Markusi 12

Maghanekero ghawandjimi

(Mat 21:33–46; Luk 20:9–19)

1Jesusi gha tangwerire ditangu eshi: “Murume ghumweya, gha karire nodipya dyovinyu. Kumbadi dhodipya gha thitire ko ruthito rongcamu. Gha thimenenine mo kataratara kokukambeka mandjembere no gha shokekire mo mushoke ghomakungero. Ko kuthighera kwendi dipya kwawakakudikunga, no gha yendire muruyendo. 2Apa dha rikanyine nako, ha tumu mupika kwawarughani eshi gha ka shimbe dihenda dyoyima yomudipya. 3Ko ka mu kwata kwawo ha mu pumure, no kumuhutha nyara‐nyara. 4Karo gha tumine kukwawo mupika ghumweya, aye ne ha mu vukumine nomawe, no ha mu remekire pamutwi, ha mu shinyine thikuma no ha mu shererire. 5Paruhatu gha tumine karo ghumweya, aye ne ha mu paghire vene. Kemo ha tendire karo nawamweya hohengi, hamweya ha wa paghire, hamweya ha wa pumurire. 6Ho gha thigharire nomwanendi yofotji ghomuhakwa wendi. Yo gha manitherire kutuma kukwawo, no gha ghayarire eshi: ‘N̂anyi ha ka mu fumaneke mwanendi.’ 7Ene harughani ha ghambathanine eshi: ‘Oyu ne yomukakuyora. Mwiye tu mu paghe, noyiyora yi kare yetu!’ 8Ko kumukwata kwawo ha mu paghe, no kumuvukumena thambodiya dhodipya.

9“Nye sho gha tende keho thindashadipya? Ghana keya gha paghe harughani no kutapa dipya kwahawonawo.

10“Mbadi mwa toya shime yitjanga yokupongoka eshi:

‘Diwe di ha mwaghire hakakumba,

dyo dina kara diwe dyodishonga.

11Ethi ne thitenda thaNyambi,

no thitetukitho mumeho ghetu.’ ”

12Hapristeri hohakuru nawakamarukwaro nawamayami ha dimukire eshi, kukwawo ghana kuyighanekera. Yo ha shanenine kumukwata ene ha yapire mbunga. Ko kumuthigha kwawo ha ka yende.

Yodiketo

(Mat 22:15–22; Luk 20:20–26)

13Ko kumutumena Hafarasayi hamweya nawakaHerodesi eshi, ha yereke kumukwata paman̂ando ghendi. 14Pakukuma kukwendi ha ningire eshi: “Muruti, twa dimuka eshi ghomukaghushemwa we, no mbadi ghuna kutokomena kuyinu yawanu, no kukenga temba kughunu wawanu. Ne ghuna kuhonga hanu ndhira dhaNyambi mughushemwa. Ninge eshi, ya pwa kufundhwera kuketa kwafumu diketo ndi? Tu kete ndi, endi twa keta?”

15Jesusi gha dimukire difurumeko dyawo no gha wa tongwerire eshi: “Nye muna kuniyerekera? Mu ni pe dinyinga ni di rondonone!”

16Ko kudimutambeka kwawo, Munyima ha wepura eshi: “Edhi nungu no yitjanga ne yadye?” Ha mu hutha kwawo eshi: “Yafumu shokuru!”

17Jesusi ne gha wa tongwrire eshi: “Ngeshi kemo ne, mu tupure kwafumu eyi ya kara yendi, no yaNyambi ne kwaNyambi.” Ko kutetuka kwawo kukwendi.

Hasadusayi nomuvumbukero

(Mat 22:23–33; Luk 20:27–40)

18Mudiyuwa dimweya, heyire Hasadusayi kwaJesusi, awa ha kananine muvumbukero no ha mwipurire eshi: 19“Muruti, Mosesi gha tu thigherire muragho eshi, ngeshi ha fu mukadiko no kuthigha difakadhi dyendi dyokupira hana, gha kona kumuyeka mwapendi no gha mwerekithe hana mufu. 20Pa karire harume kwoko nohawadi honyokwawo yofotji. Mbedi gha yekire mukamadi no gha fire kupira nohana. 21Thirandambedi gha mu tumburire mukamadi yu, naye gha fire kupira nohana. Mitakatji naye kemo. 22Waheya kwoko nohawadi wa, ha mu yekire kupira nohana papendi. Munyima ne ko kufa naye mukamadi. 23Pamuvumbukero ne wadye mukamadi mbo gha kara, yoyishi waheya wa kwoko nohawadi ne ha mu yekire?”

