Mayanzame 2
2
Gédidi SaNzambé gémaviga
1Vamabuéa nyaa asueti éaPentecôte, muetso ane ameetsa Jésus mitémamie amakôkanganaka tungu épo. 2Tsina na tsina, nzongodine émaviga g’ôba ga ndungu éagékunga. Ndungune émookanô ebee wetso ômadigaahngô. 3Omee ane ameena soto gémaaga g’ôba gégono na dimeni. Dimaaga na dimasuma, ôvo ôvo na gô ngongo amiôtsé mioma. 4Gédidi SaNzambé gémeengéa gô mitéma miaô na gémamiyuéséda na ngii. Omeaa amabandôa évovo yaanga yôgi disiikédu ahngô. Amavovo gamatévédu ahngô na Gédidi SaNzambé gôévovo.
5Gô ndéô nene gômadenganô gô Jérusalem Ajuif amaneegeda Nzambé, ahmaviga gô tsengeye yetso yava tsina. 6Vamookanô nzongodine, géômbé gévôni gémakôkangana. Ahmakuadima na ahmasôbasôbana gôébégô agendee muetso amookô ane ameetsa Jésus mitémamie, avovo môma na môma yôgiye dimabôtu agendee. 7Agendee amatsapéô na amasôbasôbana na gényônga mbe: ?Ane avovoni adua ka te asi Galilée aduaa? 8?Wa n’anyô asi dipo tsenge tôôkô ahngô avovo gô yôgiye dimabôtu wa n’anyô nayee? 9We agenda tômaviga gô tsenge diyekani. Tômaviga gô Parthes, na gô Médie na gô Elam, na gô Mésopotamie, na gô Judée na gô Cappadoce na gô Pont éndé gô tsenge étetu mbe Asie. 10Tômaviga gô Phrygie na gô Pamphylie na gô Egypte na gô gésa saLibye gébambana na Cyrène. Gôndéké n’avo amaviga gô Rome. 11Tôndéké te ane amabôtu gô éongo éAjuif na ane ameengéa gô gésôga sAjuif. We agenda tômaviga dôta gô Crète na go Arabie. Buéyé nane, we muetso tôôkô na vede gavovo omeaa yôgiye yasô yaminongo mietso gôékuméda Nzambé gô mayanza medi mavôni. 12Agendee muetso amatsapéô ti v’ekôdéô atsapéô. Ameevôana anguene n’anguene mbe: ?Ebégô édué ékegea vita nayee? 13Na avo amadeta ane ameetsa Jésus mitémamie mbe: Adua andé ti gô édangi éamaduku.
Meekédu maPierre
14Pierre amatema gôévovo. Akedi ane amatômukuni nzima na môvo amatema n’edi. Pierre amavovo na géômbége na ôgi akangégangé mbe: Anye Ajuif, n’anye muetso nôdigaa gô Jérusalem vôtanganôni, ôôkôni édué. 15Omee adua asaba gô édangi gatasanye. ?Omeaa angaba gô édangi kômbéné madeo ésitsakama nayee? 16Ene éeni anye éva te éne émavovo Joël, môpandôédi ambeego amatasa maNzambé mbe:
17Nzambé amavovo mbe: Oôkôni éne éngabuéa gô ndéône éamôyusumédu.
Me Nzambé nangatsanzabanéda Gédidige sami na gôndé oma muetso.
Anee wanyô amôgôô na anee wanyô ageto angapandôéda matasa mami.
Minzambu mianyô na tômbô yanyô angeena ndoti.
Peeye yanyô yebôôtô dingeena miôtô.
18Na gô pie gô ndéô nene, nangatsanzabanéda Gédidi Sami na gôndé ayanzi ami amôgôô na ayanzi ami ageto.
Na ahngô angapandôéda oma matasa mami.
19Nôngeena émbégéa g’ôba na étsutsuku gô tsinane énganôtubéda me.
Gôngaba nzina, na soto na nzôngé éamôtutu.
20Kômbéne éngakukégu n’evitsi.
Ngondene éngakoga na tsoo ga nzina.
Mabégô mema mangeenanô te ndéône éagénikéô saKumu madeô ésibuéa.
Génikéô sedi te ndéô épôni éngeenanô géneegage sedi setso.
21Endé te nane. Muetso angabambéa ina aKumu Jésus angoobou.
22Pierre amavovo mbe: Anye oma aIsraël, ôôkôni mabégô mema. Nzambé gô inedi ameetsa anye Jésus môsi Nazareth. Enyanga éndé n’edi éaNzambé émeenanô gô mane mameendangô va gatse awa n’anyô. N’anye nôsabômu gameenda Jésus mavétô, n’embégéa éangudi yaNzambé, na mabégô manyônganéôni masoongôa môma ésupua. 23Jésus madeo asibôtu, Nzambé amamenya mbe oma angamôkaba. Te ône amakomedanye va gésumu sowa. Nômamôyôhéda na mogo moma asagô. 24Nzambé amamôkundua g’ôwa. Amamôtsôbôa ésengo éowa. Owa ôsibé n’otômu gôédingéda Jésus gô ngii. 25Ebégôe te éne émeevéda môma aNzambé David va mbeego mbe:
Gô ndéô yetso me nameena Kumu andé va mbene ami.
