Mateghusi 25
25
Yinu yoyipumba: Maghanekero ghawakamadighana dikumi
1“Ghufumu ghodiwiru, ndani mbo ghu kara yira hakamadighana wa ha tumburire maramba ghawo ha ka taterere mwenga. 2Hakwoko mbadi ha karire nomaghano, nokwoko ha karire nomaghano. 3Hayero ha shimbire maramba ghawo, ene mbadi ha shimbire nomaghori. 4Oku hanya‐nyami hana shimbi maramba ghawo nomaghori pambadi. 5Oku shime mukawenga ko kayenda gha di, ko kukotha kwawo no kupothomokera muturo.
6“No pakatji koghuthiku, gha karire methero eshi: ‘Mwenga yu ghana kwiya! Mu mu tjingawere!’ 7Ko kupinduka hakamadighana wahe no kuroghitha maramba ghawo. 8Hayero ha ningi kwawanya‐nyami eshi: ‘Mu tu peko maghori ghenu, yoyishi kuna kudhimana maramba ghetu.’ 9Ene hanya‐nyami ha huthire eshi: ‘Ava ko, mbadi ghana rikanya kukwetu no kukwenu. Mu yende vene kuthitora mukakughurere maghori.’
10“Oku shime ha yendera hayero kukughura maghori, ko kuna kuma mwenga. Awa ha roghithire ghawo, hengenine pofotji namwenga kumukandi no kutjapera thero.
11“Munyima heyire hakamadighana hamweya witha eshi: ‘Mukadikuto, mukadikuto, tu yandhwerere!’ 12Ene mwenga gha huthire eshi: ‘Na kumutongwera eshi: Mbadi na mu dimuka!’
13“Mu rawe ne, yoyishi mbadi mwa dimuka diyuwa nonako, edhi mbo yi hokoka yi.
Yinu yoyipumba: Maghanekero ghomanyinga
(Luk 19:11–27)
14“Shime ya kara karo yira kwamurume yu, ghana kushana kuyenda muruyendo. Ha kongwedha kwendi hapikendi pofotji no kuwatapera ghugavo wendi. 15Kwayofotji gha mu pire manyinga kwoko ghomangondo, ghoghuwadi gha mu pire mawadi noghoghuhatu gha mu pire dyofotji. Aye gha tapire kwa kehe yu popamaghano ghendi, ko kuyenda kwendi muruyendo.
16“Oyu gha tamburire manyinga kwoko ghomangondo, gha tangire wangu popo kugharughanitha, ha wanena po karo makwoko. 17Kemo karo noyu gha wanine mawadi: gha wanenine po karo mawadi. 18Ene mupika yu gha wanine dinyinga dyofotji, gha kumbire dikumbo mumuve, no gha horekire mo manyinga ghahekudyendi.
19“Munyima dhonako dhodhire, ha ka huka hekudya wawapika wa no gha tendire paro nawo. 20Oyu gha tamburire manyinga kwoko ghomangondo, gheyire no gha retire karo kwoko ghamweya ghuninga eshi: ‘Mukadikuto, manyinga kwoko ghomangondo wa ni pire, gha mweya karo kwoko ghano gha na wanena po.’ 21Ko kuninga hekudyendi kukwendi eshi: ‘Yiwa kemo, mupika ghomuhunga noghomatjimapero. Koyoyimbiru wa tjimapire, no na kukutumba koyoyingi. Wiye muyishamberera yange.’
22“Ko kwiya ghumweya ghomanyinga mawadi ghomangondo eshi: ‘Mukadikuto, manyinga mawadi ghomangondo wa ni pire. Agha no, nomawadi gha na wanena po.’ 23Hekudyendi gha mu tongwerire eshi: ‘Yiwa kemo, owe ne ghomuhunga nomupika ghomatjimapero. Koyoyipu wa tjimapire, ho na kukutumba koyoyingi. Wiye muyishamberera yange.’
24“Munyima gheyire yu gha wanine dinyinga dyofotji dyomangondo ghuninga eshi: ‘Mukadikuto, na kudimuka eshi we ne ghomurume ghomukukutu, oyu ghana kukesha eyi wa dhira kukuna, no kukokora eyi wa dhira kutapeka. 25Yoyishi na yapire yo na ka vumbekerire dinyinga dyoye mumuve. Dinyinga dyoye ne dino na ka hutha.’
