Mateghusi 24
24
Yipumba nomaharan̂anyeno ghotembeli
(Mark 13:1–2; Luk 21:5–6)
1Apa gha shwaghire Jesusi mutembeli gha ka yende, ko kumuhenyena hakathishongero wendi no ha mu neghedhire edi ha dhi tanaritha tembeli. 2Ene ye gha wa huthire eshi: “Muna yi mono yoyiheya yi ndi? Shemwa na kumutongwera: Mbadiko diwe di mbo di thighara pamuyendhadyo, ghomahe mbo ghana pu kupayaghura.”
Yinu yoyipumba nodihudhi nomakuthakuthero
(Mark 13:3–13; Luk 21:7–19)
3Munyima dhokuhungumana Jesusi padirundu dyondhwe, ha mwiyera hakathishongero wendi pithawo, ha mwipure eshi: “Tu tongwere eshi, thivaka munye mbo yi hokoka yinu yi, nothidimukitho munye mbo thi kara thomwiyere ghoye noghoghuhura ghokaye?”
4Jesusi ha wa hutha eshi: “Mu koneke eshi gha mu pemukitha ghumeya. 5Yoyishi hengi mbeya muDina dyange ghuninga eshi: ‘Yame Kristusi,’ no mbo hana pemukitha hanu hohengi. 6Amwe mbo muna yuvu nguyungani dhoyita nomukukumo wayo. Mu koneke mwa mba tutukwa. Yi kone kwiya ene kadi ghoghuhura. 7Yoyishi, diko dimwe mbo di neman̂anyena diyendhadyo, noghufumu ghumwe kughufumu ghuyendhagho. No mbo ghana kara mayerenge mumango ghomengi nomakin̂eno ghomuve. 8Ene yoyiheya yi ne matangero ghoyinyanda yoghuye ghoghupya.
9“Munyima mbo hana mu tapa hanu eshi, ha mu shinye no mbo hana mu pagha. Mbo ghana mu nyatha mako ghomahe pamuranda ghokunongonona Dina dyange mwe. 10Munako dhi hengi hakamatawero mba wa, no mbana kuheta‐heta no kukudhimba.
11“Mbo ha neya haporofeta hohengi hombango no mbo hana pemukitha hanu hohengi. 12Yoyishi manyathero ghoveta, gho mbo gha kara matendereritho ghoruhakitho rwawendi. 13Ene yu mbo gha dhidhimeka kate paghuhura, mbo ghana pu kughamwena. 14No mbudhi dhino, mbo dhina pu kuyuvitha mukaye kokahe, eshi marudhi ghomahe mbo gha yuve ghunongononi wadho. Ndani po mbo wiya ghuhura.
Yinu yoyipumba nomanyandero ghomakuru
(Mark 13:14–23; Luk 21:20–24)
15“Apa mbo mu kuyuvathana yoman̂ando ghamuporofeta Daniyeli, ghokuyinu yoyiyi eyi yina kureta maharan̂anyeno, agha gha di mudyango dyokupongoka” — kehe yu ghana kuyitoya gha yitjwathane thiwana — 16“ndani awa ha di Mujudeya ha tjirerere mumarundu. 17Oyu mbo gha hungumana mughutara, mbadi gha kona kwingena mundhugho eshi, gha ka koke mo yinu yendi. 18No yu gha ka di kudipya, gha ka thighuka eshi gha ka shimbe yitere yendi.
19“Mbo yina kara ghukukutu thikuma, kwawakamadi hoharemu nokwawakatumbututu. 20Mu rapere eshi mwa mba tjira pakufu nomudiyuwa dyoSabata. 21Yoyishi muthivaka tho, mbo ghana kara manyandekero ghomakuru, agha gha dhira kukara panganyi kutunda kumatangero ghokaye no mbadi mbo gha kara. 22Ngo mbadi ya karire eshi, Nyambi gha fupipithe thivaka thi, ngo kadi wa kupara munu noyofotjie temba. Ene pamurandu wa wa hapwa kutorora, po mbo gha fupipithera Nyambi thivaka thi.
23“Ngeshi mbo gha mu tongwere ghumweya munako dhi eshi: ‘Mone, Kristusi ne no!’ Ngambi eshi: ‘Mone oya!’ Mwa mba yi tawa. 24Yoyishi mbo ha neya kughutho hakristusi hombango nawaporofeta hombango. Awo ne mbo hana na tendi yidimukitho yoyikuru noyitetukitho. Ngeshi kukona, kupemukitha karo wa hapwa kutorora. 25Ngo mu mone, Ame ne na yi mu tongwera kughutho.
