Luc 20

?Enyangee éaJésus éviga gôni?

(Bono na Matt. 21:23–27, Marc 11:27–33)

1Nyovo Jésus ameekéda oma gô eba aNzambé Tsangô Eamôsôba. Tsesu yadeekedi adigondoku, n’anigôi amige miaNzambé, na peeye yAjuif amaviga na gôndé angô. 2Ameevôa Jésus mbe: ?Enyangee éyanzewe mabégô mema, éviga gôni? ?One ameetsa éwe ôtômu gôénda nane indaa? 3Jésus amaabéa ahngô mbe: Me dôta nanôévôa yami nyivô. Beendani me 4?One amatôma Jean gôébatésa oma indaa? ?Te Nzambé-a? ?Vo te oma? 5Ahmatsunda anguene n’anguene mbe: Okô tôvovo mbe te Nzambé amatôma Jean, angô angatôévôa mbe ?tambô ébégô ndé anye nôsisingé mabégô medi? 6Okô tôvovo mbe te oma amatôma Jean ?ébégôe éngaba nayee? Oma muetso angatôtuma na mataé gôétôyôa, gôébégô muetso asabômu mbe Jean te pidi môpandôédi amatasa maNzambé. 7Vane ahngô ahmaabéa Jésus mbe: We tôsamenya ône amatôma Jean gôébatésa oma. 8Na Jésus amanikéda ahngô mbe: Na me muetso tsoongôa énôbeenda gésa géviga ényangee yami éyanza me.

Tsava éayanzi atsaga

(Bono na Matt. 21:33–46, Marc 12:1–12)

9Vane Jésus amagunya oma tsava mbe: Môma amagaaba tsaga edi éetété éamiônda étetu mbe ôvigne. Amavangana n’ayanzie. Amanôtôga gô tsengedi. Amakea môtôô ôtongoni. 10Gô ndéône émoombo miôndamie, kumu éatsaga amatôma môyanzi edi na gôndé akeneyie atsagane gôéétsô ôkabô edi amiônda. Akeneyie amatsôpa ône amatômukuni. Ahmamôbômôa. Ahmamônikéda mogo matévo. 11Kumu éatsaga amoomba étôma muene. Akeneyie amamôbômôa na amamônikéda mogo matévo. 12Kumu atsaga amoomba étôma ône amôtatô. Akeneyie amamôbeta na amamôpatsa. 13Kumu éatsaga amatasa mbe: ?Me nangeenda nayee? Nakudégé muanee ami amôtéma. Mavooe angamekeda angô. 14Ivô vameena akeneyie muanee aviga, ahmovovo anguene n’anguene mbe: Nôeni ône angaviagana n’enyangee éatsagane vangawa kooko asô. Tôbémôyôha. Buta mbe tsagane éba éasô n’anyô. 15Ahmamôkuséda gô tsaga. Na ahmamôyôha.

Jésus angô mbe: Kumu éatsagane ?angeenda nayee n’akeneyie? 16Na amanigôa mbe: Vangaviga kumu éatsaga angayôha akeneyie abévani. Angeetsa tsagane muene môma. Ane amookôni ahmakina mbe: Aé ésangaba nane. 17Ivô Jésus amabono ahngô na amavovo mbe: ?Nôkini ébégôe éne gôndé? Matendeo MaNzambé matônigôa te nane. Matônigôa mbe:

Etaé émakôngégu n’asaayi eba

Te éangô évumbu v’epandaka gôésipa ebee wetso.

18Menyani mbe ône angatenôga gô étaé éne, angakuéa na angookô pievia. Na ôkô étaé éne éaaga gôndé môma, anganigôô na angakoga tsese.

Depu émavanéda môtômi atsenge

(Bono na Matt. 22:15–22, Marc 12:13–17)

