Markusi 14
14
Hapristeri hohakuru hana kutenda ndhango
(Mat 26:1–5; Luk 22:1–2; Joh 11:45–53)
1Kwa thigharire mayuwa mawadi kughutho ghomembero ghoPaska no dyomaghuroto ghothuthun̂unyi. Hapristeri hohakuru nawakamarukwaro, ha shanine eshi ha mu kwate no ha mu paghe Jesusi. 2Ene ha ningire eshi: “Kadi mudifeste, maghana sho gha kare po meman̂anyeno mwawanu.”
Mayarekero ghomuBetaniya
(Mat 26:6–13; Joh 12:1–8)
3Apa gha karire Jesusi muBetaniya, mundhugho dhaSimoni ghomukayin̂ondwe kuthidyero, heya mukamadi nokawero komaghadhi ghothiwe mwene. Ko kuvukura kwendi kawero no gha terire pamutwi waJesusi. 4No hamweya ha yi tokotire no ha ningire eshi: “Pashanye ghana mwagharera maghadhi gha kemo? 5Yoyishi maghadhi gha ngo ghana piti manyinga mathere mahatu. No manyinga gha, hasha, ngo gha kutapera hahepwe.” Ko kutanga kwawo kuhendadhana mukamadi yu.
6Jesusi ne gha wa huthire eshi: “Mu mu thighe! Nye muna kumutokomenena? Aye ne ghana tendi thitenda thothiwa kukwange. 7Yoyishi hahepwe ha kara roruhe nenu, oku muna himi, mwa kona kuwaghamwena. Ame ne mbadi na kara nenu roruhe. 8Oyu ghana tendi ethi tha rikanya pangcamu dhendi, yo ghana tanga kuwetha yirama yange kumuvumbukero wange. 9Shemwa na kumutongwera eshi, kokuhe oku mba yaghura mbudhi dhino mbana ghamba karo eyi gha tendire no kumuvuruka.”
Yiruwera yokwamunyathi
(Mat 26:14–16; Luk 22:3–6)
10Munyima dhokenge yo, Judas Iskariyoti, ghumweya ghopawashadikumi nohawadi, gha yendire kwawapristeri hohakuru eshi gha ka mu hokore Jesusi kukwawo. 11Apa ha yi yuvire yi, ha shambererire thikuma no ha kuyongire eshi ha mu pe manyinga. Naye ha shana nako mwene dhokumuhokora.
Murarero ghokupongoka ghoghuhura
(Mat 26:17–30; Luk 22:7–23; Joh 13:21–30; 1 Kor 11:23–25)
12Mudiyuwa dyokutanga dyomaghuroto ghothuthun̂unyi, omu ha paghangire ndjwighana ghoPaska, ha mwipura hakathishongero wendi eshi: “Kudyango munye ghuna himi oku sho tu ka kuroghithere murarero?”
13Ko kutuma kwendi hakathishongero hawadi eshi: “Mu yende mudighumbo, muna ka wana munu, oyu ghana tengena kandimbe komeyu, ho mu ka mu kuthe. 14Momuhe omu sho gha kengene, mu kepure thindashandhugho eshi: ‘Muhongi wetu ghana kwipura eshi: Kupi sho gha dyere murarero nawakathishongero wendi?’ 15Ghana ka mu neghedha ngonda dhokuwiru edhi dha pwa kuroghitha. Mo sho mu ka tende mwara wetu.”
16Hakathishongero ha yendire mudighumbo no ha wanine yoyihe thika kenge gha yi wa tongwerire. Ko ka yareka kwawo murarero ghoPaska.
17Parunguro ko kwiya kwendi nawashadikumi nohawadi. 18Oku shime ha karera mukudya, ko kuninga Jesusi eshi: “Shemwa na kumutongwera eshi, yofotji ghopapenu ghana kunihokora, oyu ghana kudya Nange.”