26“Hekudyendi gha mu tongwerire eshi: ‘Ghothimango! Ghothiva we! Owe ne wa dimukire eshi, ame ne kukesha yi na dhira kukuna no kukokora yi na dira kutapeka? 27Ngo wa twarire manyinga ghange kubanga, pakuhuka kwange, ngo na wanena po yiwedherera. 28Mu mu kungure dinyinga no mu tape koyu gha di nodikumi. 29Yoyishi kwayomuhe ghokuwana, mbana yi mu vurithera no mbo ghana wana kamwagha‐mwaghe. Ene yu gha pira, mbana mu kungura ghumbiru ghu gha di nagho. 30No mu vukumene mupika ghokupira thighamwena mudikokore dyodidhungi panunda. Ko sho ha ka dire nomahumangayegho.’
Yinu yoyipumba: Ndhango dhoghuhura
31“Apa mbo gheya Mwanamunu mughufumu wendi, nawaengeli wendi wahe, mbo ghana hungumana padipuna dyoghufumu wendi. 32Mako ghomaheya, mbana gha kongwedha kughutho wendi, no mbo ghana yakunutha hanu, thika di ghana kuyakunutha mukakuditha ndjwi kun̂ombo. 33Ndjwi mbo ghana dhimeka kurudyo, non̂ombo ne kurumoho.
34“Po mbo gha ninga Fumu, kwawakakwimana kurudyo rwendi eshi: ‘Mwiye mwe gha kandadheka Tate! Mu tumbure ghutungi yira yiyora. Eyi ne yapwa kumuroghithera kutunda kumatangero ghokaye. 35Yoyishi na fire ndhara, amwe ne mwa ni pire thokudya. Na fire dinota, amwe ne mwa ni pire thokunwa. Na karire mugenda, amwe ne mwa ni pire maturo. 36Na fire wira, amwe ne mwa ni vatekire. Na korwire, amwe ne mwa ni korwithire. Mudorongo na karire, amwe ne mwa ni dhingurire.’
37“Munyima mbana mwipura wa hatendire mahimeno ghaNyambi eshi: ‘Fumu, kupi twa kumonine nondhara, ho twa kukorerire, ngambi ku ghuna fu dinota, ho twa kupire thokunwa? 38No kupi twa kumonine mughugenda, ho twa kupire maturo, ngambi muwira ho twa kuvatekire? 39Kupi twa kumonine muyikorwa ngambi mudorongo ho twa kudhingurire?’ 40Ndani po mbo gha wa hutha Fumu eshi: ‘Shemwa na kumutongwera: Thika di mwa yi tendire kwayofotji ghopawaminange wano, kukwange mwa yi tendire!’
41“Fumu mbo ghana ningi kwawakarumoho rwendi eshi: ‘Mu finyaghuke, mu tunde kukwange, mwakathikuto! Mu yende kumudiro ghororuheya, oghu gha kuroghithera Shatani nawaengeli wendi! 42Yoyishi na fire ndhara, ene mbadi mwa ni pire thokudya. Na fire dinota, ene mbadi mwa ni pire thokunwa. 43Na karire mughungenda, mbadi mwa ni pire maturo. Na fire wira, mbadi mwa ni vatekire. Na korwire no na karire mudorongo, mbadi mwa ni rekurire.’
44“Awo ne mbana hutha eshi: ‘Fumu, kupi twa kumonine nondhara, ngambi nodinota, ngambi mughugenda, ngambi muwira, ngambi muyikorwa, ngambi mudorongo, ho twa shwenine kukughamwena?’ 45Aye mbo ghana wa hutha eshi: ‘Thika di mwa dhirire kuyitenda kwayofotji ghopawange wano, no kukwange temba mbadi mwa yi tendire.’ 46Hanu wa mbana wana mahumbithero ghororuheya. Ene wa ha tendire mahimeno ghaNyambi ne moyo ghororuheya.”
Currently Selected:
Mateghusi 25: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
