Markusi 5
5
MukaGadara oyu gha karire nomupepo ghoghuyi
(Mat 8:28–34; Luk 8:26–39)
1Oku shime ha karera kenga yo, ko kukutheka kwawo thambodiya dhodikuruyiva, muditunga dyawakaGadara. 2Apa gha kandukire muwato, ha mu hangana murume, oyu gha tundire mudingurungoma no gha yarire nomupepo ghoghumango. 3Yoyishi matungo ghendi ne mudingurungoma. Noyofotji temba gha konine kumughanga nomenge. 4Nga pwanga kughanga rwingi kumaghuru nomenge, ene menge ghomahe nga mananga kutjinaghura. Po ya karerire eshi noyofotji temba gha konine kumughombeka. 5No nga kughereranga roruhe ghuthiku nomutenya pamarundu nomumangurungoma, no kukuremeka thinda nomawe.
6Apa gha kambekedhire Jesusi kokayenda, ha dhondoka kwendi gha kuvame kughutho wendi. 7Ha kugherera kwendi eshi: “Nye sho tende nange we Jesusi, ghoMwana Nyambi Shokuru? KwaNyambi na kwedha, wa ni tjitjupitha me.” 8Yoyi Jesusi gha manine kuraghura eshi, mupepo ghoghumango ghu shwaghe mwa munu yu.
9Ko kumwipura Jesusi eshi: “Yowe dye?” Aye gha mu huthire eshi: “Yame Legio, kuninga eshi: twengi twe!” 10Ho gha mu kanderire thikuma eshi: “Wa tu tjidha mo muditunga dino!”
11Kumarundu kwa dyererire katundhu koyinguru. 12Hamipepo dhodhimango wahe hamu kan̂dererire eshi gha wengeneke muyinguru yi. 13Jesusi ne gha yi wa tawedhire, no mipepo dho dhimango dha shwaghire mumwendi no dha kengenine muyinguru. No katundhu kokahe ka karire mayovi mawadi. Ka shokomokire kudirun̂da ho ka wererire mudikuruviya, no ka fire.
14Hakakuditha yinguru ha tjirire, no ha ka yi thimwetwedhire kumaghumbo. Ko keya haguva hathinda eshi, ha mone eyi yina hokoka. 15Awo ne ha ka mu wanine murume yu gha karire nomipepo dhodhimango. Ghana hungumana no ghana shupata, no maghano ghendi ghana mu hukero. Ko kututukwa kwawo thikuma. 16Awa ha yi monine, ha tongorire kwawa heyire eshi, ngepi di gha neruka yu, gha karire nomipepo dhodhimango.
17Nawahe ha mu kandererire Jesusi eshi, gha tunde muthiko thawo.
18Pakuperama Jesusi muwato, ko kumukumbera yu gherukire eshi: “Ni yende noye!”
19Ene Jesusi gha mu shwenenine ghuninga eshi: “Yende kukwenu no kwawapoye. No ghu ka wa thimwetwedhere eshi, ngepi di ghana kughamwena Nyambi, no ngepi di ghana kara nothin̂eke noye.”
20Naye ha nyangutuka gha huke, no gha ka thimwetwedhire kuthiko thomambara dikumi eshi, thitenda munye thothikuru ethi ghana tendi Jesusi kukwendi, no wahe ha tetukire.
Mukamadighana ghomwana Jayirusi, namukamadi oyu gha nyandire kun̂ongoro
(Mat 9:18–26; Luk 8:40–56)
21Jesusi gha tjinaghanine karo thambodiya, no mbunga dhodhikuru dha mu kuthire. 22Ko kwiya nduna ghumweya ghosinagoge ghodina dyoJayirusi. Apa gha monine Jesusi, ha furumana kumapadhi ghendi. 23No gha mu kandererire thikuma eshi: “Mwanange pakuhurangedha moyo gha di. Wiye no ghu kambeke dyoko dyoye papendi, n̂anyi gheruke no gha pare.”
24Hemana no gha yendire nendi. Mbunga dhodhingi dha mu kuthire no dha mu thunda‐thundire.
25Namukamadi ghumweya oyu gha karire non̂ongoro myaka dikumi nodhiwadi naye po. 26Gha nyandire thikuma kwanganga pakutaghera ghushwi wendi, ene nomaghamweno temba. Shimengwa kumushangumwena vene. 27Pakuyuva yaJesusi, ko kuthunda kwendi mbunga, kate kukundama kumwaye waJesusi. 28Yoyi gha ghayarire eshi, ngo ni kundame kumwaye wendi, ngo ni ruke.
29Kapupi kamanana, ko kughuma tushorondondo tomanyinga no gha kuyuvire eshi, gha neruka. 30Apa gha kudimukire thinda Jesusi eshi, ngcamu mumwendi dhina shwagha, ha piruka kwendi ghepure kumbunga eshi: “Yidye yu ghana kundama kumwaye wange?”
31Hakathishongero wendi ne ha mu huthire eshi: “Ghuna mono eshi, mbunga ne kuthunda‐thunda dhina kukuthundathunda, owe ne pakwipura, yu ghana kukundama.”
32Ko kuwarondonona kwendi gha mone eshi, yidye ghana yi tendi yi. 33Mukamadi yu gha yapire no kututuma. Yoyi gha dimukire eyi ya hokokire kukwendi. Heya gha kunyumane kughutho waJesusi, no kuthimwetwedha ghushemwa wendi ghoghuhe. 34Jesusi gha ningire kukwendi eshi: “Mukamadi, matawero ghoye ghana kughamwena. Yende muthiraro, yikorwa yoye yina kutundu.”
35Oku shime ha ghamba Jesusi, ko kwiya hayitumi homundhugho dhaJayirusi, ha mu tongwere eshi: “Mwanoye ne ghana fu. Nye ghuna kumutwamithera karo yu Mitiri!”
36Pakuyuva Jesusi yitongora yi, gha ningire kwaJayirusi eshi: “Wa yapa, tjimape!” 37Ha shingi wahe eshi ha mu kutha, shimengwa haPetrusi naJakobusi naJohannesi ghomina Jakobusi. 38Hengena kwendi mundhugho dhanduna ghosinagoge, no gha yuvire madiro ghawakakutokota. 39Ko kuwashinga kwendi eshi: “Nye muna kudirera kemo? Mwanuke ne kurara ghana rara.”
40Awo ne ha mu hekire thikuma. Munyima ha wa shwaghitha mo wahe. Hetha kwendi wiha nanyina mwanuke, nawa heyire nendi. Ko kupinuka kwawo kungonda dhi ha rangekire mwanuke. 41Ha kwata kwendi dyoko dyamwanuke ghughamba eshi: “Talita kumi!” Kuninga eshi: “Mukamadighana, tumuke!”
42Hemana kwendi popo no gha tangire kuyenda, yoyi gha karire nomyaka dikumi nodhiwadi. Nawahe ha yi tetukire thikuma. 43Jesusi ne gha wa shingire eshi, ha yi tongora kwawamweya. Ko kuwaninga eshi: “Mu mu pe mwanuke yidya!”
Currently Selected:
Markusi 5: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
