Lukas 9

Yesus nahalewayi kabul ɗuɗa ana hakodo halole-Na

(Mat. 10:5-15; Mrk. 6:7-13)

1Yesus nakamaikadi kabul ɗuɗana ana hakodo halole-Na, mana yiidi tabaraɗa ɓiꞌta-pareha tannam kaɗa wuggayi wad japata mono hataggahayi ata kalawara. 2Nyi manahalewayi kako talarage lii aganaɗawei Alla ɓana hareha ɗaꞌ Raja mono hataggahayi ata kalawara. 3Malinagei Yesus tabaraɗa, “Ilam ngidkam aga-agana til ɓam kakom. Ilam ngidkam takko, kaleku, ha yaa, amaha, mono kalabbe nyeil. 4Ɓa giɗuge umma kahibami, engam neɗo kahha ɓam tannage neɗo harona. 5Mono ta giɗaꞌna ata aika hibami, tannage neɗo haronaɗa mono kabbahai kabka walta ateleɗumu, kaha ape waiɗage Alla enga nahoukud oroge aiɗa hibawe nna hatodo-talaram.”

6Ma kakoɗage kabul ɗuɗana ana pahalewanai Yesus ta ɗiha harona ɗiha harona, tannam kaɗa todo-talarage Lii Dahhanai Alla mono ɗahataggahayi ata kalawara.

Herodes kabarrenage tutnai Yesus

(Mat. 14:1-12; Mrk. 6:14-29)

7Tangrage neɗo raja Herodes ɓana hareha ta tana Galilea, kole ɓana rangeyi tangngad kahekagaina harayinai Yesus, nakabarreɗangage. Oroge ɗaad ata kalina Yohanis Pembaptis mourha hagganage. 8Ɗaa ʄalad ata kalina lede-liinai Alla kangaranai Elia ɗaa haggalin.#9.8 Nutna ta jongaɗa ata Yahudi ɗaage hatena, nimmi lede-lii Elia enga maina tut ha inyakay lara tuɓa maina Raja Kahatulka-manemara (Torrowe Lii Kira Jaj Kamema, ta jurata Maleaki 4:5-6). Nehe mawaige ɗaa haggalin , oroge ta Jurata 2 Raja-raja 2:11-12, ta mourhanai Elia makeketanage ta sorga. Ata waɗeka ɗaalid kalinana ɗiha wui lede-lii walta raɗa lede-liinai Alla ulge kamourha hagga. 9Malinage raja Herodes, “Nauwag halewaɓe ata katebonage kataknai Yohanis. Tabolo naɗe ata iyaɗayi? Butaɓe tut-Na harangegun.” Nyiwe raja Herodes manakamaꞌge etai Yesus.

Yesus nayiid ha yaa lima rata ata

(Mat. 14:13-21; Mrk. 6:30-44; Yoh. 6:1-14)

10Kole ɓaɗa hagga kabul ɗuɗa ana pahalewanai Yesus, ɗadulkawe tabarai Yesus tangngad harayiɓeɗa. Maɓeggei Yesus nawaddai kabul ɗuɗa ana pahalewana ɗakako marangaɗa tannam palihike wikna walta ata buta ta wu hadau kahika tabara kota Betsaida. 11Tabolo ata buta tadawe ɓa gidau kakoɗa, maɗa ɗokuni Yesus. Nyi nahibayi mono nahanewe tabaraɗa tutnai Alla ɓana hareha ɗaꞌ Raja. Mono nahataggaha ʄalayi ata kalawara kaɗaana.

12Ɓana aroge tama matalaɗo, kabul ɗuɗa ana pahalewana ɗamai tabarai Yesus, maliɗage, “Ama, kahikawe nne hadauwu. Dahhaɗahowe pahaggad raɗe ata buta, kaɗa mayegana ha yaa mono hadau dauɗa ta harona mono ta deha kahabara.”

13Taboloi Yesus nabalehai, “Miɗaho kayiid ha yaaɗa.”

Ana hakodo halole-Na ɗabalehai Yesus, “Kaɗaana tabarama lima hed kababa mono ɗuɗa hed kaboko. Nyiɓatauɗage nam ɗaho kakako lo hiid ha yaaɗa tangngaɗa raɗe ata?” 14(Ɓakatutkayi lima ratad kaɓaan kaɗaana, wale yapgauꞌmahodi lawai mono lakawa).