26“No ngeshi ha ningi hanu kukwenu eshi: ‘Mu mone, aye mumamboreya gha di,’ mwa mba yenda ko. Ngambi eshi: ‘Mungonda dhokurara gha di.’ Mwa yi tawa. 27Yoyishi mwiyero waMwanamunu, mbo ghuna kara yira mushoro ghokushwagha muDiva, nokutjwema kate kethera muDitokera.
28“Kudirambo, ko gha konganena makwi.
Yinu yoyipumba mwiyero waMwanamunu
(Mark 13:24–27; Luk 21:25–28)
29“Paghufupi munyima dhonako dhoyinyanda yi, mbo dina vindighera diyuwa,
‘kaghonda mbadi mbo ka twedhima,
nonungwedhi mbo dhina turuka dhi we,
nomangcamu ghodiwiru mbo ghana shekesha.’
30Ndani po mbo thi hokoka thidimukitho thaMwanamunu mughuyaghayu ghodiwiru, nomako ghomahe ghopamuve, mbo ghana tethumuka. Awo mbana mono Mwanamunu pakwiya kwendi mumavuyi ghodiwiru, nongcamu dhodhikuru noghusheghenya. 31Ditorombita dishokuru mbo dina hataghuka, no mbo ghana tumu haengeli wendi, mbo ha ghongeke pofotji wa hapwa kutorora mumitara dhine dhokaye.
Yinu yoyipumba: Thighanekera thoghukuyu
(Mark 13:28–31; Luk 21:29–33)
32“Ene mu kuhongere paghukuyu maghanekero ghano: Ngeshi kutanga kwotupa mite dhagho no kuhoka mahako, muna kudimuka eshi, ditenya pepi di di. 33Karo kemo apa, mbo mu mona yinu yoyiheya yi, mu dimuke eshi, nako ne pepi dhi di mudikorogho. 34Shemwa na kumutongwera: Oku shime ha para harudhi wa, mbo yina hokoka yoyiheya yi. 35Diwiru nomuve, mbo yina dhongonoka, ene n̂ando dhange ne nokamanana temba.
Yinu yoyipumba nonako dhomwiyero karo
(Mark 13:32–37; Luk 17:26–30, 34–36)
36“Ene noyofotji temba yu gha dimuka kwiya kodiyuwa di nonako temba. Nawaengeli homudiwiru temba naMwana temba. Tate pithendi yo gha yi dimuka. 37Thika di ya karire mumayuwa ghaNoghe, kemo mbo yi kara karo pamwiyero waMwanamunu. 38Yoyishi mumayuwa gha kughutho ghodivavure, ha dire thika di ha dyangire no kunwa no kukuyeka, kate mudiyuwa di gha peramine Noghe mudyato. 39Ene mbadi ha karire nodighano eshi yinye yi di po, kate dyeyire divavure di wa kundumune po wahe. Kemo mbo yi kara karo pamwiyero waMwanamunu. 40Ndani mbana kara hawadi mudipya kuyirughana: Yofotji mbana mu shimbi, ghumweya ne mbana mu thighi. 41Hakamadi hawadi mbana tu: Yofotji mbana mu shimbi, ghumweya ne mbana mu thighi.
42“Mu rawe ne keho, yoyishi mbadi muna dikuma eshi, diyuwa munye mbo gheya Hekudyenu. 43Ene mu dimuke: Ngo gha dimukire thindashandhugho eshi, munako munye dhoghuthiku sho gheye mwidhi, ngo gha rawire. No ngo mbadiko thi tha shinyihire mundhugho dhendi. 44Yodigho muyinu yofotji yi, namwe mu kwinduke. Yoyishi Mwanamunu, mbo gha neya munako dhi mwa dhira kudimukera mwe.
Yinu yoyipumba: Mupika ghomuhunga noghomumango
(Luk 12:41–48)
45“Mupika munye ghomuhunga noghomaghano, oyu mbo gha paka hekudyendi kwawapikendi hamweya eshi, gha wape yidya munako dhokurikanya? 46Oyu ne yoyu mbo gha wana hekudyendi pakwiya kwendi ku ghana kushatana. 47Mukafiyaghudhi ye: Shemwa na kumutongwera, ghana kumutumba koyoyiheya yi gha wana.
48“Ene ngeshi mupika ghomumango, ghana kughayara eshi: ‘Hekudyange, shime rure.’ 49Munyima ghana kutanga kupumaghura hapika hamweya, oku ghana terera no kudya no kunwa. 50Hekudya mupika yu ghana kwiya, mudiyuwa di gha dhira kutaterera nomunako dhi gha dhira kudimukera. 51Hekudyendi mbo ghana mu pagha no kumupangwera kwawakadifurumeko. Omu mbo ha ka dira nomahumangayegho.
