. 30Yoyishi pamuvumbukero, kadi wa kuyeka karo hanu, awo ne yira haengeli homudiwiru. 31No yi yomuvumbukero, mbadi mwa toya di gha ningire Nyambi eshi: 32‘Yame Nyambi waAbrahamu noNyambi waIsaka noNyambi waJakopu’? Aye ne kadi Nyambi wawafu, ne wawayumi.”
33Apa dha yi yuvire mbunga, dha tutukwire kuyihonga yendi.
Mepwero ghokumuragho ghoghukuru
(Mark 12:28–34; Luk 10:25–28)
34Apa ha yuvire Hafarasayi eshi, Jesusi ne ghana yandhera Hasadusayi, ko kukukongwedha kwawo pofotji. 35Yofotji ghopapawo ghomukamuragho, gha mu yerekire mumashendende nomepwero eshi:
36“Muhongi, muragho munye ghokupiterera mumiragho?”
37Ha mu hutha Jesusi eshi: “Hake Fumu Nyambi ghoye nomutjima ghoye ghoghuhe nomudhimu ghoye ghoghuhe nomaghano ghoye ghomahe. 38Oghu ne gho ghokupiterera no‐ghoghokutanga. 39No ghoghuwadi ghokupitura ghu ne ghuno: Hake muyendhoye thikakenge di wa kuhaka ghothinda. 40Mumiragho dhiwadi dhino, mo wa kara muragho ghoghuhe wa Mosesi noyihonga yawaporofeta.”
Mepwero ghokwaMwana Davita
(Mark 12:35–37; Luk 20:41–44)
41Pa kukukongwedha Hafarasayi pofotji, ha wepura Jesusi eshi: 42“Nye muna kughayara mwe yaKristusi? Mwana dye?”
Awo ha mu huthire eshi: “Mwana Davita.”
43Aye ha wa tongwera eshi: “Nye gha toyerire heko Davita payihokora yaMupepo ghoKupongoka eshi Fumu? Munyima ha ningi karo eshi:
44‘Fumu gha ningire kwaHekudyange eshi:
Hungumane kurudyo rwange kate mbo ni withe han̂ore dhoye.’
45Ngeshi Davita thinda ghana kumutoya eshi Fumu, ngepi keho di sho gha kone kukara Mwana Davita.”
46Noyofotji temba gha konine kumukumburura po thinu. Kutunda mudiyuwa di, mbadiko yu gha yedhekerire shime kumwipura thinu.
Currently Selected:
Mateghusi 22: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