Yesus nahanewe tabara ana hakodo halole-Na, “Halewai raɗe ata kaɗa ngoɗo hakalibbona, ɓakatutkayi lima bul ata ta ɗiha kalibbo.”

15Maɗa rayige agawe hataknai Yesus tabaraɗa. 16Yesus nangalai lima kababa mono ɗuɗa kaboko, mana tangara ta langta mono waiwulinani Alla. Maɓegge nahiɓiyi kababa mono kaboko waid limmana, mana yiid ana hakodo halole-Na, kaɗa ɓaweyi ta ata buta. 17Tangngaɗa maɗa yaa, kahha ɓaɗa ɓoukta. Kole ana hakodo halolenai Yesus ɓaɗa kahhayi ha yaa kareih, kabul ɗuɗayi habura.

Mangaaknai Petrus tutnai Yesus ɓa Nyi Raja Kahatoulka-manemara hajajnai Alla

(Mat. 16:13-19; Mrk. 8:27-29)

18Ɗaage ɗiha laɗo, ɓana habayang mehai Yesus, ana hakodo halole-Na ɗaa ʄalad neꞌ ta hadau. Yesus nakanukayi tabaraɗa, “Ɓaɗoukage hatakɗa ata, Nauwa iyaɗawa?”

19Balehaɗa, “Ɗaad kalinai Yohanis Pembaptis, ɗaa ʄalad kalina lede-liinai Alla kangaranai Elia, waɗeka wal liɗage ɗiha wuy lede-liinai Alla wal ulge kamourha hagga.”

20Yesus nakanukayi, “Tabolo mi, Nauwa iyaɗawa?”

Balehanai Petrus, “Ama, Yau Raja Kahatoulka-manemara hajajnai Alla.”

21Mana hanewei Yesus tabara ana hakodo halole-Na, “Ila ɗaahingkana dau takmigela ɓa Nauwa Raja Kahatoulka-manemara hajajnai Alla.”

Yesus hanewenage tut mayilla-Na mono mate-Na

(Mat. 16:21-28; Mrk. 8:31--9:1)

22Yesus malina ʄalage, “Ana-Na Kaɗaꞌ Ata, buta memaɗahowe mayillana mono wale ɗahibaꞌmai ngora ata Yahudi, raɗa kapala imam#9.22 Imam nyiꞌna ata kaledege Alla mono kaɗaꞌ ata. Kapirrana ha ullaɗahona imam katauna yii maaraka waina ranga hatuun mono hatomage habayangna tut ata waɗeka. mono gurr agama ata Yahudi. Ɗahamate-Yi, tabolo hatauɗa laɗowai, namourha hagga.”

23Mana hanewei Yesus tabara tangngaɗa ata kaɗaana neɗo, “Ata kabaige ɗouk-Ga, natanna ɗahodi tangngadi hamaꞌna. Mono na auɗaho hibawe mayilla lohho mate, oroge ɓana yii wik hakitana ɗoukge hakab ate-Gu. 24Oroge ata kabaige ʄurtawe mourhana, walena toulkaꞌma. Tabolo ata kayiiwe mourhana tutu-Gu, enga hatoulkayi. 25Aga utge wu ata ɓana kolege tangngage pan-tana mono ɗaꞌ ata pote, tabolo ɗajalage ɓana mate ɗummoho mono walna koleꞌmage mourha ai kaman dukana? Walaꞌma utgeǃ 26Ata kamake mangaak-Ga mono lii-hanuwa-Gu, Ana-Na Kaɗaꞌ Ata namake ʄala mangaakun, nim ta rah ɓana mai waige ɓiꞌta-pareha-Na mono ɓiꞌta-parehanai Ama, lohho malaikat kateingna walta sorga! 27Kamtadawe: ta jonga dalarami nehe, ɗaan ata aika mate aina etaɗahoyi Alla ɓana hareha ɗaꞌ Raja.”