Currently Selected:
Mateghusi 24: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
Mateghusi 24
24
Yipumba nomaharan̂anyeno ghotembeli
(Mark 13:1–2; Luk 21:5–6)
1Apa gha shwaghire Jesusi mutembeli gha ka yende, ko kumuhenyena hakathishongero wendi no ha mu neghedhire edi ha dhi tanaritha tembeli. 2Ene ye gha wa huthire eshi: “Muna yi mono yoyiheya yi ndi? Shemwa na kumutongwera: Mbadiko diwe di mbo di thighara pamuyendhadyo, ghomahe mbo ghana pu kupayaghura.”
Yinu yoyipumba nodihudhi nomakuthakuthero
(Mark 13:3–13; Luk 21:7–19)
3Munyima dhokuhungumana Jesusi padirundu dyondhwe, ha mwiyera hakathishongero wendi pithawo, ha mwipure eshi: “Tu tongwere eshi, thivaka munye mbo yi hokoka yinu yi, nothidimukitho munye mbo thi kara thomwiyere ghoye noghoghuhura ghokaye?”
4Jesusi ha wa hutha eshi: “Mu koneke eshi gha mu pemukitha ghumeya. 5Yoyishi hengi mbeya muDina dyange ghuninga eshi: ‘Yame Kristusi,’ no mbo hana pemukitha hanu hohengi. 6Amwe mbo muna yuvu nguyungani dhoyita nomukukumo wayo. Mu koneke mwa mba tutukwa. Yi kone kwiya ene kadi ghoghuhura. 7Yoyishi, diko dimwe mbo di neman̂anyena diyendhadyo, noghufumu ghumwe kughufumu ghuyendhagho. No mbo ghana kara mayerenge mumango ghomengi nomakin̂eno ghomuve. 8Ene yoyiheya yi ne matangero ghoyinyanda yoghuye ghoghupya.
9“Munyima mbo hana mu tapa hanu eshi, ha mu shinye no mbo hana mu pagha. Mbo ghana mu nyatha mako ghomahe pamuranda ghokunongonona Dina dyange mwe. 10Munako dhi hengi hakamatawero mba wa, no mbana kuheta‐heta no kukudhimba.
11“Mbo ha neya haporofeta hohengi hombango no mbo hana pemukitha hanu hohengi. 12Yoyishi manyathero ghoveta, gho mbo gha kara matendereritho ghoruhakitho rwawendi. 13Ene yu mbo gha dhidhimeka kate paghuhura, mbo ghana pu kughamwena. 14No mbudhi dhino, mbo dhina pu kuyuvitha mukaye kokahe, eshi marudhi ghomahe mbo gha yuve ghunongononi wadho. Ndani po mbo wiya ghuhura.
Yinu yoyipumba nomanyandero ghomakuru
(Mark 13:14–23; Luk 21:20–24)
15“Apa mbo mu kuyuvathana yoman̂ando ghamuporofeta Daniyeli, ghokuyinu yoyiyi eyi yina kureta maharan̂anyeno, agha gha di mudyango dyokupongoka” — kehe yu ghana kuyitoya gha yitjwathane thiwana — 16“ndani awa ha di Mujudeya ha tjirerere mumarundu. 17Oyu mbo gha hungumana mughutara, mbadi gha kona kwingena mundhugho eshi, gha ka koke mo yinu yendi. 18No yu gha ka di kudipya, gha ka thighuka eshi gha ka shimbe yitere yendi.
19“Mbo yina kara ghukukutu thikuma, kwawakamadi hoharemu nokwawakatumbututu. 20Mu rapere eshi mwa mba tjira pakufu nomudiyuwa dyoSabata. 21Yoyishi muthivaka tho, mbo ghana kara manyandekero ghomakuru, agha gha dhira kukara panganyi kutunda kumatangero ghokaye no mbadi mbo gha kara. 22Ngo mbadi ya karire eshi, Nyambi gha fupipithe thivaka thi, ngo kadi wa kupara munu noyofotjie temba. Ene pamurandu wa wa hapwa kutorora, po mbo gha fupipithera Nyambi thivaka thi.
23“Ngeshi mbo gha mu tongwere ghumweya munako dhi eshi: ‘Mone, Kristusi ne no!’ Ngambi eshi: ‘Mone oya!’ Mwa mba yi tawa. 24Yoyishi mbo ha neya kughutho hakristusi hombango nawaporofeta hombango. Awo ne mbo hana na tendi yidimukitho yoyikuru noyitetukitho. Ngeshi kukona, kupemukitha karo wa hapwa kutorora. 25Ngo mu mone, Ame ne na yi mu tongwera kughutho.
