Jean 1

Ogi aNzambé ôpatsa évitsi na ôétsa monyo

1Nzambé madeo asikana tsina n’oba, vamapanga vamabaka ône atetuku mbe Ogi. Ogi te ôndé na Nzambé. Ogi dôta te amuene Nzambé. 2T’ebandô tômenya mbe vamapanga na kaa ôgi ômabaka na Nzambé. 3Gô ngudi yone ameendô mbe Ogi, Nzambé amakana na amavanga éetso. Gôsaba ta na sôma gévo gésikanô na gésivangô gô ngudi yOgi. 4Aangô te kumu amonyo. Monyoe ône ôtanéda gévede gôndé oma. 5Gévedege géne gétana gôépatsa évitsie ésaba na ngudi yeéma gévedege géne.

6Nzambé amatôma mômôgôô môvo, peegi. Inedi Jean. 7Jean amatômu gôénigôa ômbangi agévede saNzambé. Amatômu gômbe oma angeetsa Nzambé mitéma miaô vangookô ahngô mane manigôa Jean. 8Amuene Jean, kaka gévedege géne ivô amabaka mbangi gôénigôa mabégôme magévedege géne. 9Gévedege gémanigôa Jean, te géne sapie gésaba n’okana. Gémeenanô gô tsina na gétana gôndé oma muetso.

10Ogi ômabaka gô tsina, Nzambé amakana tsinane te gô ngudi yOgie, ivô asi tsinane asiôkéô aangô ta na pesu. 11Ogi ômatsiga gô tsengene na ôsisingô n’ane andé gô yangô, tambô amuene te kumu atsengene. 12Buéyé nane, avo amasinga Ogi na ameetsa angô mitémamie. Ahngô te ane ameetsô na Nzambé ngudi yekoga anedi apie. 13Ana aNzambé ahmabôtu n’edi. Obôtue ône kaka ône anzina, na ône otô, vo ône etondo éamôma gabôtu môma na môma n’edi.

14Ogi ômakoga môma. Angô kumu amabégô mapie, amanyônganéô na Tétedi vamadigaangô va tsina va gatse awa n’anyô. Tômeena ôbébayi wetso ondômbee wedi, te ône ookumakee ômeetsô angô na tétedi, angô Muana ekika. 15Jean amanigôa ômbangie wedi mbe: Nôeni, te ône ameevéda me anye mbe me noota gô mbene, angô aviga gô ngima, tambô pene te angô. Me madeo tsibôtu te angô andéké.

16Wa n’anyô muetso tômani édiia ôkabô okitie ôndé n’edi. Tômadiia te mate makôndamani. 17Mige na mitôma miaNzambé mimaviga na tétasô Moïse. Mate mapie metso mamaviga na Jésus-Christ. Môétsine te Nzambé. 18Gôsaba môma ameena Nzambé, ivô amuene muana ekika angô te Nzambé, na andé vavo na Tétedi amamôtsutsuéda.

Mane mameekéda Jean-Baptiste

(Bono na Matt. 3:1–12, Marc 1:1–8, Luc 3:1–18)

19Adeekedi adigondoku na géômbé saLévite amatômu na Ajuif agô Jérusalem gôéka na gôndé Jean. Oôkôni éne émanigôa Jean vamaviga ane amatômuni. Amamôévôa mbe: ?Ewe ndaa? 20Jean asiapipé. Ivô amatôna gébé na tsoyi mbe: Me kaka Christ, ône eenéa anye angatômu na Nzambé. 21Vane ane amakudéguni amamôévôa mbe: ?Ewe vo ndaa? ?Te Elie-a? Jean amatôna mbe: Aé, me kaka Elie. Ahngô mbe: ?Ewe te môpandôédi amatasa maNzambé-a? Jean angô mbe: Aé, kaka me. 22Amôgôôe amoomba émôbakéga mbe: ?Ewe vo indaa? ?Tôngakénigôa ane atômi we mbe ndé? ?Gatasa éwe, ômakudégu na ndaa? 23Vane Jean amanigôa ahngô mbe:

Me te

Ogi amôma ôamugana gô tsenge émagasani mbe:

Baani nzéane éaKumu ébaka tsimatsima.

(Amuene Esaïe, môpandôédi amatasa maNzambé amavovo te nane.)

24Va gatse ane amakudégu gôéévôa Jean mabégôme gômadenganô na Apharisien. 25Ahmamôtsundéda mbe: Ewe ôéndi mbe: Me kaka Christ. Me kaka Elie. Me kaka môpandôédi amatasa maNzambé. ?Ivô éwe ôétsa oma bateme nayee? 26Jean amasupua ahngô mbe: Me, nanôbatésa na meba. Ivô menyani mbe va gatse anyô deo noo gôndé muene asamenya anye. 27Buéyé gooti me gô mbene edi, me te gétôkôtôkô, angô te môtsé. Gétôkôtôkô ôgoeye géote môtsé.#1:27 G’ôgi aGrec Jean amagunya tsava éapondu. Me tsaba pengo gétôkôtôkô, nandé gô tsina asangô.

