Markusi 3
3
Murume ghokughara dyoko
(Mat 12:9–14; Luk 6:6–11)
1Mumayuwa gha, ghengenine karo musinagoge. Amo ne mwa karire murume ghokughara dyoko. 2Hamweya ha shanine kumuheta. Yodigho ha mu konekire, eshi ngwa n̂anyi gha mwirukithe muSabata. 3Jesusi gha ningire kwamurume yu eshi: “Wimane mukatji kawo.”
4Po gha ghamberire kukwawo eshi: “Yapwa kufundhwera muSabata eshi, kutenda ghunongo endi ghuyi? Kuparitha endi kupagha?” Awo ne kupira non̂umbu temba.
5Gha wa rerururire noghupata, no gha tokotire kughukukutu ghomitjima dhawo. Ha ghamba kwamurema yu eshi: “Ghonyonone nyara dhoye!” Aye gha ghonyononine nyara dhendi, nonyara dhendi dherukire. 6Ko kushwagha Hafarasayi no ha tendire ndhango pofotji nawakaHerodesi, eshi ha mu paghe Jesusi.
Jesusi muGalileya
7Jesusi ne gha hukire nawakathishongero wendi kudikuruviya. Nombunga dhodhingi, edhi dha tundire muGalileya no muJudeya, dha mu kuthire. 8Karo kemo hakaJerusalema nawakaIdumeya, no hakathambodiya dhaJordani, nawa ha tundire muTirusi no muSidoni. Wahe heyire kukwendi pakuyuva yitenda yendi no ha hakire kumumona.
9Ko kutongwera hakathishongero wendi eshi, ha mu pereke muwato. Yoyishi hanu ne hengi thikuma, maghana sha mu thunda thunde. 10Yoyi gherukithire hohengi thikuma, yo heyerire hakakukorwa kukwendi, eshi ha mu kundame. 11No kehe pano apa nga mu monanga wa ha karire nomipepo dhodhimango, nga ha tongamenanga kughutho wendi no ghukugherera eshi: “Owe ne ghoMwana Nyambi!”
12Aye ne nga wa shinganga, eshi ha mu hokora kwawanu.
Matorwero ghawapostoli dikumi nohawadi
(Mat 10:1–4; Luk 6:12–16)
13Ko kudhina Jesusi kudirundu no ghethire kukwendi awa gha himine. Nawo ha henyine kukwendi. 14Gha tororire dikumi nohawadi eshi ha kare hapostoli wendi. Gha kone kuwatuma ha ka yuvithe mbudhi dhodhitowi. 15No ha wanine ngcamu dhokwirukitha no kutjidha hashatani.
16Awa gha tororire ne wano: Simoni, gha mu tire dina dimweya eshi Petrusi. 17NaJakobusi ghomwana Sebedeghusi, naJohannesi ghominendi, awa gha tire eshi Boghanergesi, kuninga eshi: Hana mushoro. 18NaAndreyasi naFilipusi, naBartolomeghusi naMateghusi, naTomasi naJakobusi ghomwana Alfeghusi, naTadeghusi naSimoni ghomununeki, 19naJudas Iskariyoti, oyu gha mu hetire.
Mushedho oghu ha tendire hakamarukwaro
(Mat 12:22–32; Luk 11:14–23; 12:10)
20Kokwingena karo Jesusi nawakathishongero wendi mundhugho. No mbunga dha mu kuthire nadho karo. Aye nawakathishongero wendi ha pirire nako dhokudya. 21Apa ha yi yuvire hendi, ko kushwagha kwawo, eshi ha mu shimbe nomuthineneko. Yoyi ha ghayarire eshi: “Ngwa ghana ghundumuka.”
22No hakamarukwaro, awa ha tundire muJerusalema, ha ningire eshi: “Ghana kara naShadipinyi! No pangcamu dhaShatani shokuru ghana kutjidha hashatanighana.”