Andé gô géeyo sami gémôgôô
Gômbe me tsangadôtsukédu.
26Na ômeni ami ôtsôkéa.
Na dôta ôtôe wami ôdigaa n’ekasôga buéyé gandé angô gébé na ngudi.
27Gôébégô éwe Nzambé, ôsangeeba gédidi sami gô tsenge éane amawani.
Osangasinga mbe ôtôe amômane woo amatsimamani ôboo.
28Ewe ômenyeda me nzéa ébuéda môma gô monyo.
Osaagana n’ami na ôkasôgéda me.
29Ana aTétee n’ami agô mbumu éaIsraël, me nanônigôa na vede ébégô éatétene éasô n’anyô David. Angô amawa. Amapikégu. Ngiine yedi égébaka va gatse asô n’anyô ngu na deo noo. 30David amabaka môpandôédi amatasa maNzambé. Asibômuku mbe Nzambé amamôsongéa mbe: Môvo va gatse anee woo angagôaandani angadigaa g’ôkumakee ôdigaa éwe gôéviagana ényangee éôô. 31David amamenya ébégôe éangô madeo ésibuéa na ameevéda gékundugéô saChrist g’ôwa mbe te ône amatômu na Nzambé vamavovo angô mbe:
Me tsangamôeeba gô tsenge éane amawani.
Na ôtôe wedi ôsangaboo.
32Nzambé amakundua te Jésus ôdôô. Na wa n’anyô muetso tômôeni na tômôôkiô. 33Jésus amadigédu gô géeyo gémôgôô SaNzambé. Gôndé Tétedi amadiia Gédidi SaNzambé géne gémamemeoko angô na Nzambé. Jésus amatsanzabanéda sangô na gôndé wa n’anyô mônongoe ôenanye na mônongoe ôôkô anye sangô deo noo. 34David asibaté amuene na g’ôba, ta na pesu. Ivô angô amuene amavovo mbe:
Kumu amavovo na Kumu ami mbe:
Digaaka gô géeyo sami gémôgôô
35Ngu na vangakoa me adudeoe woo
Aka gétukéô samakôdô moo.
36Buedi mbe éongo éetso éaIsraël émenya ébégôe édué. Anye nômabôkéda Jésus gô gésumu sowa. Nzambé amakônza va mbeego mbe Jésus ôdôô angaba Kumu na Christ, ône amasevou na Nzambé.
37Vamookô géômbége meekédume mane, amakuadima. Na ameevôa Pierre n’akedi amasevouni na amatômukuni mbe: ?Ana aTéta tôénda nayee? 38Pierre amanigôa ahngô mbe: Koani mitéma mianyô gôéba wene mônongo oma. Buedi mbe môma na môma abatésu gô ina aJésus-Christ, gômbe ébévee éanyô ésingéô na Nzambé kokoo. Vane Nzambé anganôétsa Gédidi sedi, ôbiia. 39Menyani mbe vamavanga Nzambé gôétôétsa Gédidi sedi amavanga gôndé wa n’anyô na gôndé ana asô n’anyô, na gôndé muetso adigaa gô tsenge ditongoni. Endé gôndé muetso angabambéôni na Kumu éasô n’anyô Nzambé.
40Pierre amoomba évovo na géômbége mabégô mayekani gôékasôgéda ahngô na gôéoodeda ahngô. Angô mbe: Aaganani n’omee adua amadimbanani gôésinga Mooboyi gô mitéma mianyô. 41Tambô ane amasingaka mabégô mamavovo Pierre ameetsô bateme. Gô nyoone, mbumu éaNzambé émoomba ékôndama mitônisa mitatô mioma. 42Ahmeeka na môvinéné mane mameekédu ahngô n’ane amasevouni na amatômukuni. Amadigaa na vitoo anguene ana aTétee agô mbumu éaNzambé na asivéé éaa tabudé épo. Ndéô yetso amadigaa vavo gôévovo na Nzambé.
Vitoone éane ameetsa Jésus mitémamie
43Oma muetso ameena gomo gô ényanga émabaka na ane amasevoukuni na amatômukuni vameendangô émbégéa éangudi yaNzambé na mabégô mamisôba masoongôa môma ésupua. 44Muetso ane ameetsa Jésus-Christ mitéma miaô amadigaa tungu épo. Amabaka na yômee yetso te vavo. 45Ahngô amasômbédaka yeba yaô na yômee yaô, na amakabanaka gamadiiangô. Ameetsô môma na môma gô mônongoe ômabaka na angô ôgômbô. 46Minya mietso amabaka gô eba aNzambé gévéé. Amabukua mipemba gô yeba yaô na amaaka miyakô miaô na gényônga na mitéma mimasumani. 47Ahmakuméda Nzambé. Amanyônganéô n’oma muetso. Minya mietso Kumu Jésus amoombaka ékôndéga gô mbumu éaNzambé ane amoobogokoni.
Currently Selected:
Mayanzame 2: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