19Awo ne ha tangire kundundumena no ha mwipurire yofotjiyofotji eshi: “Yame ndi?” Ghumweya naye paya eshi: “Ngwa yame?”
20Aye gha wa huthire eshi: “Yofotji ghopapenu mwashadikumi nohawadi, oyu na kuverera nendi mukaronga. 21Mwanamunu ghana kuyenda thika di ha yi mu tjangera; ene mawe kwamunu yu, ghana mu hokora! Ghuhunga ne, ngo mbadi gha pwire kushamuruka.”
22Shime ha karera mukudya, ko kudhamuna Jesusi ghuroto, ha tumera kwaNyambi, ha ghu yondora no ku ghu tapa kukwawo ghuninga eshi: “Mu tumbure, mu dye, eyi ne yirama yange.”
23Karo kemo gha tumburire thinwitho, ha tumera no kuthitapa kukwawo, nawo ha nwine mo wahe. 24Ha wa tongwera eshi: “Ghomanyinga ghange gha, manyinga ghoghundambo ghoghupya. Agha mbo gha ndendeshera kwawanu hohengi. 25Shemwa na kumutongwera eshi, mbadi mbo ni nwa karo kumbuyo dhothitondo thovinyu, kate mudiyuwa di mbo ni ka kuma mughufumu waNyambi. Po mbo ni ka nwa ko mumuhingo ghoghupya.”
26Apa gha manine kwimba dimbo dyomakughero, ha shwaghire no ha yendire kudirundu dyondhwe.
Medhero ghaPetrusi
(Mat 26:31–35; Luk 22:31–34; Joh 13:36–38)
27Mundhira gha ghambire Jesusi kukwawo eshi: “Mughuthiku ghuno, mwaheya muna kunimwagha. Yoyi ya pwa kutjanga eshi: ‘Na kushinya mudithi nondjwi dhina kukuharan̂anya.’ 28Ene munyima dhokuvumbuka kwange, mbo na mu piterera kuGalileya.”
29Petrusi gha vurumukire ghuninga eshi: “Ngambi ngo ha kumwaghe wahe, ame ne mbadi sho ni kumwaghe!”
30Jesusi gha mu huthire eshi: “Shemwa na kukutongwera eshi, mughuthiku ghuno, kughutho ghokwigha ngondovoro paruwadi, ghuna kunihamura paruhatu.”
31Ene Petrusi gha thudire eshi: “Ngambi ha ni fu noye, mbadi na kona kukuhamura!” Nawaheya ha ghambire kemo.
Jesusi muGetsemani
(Mat 26:36–46; Luk 22:39–46)
32Munyima ha kumine kudyango edi ha tire eshi Getsemani. Ha ningi kwawakathishongero wendi eshi: “Mu hungumane mwe pano, tango ni yende me, ni ka rapere.” 33Ha shimbi kwendi haPetrusi naJaokobusi naJohannesi. Aye ne ko kutanga kundundunena no kutoka. 34Ha ghamba kukwawo eshi: “Mudhimu wange ghuna kasha yira ni fe; mu kare mwe pano no mu rawe!”
35Apa gha henyine kamanana, ko kufurumana kwendi pamuve no gha raperire eshi: “Ngo ghuhunga, ngo dhi mu keruke nako dhi.” 36No gha kuhemine eshi: “Tate, yoyihe kukoye ne yiredhu, tundithe thinwitho thi thoyinyanda papange; ene kadi thika di na himi Me, shimengwa pamahimeno Ghoye.”
37Ko kuhuka kwendi, ka wa wana ne muturo. Ho gha ningire kwaPetrusi eshi: “Simoni, ghuna rara ndi? Mbadi wa kona kurawa viri dhofotji ndi? 38Mu rawe no mu rapere, maghana sho mu were mumayerekero. Yihima ne ko yi di, yirama ne yina kasha.”
