Jean 5

Jésus amadôngéda môma amagégésanéa éeyo

1Jésus amakea na gô Jérusalem. Gô ndéô nene Ajuif amabaka na suetine éagésôga saô. 2Gô môsengee ône va kôbangô ombaa ôéndô mbe Mandombo, gôndéké gévondo gévôni gémeeba oma. Vamabaka n’eba akomu ditayi. Gévondoge géne gématetu g’ôgi aHebreu mbe Bethzatha. 3Gô komuye dine gômayama abeeyi ayekani, asi pogu na ane avékumani, n’ane amagégésanéani. [Muetso ameenéaka mebame mapupédu. 4Emabaka te nane. Môsi g’ôba amavigédu na Nzambé amasuma gô ndéô na ndéô gôépupéda mebame magévondoge. Vamapupa mebame, môbeene apanga ékuyaméa gô mangô te ône angadôngani pati yebeea.] 5Wangô gômabaka mômôgôô môvo amabeea nzima ditatô na mipuma génana. 6Jésus ameena mômôgôô nône andé yama. Asibômu mbe ôdôô adingi na beeagane. Amamôévôa mbe: ?Ewe, ônyôngéô édônga-a? 7Môbeene amamônigôa mbe: Môékédi, me tsaba na môma gôétsua me mbe nakuyaméa gô gévondoge. Vapupa mebame, buéyé mbe nakanégéké ékea, muene apanga ékuyaméa, te me madeo tsibuéa. 8Jésus amamôénda mbe: Timôga. Bongo gétavage soo. Kiaka. 9Ogi yadingani, mômôgôô nône amadônga. Amavutéga gétavage na amakea.

Ivô nyoone ômabaka nyee edunda. 10Peeye yAjuif amavovo na mômôgôô nône mbe: Deo noo te nyee edunda. Osabômu mbe te môge gôndé éwe gôétsua gétava. 11Amanigôa ahngô mbe: Te ône adôngédi me, eendi mbe: Bongo gétavage soo, kiaka. 12Ahmamôévôa mbe: ?One agôéndi mbe: Bongo gétavage kiaka, indaa? 13Ivô mômôgôône amadôngéduni asimenye ône amamôdôngédani, gôébégô Jésus amoota gô géômbége gémadenganô vangô.

14Va mbenene vane, Jésus amadengana n’edi gô eba aNzambé. Amavovo n’edi mbe: Owema, éwe ôdôngédiô. Ombieendadô ébégô ébévani kabaga ôena éene ébégô éôtéa édagani. 15Vane mômôgôô nône amakea gôénigôa peeye yAjuif mbe: One adôngédi me, te Jésus. 16T’ebandô peeye yAjuif amakuanaka Jésus gômadôngédangô mômôgôô nône nyee edunda. 17Ivô Jésus amanikéda ahngô mbe: Téta, ône andé g’ôba ayanza kuka yetso. Na me te mônongovo. Nayanza te kuka yetso.

18Gô mavoviame mane, Ajuif amabuta gô minongo mietso gôéyôha Jésus. Ameena gôndé angô mabégô matatô. Amookuua môge anyee edunga. Na amamema mbe: Nzambé te téta. Na amabatéda amuene mbe: Wa na Nzambé tôndé ti môvo.

Enyangee éaJésus Muana ANzambé

19Jésus amanigôa Ajuif mbe: Me nanôbeenda na gô pie mbe Muana ANzambé asoongôa éyanza gô ngudi yamuene. Ayanza te éne éenangô Tétedi éénda. Metso meenda Tétee, te mane mangeenda dôta Muanee. 20Menyani mbe Tétee anyôngéô Muanedi. Na amôtubéda metso meendangô. Angamôtubéda dôta na mavo mayanza mootéa na mane mamapanga éenanôni. Na anye nôngatsapéô ti tsapéô. 21Mônongovo gakundua Tétee ane amawani, na Muanee te mônongovo. Angô eetsa monyo gôndé ane anyôngéô angô éétsa. 22Amuene Téta aseeséda môma. Ivô ameetsa Muanedi ényangee éetso gôéeséda oma. 23Endé te mbe oma muetso angagobeda Muanee mônongovo gagobeda oma Tétee. One asagobeda Muanee, asagobeda na Tétene, angô môtômine aMuanee.