28Mabégô mema mamabuéa gô mbôka étetu mbe Béthanie gômabatésa Jean oma gô dipo tsényé yambéne étetu mbe Jourdain.

Jésus te môpaga endombo aNzambé

29Ovo enyaa Jean ameena Jésus aviga na gôndé angô na amapandôéda mbe: Nôeni, ôdôô te môpaga endombo ômakudéga Nzambé gôéba ôgondoku gôéyôhu mbe anganôtôa ébévee éamitéma mioma muetso ava tsina. 30Te ône anigôi me anye kôdôtsé mbe me noota gô mbene, angô aviga gô ngima tambô, pene te angô. Me madeo tsibôtu te angô andéké. 31Vamavovo me mbe gôngaviga muene, tsimenyeke mbe ône angavigani te ôdôô. Ivô éyanzee éami te gôénôbatésa na meba na gôétubéda angô gôndé asi éongo éaIsraël.

32-33Jean amoomba énigôa mbe: Endéké te gavovi me. Me tsimenya ône amasevoa Nzambé gôéaanda me gô ngima. Ivô namatômu na Nzambé mbe: Kiaka ôkebatésa ome na meba. Va gatse ane angabatésuni, ôngeena Gédidi sami gésuma na vandé môma môvo. Menya mbe te angô angabatésa oma na Gédidi sami. Vane me Jean neeni Gédidi SaNzambé gésuma g’ôba gô gégoni saménga na vandé mômôgôône ôdôô. 34Gôeni me nane, te ganôpandôéda me mbe ôdôô te Muana ANzambé.

Jésus amabandôa ébambéa aneengi edi

35N’ongôngôe ône, Jean na avo aneengi edi abaé amadenganô 36vamoota Jésus wangô. Jean ameena Jésus na amatubéda aneengi edi mbe: Nôéni, môpaga endombo ômakudéga Nzambé. 37Aneengie abaé ane amookô éne évovi Jean na amaanda Jésus gôékea n’edi géômbé. 38Jésus amagéngôga gôébono ane amôaanda gô ngima, na ameevôa ahngô abaé mbe: ?Anye nônyôngéô ndé? Omee amavovo n’edi mbe: Rabbi, tubéda we gôdigaa éwe. (Vamavovo angô mbe: Rabbi, te gôémômekeda mbe: Môékédi.) 39Jésus amabambéa ahngô mbe: Vigani, nôviena gôdigaa me. Angô abaé amakea na ameena gômadigaangô. Emabaka kômbéne mbe émavéndama, na amadigaa na Jésus.

40Va gatse angô abaé amookô gamavovo Jean na amakea na Jésus, môvo te André muaneya aSimon Pierre. 41André amapanga éwanya na muanayeedi Simon na amamônigôa mbe: Tôéni Messie. (Vamavovo angô g’ôgi aHebreu mbe: Messie, g’ôgi aGrec te Christ, ône amasevou na Nzambé.) 42André amakea na Simon na gôndé Jésus. Jésus amabono Simon na amavovo mbe: Ewe te Simon, muana aJean. Nagôôga mbe Céphas. (G’ôgi aSuada te Pierre.#1:42 G’ôgi aGétsogo te étaé.)

Jésus amabambéa Philippe na Nathanaël

43N’ongôngôe ône Jésus amatimôga gôékea na gô tsenge éaGalilée. Amawanya na Philippe na amavovo n’edi mbe: Oka n’ami nzéepo. 44Mbôkane éaPhilippe te Bethsaïda. Te mbôkane dôta éAndré na Pierre. 45Gô mbene anzéa, Philippe amawanya na Nathanaël. Amamônigôa mbe: Tôenani na ône amavovoko Moïse gô miganda mimatendangô mige na mitôma na ndongi yaNzambé. Te ône amanigôa dôta apandôédi amatasa maNzambé. Te Jésus muana aJoseph, môsi mbôkane ééndô mbe Nazareth. 46Nathanaël amatsuma paga mbe: Ti gô vimbôkavie viaNazareth vine. ?Gôngeenanô ébégô éamôsôba-a? Philippe amamôénda mbe: Viga, ôviena.

47Vameena Jésus Nathanaël aviga ga vane gôéwanya na Jésus, amavovo mbe: Ii, ôdôô te môsi éongo éaIsraël apie. Asaba na mangônzô. 48Nathanaël amamôévôa mbe: ?Ewe ômenyi me nayee? Jésus amamônigôa mbe: Me nagôeni ôndé digaa gô tsina agéététége géne, sofiguier. Namenyi éwe, Philippe madeo asigôbambéa. 49Vane Nathanaël amamômekeda mbe: Môékédi, éwe te Muana ANzambé. Ewe te môtômine eongo éaIsraël. 50Jésus amabika n’edi mbe: Ewe ôyavôga éétsa môtémee gôéndi me mbe nagôeni gô tsina ofiguier. Te buedi. Ivô ôngeena na mavo mabégô mavôni madeo masienewe. 51Jésus amoomba énigôa mbe: Nôngeena ôba ôkukuga. Asi g’ôba angavigédu na Nzambé, angabata na angasuma vandé me, Muana Amôma.

Currently Selected:

Jean 1: TSV

Highlight

Copy