39Jesusi gha yendire ko karo no gha hukurukire ndapero dhendi. 40Apa gha ka thighukire karo kukwawo, gha wa wanine karo hana rara; yoyi meho ghawo gha remwenine, no ha pirire non̂umbu kukwendi.
41Ha ka huka roghuhatu kukwawo no gha wa tongwerire eshi: “Mu rare ngenyu no mu turumuthe. Yina rikanya; nako ne dhi neya. Mu mone eshi, Mwanamunu kutapa hana kumutapa mumoko ghawan̂ore. 42Mwimane, tu yende, munyathi pepi gha di.”
Kuna kumukwata Jesusi
(Mat 26:47–56; Luk 22:47–53; Joh 18:3–12)
43Oku shime ha ghamba, ko kwiya Judasi ghopawashadikumi nohawadi. Nendi dyeyire dikuta dyawarume, edi ha tumine hapristeri hohakuru nawakamarukwaro nawamayami, noyimende yawo nomamburo ghawo. 44Mukakumuhokora ne gha wa dimukithire eshi: “Oyu sho ni ncumite, yo sho mu kwate no mwa mu thigherera.”
45Ko kuhenya Judasi kukwendi no kumurumeritha ghuncumita eshi: “Ghu rumere Muhongi.” 46Ha mu mbandukera kwawo ha mu kwate. 47Yofotji ghopawendi gha shwamunine thimende thendi no kukeshura ditwi dyamupika mupristeri shokuru. 48Jesusi gha ghambire kumbunga eshi: “Amwe mu neya kukunikwata noyimende yenu nomiramu dhenu, yira noshondoro Me ndi? 49Kehe diyuwa na karire nenu mutembeli, mukumuhonga. Ene mbadi mwa ni kwatire. Kemo, yi rikanye eyi ya pwire kutjanga.”
50Popo ko kumuthigha hakathishongero wahe ha tjire.
51No mungaghu ghumweya gha kukavire mwaye gha kuthe Jesusi. Naye momu ha mu kwate. 52Ko kupothora kwendi, gha thighe mwaye mumoko ghawo, no kutjira thiheha.
Jesusi kughutho ghondhango dhaWajuda
(Mat 26:57–68; Luk 22:54–55, 63–71; Joh 18:13–14, 19–24)
53Ha mu twara Jesusi kundhugho dhamupristeri shokuru. Omu ha kukongwedherire hapristeri wahe nawamayami nawakamarukwaro. 54Naye Petrusi gha mu kuthire kate kukuma mumarombe ghamupristeri shokuru. Ho gha hungumanine pofotji nawapika, gha yote. 55Hapristeri hohakuru nawakandhango wahe ha shanine thinongonona eshi ha mu paghe Jesusi, ene mbadi ha thi wanine. 56Hengi ha nongononine mbango kukwendi, yo ha kutjakerire hatunonga.
57Hamweya heman̂anyine ghughamba eshi: 58“Twa mu yuvire apa gha ningire eshi: ‘Mbo na dhingununa tembeli yu ha tendire nonyara. No munyima dhomayuva mahatu mbo na shokeka ghumweya ghokudhira kutenda nonyara dhawanu.’ ” 59Ene ngambi pakunongonona kemo, ha kutjakire.
60Ko kwimana mupristeri shokuru mukatji kawo, hepura Jesusi eshi: “Mbadi ghuna kuhutha we thinu ndi? Nye hana kunongonona wa hanu yokukoye?”
61Aye ne gha karire pore nomahuthero temba. Karo ha mwipura mupristeri shokuru eshi: “Yowe Kristusi ghomwana Nyambi ghokufumana thikuma ndi?”
62Jesusi gha huthire eshi: “Yame vene. Namwe mwahe mbo muna mono Mwanamunu ghana hungumana kurudyo rwaNyambi ghomukangcamu, no pa mbo gheya nomavuyi ghodiwiru.”
