Matthieu 6
6
Meekédu mayôma éetsô ôbiia na gôndé misuga
1Nômbieenda mayanza manyô mamisôba va miso moma gôébuta éséngu n’ahngô ôséngu. Okô nôéndi nane, nôsangeetsô misenda na Tétanyô, ône andé g’ôba.
2Okô éwe ôétsi misuga yôma ôbiia ônatoongo môsosi gôébuta éenanô n’akoo mbe: Odôô te ône eetsini. Asi enyepa éamiônya eenda te nane gô yeba yewanyéô na gô nzéa buta mbe oma akuméda ahngô. Me nanôbeenda na gô pie mbe angô amani édiia ôséngue waô n’oma. Asangeetsô ôséngu na Nzambé. 3Ivô vangeetsewe misgua yôma ôbiia te buedi mbe ôétsa v’esooe mbe buéyé mômane woo amôtéma asangamenya éne éétsi éwe. 4Itsaka misuga yôma ôbiia v’esooe. Na vane, Tétoo ône eena v’esooe angagôétsa ôséngu.
Meekédu mosambô
(Bono na Luc 11:2–4)
5Asi enyepa éamiônya anyôngéô étema mitie gôévovo na Nzambé gô yeba yewanyéô na gô magô manzéa gômbe oma angakuméda ahngô. Ivô anye vavovo anye na Nzambé, nômbienda mônongovo geenda ahngô. Me nanôbeenda na gô pie mbe gôndé ahngô asabadô na tsoongo, amani édiia misenda miaô. 6Gôndé éwe, vavovo éwe na Nzambé, ingéa gô tsongone yoo na kukéga ôkukée. Vovo na Tétoo andé n’ewe gô tungu éav’esooe. Tétoo amenya mabégô mav’esooe, na angagôétsa môsenda.
7Vavovo anye na Nzambé, nômbiayekeda mavovia mabobo geenda avo oma asavamba na Nzambé. Ahngô ahtasa mbe angadiia éne édukangô gôébégô avovo mavovia mayekani. 8Nômbienda geendahngô. Tétanyô g’ôba asabômu éne éôkô anye tsôvé, anye ti madeo nôsimôduka. 9Nôeni mônongoe ônyepa évovo na Nzambé. Nôvovo te mbe:
Tétasô ôndé g’ôba
Nanyôngéô mbe inoo éneegedu.
10Nanyôngéô mbe ôkumue woo ôviga gôétôma.
Nanyôngéô mbe oma eenda va tsina éne ényôngéô éwe,
Mônongovo geendô éne ényôngéô éwe g’ôba.
11Itsa we môyakô akuanakue n’asô deo noo.
12Singéa we kokoo gô mabégo masô mabévani mônongovo gasingéa we kokoo gôndé ane atôéndéa mabégô mabévani.
13Vakanégu we gôéénda mabégô mabévani, ômbiatsika we.
[Ivô ooboo we tônôtôga gô ngudi yaSatan.
Gôébégô ôkumu na ngudi na géneega éndé n’éwe môbô na môbô. Amen.]
14Okô anye nôsingéyi akanyô kokoo gô mabégô mabévani meendangô anye, Tétanyô ône andé g’ôba anganôsingéa dôta kokoo. 15Ivô ôkô anye nôsisingéa akanyô kokoo, Tétanyô dôta, ône andé g’ôba asanganôsingéa kokoo gô mabégô manyô mabévani meendanye.
Meekédu mekina môyakô gôévovo na Nzambé
16Vakinanye môyakô gôévovo na Nzambé, anye nôkinini, nômbiaduta ésunga gôényemôga geenda asi enyepa éamiônya. Angô anyinyama gôétubéda oma mbe: We tôkini môyakô gôévovo na Nzambé. Nanôbeenda na gô pie mbe gôndé ahngô asabadô na tsoongo, amani édiia misendamie miaô. 17Ivô, vakinewe môyakô gôévovo na Nzambé, ôokea meba na ôpatséda tsôgéye, 18kabaga ônyemôga mbe: Me nanyepa gôndé Nzambé gôkina me môyakô gôévovo n’edi. Tétoo Nzambé andé wangô gô tungu évangi éwe n’edi gôékina môyakô. Tétoo amenya mabégô mav’esooe na angagôétsa môsenda.
