Jean 7

Anaya aJésus ahmamôtsuma paga

1Gô ndéô nene, Jésus amaseta tsengene éaGalilée. Asisete éne éaJudée gôébégô peeye yAjuif amanyôngéô émôyôha. 2Suetine ééndô mbe Tabernacle étsôkéa Ajuif émabaka éka gôpégôpé. 3Anaya aJésus amavovo n’edi mbe: ?Okea vo ôsakea na gô tsenge éaJudée gôétubéda aneengie woo mayanza moo mamisôba? 4Gôndé ône anyôngéô émenyanganôni asangasuéga mane meendangô. Vandé éwe gôéyanza mana moo mamisôba, tambô kiaka ôkeyanza mangô va tungune éngeenanô éwe n’oma muetso. 5Buéyé gamavovo ahngô nane, anayeedi amamôtsuma paga. 6Jésus amanigôa ahngô mbe: Ndéône éamôsôba gôndé me madeo ésibuéa. Géé gôndé anye, ndéô yetso dindé te kuanakue. 7Oma ava tsina asoongôa évinga anye. Ivô ahvinga te me. Gôébégô napandôéda ahngô mbe ésimee ééndahngô ésanyepa. 8Gôndé anye, kiakani gôétsôkéa suetine. Géé gôndé me, madeo tsikea. Ndéône éami madeo ésibuéa. 9Jésus n’emana évovo na anayeedi nane, amasanéa gô Galilée.

Jésus amatsôkéa suetine

10Vamakea anaya aJésus gôétsôkéa suetine, Jésus amaanda angô v’esooe géenanô na môma. 11Gô pitsi yasuetine peeye yAjuif amamôbuta mbe: ?Andé gôni? 12Oma muetso amoonguma anguene gô mane mameenda Jésus. Avo, ahngô mbe: Mômôgôô nône ayanza ti mamisôba. Avo dôta mbe: Aé, kaka nane. Abôméda oma ti bôméda. 13Ivô gôsibé ta na môvo amateta inedi va vede. Muetso ahmookô peeye yAjuif gomo.

14Va gatse asuetine Jésus amatsiga gô eba aNzambé gôéékéda. 15Vamookô peeye yAjuif meekédume maJésus ahmatsapéô mbe: ?Mômôgôô noo amenya mabégôme metso mane, angô géékédu nayeeni? 16Jésus amanigôa ahngô mbe: Menyani mbe meekédume meekéda me, kaka mami. Maviga te gôndé Nzambé ône amatôma me. 17One andé na môtéma ôgobeda Nzambé asatsapéô gô meekédume mami. Asabômu mbe ône asavovo gô ényangee éedi, avovo te gô ényangee éaNzambé. 18Jésus angô mbe: One avovo gô ényangee éedi amuene abuta ékumédu. Ivô ône ayanza mbe môtômine wedi akumédu asangapata. Na mane medi metso te mapie matévo. 19Nômatsikéô na Moïse ndongi na mitôma na mige miaNzambé ?kaka nane-a? Ivô gôndé anye, ta na môvo agobeda miangô. ?Anye nônyôngéô éyôha me gôndé? 20Oma muetso amatôna mbe: Yéé. ?One abuta éyôha éwe vita indae? Vavovo éwe vane, ôndé ti na gédidi gébévani. 21Jésus amavovo n’ahngô mbe: Me nanôtubédi ti ébégô évo na koo, n’anye nôésôbasôbana. 22Gésôgage sanyô segeeta anamôgôô, nômagétsikéô na tétee yanyô yambeego. Ivô anye nôénda mbe: Te Moïse amatsikéa we gésôgage géne. N’anye nôsinga égeeta anamôgôô buéyé mbe gô nyee edunda. 23Anye mbe: Tôsangoongôa ékékôa mige mimatsikéô we na Moïse. T’ebandô tôgeeta anamôgôô gô nyee edunda. Me dôta, nanôévôa mbe ?nôndé na me n’opisa vadôngédi me môma ôtôe wetso gô nyee edunda gôndé? 24Tsikani gésima sanyô seeséda môma gô éne éenanôni. Kabaga ôésédie wanyô ôpengana.

?Jésus indaa?

25Avo asi Jérusalem ameevôana anguene mbe: ?Mômôgôône ôdôô kaka te ône abutuku mbe ayôhu? 26Bonokoni geekédangô va pingô oma. N’angô atsikô gémôanza. Mavooe peeye yasô asabômu mbe ôdôô te ône eendô mbe Christ amatômu na Nzambé. 27Eébéyée nane, we tômookô mbe vangaviga ône eendô mbe Christ, gôsangaba môma angamenya gôvigangô. Géé ôdôô, we muetso tôsabômu gôvigangô.