63Ko kupayaghura mupristeri shokuru thivata thendi ghuninga eshi: “Nye sho tu shanene karo hatunonga! 64Muna yuvu mwathinda mashamweno ghokwaNyambi; nye keho muna kughayara mwe?” No wahe ha mu teterire ndhango eshi: “Murandu wendi, murandu ghokumudya!”
65Hamweya ha tangire kumuthipera mate, no kufikerera rupara rwendi no kumupumura nomakonye ghuninga eshi: “Pumbe!” Hapika ne pa kumurambura notutondo.
Petrusi ghana kumuhamura Jesusi
(Mat 26:69–75; Luk 22:56–62; Joh 18:15–18, 25–27)
66Oku shime gha karera Petrusi mumarombe, ko kupita mukadhipika wamupristeri shokuru. 67Apa gha monine Petrusi, oku ghana kukukangura, ha mu rondonona, ghuninga eshi: “Nowe karo wa karire naJesusi ghomukaNasareti.”
68Aye ne gha kananine eshi: “Mbadi na yi dimuka no kutjwathana temba eshi nye ghuna kughamba.” Ko kushwagha kwendi pambandha. Popo vene ko kwigha ngondovoro.
69Apa gha mu monine karo yu mukamadi, ko kughamba kwendi kwawa hemanine po eshi: “Oyu ne ghumweya ghopapawo.” 70Petrusi gha hamurire karo. Kapupi kamanana ha ghamba kwawa hemanine po kwaPetrusi eshi: “Shemwa, owe ne ghowendi. Mbadi wa kona kukanana. Nowe ghomukaGalileya!”
71Ko kutanga kwendi kututuma no kwedha eshi: “Munu yo muna kughamba ne, mbadi na mu dimuka me!” 72Ngondovoro ko kwigha paruwadi; Petrusi ha vuruka man̂ando agha gha ghambire Jesusi kukwendi eshi: “Kughutho gho kwigha ngondovoro paruwadi, ghuna kunihamura ruhatu.” Ko kudira kwendi thikuma.
Currently Selected:
Markusi 14: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
Markusi 14
14
Hapristeri hohakuru hana kutenda ndhango
(Mat 26:1–5; Luk 22:1–2; Joh 11:45–53)
1Kwa thigharire mayuwa mawadi kughutho ghomembero ghoPaska no dyomaghuroto ghothuthun̂unyi. Hapristeri hohakuru nawakamarukwaro, ha shanine eshi ha mu kwate no ha mu paghe Jesusi. 2Ene ha ningire eshi: “Kadi mudifeste, maghana sho gha kare po meman̂anyeno mwawanu.”
Mayarekero ghomuBetaniya
(Mat 26:6–13; Joh 12:1–8)
3Apa gha karire Jesusi muBetaniya, mundhugho dhaSimoni ghomukayin̂ondwe kuthidyero, heya mukamadi nokawero komaghadhi ghothiwe mwene. Ko kuvukura kwendi kawero no gha terire pamutwi waJesusi. 4No hamweya ha yi tokotire no ha ningire eshi: “Pashanye ghana mwagharera maghadhi gha kemo? 5Yoyishi maghadhi gha ngo ghana piti manyinga mathere mahatu. No manyinga gha, hasha, ngo gha kutapera hahepwe.” Ko kutanga kwawo kuhendadhana mukamadi yu.
6Jesusi ne gha wa huthire eshi: “Mu mu thighe! Nye muna kumutokomenena? Aye ne ghana tendi thitenda thothiwa kukwange. 7Yoyishi hahepwe ha kara roruhe nenu, oku muna himi, mwa kona kuwaghamwena. Ame ne mbadi na kara nenu roruhe. 8Oyu ghana tendi ethi tha rikanya pangcamu dhendi, yo ghana tanga kuwetha yirama yange kumuvumbukero wange. 9Shemwa na kumutongwera eshi, kokuhe oku mba yaghura mbudhi dhino mbana ghamba karo eyi gha tendire no kumuvuruka.”