Yesus ɓahamanadayi

(Mat. 17:1-8; Mrk. 9:2-8)

28Ɗaa ɗiha migge jongage kolei Yesus ɓana hanuwad tangngadi, namarangadi Petrus, Yohanis monoi Yakobus ta ɗiha wu letena lo habayang. 29Tangranai Yesus ɓana habayang, hekawe mata-Na mono kalabbe-Na kaka ɓillahawe. 30-31Ɗaa hayaɗadi ɗuɗa ata lede-liinai Alla, Musa monoi Elia ɗahatingo wikɗa waina magakaha walta sorga. Ɗahanewe ɗangani Yesus tut mate-Na aika hil moʄana ta Yerusalem ɗoukge hakab atenai Alla. 32Nyiwe neɗana, Petrus mono ɗuɗa olena duraɗage. Ɓaɗa kole hakaɗe, ɗa etayi Yesus ɓana magakahana mono raɗa ɗuɗa ata ɗadede hamera ɗanga-Ni. 33Kole raꞌ kaɗuɗana ata ɓaɗa aroge ijakani Yesus, Petrus malinage tabaranai Yesus, “Ama Guru, dahha takkawe ɓa neheda. Naɓatauge hadedemage tauɗa rabo: wu ɗau-Mu, wuy Musa, mono wu wal ɗaunai Elia!” (Mana hanewe tauɗanai Petrus oroge walna tadaꞌmawe agawe hatakna).

34Tangrana ɓana hanewei Petrus, amge karabba mono nakabakadi, nyiwe maɗa madauta. 35Maɓegge walta karabba rangewe lii kalinana, “Nyiꞌna Ana-Gu hapede-Gu. Rangeganla!”

36Kole ɓana ngahwe nna lii, maɗa etayi Yesus ɓana meha. Katauɗana ana hakodo halolenai Yesus kaɗannaheɗage mono walaꞌma dau takɗage agawe ha etaɗa.

Yesus nahataggahai lakawa hatamana wad japata

(Mat. 17:14-18; Mrk. 9:14-27)

37Ɗammagetana Yesus mono tauɗa ana hakodo halole-Na doɗoɗage walta letena, mono ata buta halota-lotana ɗamai taɓokai Yesus. 38Ɗiha wu kaɓaan walta jongaɗa ata buta nakawula, “Ama Guru, oha am torrokigan anagu, nyi waikina! 39Ɓana regakigan wad japata, hawingnage ɓana kawula mono hawingnage ɓana dingrawe ngihna, kahha ɓana kawurage ɓaana. Naha oungtakka walta wad japata mono naɗa wad japata walena auꞌma huuna wal tabarana! 40Nauwa karaiɓeyi ana hakodo halolem Ama, wuggayi naꞌ wad japata, tabolo wale naɗaɗiꞌmawe.”

41Nabalehai Yesus, “Taa... mi dalara ata aika hatena mono kajalora! Miꞌna nne ata aika hatetakkana hatenawe kawahanai Alla! Kahha pirraɗahowe ɓag enga ɗangagim mono ɓag maloyawa tabaram, ɓegge ubum hatena tabara-Gu? Ngidgan nim anam!”

42Tangraɗa ɓaɗa ngiɗiyi naɗa lakawa ta aronai Yesus, wad japata nabaktan mono nadingrawe ngihna. Taboloi Yesus naharehai wad japata huuna, nyiɗawe mana taggaha naɗa lakawa. Mono napahaggani naɗa lakawa ta amana. 43Tangngaɗa ata ɓangara etawe ɓiꞌta-harehanai Alla kamadakka.

Yesus hanewelnage tut mate-Na

(Mat. 17:22-23; Mrk. 9:30-32)

Ɓatangraɗa ata ɓaɗa engahoɗa ɓangara etawe tangngage harayinai Alla, Yesus nahanewe tabara ana hakodo halole-Na, 44“Hamatara hatidge mono ilam dangngad raɗe hatakki-Gu: ata enga ɗayappa-Wa, Ana-Na Kaɗaꞌ Ata, mono ɗaharakani tabaraɗa ata kaman kawahana.” 45Tanyiɗuwe ana hakodo halolenai Yesus waleɗa yappaꞌmawe nna hatak-Na. Orogei Alla nakaɓunyge ngih hatak-Na tabaraɗa. Lohho madauta ʄalaɗage kanukawe tabara-Na.

Iyai kareih madakka?

