Markusi 10
10
Yokutjora mayekero
(Mat 19:1–12; Luk 16:18)
1Gha fungurukire no gha yendire Jesusi thamboydiya dhaJordani ho gha kumine kuthiko thaJudeya. Ko kukukongwedha karo mbunga, Jesusi gha dhi hongire thika di wa karire muhingo wendi.
2Ko kwiya Hafarasayi kukwendi, ha mu yereke. Ha mwipura kwawo mepwero ghano eshi: “Ya pwa kufundhwera kwamurume eshi gha mwaghe munu wendi ndi?”
3Aye ha wa hutha no kuwepura eshi: “Nye gha mu rawerire Mosesi?”
4Awo eshi: “Mosesi gha shuturire eshi, kutjamga mbapira dhomashutwero no kukuyakunuka.”
5Jesusi gha wa huthire eshi: “Pamurandu ghoghukukutu ghomitjima dhenu, yo ha mu tjangerire muragho gho. 6Ene pamatangero ghoyivareka, Nyambi gha tendire murume namukamadi. 7Payinu yi, murume gha thighe wihe nanyina, no gha kughunguvure namunu wendi. 8Mughuwadi wawo ha kare yirama yofotji, kadi yiwadi ene yofotji. 9Yodigho eshi thinu ethi gha nunga Nyambi, mbadi gha kona kuthishutura munu.”
10Hakathishongero wendi nawo ha mwipurire mundhugho eshi, ngepi yoyinu yi. 11Ko kuwakhutha kwendi eshi: “Kehe yu ghokumwagha munu wendi no ka yeka waye, ghana tjoro mayekero kwamunu wendi. 12No ngeshi mukamadi ghana shwena didhiko dyendi, no ka mu yeka waye, naye ghana tjoro mayekero.”
Jesusi ghana kukandadheka hanuke
(Mat 19:13–15; Luk 18:15–17)
13Hanu hamweya ha retire hanawo kukwendi eshi, gha wa kandadheke. Ene hakathishongero wendi ha wa shingire. 14Apa gha yi monine Jesusi, gha patire thikuma kukwawo no gha ghambire eshi: “Mu thighe hanuke, heye kukwange, yoyishi wawo ghufumu waNyambi. 15Shemwa na kumutongwera eshi, yomuhe ghokudhira kutambura ghufumu waNyambi yira mwanuke, mbadi mbo ghengena mo.” 16Ko kuyandja nyara dhendi papawo no kuwakandadheka.
Munu ghomutungi
(Mat 19:16–30; Luk 18:18–30)
17Apa gha karire mundhira, ko kudhondoka ghumweya kukwendi, no gha tongamenine kughutho wendi ghumukumbera eshi: “Muhongi ghomunongo, nye sho ni tende, ni ka wane moyo ghororuheya?”
18Jesusi gha mu huthire eshi: “Nye ghuna kunitoyera eshi no munongo? Mbadiko ghomunongo, shimengwa yofotji eshi, Nyambi! 19Wa dimuka sha miragho dhendi eshi: ‘Wa pagha, wa tjora ghurugho, wedha, wa ghamba yishewe, wa paka nya; ghu fumaneke wiho nanyoko!’ ”
20Murume yu gha mu huthire eshi: “Yinu yoyiheya yi na yi kwata kutunda kuwanuke wange.”
21Jesusi ne ko kumurerurura noruhakitho, ho gha ningire kukwendi eshi: “Thinu thofotji ne, hasha ghu kare ghuhepwe, yende, ka ghurithe yoyiheya, eyi ghu di nayo. No ka yi tape kwawakakunyanda. Kemo mbo ghu wana ghushwi mudiwiru. Munyima wiye no tumbure thikurushe thoye, ghu ni kuthe.” 22Aye ne gha tokotire kun̂ando dhi, no gha hukire ghundundumena, yoyi gha karire noghugavo ghowingi.
23Ko kureva‐reva Jesusi kokuhe, no gha ningire kwawakathishongero wendi eshi: “Ngepi ghukukutu kwawatungi pakwingena mughufumu waNyambi.”
24Hakathishongero wendi ha tutukwire kun̂ando dhendi. Jesusi ha wa hutha karo eshi: “Amwe, ghukukutu kwawa ha haka yimuna yawo, mukwingena muditunga dyaNyambi. 25Ghuredhu kwangameno kukwingena mudiho dyothonga, ene ghukukutu kwamutungi mukwingena mughufuma waNyambi.”
26Ko kuhedhumuka kwawo thikuma no ha ghambathanine eshi: “Yidye ne mbo gha pwa ndani kughamwena?”
27Jesusi ne gha wa rerururire ghuninga eshi: “Kwawanu ne ghukukutu, kadi kwaNyambi, yoyishi kwaNyambi ne yoyiheya viredhu.”
28Ha mwipura Petrusi eshi: “Mone, tuna thighi yoyihe no tuna kukuthu.”