Yiruwera yokwamunyathi
(Mat 26:14–16; Luk 22:3–6)
10Munyima dhokenge yo, Judas Iskariyoti, ghumweya ghopawashadikumi nohawadi, gha yendire kwawapristeri hohakuru eshi gha ka mu hokore Jesusi kukwawo. 11Apa ha yi yuvire yi, ha shambererire thikuma no ha kuyongire eshi ha mu pe manyinga. Naye ha shana nako mwene dhokumuhokora.
Murarero ghokupongoka ghoghuhura
(Mat 26:17–30; Luk 22:7–23; Joh 13:21–30; 1 Kor 11:23–25)
12Mudiyuwa dyokutanga dyomaghuroto ghothuthun̂unyi, omu ha paghangire ndjwighana ghoPaska, ha mwipura hakathishongero wendi eshi: “Kudyango munye ghuna himi oku sho tu ka kuroghithere murarero?”
13Ko kutuma kwendi hakathishongero hawadi eshi: “Mu yende mudighumbo, muna ka wana munu, oyu ghana tengena kandimbe komeyu, ho mu ka mu kuthe. 14Momuhe omu sho gha kengene, mu kepure thindashandhugho eshi: ‘Muhongi wetu ghana kwipura eshi: Kupi sho gha dyere murarero nawakathishongero wendi?’ 15Ghana ka mu neghedha ngonda dhokuwiru edhi dha pwa kuroghitha. Mo sho mu ka tende mwara wetu.”
16Hakathishongero ha yendire mudighumbo no ha wanine yoyihe thika kenge gha yi wa tongwerire. Ko ka yareka kwawo murarero ghoPaska.
17Parunguro ko kwiya kwendi nawashadikumi nohawadi. 18Oku shime ha karera mukudya, ko kuninga Jesusi eshi: “Shemwa na kumutongwera eshi, yofotji ghopapenu ghana kunihokora, oyu ghana kudya Nange.”
19Awo ne ha tangire kundundumena no ha mwipurire yofotjiyofotji eshi: “Yame ndi?” Ghumweya naye paya eshi: “Ngwa yame?”
20Aye gha wa huthire eshi: “Yofotji ghopapenu mwashadikumi nohawadi, oyu na kuverera nendi mukaronga. 21Mwanamunu ghana kuyenda thika di ha yi mu tjangera; ene mawe kwamunu yu, ghana mu hokora! Ghuhunga ne, ngo mbadi gha pwire kushamuruka.”
22Shime ha karera mukudya, ko kudhamuna Jesusi ghuroto, ha tumera kwaNyambi, ha ghu yondora no ku ghu tapa kukwawo ghuninga eshi: “Mu tumbure, mu dye, eyi ne yirama yange.”
23Karo kemo gha tumburire thinwitho, ha tumera no kuthitapa kukwawo, nawo ha nwine mo wahe. 24Ha wa tongwera eshi: “Ghomanyinga ghange gha, manyinga ghoghundambo ghoghupya. Agha mbo gha ndendeshera kwawanu hohengi. 25Shemwa na kumutongwera eshi, mbadi mbo ni nwa karo kumbuyo dhothitondo thovinyu, kate mudiyuwa di mbo ni ka kuma mughufumu waNyambi. Po mbo ni ka nwa ko mumuhingo ghoghupya.”
26Apa gha manine kwimba dimbo dyomakughero, ha shwaghire no ha yendire kudirundu dyondhwe.
Medhero ghaPetrusi
(Mat 26:31–35; Luk 22:31–34; Joh 13:36–38)
27Mundhira gha ghambire Jesusi kukwawo eshi: “Mughuthiku ghuno, mwaheya muna kunimwagha. Yoyi ya pwa kutjanga eshi: ‘Na kushinya mudithi nondjwi dhina kukuharan̂anya.’ 28Ene munyima dhokuvumbuka kwange, mbo na mu piterera kuGalileya.”