Meekédu mokiti ôkeneo g’ôba
(Bono na Luc 12:33–34)
19Nômbiavaga ôkitie wanyô éva gô tsengene. Gô tsengene mangbangba na nyanga ébunza éôma. Eésui apada yeba gôébongo éôma. 20Ivô vagani ôkitie wanyô gô tsenge éag’ôba éaNzambé. G’ôba gôsaba mangbangba na nyanga gôébunza éôma, pengo ta na pesu. Na dôta gôsaba éésui apada yeba gôébongo éôma. 21Môtémoo ôndéké gô tungune évagewe ôkitie woo.
Otô ôtômu na miso
(Bono na Luc 11:34–36)
22Miso mamôma te dambi étômbéda ôtôe wedi wetso. Okô miso moo meenéa, na ôtôe wetso ôngaba na vede. 23Ivô ôkô miso moo mabeea, na ôtôe woo wetso ôngaba gô évitsi. Vane, gévedege géndé n’ewe géngakoga te géka sevitsi. Ti évitsie éne ésaba n’okana.
Meekédu maNzambé mokiti
(Bono na Luc 16:13)
24Môma asoongôa éyanzéa kumu diabaé kuképo. Angadudu épo na anganyôngéô épo. Angagobeda épo na angeenza épo. Okiti ôndéké ga kumu gôétôma môtéma amôma. Anye nôsoongôa égobeda aangô na Nzambé kuképo.
Digaakani gébé na mikebanganô
(Bono na Luc 12:22–31)
25Me Jésus, nanôbeenda mbe, nômbiakebangana gô môyakô ôngaa anye, na meba manganyua anye gô monyoe ôdôô. Nômbiakebangana béyé gô maduani mangaatanye gôékenea yôtô yanyô. ?Monyoe ôsootéa môyakô‐ma? ?Otôe ôsootéa maduani‐a? 26Bononi nyoyi diveeani. Nyoeye dine disagaaba tsaga, na disakuéga migônô. Disakata môyakô gô papa. Na Tétanyô, ône andé g’ôba abôngôa nyoeye dine. ?N’anye oma, na nyoeye, ône ootéa na tsoongo va mbene aNzambé indaa? Te anye oma. 27?Môma ndé va gatse anyô angoongôa ékôndéga pitsiye yedi yava tsina gô ngudi yamikebanganô?
28?Tambô nôkebangana gô maduani gôndé? Tasani môngongo ôvunda éétété éagô pindi. Enyepa na yabi yaô na ébôta miônda. Ivô éangô ésatsôgô n’eyanza na ésagomo mikanda. 29Me nanôbeenda mbe, buéyé na môtômine Salomon ône akumédu g’ôndômedi ôvôni, asiaaté maduani mamisôba gaata éététée. 30Nzambé aatéda éétété na mabunza magô pindi gô mônongoe waô ônyepani, na éangô te éapitsi épo. Mene éngabéku gô soto. Tambô gôndé anye oma ?Nzambé asangootéa éaatéda anye éamisôba‐a? Gô mane moongôa Nzambé éyanza, pagaye yanyô dipoo. 31T’ebandô nômiaba na mikebanganô mbe: ?We tôngaa môyakô ndé? ?Tônganyua ndé? ?Tôngaata maduani ndé? 32Te ane asavamba na Nzambé abuta yômee éne. Ivô anye, Tétanyô ône andé g’ôba amenya éetso ébutanye gôénôdôngéda gô tsina. 33Pangani ébuta mane mokumu aNzambé na gôéénda éne ényôngéô angô, na vane angoomba énôkôndéga évo yôma ébutanye. 34Nômbiakebangana gô mane mamene. Panda yamene te yamene. Inya n’enya ôndé na yedi panda.
Currently Selected:
Matthieu 6: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
