Jean 3

Jésus na Nicodème

1Vamabaka môma môvo môsi gô géômbé sApharisien, inedi Nicodème. Amabaka môtômine gô éongo éAjuif. 2Nicodème amakea na gôndé Jésus na pitsi. Amamômekeda mbe: Môékédi, tômenya mbe Nzambé amatôma éwe gôéékéda we. Môma asoongôa éénda émbégéa ényônganéôni éne ééndewe, buétsé te Nzambé amôétsa ngudi. 3Jésus amasiia n’edi mbe: Nagôbeenda na gô pie mbe, ôkô môma asibôtu ôbôtu amôbaé, ône aGédidi SaNzambé, asangoongôa émenya mbe ôkumu aNzambé ôndéké. 4Nicodème amamôévôa mbe: ?Payi oongôa éômba ébôtu nayee? ?Angeengéa gô ébuyi éayeedi gôébôtu kukane éamôbaé-a? 5Jésus amamônikéda mbe: Me nagôbeenda na gô pie mbe: ôkô môma asibôtu na meba, na Gédidi SaNzambé, asangatsôkéa ôtômue aNzambé na mateme medi. 6One amabôtu n’otô n’edi te ôtô. Na ône amabôtu na Gédidi SaNzambé te Gédidi. 7Ombiatsapéô gagôbeendi me mbe, te ôtômu mbe anye muetso nôbôtu ôbôtu amôbaé, ône aGédidi SaNzambé. 8Opunga ôvumbéa gô tungu ényôngéô angô. N’ewe ôôkô ndungune éedi. Ivô ôsamenya gôvigangô na gôkeangô. Te mônongovo gôndé muetso abôtu na Gédidi SaNzambé. 9Nicodème amatsapéô mbe: ?Ebégôe éne éngaba nayee? 10Jésus amaabéa angô mbe: ?Ewe te môékédi môvôni aIsraël n’ewe ôsamenya mabégô mema? 11Me nagôbeenda na gô pie mbe tôvovo te éne ésabômu we. Tônigôa te éne émeena we, n’anye nôsasinga ômbangie wasô. 12Anye mbe nôsatsuma paga gô mane manigôa me anye mava tsina, anye mbe nôsangatsuma paga gô mane manigôa me anye mag’ôba. 13Gôsaba môma amabata na g’ôba, buétsé te amuene Muana Amôma, ône amasuma g’ôba.

14Gamatômba Moïse gégoni sanyogo éakunga gô péndé gô tsenge émagasani, te ôtômu mbe me Muana Amôma nangatômbu te mônongovo. 15Gômbe ône eetsa môtémedi wetso na gôndé me angaba na monyo amôbô na môbô. 16Menyani mbe Nzambé amanyôngéô oma muetso pepe. Ameetsa Muanedi ekika, gômbe ône eetsa môtémedi wetso na gôndé angô gébé na paga asangawa ivô andé na monyo amôbô na môbô. 17Nzambé amatôma Muanedi na gô tsina, kaka gôéeséda oma ivô te mbe oma muetso angoobou n’edi.

18One eetsa Muana ANzambé môtémedi wetso aseetsô ôési. Ivô ône aseetsa Muana ANzambé môtémedi wetso amani éétso ôési te gôtsumangô mane maMuana ekika ANzambé paga. 19Nôeni ébandôe éoésie ôéétsô môma. Gévede saNzambé gématsiga na géndéké gô tsengene. Ivô oma ootéa ényôngéô te évitsi gôyanzahngô mabégôme mabévani yaduduku gévedege. 20Mômane ayanza mabégô mabévani adudu gévede na asasinga sangô gétana gôndé angô. Eena gomo kabaga mane medi mabévani meenanô na vede v’ekanga. 21Géé mômane ayanza mane mapie manyôngéô Nzambé anyôngéô mbe gévedege gétana gôndé angô. Gôgobedangô Nzambé anyôngéô mbe ésimee éedi éamisôba éenanô na vede.

Jésus na Jean

22Va mbenene vane, Jésus na aneengi edi ahmakea na gô tsenge éaJudée. Dipo pitsi amadigaa wangô na ameetsa oma bateme. 23-24Ndéô nene te Jean madeo asiengédu gô tsôgôô. Amabaka gôéétsa oma bateme gô mbôkane étetu mbe Ainon, vapévapé na Salim. Te tungune émabaka meba mayekani. Oma amaviga na gôndé Jean na asikiné éétsa ahngô muetso bateme.

25Aneengie aJean avo, amatsumana na Môjuifene paga gagôgédahngô yôtôye yaô gô gésôgage saô sAjuif. 26Aneengie amakea na gôndé Jean na amamôningôa mbe: Môékédi, ôsabômu vamabaka wa n’anyô gô dipo tsényé yambéne ééndô mbe Jourdain. Obangôa mômôgôône amabaka n’ewe na ômanigôa we mônongoe wedi. Oeni, andé te gôéétsa oma bateme. Na muetso akea te na gôndé angô. 27Jean amaabéa ahngô mbe: Môma asoongôa éba na sôma, buétsé te Nzambé amôétsa sangô. 28Anyene nômookô gamavovo me nyoone mbe, me kaka Christ. Ivô namatômu gôéôta peegi gô mbene edi. 29Muéba te amômiedi, kaka amuene môma. Buéyé nane, wee amômôgôône andé te va kôbangô edi gôéôkô ôgie edi. Na angô atsôkéa gô gényôngage sawee edi. Gényôngage géne te sami. Na géndéké gémadugani. 30Engaba mbe angô te ône ava ngenge angabateduni. Me nangasugédu nangaba va kôbangô ga gône.

One aviga g’ôba

31One aviga g’ôba andé gô ngongo amabégô metso. One andé gô tsina te môsi tsinane na avovo te mane magô tsina. One aviga g’ôba andé gô ngongo ametso. 32Anigôa te mane mameenangô na mane mamookô angô, ivô gôsaba môma angamasingani. 33One amasinga ômbanzedi asabômu mbe Nzambé te kumu amabégô mapie na asoongôa épatani. 34One amatômu na Nzambé avovo te mane maNzambé gôébégô Nzambé, ône asaba na guma eetsa oma Gédidi sedi gésaba n’okana. 35Téta Nzambé anyôngéô Muanedi na amadeekeda mabégô metso gô tsina otômu aMuanedi. 36One eetsa môtémedi wetso na gôndé Jésus, Muana ANzambé, andé na monyo amôbô na môbô. One aseetsa môtémedi wetso na gôndé Jésus asaba na monyoe ône ta na pesu na Nzambé amôena ôpisa.

Currently Selected:

Jean 3: TSV

Highlight

Copy