29Petrusi gha vurumukire ghuninga eshi: “Ngambi ngo ha kumwaghe wahe, ame ne mbadi sho ni kumwaghe!”
30Jesusi gha mu huthire eshi: “Shemwa na kukutongwera eshi, mughuthiku ghuno, kughutho ghokwigha ngondovoro paruwadi, ghuna kunihamura paruhatu.”
31Ene Petrusi gha thudire eshi: “Ngambi ha ni fu noye, mbadi na kona kukuhamura!” Nawaheya ha ghambire kemo.
Jesusi muGetsemani
(Mat 26:36–46; Luk 22:39–46)
32Munyima ha kumine kudyango edi ha tire eshi Getsemani. Ha ningi kwawakathishongero wendi eshi: “Mu hungumane mwe pano, tango ni yende me, ni ka rapere.” 33Ha shimbi kwendi haPetrusi naJaokobusi naJohannesi. Aye ne ko kutanga kundundunena no kutoka. 34Ha ghamba kukwawo eshi: “Mudhimu wange ghuna kasha yira ni fe; mu kare mwe pano no mu rawe!”
35Apa gha henyine kamanana, ko kufurumana kwendi pamuve no gha raperire eshi: “Ngo ghuhunga, ngo dhi mu keruke nako dhi.” 36No gha kuhemine eshi: “Tate, yoyihe kukoye ne yiredhu, tundithe thinwitho thi thoyinyanda papange; ene kadi thika di na himi Me, shimengwa pamahimeno Ghoye.”
37Ko kuhuka kwendi, ka wa wana ne muturo. Ho gha ningire kwaPetrusi eshi: “Simoni, ghuna rara ndi? Mbadi wa kona kurawa viri dhofotji ndi? 38Mu rawe no mu rapere, maghana sho mu were mumayerekero. Yihima ne ko yi di, yirama ne yina kasha.”
39Jesusi gha yendire ko karo no gha hukurukire ndapero dhendi. 40Apa gha ka thighukire karo kukwawo, gha wa wanine karo hana rara; yoyi meho ghawo gha remwenine, no ha pirire non̂umbu kukwendi.
41Ha ka huka roghuhatu kukwawo no gha wa tongwerire eshi: “Mu rare ngenyu no mu turumuthe. Yina rikanya; nako ne dhi neya. Mu mone eshi, Mwanamunu kutapa hana kumutapa mumoko ghawan̂ore. 42Mwimane, tu yende, munyathi pepi gha di.”
Kuna kumukwata Jesusi
(Mat 26:47–56; Luk 22:47–53; Joh 18:3–12)
43Oku shime ha ghamba, ko kwiya Judasi ghopawashadikumi nohawadi. Nendi dyeyire dikuta dyawarume, edi ha tumine hapristeri hohakuru nawakamarukwaro nawamayami, noyimende yawo nomamburo ghawo. 44Mukakumuhokora ne gha wa dimukithire eshi: “Oyu sho ni ncumite, yo sho mu kwate no mwa mu thigherera.”
45Ko kuhenya Judasi kukwendi no kumurumeritha ghuncumita eshi: “Ghu rumere Muhongi.” 46Ha mu mbandukera kwawo ha mu kwate. 47Yofotji ghopawendi gha shwamunine thimende thendi no kukeshura ditwi dyamupika mupristeri shokuru. 48Jesusi gha ghambire kumbunga eshi: “Amwe mu neya kukunikwata noyimende yenu nomiramu dhenu, yira noshondoro Me ndi? 49Kehe diyuwa na karire nenu mutembeli, mukumuhonga. Ene mbadi mwa ni kwatire. Kemo, yi rikanye eyi ya pwire kutjanga.”
50Popo ko kumuthigha hakathishongero wahe ha tjire.
51No mungaghu ghumweya gha kukavire mwaye gha kuthe Jesusi. Naye momu ha mu kwate. 52Ko kupothora kwendi, gha thighe mwaye mumoko ghawo, no kutjira thiheha.
