Markusi 15
15
Jesusi kughutho waPilatusi
(Mat 27:1–2, 11–31; Luk 23:1–5, 13–25; Joh 18:28—19:16)
1Murughura ko kukuyuva hapristeri hohakuru nawamayami nawakamarukwaro. Ko kumughanga kwawo Jesusi, ha mu tware no kumutapa kwaPilatusi. 2Pilatusi gha mwipurire eshi: “Yowe Fumu waWajuda ndi?” Ha mu hutha kwendi eshi: “Ghuna yi ghamba.”
3No hapristeri hohakura ha mu runderire yoyingi thikuma. 4Pilatusi ne ha mwipura karo eshi: “Mbadi ghuna kuhutha ndi? Mone kuyinongonona yoyingi eyi hana kukuretera.”
5Jesusi ne non̂umbi temba, kate kutetuka naye Pilatusi.
6Mudiyuwa dyoPaska gha karire nomuragho ghokushutura mukan̂otwa, oyu hana kumbera. 7Ene pa karire Barabasi mudorongo pofotji nawayendhendi, awa ha paghire munu muyishatana yawo. 8No mbunga dha kughererire no dha kumberire eshi, gha wa tendere thika di ya kara roruhe. 9Pilatusi gha wa huthire eshi: “Ni mu shuture Fumu waWajuda ndi?” 10Yoyi gha dimukire eshi, hapristeri hohakuru ne munya hana mu tapera.
11No hapristeri hohakura ha tjokedhire mbunga eshi, ghuhunga ne, gha wa shutwere Barabasi. 12Ha wa hutha karo Pilatusi eshi: “Nye sho ni tende, noyu muna toyo eshi, Fumu waWajuda?”
13Ko kukushomonona kwawo eshi: “Mu mu pamarere kuthikurushe!”
14Pilatusi ha wepura eshi: “Yishinya munye gha shinya?” Awo ha kushomonine karo eshi: “Mu mu pamarere kuthikurushe!”
15Yoyi Pilatusi gha shanine kurikanyithera mbunga yihima yadho, ha wa shutwera Barabasi; no pa gha manine kumwashura Jesusi, ha mu tapa kwendi ha mu pamarere.
16Hamashorondate ko kumutwara kwawo mumarombe gha mupanguri ghoditunga, no ha kongwedhire mbunga dhawayendhawo. 17Ko kumukava kwawo mwaye ghoghukihu no kudhinga n̂ata dhomighunga ha dhi mu kureke. 18Ha mu furumekire eshi: “Ghu rumere Fumu waWajuda!” 19Ko kumumwashura kwawo nokambu pamutwi no kumuthipera mate no kutongamena kughutho wendi, ghumukumadheka. 20Apa ha manine kumusherera kemo, ha mu shuturire mwaye wendi no kumuvateka yivata yendi. Ko kumthindadheka ha mu tware kudyango dyokumupaghera.
Mapamarero ghopathikurushe
(Mat 27:32–56; Luk 23:26–49; Joh 19:17–30)
21Ko kuhangana kwawo munu ghodina dyoSimoni ghomukaSirene, wiha wawaAleksanderi naRufusi, oku ghana ka tunda kumapya. Yo ha thinenekire eshi gha mu yakure thikurushe. 22Oku hana kumutwara kudyango dyaGolgota, kuninga eshi dyango dyotuteneghere. 23Ha mu pa kwawo vinyu ghokuvunga noghungongorwa eshi gha nwe. Ene mbadi gha yi nwine. 24Apa ha manine kumupamarera, ko kukutapera yivata yendi, ha tendere po fungu‐fungu eshi, yingatji sho gha wane kehe yu. 25Omu ne munako dhoviri dhoghuhatu, apa ha mu pamarerire. 26No thitjanga thokumukumadhekitha tha ninga ngeno eshi: Fumu waWajuda. 27Nendi ha pwire kupamarera karo haringiringi hawadi, yofotji kurudyo, no ghumweya kurumoho. 28Kemo ya pwa kurikanyitha yipumba eyi ya ninga eshi: “Aye gha pwa kupangwera kwawaringiringi.”
29Harupitandhira ha mu shererire noghupunga‐punga mitwi dhawo eshi: “Ha! Yowe ghokudhingununa tembeli no kumutendurura mumayuwa mahatu, 30kughamwene ghothinda, ho ghu shuruke ko kuthikurushe!”
31Hapristeri nawakamarukwaro nawo karo ha mu shererire eshi: “Hawonawo ghana ghamwenanga, thinda ne kadi wa kukughamwena. 32Gha shuruke keho Kristusi, ghoFumu waIsragheli kuthikurushe eshi, tu yi mone, no tu tawe!” Karo nawa ha pwire kupamarera nendi ha mu shamaghurire.
33Apa dha rikanyine viri dhoghukwoko noghofotji ha di kara dikokore kate kunako dhoviri dhoghukwoko noghune. 34Muviri dhi dhoghukwoko noghune ha kugherera Jesusi nodiywi dyodikuru eshi: “Eloi, Eloi, lama sabagtani?” Kuninga eshi, “Nyambi wange, Nyambi wange, nye ghuna ni mwagherera kemo?”
35Hamweya awa hemanine po, ha yi yuvire no ha ningire eshi: “Mu yuve, Eliya ghana kwitha.” 36Ko kutjira ghumweya gha tjavangedhe ncokwe mumasheshe no kudhikureka kukambu gha mu poporithe ko kuninga eshi: “Tango tu yi mone eshi, ngeshi ghana kwiya Eliya gha mwambure ko.”
37Ene Jesusi gha kughererire nodiywi dyodikuru thikuma no gha hurangedhire moyo.
38No dihina dyongonda dhotembeli dya yatukire kutunda kuwiru kate pamuve. 39Apa gha yi monine nduna wawamashorondate, oyu ghemanine kughutho ghothikurushe, oku ghana kukugherera Jesusi no kuhurangedha moyo wendi, ha ningi eshi: “Shemwa, murume yu gha karire Mwana Nyambi.”
40Pa karire karo hakamadi awa hemanine kokayenda no ha yi monine. Mukatji kawo ha karire mo haMaria Magdalena naSalome naMaria ghonyina wawaJakobusighana naJosese. 41Awa ha mu kuthire no kumukarera muGalileya, nohakamadi hamweya, awa ha mu kuthire kuJerusalema.
Mavumbekero ghaJesusi
(Mat 27:57–61; Luk 23:50–56; Joh 19:38–42)
42Parunguro rodiyuwa di ne, dya kuroghitha yokuhutho ghoSabata.
43Heya mukandhango ghodikuto, Josefu ghomukaArimateya, oyu gha tatererire naye ghufumu waNyambi. Gha yendire kwaPilatusi gha ka yereke kukumbera mwimba waJesusi. 44Na Pilatusi gha tetukire eshi kare nga fu; hetha kwendi nduna wawamashorondate no kumwipura eshi, kare‐kare ngafu ndi? 45Apa gha yi yuvire yi kwanduna, ko kutapa kwendi mwimba kwaJosefu. 46Ko kughura kwendi mahina, ha mwambura kuthikurushe no kumudhinga mumahina, ha mu vumbeka mumbira dhomawe ghokushoka. Ko kugharumwena kuthero diwe dyokuyandheritha. 47Ene Maria Magdalena naMaria ghonyina Josese, ha monine eshi, kupi hana mu paka.
Currently Selected:
Markusi 15: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