24Jesusi gha wa dimbururire eshi: “Yashemwa, mbadi muna yongara mwe ndi, pakudhira kudimuka yitjanga nongcamu dhaNyambi? 25Yoyishi pamuvumbukero wawafu, mbadi mba yeka karo, ene mbana para yira haengeli homudiwiru. 26Ngeshi mbadi muna kutawa kuyinu yi, eshi hafu mbana vumbuka, mbadi mwa toya mbapira dhaMosesi dhoyitjanga yothiginda thomudiro, omu gha ghambire Nyambi kukwendi eshi: ‘Yame Nyambi waAbrahamu, Nyambi waIsaka, no Nyambi waJakopu!’ 27Nyambi ne kadi Nyambi wawafu, ene Nyambi wawayumi. Amwe ne mwa yongara thikuma.”

Muragho ghoghukuru

(Mat 22:34–40; Luk 10:25–28)

28Mukamarukwaro ghumweya gha yuvire n̂anani dhawo no gha tetukire kumahuthero ghaJesusi. Yo gha mwipwerire eshi: “Muragho munye ghokupiterera miragho dhodhiheya?”

29Ko kumuhutha Jesusi eshi: “Muragho ghokupiterera ne ghuno: ‘Yuve ghoIsragheli, mbadiko Nyambi ghumweya gha kara Fumu, shimengwa Hekudyetu. 30Ghu hake Fumu Nyambi ghoye nomutjima ghoye ghoghuhe, nomudhinu ghoye ghoghuhe, nomaghano ghoye ghomahe nongcamu dhoye dhodhihe. Oghu ne ghomuragho ghokutanga.’ 31Ghoghuwadi oghu wa rikanya kumuragho ghu ne ghuno: ‘Ghu hake muyendhoye thika di wa kuhaka ghothinda.’ Mbadiko muragho ghumweya ghokupiterera miragho dhi.”

32Mukamarukwaro gha huthire eshi: “Ghuhunga, Muruti, ghuna ghamba ghushemwa eshi, Nyambi yofotji no mbadiko Nyambi waye‐naye. 33Yodigho kuhaka Nyambi nomutjima ghoghuhe nomaghano ghomahe nomudhimu ghoghuhe nongcamu dhodhihe, no kuhaka muyendhoye thika di wa kuhaka ghothinda, eyi ne ya piterera miyambo dhokukon̂erera nodhokupagha.”

34Apa gha yuvire Jesusi eshi ghana hutha nomaghano, gha mu tongwerire eshi: “Owe ne mbadi wa kara kayenda noghufumu waNyambi.” Kutunda pa, mbadiko karo oyu gha konine kumwipura.

Kristusi ghomwana Davita

(Mat 22:41–46; Luk 20:41–44)

35Oku shime gha karera Jesusi mukuhonga mutembeli, ko kwipura kwendi eshi: “Ngepi di hana kughambanga hakamarukwaro eshi, Kristusi ne mwanahoka Davita? 36Yoyi Davita thinda gha ghambire mwaMupepo ghoKupongoka eshi:

‘Hekudyange ghana ghamba kwaHekuyange eshi,

hungumane kurudyo rwange,

kate mbo ni kupakere han̂ore dhoye kumapadhi ghoye.’

37“Aye Davita thinda ghana kumuta eshi Fumu; kupi keho wa tunda wanahoka ghokukwendi?” No mbunga dhodhingi dha mu teghererire thikuma.

Mashingero ghokwawakamarukwaro

(Mat 23:1–36; Luk 20:45–47)

38Mumayuwa gha, ha wa tongwera muyihonga yendi eshi: “Mu koneke kwawakamarukwaro awa ha haka kuyendaghura noyivata yoyire no ha haka eshi hanu ha wa rumerithe pamambandha. 39No ha haka kuhungumana mumasinagoge mumapuna ghokughutho, no mumango ghodikuto mumayuwa ghomakuru. 40Awo hakakwan̂itha mayugho ghawadidhi, no kurapera mandapero ghomare kudikuto dyawo. Hanu wa, mbana wana ndhango dhodhikuru.”

Yitapa yamudidhi ghokunyanda

(Luk 21:1–4)

41Ko kuhungumana Jesusi kughutho ghodimbangu dyoyitapa. Pakukengerera edi dhina kupaka mbunga manyinga mudimbangu dyoyitapa. Hatungi mwene ha pakire mo manyinga ghomengi. 42Ko kwiya mudidhi ghomuhepwe na gha pake mo naye tunyinga tuwadi, otu twa mu thigharire ko. 43Hetha kwendi hakathishongero wendi no gha wa tongwerire eshi: “Shemwa, na kumutongwera eshi, oyu mudidhi ghomuhepwe, ghana tapa kupiterera wahe, awa hana paka mudimbangu di. 44Yoyishi wahe hana tapa muwingi ghoyiwana yawo; aye ne mughuhepwe wendi, no yoyihe yi ghana wana ne, makurupero ghendi ghokumuparitha.”

Currently Selected:

Markusi 12: MHW1986

Highlight

Copy