23Ha wetha kwendi no gha ghambire nawo mumaghanekero eshi: “Ngepi di gha kona Shatani kutjidha Shatani muyendhendi? 24Kehe ghufumu ghokukutjinuna, ghufumu ghu, ghuna kupwa. 25No ndhugho dhokukuyakunutha dhothinda, mbadi mbo dhi kara po. 26Ngeshi Hashatani ha kutjinuna hathinda, ngcamu dhawo ne dha kona kutanara ndi? Vadho, nadho dhina kuhura.
27“Noyofotji temba gha kona kwingena mundhugho dhandwarume, no kwidha mo yinu yendi, ngeshi mbadi ghana mu ghanga tango mukangcamu yu. Munyima ndani po sho gha mu kungure ndhugho dhendi.
28“Shemwa, na kumutongwera eshi: Maharwero nomishedho dhawahe, mbo yina pu kuthigherera. 29Ene mukakuharura kwaMupepo ghoKupongoka, mbadi gha kona kuwana mathigherero. Ne mbo ghana wana murandu mundhango dhokuroruhe.” 30Eyi gha ghamberire kemo Jesusi ne, yoyi ha mu ningire eshi: “Gha kara nomupepo ghoghumango.”
Hapa Jesusi
(Mat 12:46–50; Luk 8:19–21)
31Diyuwa dimweya, ko kwiya hapendi nanyina. Oku shime hemanena panunda, ko kutuma munu, gha ka mwithe. 32Mbunga ne dha mu dhingire. Ko kumutongwera kwawo eshi: “Nyoko nawapoye waya hana kukushana panunda.”
33Aye gha wa huthire eshi: “Yidye nawe na wadye hapange?” 34Ha rerurura kwendi wa ha mu dhingire, no gha ghambire eshi: “Oyu ne yonawe nawapange. 35Yoyishi, yomuhe ghokutenda mahimeno ghaNyambi, yonawe non̂amba dhange.”
Currently Selected:
Markusi 3: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
Markusi 3
3
Murume ghokughara dyoko
(Mat 12:9–14; Luk 6:6–11)
1Mumayuwa gha, ghengenine karo musinagoge. Amo ne mwa karire murume ghokughara dyoko. 2Hamweya ha shanine kumuheta. Yodigho ha mu konekire, eshi ngwa n̂anyi gha mwirukithe muSabata. 3Jesusi gha ningire kwamurume yu eshi: “Wimane mukatji kawo.”
4Po gha ghamberire kukwawo eshi: “Yapwa kufundhwera muSabata eshi, kutenda ghunongo endi ghuyi? Kuparitha endi kupagha?” Awo ne kupira non̂umbu temba.
5Gha wa rerururire noghupata, no gha tokotire kughukukutu ghomitjima dhawo. Ha ghamba kwamurema yu eshi: “Ghonyonone nyara dhoye!” Aye gha ghonyononine nyara dhendi, nonyara dhendi dherukire. 6Ko kushwagha Hafarasayi no ha tendire ndhango pofotji nawakaHerodesi, eshi ha mu paghe Jesusi.
Jesusi muGalileya
7Jesusi ne gha hukire nawakathishongero wendi kudikuruviya. Nombunga dhodhingi, edhi dha tundire muGalileya no muJudeya, dha mu kuthire. 8Karo kemo hakaJerusalema nawakaIdumeya, no hakathambodiya dhaJordani, nawa ha tundire muTirusi no muSidoni. Wahe heyire kukwendi pakuyuva yitenda yendi no ha hakire kumumona.
9Ko kutongwera hakathishongero wendi eshi, ha mu pereke muwato. Yoyishi hanu ne hengi thikuma, maghana sha mu thunda thunde. 10Yoyi gherukithire hohengi thikuma, yo heyerire hakakukorwa kukwendi, eshi ha mu kundame. 11No kehe pano apa nga mu monanga wa ha karire nomipepo dhodhimango, nga ha tongamenanga kughutho wendi no ghukugherera eshi: “Owe ne ghoMwana Nyambi!”