29Jesusi gha huthire eshi: “Shemwa na kumutongwera eshi, yomuhe yu ghokuthigha ndhugho dhendi, ngambi han̂amba dhendi, nawihe nanyina, ngambi hanendi noyimuna yendi, muDina dyange no dyombudhi dhodhiwa, 30no kuyora mumoyo ghuno dithere, pamayugho, pawan̂amba, pawanyina, pawaminendi no payimuna eshi mbo gha dhire kuwana moyo ghororuheya. 31Ene hengi hakakutanga mba kare hakanyima, no hakanyima wo hakakutanga.”
Jesusi ghana kuyuvitha paruhatu yifa yendi nomuvumbukero wendi
(Mat 20:17–19; Luk 18:31–34)
32Ha karire mundhira dhokukanduka kuJerusalema, Jesusi ne gha piterire kughutho wawo. Hakakumutata nawakathishongero wendi ha tutukwire. Ko kuthighuka kwawadikumi nohawadi gha wa thimwetwedhere eyi mbo yi hokoka kukwendi kughutho eshi: 33“Mu mone, kuJerusalema tuna kuyenda, naMwanamunu mbo hana mu tapa kwawapristeri hohakuru no kwawakamarukwaro. Awo ne mbo hana, mu pangwera kukufa, no kumutapa kwawanumaghana, awa ha dhira kudimuka Nyambi. 34Awo ne mbo hana mu sherera no kumumwashura no kumuthipera mate no kumupagha. No mudiyuwa dyoghuhatu, mbo ghana vumbuka mwawafu.”
Mepwero ghawana Sebedeghusi
(Mat 20:20–28)
35Jakobusi naJohannesi, hana Sebedeghusi heyire kukwendi no ha mwipurire eshi: “Muruti, tuna haka eshi, ghu tende yoyihe eyi sho tu kurombe.”
36Aye gha wa tongwerire eshi: “Nye muna haka eyi sho ni mu tendere?”
37Awo ha huthire eshi: “Ghu tu pe eshi tu kone kuhungumana mughufumu ghoye. Yofotji kurudyo, yofotji kurumoho.”
38Ene Jesusi gha wa dimbwererire eshi: “Mbadi muna kudimuka eyi muna kwipura. Mwa kona kunwitha kuthinwitho thoyinyanda ethi na kunwitha Me, no kumuyogha nodiyoghero edi mbo ha ni yoghitha Me ndi?”
39Awo eshi: “Twa kona!” Jesusi gha wa tongwerire eshi: “Yashemwa, thinwitho thi na kunwena Me, tho mbo mu nwena namwe. No diyoghero edi mba ni yoghitha Me, namwe dyo mbo ha mu yoghitha. 40Ene kuhungumana kurudyo Rwange no kurumoho Rwange, mbadi ya kara kuKwange eshi, ni yi wa pe, shimengwa kwawa ha yi turekera.”
41Apa ha yi yuvire hamweya dikumi, ko kutokotera kwawo kwawaJakobusi naJohannesi. 42Jesusi gha wethire kukwendi no gha wa yuvithire eshi: “Muna yi dimuka eshi yomuhe oyu ghana kughayara kughukuru ghodiko, gha wa rawere, nomanduna gha tende mahimeno ghendi. 43Eyi ne mbadi ya kona kukara mumwenu, no kehe yu ghopapenu, oyu ghana kuhima kukara ghukuru, gha kare mupikenu. 44No yomuhe ghopapenu, oyu ghana kuhima kukara kughutho, gha kare mupika wawahe. 45Yoyishi naye Mwanamunu mbadi gheyire kukurughanena, ene kukurughana no kutapa moyo wendi ghu kare thikomononitho thawengi.”
Mukaghukunga ghomuJeriko
(Mat 20:29–34; Luk 18:35–43)
46Ko kukuma kwawo muJeriko. No pakushwangha kwendi nawakathishongero wendi, nombunga, dhimweya muJeriko, ko kuhungumana munu ghomukunga, Bartimeghusi ghomwana Timeghusi kumbadi dhondhira ghukumbera. 47Apa gha yuvire eshi yoJesusi ghomukaNasareti ghana kupita, ko kukugherera kwendi eshi: “Mwana Davita, Jesusi, ghu ni fere n̂eke!”
48No hengi ha mu shingire eshi, gha porere; aye ne pakukugherera thikuma eshi: “Mwana Davita, ghu ni fere n̂eke!”
49Ko kwimana Jesusi gha wa tongwere eshi, ha mwithe, gheye; nawo ko kwitha mukunga no kumutongwera eshi: “Tjimape! Wimane, yowe ghana kwitha.”
50Ha mwagha mwaye wendi no ghemanine gha yende kwaJesusi. 51Ko kumwipura Jesusi eshi: “Nye ghuna haka eyi sho ni kutende?” Mukunga gha mu tongwerire eshi: “Hekudyange, na haka eshi, ni mone!”
52Ha mu tongwera Jesusi eshi: “Yende, matawero ghoye ghana kughamwena.” Popo vene ko kumona, no gha kuthire Jesusi mundhira.
Currently Selected:
Markusi 10: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