28Vane Jésus ameekéda gô eba aNzambé. Amookanô na muetso ameevôa oma mbe: ?Anye nôsabômu me-a? ?Nômenya gôviga me-a? Tambô, tsiviga gô ényangee éamemuene. Me natômiô te tômugu. Na ône amatôma me te Kumu amabégô metso mapie. Anye nôsamômenya. 29Me te tsamôbômuni. Gôébégô me namaviga te vandé angô. Na te angô amatôma me. 30Vane oma amanyôngéô étsôpa Jésus ivô gôsibé môma amamôbandani. Ndéône éedi éetsôpu madeo ésibuéa. 31Va gatse omee ane, gômabaka ayekani amamôétsa mitémamie gébé na paga. Ahngô mbe: Vangaviga Christ, ône angatômu na Nzambé ?émbégéa éangudi yaNzambé éngatubédangô éngootéa éyéka na éne étubéda mômôgôô noo-a? Esangootéa éyeka. Gôsaba muene angavigani.

Migode mimatômu gôétsôpa Jésus

32Apharisien amookô mane mamakumédu Jésus vamoonguma oma va gatse agéômbége. Tsesu yadeekedi adigondoku na Apharisien amatôma migode gôémôtsôpa. 33Jésus amapandôéda ahngô mbe: Me nagébaka n’anye ti vipesu viandéô, te me keaga na gôndé ône amatôma me. 34N’anye nôngabuta me ivô nôsangatsutsua me. Ekegea te nane. Gôkea me, anye nôsangoongôa ébuéa. 35Peeye yAjuif ameevôana anguene mbe: ?Angakea vita na gésa ndé gésangatômenyani? Tambô mavooe angakea te na gôndé Ajuif amapanzanganani adigaa va gatse aAgrec. Mavooe angeekéda Agrec. 36?Ti mane mavovi angô mbe: Gôkea me, anye nôsangoongôa ébuéa ékegea nayee?

Ebégô éagétôka sameba meetsa monyo

37Gô sueti nene, pitsine éamôyusumédu te pitsine épôni. Te pitsine ématema Jésus va mbene agéômbége. Muetso amookô vameekédangô mbe: One ookô soé avigé na gôndé me gôényua. 38Matendeo MaNzambé meenda mbe: One eetsa môtémedi wetso na gôndé me, gétôka sameba meetsa monyo géngabundugaka gô môtémedi. 39Jésus amavovo nane gôépandôéda gangaviga Gédidi SaNzambé gôéengéa na gôndé ane eetsa Nzambé mitémamie miaô. Ivô gô ndéône ématemangô gôévovo, Gédidi SaNzambé gémabaka madeo gésisuma gôébégô amuene Jésus amabaka te madeo asikea na g’ôba gôndé Nzambé.

Géômbége gémaagana gôébégô éaJésus

40Avo oma amookô mavovia maJésus na ahmasinga mbe: Na gô pie, ôdôô te môpandôédi amatasa maNzambé. 41Avo dôta amamôneegeda mbe: Odôô te Christ, ône amasevou na Nzambé. N’avo amatsuma paga mbe: Aé, kaka nane. ?Christ angaviga te gô Galilée-a? 42Matendeo MaNzambé matônigôa mbe: One eendô mbe Christ, angaba muana agô ébôta éaDavid. Angaviga gô Bethléhem, te môsenge ômadigaa David. 43Géômbége gémaagana te gô mabégôme mane. 44T’ebandô avo amanyôngéô étsôpa Jésus, ivô gôsibé môma amamôbandani géômôtsôpa.

Peeye yAjuif amatsuma Jésus paga

45Migode mimatômukuni mimanika mogo matévo na gôndé tsesu yadeekedi adigondoku n’Apharisien. Ahmeevôa migodemie mbe: ?Anye nôsitsôpa Jésus gôndé? 46Migodemie mimanigôa ahngô mbe: Madeo tôsiôkô môma avovoni ga mômôgôô nône. 47Apharisien amamisemba mbe: Tambô n’anye nômabômédu n’edi te bômédu-a? 48?Va gatse atsesuye yasô na Apharisien wasô gôndéké môvo amôétsi môtémee-a? Gôsaba. 49Ivô géômbége sane amookôni asamenya mane mamatsikéô we na Moïse. Andéké amakokouni. 50Va gatse aApharisien vamadenganô môvo, inedi Nicodème, te ône amakea va mbeego gôéévôa Jésus mabégô. Nicôdème amavovo n’akedi mbe: 51Gô ndongi dimatsikéô wa n’anyô, tôsaba na gésima seeséda môma gépangé émenya éne émeendangô, na gépangé éôkô mane mavovo angô ?kaka nane-a? 52Akedi amamôdeta mbe: ?Tambô n’ewe muetso to môsi Galilée-a? Tangaka Matendeo MaNzambé. Ongeena mbe ta na môpandôédi môvo amatasa maNzambé amaviga gô Galilée. 53Vane muetso amapanzangana na gô yeba yaô.

Currently Selected:

Jean 7: TSV

Highlight

Copy