12Aye ne nga wa shinganga, eshi ha mu hokora kwawanu.
Matorwero ghawapostoli dikumi nohawadi
(Mat 10:1–4; Luk 6:12–16)
13Ko kudhina Jesusi kudirundu no ghethire kukwendi awa gha himine. Nawo ha henyine kukwendi. 14Gha tororire dikumi nohawadi eshi ha kare hapostoli wendi. Gha kone kuwatuma ha ka yuvithe mbudhi dhodhitowi. 15No ha wanine ngcamu dhokwirukitha no kutjidha hashatani.
16Awa gha tororire ne wano: Simoni, gha mu tire dina dimweya eshi Petrusi. 17NaJakobusi ghomwana Sebedeghusi, naJohannesi ghominendi, awa gha tire eshi Boghanergesi, kuninga eshi: Hana mushoro. 18NaAndreyasi naFilipusi, naBartolomeghusi naMateghusi, naTomasi naJakobusi ghomwana Alfeghusi, naTadeghusi naSimoni ghomununeki, 19naJudas Iskariyoti, oyu gha mu hetire.
Mushedho oghu ha tendire hakamarukwaro
(Mat 12:22–32; Luk 11:14–23; 12:10)
20Kokwingena karo Jesusi nawakathishongero wendi mundhugho. No mbunga dha mu kuthire nadho karo. Aye nawakathishongero wendi ha pirire nako dhokudya. 21Apa ha yi yuvire hendi, ko kushwagha kwawo, eshi ha mu shimbe nomuthineneko. Yoyi ha ghayarire eshi: “Ngwa ghana ghundumuka.”
22No hakamarukwaro, awa ha tundire muJerusalema, ha ningire eshi: “Ghana kara naShadipinyi! No pangcamu dhaShatani shokuru ghana kutjidha hashatanighana.”
23Ha wetha kwendi no gha ghambire nawo mumaghanekero eshi: “Ngepi di gha kona Shatani kutjidha Shatani muyendhendi? 24Kehe ghufumu ghokukutjinuna, ghufumu ghu, ghuna kupwa. 25No ndhugho dhokukuyakunutha dhothinda, mbadi mbo dhi kara po. 26Ngeshi Hashatani ha kutjinuna hathinda, ngcamu dhawo ne dha kona kutanara ndi? Vadho, nadho dhina kuhura.
27“Noyofotji temba gha kona kwingena mundhugho dhandwarume, no kwidha mo yinu yendi, ngeshi mbadi ghana mu ghanga tango mukangcamu yu. Munyima ndani po sho gha mu kungure ndhugho dhendi.
28“Shemwa, na kumutongwera eshi: Maharwero nomishedho dhawahe, mbo yina pu kuthigherera. 29Ene mukakuharura kwaMupepo ghoKupongoka, mbadi gha kona kuwana mathigherero. Ne mbo ghana wana murandu mundhango dhokuroruhe.” 30Eyi gha ghamberire kemo Jesusi ne, yoyi ha mu ningire eshi: “Gha kara nomupepo ghoghumango.”
Hapa Jesusi
(Mat 12:46–50; Luk 8:19–21)
31Diyuwa dimweya, ko kwiya hapendi nanyina. Oku shime hemanena panunda, ko kutuma munu, gha ka mwithe. 32Mbunga ne dha mu dhingire. Ko kumutongwera kwawo eshi: “Nyoko nawapoye waya hana kukushana panunda.”
33Aye gha wa huthire eshi: “Yidye nawe na wadye hapange?” 34Ha rerurura kwendi wa ha mu dhingire, no gha ghambire eshi: “Oyu ne yonawe nawapange. 35Yoyishi, yomuhe ghokutenda mahimeno ghaNyambi, yonawe non̂amba dhange.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986