19Anigôi amige miaNzambé na tsesu yadeekedi adigondoku amabuta mônongo gôétsôpa Jésus te gô ndéô nene. Anguene gébômu mbe tsavane égunyi Jésus te gôndé anguene. Ivô asiôngôé émôtsôpa amookô géômbége gomo. 20Ahmaanda Jésus gô bôvingô gôéôkô gavovo angô. Ahmatôma n’avo oma amaakuméda anguene mbe ahmisôba, gôékea diébô gôétambéa Jésus pagô na nyivô gôémôkubéda. Te gô mônongo ône amabuta étsua Jésus na gôndé asi ényanga, atômie atsenge. 21Ane amatômuni ameevôa Jésus mbe: Môékédi, tôsabômu mbe mane mavovo éwe te mapie matévo. Oékéda môdigédi apie ônyôngéô Nzambé. Osabono môma, buéyé môma abobo, buéyé môma môvôni, ôsamenya mane. 22Beenda we gookô éwe gô mitôma mimatsikéô we. ?Tôvanéa môtômi atsenge César, depune vo tôsavana-a? 23Ivô Jésus asibômu ébandôe éebégôe émavigahngô na buembee nane gôémôkanéga. Amaabéa ahngô mbe: 24Tubédani me dode. ?Gégonige soso géndé gô dodene egé sandaa? Ahmamôaabéa mbe: Te saCésar, môtômi atsenge. 25Vane Jésus amavovo n’ahngô mbe: Ene éndé éaCésar môtômi atsenge, nikédani na gôndé angô. Ene éndé éaNzambé, nikédani na gôndé Nzambé. 26Ane amanyôngéô émôkubéda gô nyivô va miso moma asimôdiié. Amasôbasôbana éodoe éedi na ahsiôngôé ébubua.

Nyivô éagékundungéô

(Bono na Matt. 22:23–33, Marc 12:18–27)

27Avo Asadducéen ahmaviga na gôndé Jésus. (Asadducéen te asi gésôga géékéda mbe ane amawani asangakunduga.) Ahmeevôa Jésus mbe: 28Môékédi, ndongi dimatendéô we na Moïse ditôbeenda mbe: Okô muanayoo amômôgôô awéyi atsika môgayedi gékômba, ôviagana môkuée. Obôta n’edi ana gô ina amuanayoo amawani. 29Oôkô ébégô édué. Gômabaka aneyee tsambué amôgôô. Pene amabaa môgeto. Na amawa amatsika môgayedi gébé na muana. 30Môdimine amaviagana môkuée. 31Na ône amôtatô te nane. Gôndé ahngô muetso tsambué te mônongovo. Ahmabongo môgetone na amawa ahngô muetso gébôté muana. 32Gô ngima amôgôôe muetso, na môgetone amawa. 33?Gô nyee ôngakunduga ane amawani, môgeto nône angaba waanda? Bonoko, muetso tsambué ahmamana émôbaa.

34Jésus amaabéa ahngô mbe: Amôgôôe n’agetoe atsengene abaana. 35Ivô amôgôôe n’agetoe, ane andé kuanakue gôékunduga g’ôwa na gôédigaa gô tsenge évigani asangabaana. 36Asangadôôwa. Angaba gandé asi g’ôba. Angaba ana aNzambé gômakunduga ahngô g’ôwa. 37Moïse amanigôa na vede mbe ane amawani angakunduga. Gô ndéône émavovo Nzambé n’edi, ôgi aNzambé ômakusa gô géétété gémayôani, Moïse amabeendu mbe: Kumu Nzambé te Nzambé éneegeda Abraham na Isaac, na Jacob. 38Nzambé te Nzambé ane adôngani kaka Nzambé ane amawani. Gôébégô gôndé Nzambé, ahngô muetso andé na monyo. 39Avo anigôi amige amamôsénga mbe: Ti éwe môékédi, ômenyi évovo. 40Vane asiyeegedô émôévôa nyene nyivô.

Ebégô éaChrist na David

(Bono na Matt. 22:41–46, Marc 12:35–37)

41Jésus ameevôa ane amadenganôni mbe: ?Nayee oma avovo mbe Christ, ône amatômu na Nzambé te muana aDavid? 42Amuene David amatenda gô miganda miedi miamimbô mbe:

Kumu Nzambé amavovo na Kumu ami mbe:

Ewe digaa gô géeyo sami gémôgôô.

43Na me nangagudaméda adudeoe woo

Aka gétukéô samakôdôme moo.

44Jésus angô mbe: Amuene David amateta môma nône mbe Kumu ami. ?Mbe muanedi nayee angamôénda mbe: Kumu ami?

Jésus amakeneda oma gôndé anigôi amige miaNzambé

(Bono na Matt. 23:1–36, Marc 12:38–40)

45Géômbége setso gémookô gamavovo Jésus n’aneengi edi mbe: 46Nôwema anigôi amige miaNzambé. Ahnyôngéô ékénga gô édénga éaô étongoni. Ahnyôngéô ékômbôu na géneega gô étungue éyeka oma. Ahsevôa édigaa éokumaka gô eba agéwanyéô sAjuif. Gô môambô te mônogovo. Ahnyôngéô édigaa va kôbangô akumu éasueti. 47Ahnyôngéô émana éetso éndé gô yeba yamikué. Ahvovo disambô ditongoni te gô ényepa éamiônya. Gésisédéô saô géngootéa gévôni.

Currently Selected:

Luc 20: TSV

Highlight

Copy