24Jésus amavovo mbe: One ookô mane mavovo me na eetsa môtémedi wetso na gôndé Nzambé, ône amatôma me, andé na monyo amôbô na môbô. Namani émôyuua gô môtsundu. Anôtôgi g’ôwa, aka na monyo. 25Me nanôbeenda na gô pie mbe: Gô ndéô évigani, na émani ébuéa, ane amawani angookô ôgie aMuana ANzambé. Ane angookôni, angaba na monyo. 26Menyani mbe amuene Téta te Kumu amonyo. Andé na ngudi yeetsa môma monyo, te mônongovo dôta ameetsa Muanedi ényanga eba Kumu amonyo gôéétsa môma monyo. 27Téta ameetsa Muanee ényanga gôétsundéda oma gôébégô angô te Muana Amôma. 28Nômbiatsapéô ndéône étôweseani. Te ndéône éngookô muetso ane amawani andé gô ngii, ookô ôgie aMuana ANzambé. 29Na angatimôga gôékusa gô ngii. Ane amayanza gô monyoe waô mane manyôngéô Nzambé angakunduga gôédiia wene monyo. Ane amayanza gô monyoe waô mane masanyôngéô Nzambé angakunduga gôésisédu.

Embégéa éenyanga éaJésus

30Jésus amanigôa mbe: Tsoongôa éyanza gô ngudi yamemuene. Natsundéda oma te gatévu me na Nzambé. Vane géesédéô sami géeséda me oma gésapengana gôébégô tseenda éne ényôngéô memuene. Me neenda te éne ényôngéô ône amatôma me. 31Okô mbe nanigôi mane mamemuene, oma mbe angatsuma me paga. 32One anigôa mane mami te muene na me tsabômu mbe angô asapata. 33Anye nômakudéga oma na gôndé Jean. ?Nôsiôkô gamavovo angô-a? Asipaté. Amanigôa te mane mapie. 34Me tsabuta môma gôénônigôa mane mamemuene. Ivô nanôpandôéda gakegea ébégôe gômbe nôngoobou. 35Jean amagono na dambi ématumbuni na étanani. Anye nômasinga étsôkéa gévedege sedi gô pesu andéô. 36Kaka Jean anganônigôa mane mandé n’ami. Jean te mbangi ivô mane mandé n’ami masakôdéa na mane medi matévo. Mayanzame meenda me te mbangi énigôa anye mônongoe wami na gamatômu me na Téta. 37Na amuene Téta ône amatôma me, te mbangi ami. Anye madeo nôsiôkô ôgie wedi na madeo nôsiena gédimôge sedi. 38N’anye nôsasinga mabégô medi meengéa gô mitéma mianyô, te gôgétsumakanye ône amatômangô paga. 39Anye nôvasa Matendeo MaNzambé, nôbuta édiia monyoe amôbô na môbô ôtasanye mbe ôndé gô mangô. Tambô mangô te mbangi énigôa gôndé me. 40Buéyé vane nôsanyôngéô éviga na gôndé me gôédiia monyoe apie.

41Me tsabuta kumane ékuméda oma. 42Me tsabômu mitéma mianyô. Me tsabômu mbe anye nôsanyôngéô évamba na Nzambé. 43Me namaviga gô ina a Téta, n’anye nôsanyôngéô ésinga me. Géé gôndé muene aviga gô inedi amuene, anye nômôsinga. 44Nônyôngéô éakuméda anyene n’anyene. Anye nôsanyôngéô ékumédu n’amuene Nzambé. ?Nôngamôétsa mitéma mianyô nayee? 45Kaka me nanganôsunda va mbene aTéta. One anganôsundani te Moïse, ône atanganédanye mbe tsoongone éasô te angô. 46Okô mbe anye nômeetsa mitémamie na gô pie na gôndé Moïse, mbe nômamiétsa dôta na gôndé me, gôébégô Moïse te épo mbangi émanigôa mane mami. 47Ivô anye nôtsuma matendeo maMoïse paga. ?Tambô nôngookô mavovia mami nayee?

Currently Selected:

Jean 5: TSV

Highlight

Copy