(Mat. 18:1-5; Mrk. 9:33-37)

46Ta jonga ana hakodo halolenai Yesus tumwe pahibatana tutge ɓa iyai kahadda madakka ta jongaɗa. 47Yesus natadawe pahangaɗaɗa, nyiwe manangalai wu lakawa mono nahadedei tabara-Na. 48Ɓegge malinage tabaraɗa ana hakodo halole-Na, “Ata kahibai ata kahadda liɓawa katuʄai naɗe lakawa oroge naɗe ata ɓana hatena tabara-Gu, nyi nahiba-Wa. Mono ata kahiba-Wa, nahiba ʄalai kahalewa-Wa. Oroge ta aro matanai Alla, ata kahadda liɓawa ta jongam nyiꞌna kahadda madakka!”

Ata aika gaɓɓagim nyi ka olegimi

(Mrk. 9:38-40)

49Nahanewei Yohanis, “Ama Guru, nam ma etayi ata kawuggayi mortana waige ngaram Mori, mono maherin, oroge ai olemodan.”

50Malinagei Yesus tabarai Yohanis mono ana hakodo halole-Na waɗeka, “Ilam herkani, oroge ata aika gaɓɓagimi, naha ole tabaram.”

Bat harona ta tana Samaria wale auꞌma hibai Yesus

51Rahge Yesus ɓana makeketa ta sorga naɗaheɓewe, Nyi napohtawe kako ta kota Yerusalem. 52Manahalewai kapirrana ata kako ul wal tabara-Na. Ata halewana ɗakako, maɗa tama ta bat harona neꞌ ta tana Samaria lohaganana tangngage tutnai Yesus. 53Tabolo ata ta harona waleɗa auꞌma hibai Yesus, oroge nahiratakawe ɓaɗa tadai Yesus ɓakakonage haɗiyi Alla ta kota Yerusalem.#9.53 Raɗa ata Samaria ɗaɗaikayi Alla ta Lete Gerizim ta tana Samaria, nyiwe kapege mawale ɗa ole ateɗangaꞌmad ata Yahudi kaliɗaɗage tanaɗa, ɓaɗa kako ta Yerusalem tut haɗi-ɗaikayi Alla ta Ummanai Mori. 54Maɓegge ana hakodo halolenai Yesus, Yakobus monoi Yohanis ɓaɗa tadawe nna kaɗaꞌ, maliɗage, “Mori, ɓam baikaꞌge, ɓama karaiwe lat burr walta langta kapuɗahayi raɗe ata?”

55Yesus nagilaka, mono napaɗekayi oro ɓaɗa hanewe tauɗaɗa. 56Tabalge neɗa maɗa kako ta harona heka.

Ata kabaige ɗaꞌ ana hakodo halolenai Yesus

(Mat. 8:19-22)

57Tangranai Yesus mono ana hakodo halole-Na hakitana kako, ɗaad ata kahanewe tabaranai Yesus, “Ama, nauwa enga ɗoukgugu langka giꞌka!”

58Nabalehai Yesus, “Ɓagga utta kabaan ɗaage hadauna, mono kawurna ɗaage haꞌna, tabolo Ana-Na Kaɗaꞌ Ata walelaꞌma hadau baikana.” 59Lohho nahanewei Yesus tabara wu ata waɗeka, “Ɗoukga Nauwa.”

Tabolo naɗe ata hanewenage, “Ama, pahaitoga kag haggatona taanin amagu.”

60Balehanai Yesus, “Ata aika hatena-Wa, yiɗɗa ɗatuʄai ata mate. Nyammaꞌmodi yiɗɗa ata aika hatena-Wa kaɗa taanid ata mate. Tabolo yau, kakowu kam talarage lii aganaɗawei Alla ɓana hareha ɗaꞌ Raja.”

61Ɗaa ʄalan wu ata waɗeka kahanewe, “Ama, nauwa enga ɗoukgugu Ama, tabolo pahaitoga hagga kag lo hanautoyi oleɓaigu.”

62Yesus nahanewe tabarana, “Ata kahalegeɓewe kareekata, tabolo kagilaɗalge lirana, ha ullana naɗa ata walna tenaꞌmawe. Tauɗa ʄalage ata kabaige ullage ha ullanai Alla tabolo wale nahakako dahhaꞌmawe, walena marakkaꞌma ullage tutnai Alla.”

Currently Selected:

Lukas 9: lmy

Highlight

Copy