Markusi 2
2
Murume ghomurema ghomuKafarnaghumu
(Mat 9:1–8; Luk 5:17–26)
1Munyima dhomayuwa ghomapu, gha hukire karo muKafarnaghumu. No hanu ha yuvire eshi, mundhungho gha di. 2Hengi ha tambukire ko, ene kuthero mbadi ha wanine dyango. Jesusi ne pakuwayuvitha mbudhi. 3Harume hane ha shimbire murema. 4Ene pamurandu ghombunga dhawanu, mbadi ha konine kukuma kukwendi. Ko kuyora kwawo mutuya ghondhugho, mudyango di ghemanine Jesusi. Ha tupekedha kwawo thirongo namurema po. 5Pakumona Jesusi matawero ghawo, ha ghamba kwamurema eshi: “Mwanange, maharwero ghoye ghana pu kuthigherera.”
6Ko kukwipudhura hakamarukwaro hamweya wa ha karire po, mumitjima dhawo eshi: 7“Nye ghana kushedhera yu murume Nyambi? Yidye ghokukona kuthigherera maharwero, shimengwa yofotji, eshi Nyambi.”
8Jesusi ne gha dimukire eyi ha ghayarire. Ko kuwatongwera kwendi eshi: “Nye muna kukwipudhwera yoyinu yino mumitjima dhenu? 9Nye yoyiredhu po, kutongwera murema eshi: ‘Maharwero ghoye ghana pu kuthigherera,’ endi kuninga eshi: ‘Wimane no ghu tumbure thirongo thoye, ghu ka yende’? 10Ene mu dimuke eshi, Mwanamunu gha kara nongcamu pamuve dhokuthigherera maharwero.” Yo ghana ningi kwamurema eshi: 11“Na kukutongwera eshi: Tumbure thirongo thoye no ghu huke kukwenu!”
12Shemwa hemana kwendi wangu, no gha tumburire thirongo thendi, muthitunumeho thawahe. Hanu wahe ko kukugha Nyambi ghuninga eshi: “Thinu thokenge yo mbadi twa thi mona panganyi!”
Matorwero ghaLevi
(Mat 9:9–13; Luk 5:27–32)
13Gha yendire karo kumbadi dhodikuruviya. Nombunga dhodhihe dheyire kukwendi, no gha dhi hongire. 14Apa gha henyine kughutho kamanana, ko kumona kwendi Levi, ghomwana Alfeghusi, mundhugho dhodiketo. Jesusi gha mu ningire eshi: “Ni kuthe!” Hemana kwendi gha mu kuthe.
15Pakukara Jesusi mundhugho dhaLevi kuthidyero, ko kwiya haketethi hohengi nawakamaharwero. Nawakathishongero wendi nawo po. Wingi wawo wa ha mu kuthire, ha dire nendi pofotji. 16Apa ha yi monine hakamarukwaro naWafarasayi, eshi pofotji ghana kudya nawaketethi nawakamaharwero, ko kwipura kwawakathishongero wendi eshi: “Nye yi ghana kudyera no kunwa, pofotji nawakamirandu?”
17Pakuyiyuva Jesusi yi, gha wa huthire eshi: “Oyu gha di ndjewa‐ndjewa, mbadi gha nyanda mwirukithi. Shimengwa yu gha hendama. Ame ne mbadi neyire kukwitha hahunga keho, ene kukupirura hamango.”
Yokudhirerekedha
(Mat 9:14–17; Luk 5:33–39)
18Hakathishongero waJohannesi nowaWafarasayi, ha karire mukudhirerekedha. Ko kwiya hanu ha mwipure Jesusi eshi: “Nye hana kudhirerekedhera hakathishongero waJohannesi nowaWafarasayi. Hoye ne mbadi hana kudhirerekedha?”
19Jesusi ne gha wa huthire eshi: “Kukona kudhirera hangenda homukandi, oku ha di na thindashamukandi ndi? 20Ene mbo gha neya mayuwa, agha mbo gha wa yakunutha po mukamukandi. Ndani po mbo ha dhirerekedha nawo mumayuwa gha.
21“Mbadiko yu ghokuriveka thirivo thothipya pathivata thothikurukuru. Yoyishi maghana sho thi tungunuke po, no sho di yaghurupe dituywera dyatho. 22Karo noyofotji temba gha kona kupingwerera vinyu mukandimbe kokakurukuru, yoyi vinyu yu, ghana kuyoghorora kandimbe ka. No kandimbe kana kuvinya no kana kuyatuka. Yodigho vinyu kumutera mukandinbe kokapya.”
Jesusi ghana kuhonga yoSabata
(Mat 12:1–8; Luk 6:1–5)
23Mudiyuwa dyoSabata, gha tjinaghanine Jesusi nawakathishongero wendi, mumayindha ghomapya. Awo ne ha fenyine mbeya, ha tafune. 24Ko kumutongwera Hafarasayi eshi: “Mone, nye hana kutendera yinu yokudhira kushutura muSabata.”
25Aye ne gha wa huthire eshi: “Mbadi mwa toya panganyi eyi gha tendire Davita, apa gha karire mughukukutu ndi? Nawa ha karire nendi eshi ha fire ndhara. 26Ghengenine mundhugho dhaNyambi mumayuwa ghamupristeri shokuru Abiyatari. No gha dire ghuroto ghomuyambo, oghu ha dhirekire kwakehe munu. Shimengwa hapristeri. Ene ngambi kemo, gha taperire ko wa ha karire nendi.”
27Karo ha ghamba eshi: “Sabata ne ha mu pakera po hanu kadi hanu kuSabata. 28Yodigho eshi, Mwanamunu ne Fumu, karo yoghoSabata.”
Currently Selected:
Markusi 2: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