Jesusi kughutho ghondhango dhaWajuda
(Mat 26:57–68; Luk 22:54–55, 63–71; Joh 18:13–14, 19–24)
53Ha mu twara Jesusi kundhugho dhamupristeri shokuru. Omu ha kukongwedherire hapristeri wahe nawamayami nawakamarukwaro. 54Naye Petrusi gha mu kuthire kate kukuma mumarombe ghamupristeri shokuru. Ho gha hungumanine pofotji nawapika, gha yote. 55Hapristeri hohakuru nawakandhango wahe ha shanine thinongonona eshi ha mu paghe Jesusi, ene mbadi ha thi wanine. 56Hengi ha nongononine mbango kukwendi, yo ha kutjakerire hatunonga.
57Hamweya heman̂anyine ghughamba eshi: 58“Twa mu yuvire apa gha ningire eshi: ‘Mbo na dhingununa tembeli yu ha tendire nonyara. No munyima dhomayuva mahatu mbo na shokeka ghumweya ghokudhira kutenda nonyara dhawanu.’ ” 59Ene ngambi pakunongonona kemo, ha kutjakire.
60Ko kwimana mupristeri shokuru mukatji kawo, hepura Jesusi eshi: “Mbadi ghuna kuhutha we thinu ndi? Nye hana kunongonona wa hanu yokukoye?”
61Aye ne gha karire pore nomahuthero temba. Karo ha mwipura mupristeri shokuru eshi: “Yowe Kristusi ghomwana Nyambi ghokufumana thikuma ndi?”
62Jesusi gha huthire eshi: “Yame vene. Namwe mwahe mbo muna mono Mwanamunu ghana hungumana kurudyo rwaNyambi ghomukangcamu, no pa mbo gheya nomavuyi ghodiwiru.”
63Ko kupayaghura mupristeri shokuru thivata thendi ghuninga eshi: “Nye sho tu shanene karo hatunonga! 64Muna yuvu mwathinda mashamweno ghokwaNyambi; nye keho muna kughayara mwe?” No wahe ha mu teterire ndhango eshi: “Murandu wendi, murandu ghokumudya!”
65Hamweya ha tangire kumuthipera mate, no kufikerera rupara rwendi no kumupumura nomakonye ghuninga eshi: “Pumbe!” Hapika ne pa kumurambura notutondo.
Petrusi ghana kumuhamura Jesusi
(Mat 26:69–75; Luk 22:56–62; Joh 18:15–18, 25–27)
66Oku shime gha karera Petrusi mumarombe, ko kupita mukadhipika wamupristeri shokuru. 67Apa gha monine Petrusi, oku ghana kukukangura, ha mu rondonona, ghuninga eshi: “Nowe karo wa karire naJesusi ghomukaNasareti.”
68Aye ne gha kananine eshi: “Mbadi na yi dimuka no kutjwathana temba eshi nye ghuna kughamba.” Ko kushwagha kwendi pambandha. Popo vene ko kwigha ngondovoro.
69Apa gha mu monine karo yu mukamadi, ko kughamba kwendi kwawa hemanine po eshi: “Oyu ne ghumweya ghopapawo.” 70Petrusi gha hamurire karo. Kapupi kamanana ha ghamba kwawa hemanine po kwaPetrusi eshi: “Shemwa, owe ne ghowendi. Mbadi wa kona kukanana. Nowe ghomukaGalileya!”
71Ko kutanga kwendi kututuma no kwedha eshi: “Munu yo muna kughamba ne, mbadi na mu dimuka me!” 72Ngondovoro ko kwigha paruwadi; Petrusi ha vuruka man̂ando agha gha ghambire Jesusi kukwendi eshi: “Kughutho gho kwigha ngondovoro paruwadi, ghuna kunihamura ruhatu.” Ko kudira kwendi thikuma.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986