26“No ngeshi ha ningi hanu kukwenu eshi: ‘Mu mone, aye mumamboreya gha di,’ mwa mba yenda ko. Ngambi eshi: ‘Mungonda dhokurara gha di.’ Mwa yi tawa. 27Yoyishi mwiyero waMwanamunu, mbo ghuna kara yira mushoro ghokushwagha muDiva, nokutjwema kate kethera muDitokera.
28“Kudirambo, ko gha konganena makwi.
Yinu yoyipumba mwiyero waMwanamunu
(Mark 13:24–27; Luk 21:25–28)
29“Paghufupi munyima dhonako dhoyinyanda yi, mbo dina vindighera diyuwa,
‘kaghonda mbadi mbo ka twedhima,
nonungwedhi mbo dhina turuka dhi we,
nomangcamu ghodiwiru mbo ghana shekesha.’
30Ndani po mbo thi hokoka thidimukitho thaMwanamunu mughuyaghayu ghodiwiru, nomako ghomahe ghopamuve, mbo ghana tethumuka. Awo mbana mono Mwanamunu pakwiya kwendi mumavuyi ghodiwiru, nongcamu dhodhikuru noghusheghenya. 31Ditorombita dishokuru mbo dina hataghuka, no mbo ghana tumu haengeli wendi, mbo ha ghongeke pofotji wa hapwa kutorora mumitara dhine dhokaye.
Yinu yoyipumba: Thighanekera thoghukuyu
(Mark 13:28–31; Luk 21:29–33)
32“Ene mu kuhongere paghukuyu maghanekero ghano: Ngeshi kutanga kwotupa mite dhagho no kuhoka mahako, muna kudimuka eshi, ditenya pepi di di. 33Karo kemo apa, mbo mu mona yinu yoyiheya yi, mu dimuke eshi, nako ne pepi dhi di mudikorogho. 34Shemwa na kumutongwera: Oku shime ha para harudhi wa, mbo yina hokoka yoyiheya yi. 35Diwiru nomuve, mbo yina dhongonoka, ene n̂ando dhange ne nokamanana temba.
Yinu yoyipumba nonako dhomwiyero karo
(Mark 13:32–37; Luk 17:26–30, 34–36)
36“Ene noyofotji temba yu gha dimuka kwiya kodiyuwa di nonako temba. Nawaengeli homudiwiru temba naMwana temba. Tate pithendi yo gha yi dimuka. 37Thika di ya karire mumayuwa ghaNoghe, kemo mbo yi kara karo pamwiyero waMwanamunu. 38Yoyishi mumayuwa gha kughutho ghodivavure, ha dire thika di ha dyangire no kunwa no kukuyeka, kate mudiyuwa di gha peramine Noghe mudyato. 39Ene mbadi ha karire nodighano eshi yinye yi di po, kate dyeyire divavure di wa kundumune po wahe. Kemo mbo yi kara karo pamwiyero waMwanamunu. 40Ndani mbana kara hawadi mudipya kuyirughana: Yofotji mbana mu shimbi, ghumweya ne mbana mu thighi. 41Hakamadi hawadi mbana tu: Yofotji mbana mu shimbi, ghumweya ne mbana mu thighi.
42“Mu rawe ne keho, yoyishi mbadi muna dikuma eshi, diyuwa munye mbo gheya Hekudyenu. 43Ene mu dimuke: Ngo gha dimukire thindashandhugho eshi, munako munye dhoghuthiku sho gheye mwidhi, ngo gha rawire. No ngo mbadiko thi tha shinyihire mundhugho dhendi. 44Yodigho muyinu yofotji yi, namwe mu kwinduke. Yoyishi Mwanamunu, mbo gha neya munako dhi mwa dhira kudimukera mwe.
Yinu yoyipumba: Mupika ghomuhunga noghomumango
(Luk 12:41–48)
45“Mupika munye ghomuhunga noghomaghano, oyu mbo gha paka hekudyendi kwawapikendi hamweya eshi, gha wape yidya munako dhokurikanya? 46Oyu ne yoyu mbo gha wana hekudyendi pakwiya kwendi ku ghana kushatana. 47Mukafiyaghudhi ye: Shemwa na kumutongwera, ghana kumutumba koyoyiheya yi gha wana.
48“Ene ngeshi mupika ghomumango, ghana kughayara eshi: ‘Hekudyange, shime rure.’ 49Munyima ghana kutanga kupumaghura hapika hamweya, oku ghana terera no kudya no kunwa. 50Hekudya mupika yu ghana kwiya, mudiyuwa di gha dhira kutaterera nomunako dhi gha dhira kudimukera. 51Hekudyendi mbo ghana mu pagha no kumupangwera kwawakadifurumeko. Omu mbo ha ka dira nomahumangayegho.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986